?Wanem Mining Blong Stap Tru Long God?
?Wanem Mining Blong Stap Tru Long God?
LONG ol yia wan handred B.K.T. * wan grup blong ol man Jiu we i tekem nem ya Hasid i talem se olgeta nao i rili gat fasin blong stap tru long God. Nem blong olgeta [cha·sidhʹ] i stamba Hibru tok we ol man oli yusum blong tokbaot “stap tru.” Nem ya i kamaot long tok ya cheʹsed, we plante taem oli tanem i kam “fasin blong mekem i gud,” “trufala lav,” “fasin kaen,” “gud fasin,” “fasin sore.” Wan buk (Theological Dictionary of the Old Testament) i talem se cheʹsed i “pulum man blong mekem wok, blong laekem frengud wetem narafala, [mo hem wan fasin we] i no save lus kwiktaem. Hem i no wan fasin blong tingting nomo, be hem i minim tu, aksin we i kamaot from tingting ya. Aksin ya i lukaotgud long laef blong i no kam nogud. Hem i pulum man blong givhan long narafala we i kasem trabol no i harem nogud. Hem i aksin we man i tekem blong soemaot fasin frengud.”
I klia nomo se, long plante lanwis i no gat wan tok we i save talemaot fulwan mining we i laenap wetem Hibru tok ya, olsem we i stap long Baebol. Oltaem, taem Baebol i tokbaot fasin blong stap tru, hem i minim se yumi mekem moa i bitim we yumi jes holemstrong long ol promes we yumi mekem. Fasin ya i joen wetem fasin blong fasgud long narafala from yumi lavem hem, mo fasin blong tekem aksin blong mekem i gud long narafala. Blong kasem save trufala mining blong fasin blong stap tru, tingbaot olsem wanem Jeova i soemaot fasin ya long Ebraham, Moses, Deved, nesen blong Isrel, mo long olgeta man long wol.
Jeova i Soemaot Fasin Blong Stap Tru
Jeova i bin talem long fren blong hem Ebraham se: “Mi stap blokemgud yu, blong i nogat wan samting i save kam spolem yu.” (Jenesis 15:1; Aesea 41:8) Jeova i no jes talem toktok olsem nomo, be i tekem aksin tu folem wanem we hem i talem. Hem i protektem Ebraham wetem famle blong hem mo i mekem oli kam fri long han blong Fero mo long han blong Abimelek tu. Hem i halpem Ebraham blong i sevem Lot long han blong ol ami blong fo king. Jeova i mekem bodi blong Ebraham, we i gat 100 yia, mo Sera, we i gat 90 yia, i gat paoa bakegen blong wokem pikinini, nao promes Laen i save kamaot tru long tufala. Oltaem Jeova i toktok long Ebraham tru long ol vison, ol drim, mo ol enjel we hem i sanem. Tru ya, Jeova i stap tru long Ebraham, taem we hem i laef mo tu, longtaem afta we Ebraham i ded. Blong plante handred yia, Jeova i holemtaet ol promes blong hem long ol pikinini blong Ebraham, hemia nesen blong Isrel, nating we oli stronghed. Fasin fren blong Jeova wetem Ebraham i soemaot trufala fasin blong stap tru—hem i filing blong lav we i jenis i kam aksin.—Jenesis, japta 12 kasem 25.
Baebol i talem se “Jeova i toktok wetem Moses stret long fes blong hem, olsem wan man i toktok wetem narafala man.” (Eksodas 33:11, NW) Yes, Moses i fren wetem Jeova mo i klosap moa long hem i bitim eni narafala profet bifo long Jisas. ?Olsem wanem Jeova i soemaot se hem i stap tru long Moses?
Taem Moses i gat 40 yia, hem i wan man we i strong mo i nafgud. Taswe, hem i tekem disisen hem wan Ol Wok 7:23-30) Nating se i olsem, Jeova i no lego hem. Long stret taem blong hem, God i tekembak Moses blong lidim ol man Isrel oli goaot long Ijip.
