Yu Save Gat Bilif Ya We i Tru

Taem Sarah Jayne i gat 19 yia, ol dokta oli faenem se hem i gat kansa long ovari * blong hem. Afta we oli katem hem, hem i haremgud bakegen, mo hem i harem se ol samting bambae oli gud nomo nao. Taswe, taem hem i gat 20 yia hem i fren long wan boe mo tufala i stat mekem ol plan blong mared blong tufala. Be, long semfala yia ya, kansa i kambak, mo ol dokta oli talem long hem se hem i gat sam wik nomo blong laef i stap. Sarah Jayne i ded long Jun 2000, jes bifo we hem i kasem 21 yia blong hem.

OL MAN we oli kam visitim Sarah Jayne long hospital oli sapraes blong luk we tingting blong hem i kwaet mo hem i no fraet long samting we bambae i hapen. Oli luk tu we hem i gat strong bilif long God mo Tok blong hem, Baebol. Nomata long nogud samting we bambae i kasem hem, hem i sua long promes ya se bambae ol dedman oli laef bakegen. Hem i save se bambae hem i luk olgeta fren blong hem bakegen samtaem. (Jon 5:28, 29) Hem i se: “Bambae mi luk yufala evriwan bakegen, long niufala wol blong God.”

Sam man oli talem se bilif olsem we Sarah Jayne i gat, i stanap long giaman tingting nomo. Ludovic Kennedy i talem se: “Ol man we oli fraet mo oli wari long saed blong laef, oli wantem bilif se i gat laef afta ded. Oli ting se taem laswan pupu i krae, bambae i gat plante kek mo waen, wetem ol gudgudfala kakae blong harem gud, mo noes blong ol pupu we oli singaot. Bambae ol man oli stap long wan naesfala garen olsem Iden mo bambae oli harem gud blong kampani wetem ol man we oli bin ded bifo mo olgeta ya tu we maet oli ded biaen. Be bilif ya i stanap long nating nomo.” Be i gud blong askem wan kwestin long saed ya. ?Wanem i stret moa? ?I  stret blong bilif se “laef we yumi gat naoia, hemia nomo we yumi gat, taswe yumi mas yusum fulwan,” olsem we Ludovic Kennedy i soem? ?No i stret blong bilif long God mo promes we hem i givim long saed blong laef bakegen long ded? Sarah Jayne i jus blong bilif long God. ?Olsem wanem hem i wokem bilif olsem?

‘Lukaot God . . . Mo Faenem Hem’

Blong bilif mo trastem wan man, yu mas savegud hem mo yu mas lanem olsem wanem hem i tingting mo mekem ol wok blong hem. Hat mo tingting, tufala i joen long bisnes ya. Taem yumi wantem gat trufala bilif long God yumi mas mekem sem samting. Yumi mas savegud hem, yumi mas lanem wanem ol fasin blong hem, yumi mas faenemaot olsem wanem ol man oli save trastem mo dipen long ol toktok mo wok blong hem.—Ol Sam 9:10; 145:1-21.

Samfala oli ting se man i no naf nating blong mekem olsem. Oli talem se God i stap longwe tumas, yumi no save luk hem, mo maet hem i no rili stap tu. Ol man we oli no bilif long God, oli askem se: “?Sipos God i rili stap, folem tingting blong ol Kristin olsem Sarah Jayne, from wanem God ya i no soemaot hem long yumi tu, ol narafala man?” ?I tru se God i stap longwe tumas mo yumi no save faenem hem? Taem aposol Pol i stap long Atens hem i toktok long ol waesman mo man blong bigsave. Hem i talem long olgeta se ‘God ya we i mekem wol ya, mo olgeta samting we oli stap long hem,’ hem i givim evri samting we ol man oli nidim, blong bambae oli save ‘lukaot hem, mo faenem hem.’ Tru ya, Pol i talem se: “God ya i no stap longwe long yumi nating.”—Ol Wok 17:24-27.

?Be, olsem wanem yumi save ‘lukaot God, mo faenem hem’? Sam man oli tekem taem blong lukluk olgeta samting long skae raonabaot long yumi. Plante long olgeta we oli mekem olsem, oli faenem se hemia i naf blong pruvum se i gat wan Man we i Wokem olgeta samting. * (Ol Sam 19:1; Aesea 40:26; Ol Wok 14:16, 17) Oli gat tingting olsem aposol Pol, we i se “yumi no save luk ol fasin ya blong [God] stret long ae blong yumi. Hem i God. Hem i stap oltaem, mo paoa blong hem i no save finis. Be i stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.”—Rom 1:20; Ol Sam 104:24.

