Lukaotgud Long Hat Blong Yu
Lukaotgud Long Hat Blong Yu
“Samting we yu mas lukaot moa long hem i bitim ol narafala samting, se hat blong yu. Blokem ol samting we oli save kam spolem hat blong yu, from we hat hem i stamba blong laef.”—OL PROVEB 4:23, NW.
1, 2. ?From wanem yumi mas lukaot gud long hat blong yumi?
WAN olfala man i stap long wan aelan blong Karabian we hariken i kilim. Afta we hariken i finis, olfala ya i kamaot long ples we hem i bin haed long hem, i lukluk raon, nao hem i luk se wan bigfala tri we i bin stanap plante yia finis long fored blong get blong hem, i foldaon. Olfala ya i tingting se: ‘?Weswe bigfala tri ya i foldaon be ol narafala smosmol tri raonabaot oli stanap yet?’ Hem i kasem ansa blong kwestin ya taem hem i lukluk stamba blong tri ya we i slip long graon. Tri ya i rotin insaed. Nating we i luk olsem se i strong gud i stap, hariken i soemaot klia ol samting we i haed.
2 I nogud tumas taem sam trufala man blong God we i luk olsem se oli stanap strong long Kristin fasin, oli foldaon from wan traem we i kasem olgeta. Baebol i talem stret nomo se “taem man i yangfala yet, be hat blong hem i wantem mekem ol nogud samting finis.” (Jenesis 8:21, NW) Hemia i min se yumi mas lukaotgud oltaem. Sipos yumi no mekem olsem, hat blong yumi i save kam nogud, nating sipos hem i stretgud fastaem. Ol traem oli save pulum yumi blong mekem nogud fasin. Yumi evriwan i sinman mo hat blong yumi i save kam nogud, taswe yumi mas tinghevi long advaes ya: “Yu mas lukaot moa long [hat blong yu] i bitim ol narafala samting.” (Ol Proveb 4:23, NW) ?Olsem wanem blong lukaot gud long hat blong yumi?
I Impoten Blong Jekemap Hat Oltaem
3, 4. (a) ?Wanem sam samting we maet dokta i wantem save taem hem i jekem hat blong man? (b) ?Wanem i save halpem yumi blong jekem hat blong yumi we i minim ol tingting mo fasin blong yumi we oli haed?
3 Taem yu go luk dokta blong hem i jekem helt blong yu, bambae hem i mas jekem hat blong yu. ?Olsem wanem? ?Helt blong yu, wetem hat blong yu tu, i soem se yu stap kakae ol gudfala samting we bodi blong yu i nidim? ?Olsem wanem long blad presa blong yu? ?Hat blong yu i stap pam strong mo folem sem bit oltaem? ?Yu stap mekem inaf eksasaes? ?I gat sam samting long laef we oli stap mekem yu yu wari nao maet hat blong yu i hevi from?
4 ?Sipos hat blong yumi we i stap pam insaed long bodi i nidim jekap oltaem, olsem wanem long hat we i pija blong ol filing mo fasin blong yumi we oli haed? Jeova nao i stap jekemap hat ya. (1 Kronikel 29:17) I gud we yumi tu, yumi jekemap hat blong yumi. ?Olsem wanem blong mekem samting ya? Yu save askem ol kwestin olsem: ?Mi mi stap stadi mo go long ol miting oltaem blong meksua se hat blong mi i kasem naf kakae blong spirit? (Ol Sam 1:1, 2; Hibrus 10:24, 25) ?Tok blong Jeova i “stap bon olsem faea” insaed long hat blong mi, mo i stap pusum mi blong joen long wok blong talemaot Kingdom mo mekem disaepol? (Jeremaea 20:9; Matiu 28:19, 20; Rom 1:15, 16) ?Mi mi glad blong traem mekem moa, olsem, joen long wok blong prij fultaem sipos mi gat janis? (Luk 13:24) ?Wanem samting raonabaot long mi we mi stap letem oli gat paoa long hat blong mi? ?Mi stap lukaot ol fren we hat blong olgeta tu i fulwan long trufala wosip? (Ol Proveb 13:20; 1 Korin 15:33) I gud yumi luksave kwiktaem sipos yumi slak long eniwan long ol samting ya mo yumi hareap blong stretem.