blong mekem ol manples blong hem oli fri. Be i no taem yet blong mekem olsem. Ale, hem i mas ronwe blong sevem laef blong hem. Hem i go stap 40 yia long Midian mo i lukaot long ol sipsip. (Long sem fasin, Jeova i stap tru long Deved, namba tu king blong Isrel we plante man i save long hem. Taem Deved i yangfala yet, Jeova i talem long profet Samuel se: “!Hemia nao! !Yu girap, yu makemaot hem se bambae i kam king!” Stat long taem ya, Jeova i stap tru long Deved, i protektem mo lidim Deved gogo kasem taem we hem i kam bigman blong i king long ful Isrel. Jeova i sevem hem “blong ol laeon mo bea oli no spolem” hem, mo i sevem hem long han blong bigfala man Filistia ya Golaeat. Plante taem Jeova i mekem Deved i winim ol faet agens long ol enemi blong Isrel, mo i sevem hem taem Sol, we i jalus mo we i no laekem Deved nating, i traem sperem hem wetem spia.—1 Samuel 16:12; 17:37; 18:11; 19:10.
I tru se Deved i no wan man we i stretgud olgeta. Yes, hem i bin mekem wan bigfala sin. Be taem hem i rili tanem tingting blong hem from sin blong hem, Jeova i no lego hem, be i stap tru long hem wetem lav. Bakegen mo bakegen, Jeova i tekem aksin blong lukaotgud long laef blong Deved blong i no kam nogud. Hem i tekem aksin blong givhan long hemia we i trabol long tingting. !Hemia nao lav mo kaen fasin!—2 Samuel 11:1–12:25; 24:1-17.
Taem nesen blong Isrel i agri long kontrak blong Loa blong Moses long Hil Blong Sinae, nesen ya i statem wan spesel fasin fren wetem Jeova. (Eksodas 19:3-8) From samting ya, Baebol i tokbaot Isrel olsem we i mared wetem Jeova. Hem i talem long Isrel se: ‘Yufala i olsem wan yang woman we man blong hem [Jeova]. . . i stap singaot hem blong i kambak.’ Mo Jeova i talem long woman ya se: ‘Bambae mi lavem yu olwe, gogo i no save finis.’ (Aesea 54:6, 8) ?Olsem wanem Jeova i soemaot se hem i holemstrong long fasin fren ya?
Jeova i rere blong kea long ol nid blong ol man Isrel mo blong mekem fasin fren we oli gat wetem hem i kam moa strong. Hem i tekemaot olgeta long Ijip, i givim ol loa long olgeta blong oli kam wan nesen, mo i karem olgeta i go long “wan gudfala kantri, we i bigfala tumas, we graon blong hem i . . . karem fulap kakae.” (Eksodas 3:8) Oltaem hem i givim tijing long saed blong spirit long olgeta tru long ol pris, ol Livaet, mo wan longfala laen blong ol profet mo man blong karem mesej. (2 Kronikel 17:7-9; Nehemaea 8:7-9; Jeremaea 7:25) Taem nesen ya i go mekem wosip long ol narafala god, Jeova i stretem olgeta. Taem oli tanem tingting blong olgeta, hem i fogivim olgeta. Blong talem stret, nesen blong Isrel i wan waef we i givim tumas hadtaem long man blong hem. Be Jeova i no hareap blong lego hem. From we Jeova i mekem promes long Ebraham, Hem i stap tru long ol man Isrel gogo stamba tingting blong hem i kamtru fulwan. (Dutronome 7:7-9) !Hemia i wan nambawan eksampol blong olgeta we oli mared!
Jeova i soemaot tu se hem i stap tru long olgeta man long wol taem hem i givim ol stamba samting we olgeta man oli nidim blong laef, nating se oli ol gudfala man no ol man nogud. (Matiu 5:45; Ol Wok 17:25) Antap moa, hem i givim Pikinini blong hem olsem wan ransom sakrefaes blong olgeta man long wol oli save gat janis blong kam fri long sin mo ded. Mo tu, oli save haremgud long promes ya blong kasem wan laef we i stretgud olgeta, gogo i no save finis, long Paradaes. (Matiu 20:28; Jon 3:16) Presen blong ransom ya we God i givim, i wan nambawan aksin blong lukaotgud long laef blong i no kam nogud. Tru nomo, hemia wan aksin “blong givhan long narafala we i kasem trabol no i harem nogud.”