Yu Nidim Baebol

Be blong gat trufala bilif long Man we i Wokem olgeta samting, yumi nidim wan samting moa we God i givim. ?Wanem samting ya? Hemia Baebol—Tok blong God we hem i yusum blong talemaot stamba tingting blong hem long ol man. (2 Timoti 3:16, 17) Be maet sam man oli talem se: “Ol man we oli talem se oli folem Baebol oli stap mekem plante fasin nogud. ?Weswe nao yu save bilivim wanem we Baebol i talem?” I tru, histri i soemaot se Krisendom * i gat tu fes, hem i mekem plante raf fasin, mo i fulap long ol nogud fasin. Be eni man we i gat stret tingting i luksave se Krisendom i giaman nomo blong folem ol rul blong Baebol.—Matiu 15:8.

Baebol i givim woning se plante man bambae oli talem se oli wosip long God, be rili, oli stap “tanem baksaed long Masta ya blong olgeta we i pemaot olgeta i mekem olgeta oli fri.” Aposol Pita i talem se: “From fasin ya blong olgeta, bambae plante man oli tok nogud long Rod blong Trutok.” (2 Pita 2:1, 2) Jisas Kraes i talem se olgeta ya oli “man blong mekem ol rabis fasin” mo ol nogud fasin ya blong olgeta bambae oli save soemaot klia se oli wanem kaen man. (Matiu 7:15-23) Sipos wan man i sakemaot Tok blong God from we hem i luk se ol wok blong Krisendom oli nogud, i olsem we man ya i sakemaot wan leta blong wan gudfala fren we hem i trastem, jes from we man we i karem leta i kam long hem i gat rabis fasin.

Yumi no save bildimap trufala bilif sipos yumi no gat Tok blong God. Jeova i putum tingting blong hem i stap long ol pej blong Baebol nomo, mo man we i wantem save ol tingting ya blong hem, i mas ridim Baebol. God i givim ansa long ol kwestin ya we ol man oli stap askem bakegen mo bakegen se, from wanem hem i letem man i safa mo i harem nogud, mo bambae hem i mekem wanem long saed ya. (Ol Sam 119:105; Rom 15:4) Sarah Jayne i lanem bilif se Baebol hem i Tok we i kamaot long God. (1 Tesalonaeka 2:13; 2 Pita 1:19-21) ?Olsem wanem hem i lanem samting ya? I no from we papa mama blong hem i talem se hem i mas bilif. No gat. Sarah Jayne hem wan i tektaem blong tingting gud long ol samting we oli pruvum se Baebol i kamaot long God. (Rom 12:2) Wan long ol pruf ya hem i faenem taem hem i luk paoa we Baebol i gat long laef blong olgeta we oli folem ol rul blong hem. Mo tu, hem i yusum ol buk olsem The Bible—God’s Word or Man’s?, * blong halpem hem blong lukluk gud long olgeta pruf insaed long Baebol we oli soemaot se hem i kamaot long God.

 ‘Man i Bilif Taem i Harem Gud Nius’

I no naf blong gat wan Baebol mo bilif nomo se hem i kamaot long God. Aposol Pol i raetem se: “Ol man oli stap bilif long God, taem oli harem gud nius.” (Rom 10:17) Tru ya, yumi bildimap bilif taem yumi harem ol tok blong God, i no jes from we yumi holem wan Baebol. Taem yu ridim mo stadi long Tok blong God i olsem we yu “harem” wanem we God i talem. Ol yangfala tu oli save mekem samting ya. Pol i talem se taem Timoti i “pikinini yet,” mama blong hem mo bubu woman blong hem, tufala i tijim hem long “ol tabu hanraet blong Baebol.” ?Hemia i minim se tufala i fosem hem blong bilif long Baebol? No gat. Tufala i no bos long tingting blong hem mo talem ol giaman tok long hem blong mekem hem i bilif. Ol samting we Timoti i harem mo i ridim, oli ‘pulum hem blong bilif.’—2 Timoti 1:5; 3:14, 15, NW.

Hemia i sem mak long Sarah Jayne. Hem i mekem olsem ol man Berea long faswan handred yia, i “wantem tumas blong harem tok ya [we papa mama blong hem mo olgeta we oli tijim hem oli givim].” Taem hem i pikinini yet, i klia se hem i putum ful tras blong hem long wanem we papa mama blong hem, tufala i talem long hem. Biaen, taem hem i gruap, hem i no folem nomo ol tijing ya we hem i kasem, olsem wan blaenman. No gat. Hem i gohed blong “ridimgud ol tok blong Baebol, blong luksave sipos ol samting ya oli tru, no olsem wanem.”—Ol Wok 17:11, NW.

Yu Save Bildimap Wan Bilif We i Tru

Yu tu yu save bildimap wan bilif we i tru. Semfala bilif ya aposol Pol i tokbaot long leta we hem i raetem long ol Hibru Kristin. Hem i se ‘fasin ya we yumi bilif strong long God, hem i soemaot long yumi we olgeta samting ya we yumi stap putum tingting blong yumi i strong long hem, olgeta oli tru. Mo hem i soemaot long yumi we olgeta samting ya we yumi no save luk, be oli stap.’ (Hibrus 11:1) Taem yu gat bilif olsem, bambae yu sua fulwan se olgeta samting we yu wantem kasem mo we yu wantem luk, olsem promes blong God blong mekem ol dedman oli laef bakegen, bambae oli kamtru. Bambae yu sua se ol samting ya we yu putum tingting blong yu i strong long hem, oli stanap long samting we i suagud, i no stanap long ol drim. Bambae yu save se Jeova i neva mestem blong mekem ol promes blong hem oli kamtru. (Josua 21:45; 23:14; Aesea 55:10, 11; Hibrus 6:18) Niufala wol ya we God i promes blong mekem, bambae i wan trufala samting long tingting blong yu, i olsem we hem i stap finis. (2 Pita 3:13) Mo bambae yu save luk klia, wetem ae blong bilif, se Jeova God, Jisas Kraes, mo Kingdom blong God oli ol trufala samting, bilif ya i no stanap long ol giaman tok.

Taem yu stap wokhad blong bildimap trufala bilif, yu no stap yu wan. Jeova i givim Tok blong hem long enikaen man, be tu, hem i givim Kristin kongregesen we i stap long olgeta ples long wol. Kristin kongregesen  ya i stap halpem ol man we hat blong olgeta i stret blong oli bildimap bilif long God. (Jon 17:20; Rom 10:14, 15) Yu mas yusum gud olgeta samting we Jeova i givim tru long ogenaesesen blong hem blong halpem yumi. (Ol Wok 8 :30, 31) Mo from we bilif hem i wan frut blong tabu spirit blong God, yu mas prea oltaem blong askem spirit blong hem blong halpem yu blong wokem trufala bilif.—Galesia 5:22.

Yu no mas letem tingting blong yu i foldaon sipos ol man we oli no bilif oli jikim yu from bilif we yu gat long God mo Tok blong hem. (1 Korin 1:18-21; 2 Pita 3:3, 4) Yes, trufala bilif i impoten tumas from we hem i save mekem yu yu strong blong stanap agensem ol man ya we oli traem spolem yu. (Efesas 6:16) Sarah Jayne i faenem se samting ya i tru. Oltaem hem i talem long olgeta we oli kam luk hem long hospital se oli mas bildimap bilif blong olgeta. Hem i stap talem long olgeta se: “Yufala i mas bilif long trutok wetem fulhat blong yufala. Stadi long Tok blong God. Stap klosap long ogenaesesen blong God. Prea oltaem. Stap bisi long wok blong Jeova.”—Jemes 2:17, 26.

Wan nes we i stap lukaot long Sarah Jayne, i sapraes long bilif we hem i gat long God mo laef bakegen long ded. Nes ya i talem se: “Man, bilif blong yu i rili strong long samting ya.” Taem hem i askem hem se wanem nao i mekem hem i holem gudfala tingting long saed blong fiuja nating se i fesem hadtaem, hem i ansa se: “Mi bilif long Jeova. Hem i wan trufala fren long mi, mo mi laekem hem tumas.”

[Ol futnot]

[Tok blong pija long pej 6]

Taem Timoti i “pikinini yet,” mama blong hem mo bubu woman blong hem, tufala i tijim hem long “ol tabu hanraet blong Baebol”

[Tok blong pija long pej 6]

Ol man Berea oli stap ridimgud Baebol evri dei

[Credit Line]

From “Photo-Drama of Creation,” 1914

[Tok blong pija long pej 7]

Yumi bildimap bilif taem yumi harem mo folem ol tok blong Baebol, i no naf jes blong gat wan Baebol

[Tok blong pija long pej 7]

“Bambae mi luk yufala evriwan bakegen long niufala wol blong God”