Pruvum Wetem Aksin Se Yu Stap Tru
From we fasin blong stap tru i laenap wetem lav mo kaen fasin, hem i karem strong mining tu se yumi mekem long narafala olsem we oli mekem long yumi. Sipos wan i soem lav mo kaen fasin long yu, i stret blong yu mekem sem samting ya tu long hem. Fasin blong stap tru i mekem se yumi kasem sem fasin ya long narafala. I klia se, Deved i savegud mining blong tok ya cheʹsed, from we hem i talem se: “Oltaem mi stap lukluk i go long haos blong yu we i tabu, mi stap bodaon mi stap presem nem blong yu.” ?From wanem? From we “oltaem yu yu lavem man tumas, mo yu stap holem ol promes blong yu.” (Ol Sam 138:2) From we Deved i stap kasem lav mo kaen fasin blong Jeova, i klia se hemia i pusum hem blong wosipim mo presem Jeova. Taem yumi luk lav mo kaen fasin we Jeova i soemaot long yumi, hemia i pusum yumi blong wantem mekem olsem long hem. Eksampol, sipos man i sakem doti long nem blong Jeova, wari we yu gat long gudnem blong hem, bambae i pusum yu blong toktok blong karemaot doti ya long nem blong hem.
Hemia wanem we i hapen long wan Kristin wetem waef blong hem we tufala i niuwan nomo long trutok. Tufala i go blong berem wan famle we i ded long wan aksiden blong moto. I no gat jos sevis taem oli berem dedman ya, be olgeta we oli stap oli gat raet blong givim smol toktok. Wan man i toktok nao i stap talem se i fol blong God we yangfala man ya i ded. Hem i se ‘God i wantem hem long heven, taswe i tekem hem i go.’ Kristin brata ya blong yumi i harem se hem i no save stap kwaet. Nating se hem i no gat Baebol mo ol not, hem i wokbaot i go antap long platfom. Hem i askem se: “?Yufala i ting se wan God we i hae olgeta mo we i gat fasin sore, i save agri long trabol olsem?” Nao hem i mekem wan smol toktok blong 10 menet mo i talem ol vas blong Baebol we oli eksplenem from wanem yumi ded, wanem samting we God i mekem blong sevem ol man long ded, mo nambawan hop blong laef bakegen long ded blong kasem laef we i no save finis long wan paradaes long wol. Wantaem nomo, olgeta man long ples ya, we oli bitim 100 man, oli klapem han blong olgeta blong longtaem. Biaen brata ya i talem se: “Mi bin harem wan glad insaed long mi we mi neva harem bifo. Mi tangkiu long Jeova from we hem i tijim mi long waes blong hem mo i givim janis long mi blong mi toktok blong karemaot doti we man i sakem long tabu nem blong hem.”
Fasin blong stap tru long Jeova i minim tu se yumi stap tru long tok blong hem, Baebol. ?From wanem? From we Jeova i yusum Baebol blong tijim yumi olsem wanem blong laef. Ol beswan loa mo rul we oli save givhan long laef blong yumi oli stap insaed long Baebol. (Aesea 48:17) Yu no mas letem ol narafala man no ol slak fasin blong yu oli pusum yu blong lego ol loa blong Jeova. Yu mas stap tru long Tok blong God.
Stap tru long God i minim tu se yumi stap tru long ogenaesesen blong hem. Long ol yia we i pas, i nidim blong yumi jenisim sam save we yumi gat long sam vas blong Baebol. Samting we i tru se i no gat narafala man we i stap kakae gud long saed blong spirit olsem yumi. (Matiu 24:45-47) Yes, Jeova i stap tru long ogenaesesen blong hem tede. ?Yumi save mekem sem mak? A. H. Macmillan i mekem olsem. Smol taem bifo we hem i ded, hem i talem se: “Taem mi gat 23 yia mo mi givim laef blong mi i go long God long Septemba 1900, mi luk ogenaesesen blong Jeova we long stat i smol nomo, i gru i kam wan bigfala kampani blong ol hapi man raon long wol we oli gat strong tingting blong talemaot ol trutok blong God. . . . Naoia taem blong mi blong mekem wok blong God long wol ya klosap i finis, be mi sua moa bitim bifo, se Jeova i lidim ol man blong hem mo se long stret taem blong hem, bambae hem i givim wanem we ol man ya oli nidim.” Brata Macmillan i holemstrong long bilif mo i stap tru long God blong klosap 66 yia, kasem taem we hem i ded long Ogis 26, 1966. Hem i wan gudfala eksampol blong fasin blong stap tru long ogenaesesen blong God long wol.
?Antap long fasin ya blong stap tru long ogenaesesen, bambae yumi stap tru long ol narafala? ?Sipos ol man oli girap agensem yumi bambae yumi stap tru long ol Kristin brata sista blong yumi? Long taem blong Seken Wol Wo, ol brata blong yumi long Netalan oli soem
wan gudfala eksampol long saed blong fasin blong stap tru. Gestapo blong ol Nasi i bin askem kwestin long wan elda blong wan kongregesen long Groningen, nem blong hem Klaas de Vries, mo oli yusum raf fasin we oli nogat sore nating long hem. Oli satem hem long kalabus hem wan nomo blong 12 dei mo kakae blong hem i bred mo wota nomo, afta oli askem kwestin long hem bakegen. Oli poenem wan masket long hem mo talem long hem se hem i gat tu menet nomo i stap blong talemaot weples nao ol brata we oli gat responsabiliti oli stap long hem, mo sam moa save we i impoten. Sipos hem i no mekem olsem, bambae hem i ded. Klaas i talem nomo se: “Bambae mi no talem wan samting long yufala. . . . Mi no save letem ol fren blong mi oli go long han blong yufala.” Oli poenem masket mo tok strong long hem olsemia, tri taem. Biaen ol Gestapo oli taed nao oli stop, mo oli sanem Klaas i go long wan narafala kalabus bakegen. Neva hem i talem wan samting we i save spolem ol brata blong hem.?Olsem wanem long hasban no waef blong yumi? ?Bambae yumi soemaot se yumi stap tru long hem? Jeova i ona long kontrak blong hem we i mekem se hem i fren wetem nesen blong Isrel. ?Yumi mekem olsem hem mo stap tru long promes we yumi mekem long mared blong yumi? Be i no naf jes blong holemstrong long promes blong yumi. Yumi save go moa, mo traem gat wan fasin fren we i klosap moa wetem hasban no waef blong yumi. Yu mas rere oltaem blong protektem mared blong yu long ol samting we oli save spolem hem. Spenem taem tugeta, glad blong storian long evri samting tugeta, sapotem mo leftemap tingting blong yutufala, lesin long yutufala, laf tugeta, krae tugeta, pleplei tugeta, wok tugeta blong kasem ol mak blong yutufala, mekem yutufala i glad, frengud tugeta. Yu mas lukaot gud blong no letem filing ya blong laekem wan narafala man no woman i kamaot. Nating se i stret nomo blong savegud mo frengud wetem narafala afsaed long mared blong yumi, be yumi mas soem ol filing blong lav long hasban no waef blong yumi nomo. Yu no mas letem wan narafala i seraotem yu long hasban no waef blong yu.—Ol Proveb 5:15-20.
Gohed blong stap tru long ol famle mo fren blong yumi we oli bilif. Taem ol yia oli pas, no fogetem olgeta. Gohed blong raetem leta long olgeta, ring long olgeta, no visitim olgeta. Nomata laef blong yu i go olsem wanem, yu no mas mekem olgeta i harem nogud from yu. Yu mas mekem we oli glad blong talem se oli save yu no oli famle blong yu. Taem yu stap tru long olgeta, fasin ya i mekem we yu yu strong blong folem ol samting we i stret mo hemia bambae i leftemap tingting blong yu.—Esta 4:6-16.
Yes, fasin blong stap tru i pulum man blong tekem aksin blong holemtaet fasin fren wetem narafala. Traem bes blong yu blong pembak lav mo kaen fasin we Jeova i soemaot long yumi. Folem fasin blong Jeova blong stap tru, taem yu wok wetem Kristin kongregesen, hasban no waef blong yu, famle, mo ol fren blong yu. Stap tru long wok blong talemaot ol nambawan fasin blong Jeova long ol man raonabaot long yu. Man blong raetem Ol Sam i stret nomo taem i talem se: “Hae God. Oltaem bambae mi stap singsing from fasin ya blong yu we oltaem yu yu lavem man tumas. Fasin ya blong yu we oltaem yu stap holem ol promes blong yu, bambae mi stap talemaot oltaem nomo, gogo i no save finis.” (Ol Sam 89:1) ?Yu yu wantem kam klosap moa long wan God olsem? Yes, “fasin blong hem, we hem i stap lavem man tumas, bambae i stap oltaem nomo.”—Ol Sam 100:5.
[Futnot]
^ B.K.T. i minim Bifo Kristin Taem.
[Tok blong pija long pej 23]
A. H. Macmillan