5. ?Ol samting we oli traem bilif blong yumi oli save givhan long yumi olsem wanem?
5 Plante taem yumi kasem trabol we i traem bilif blong yumi. Ol traem ya oli givim janis long yumi blong luk sipos hat blong yumi i gud no nogat. Moses i toktok long ol man Isrel taem oli kam klosap long Promes Lan, i se: “Hae God . . . i stap lidim yumi foti yia long longfala rod ya we yumi kamtru long draeples. Hem i mekem yumi kasem hadtaem blong traem yumi, mo blong faenemaot tingting blong yumi [“wanem i stap long hat,” NW], se yumi save obei long ol tok blong hem no nogat.” (Dutronome 8:2) ?Samtaem yu sek long sam narakaen filing, fasin, no tingting we oli kam antap taem yu fesem sam traem no hadtaem long laef? Ol traem we Jeova i letem oli kasem yumi, oli save mekem we yumi luksave ol slak fasin blong yumi, mo oli givim janis long yumi blong kamgud moa. (Jemes 1:2-4) !Yumi neva mas mestem blong tingting mo prea long saed blong ol filing we oli kasem yumi taem yumi fesem ol traem ya!
?Ol Tok Blong Yumi i Soemaot Wanem?
6. ?Ol samting we yumi tokbaot oli save soemaot wanem long saed blong hat blong yumi?
6 ?Olsem wanem blong luksave wanem samting we i sas moa long hat blong yumi? Jisas i talem se: “Gudfala man we i fulap long ol gudfala tingting, hem i save mekem ol gudfala fasin. Mo rabis man we i fulap long rabis tingting, hem i save mekem ol rabis fasin, from we taem man i tok, hem i stap talemaot ol samting we tingting blong hem i fulap long hem.” (Luk 6:45) Plante taem, ol samting we yumi tokbaot, oli save soemaot wanem i stap long hat blong yumi. ?Olsem wanem? ?Yumi laekem blong tokbaot ol sas samting we yumi save pem mo ol samting we yumi mekem long wok? ?Ol storian blong yumi oli stanap long ol samting blong spirit mo ol mak we yumi wantem kasem long ol tiokratik wok? ?Yumi talemaot evri mastik we narafala i mekem no yumi gat lav we yumi rere blong kavremap mastik blong olgeta? (Ol Proveb 10:11, 12) ?Yumi toktok plante long saed blong ol narafala man mo samting we i stap hapen long laef blong olgeta, be yumi no toktok plante long saed blong ol tingting mo fasin we oli gud? Maet hemia wan saen se yumi stap pusum nus blong yumi long bisnes blong ol narafala.—1 Pita 4:15.
7. ?Olsem wanem stori blong ol ten brata blong Josef i tijim yumi se yumi mas lukaot gud long hat blong yumi?
7 Tingbaot wanem we i bin hapen long wan bigfala famle. Ol ten fasbon boe blong Jekob “oli no moa save toktok gud” long smol brata blong olgeta, hemia Josef. ?From wanem? Oli jalus long Josef from we papa blong olgeta i laekem hem moa. Biaen, Josef i luk sam spesel drim we God i givim long hem, hemia i pruvum se Jeova i laekem hem. Be ol brata blong Josef “oli agens long hem moa.” (Jenesis 37:4, 5, 11) Oli no gat sore nating, oli salem brata blong olgeta olsem wan slef. Ale, blong kavremap rong blong olgeta, oli giaman long papa blong olgeta se wan wael anamol i kilim Josef i ded. Long taem ya, ol ten brata ya blong Josef oli no bin lukaot gud long hat blong olgeta. Sipos yumi hareap blong luk mastik blong narafala, maet hemia i soemaot se i gat jalus long hat blong yumi. Yumi mas jekem ol tok we i kamaot long maot blong yumi, mo yumi mas hareap blong rutumaot eni samting we maet i save pulum yumi i go long rong rod.
8. ?Sipos yumi talem wan giaman tok, wanem i save halpem yumi blong luksave samting we i stap long hat blong yumi?
8 “God i no save giaman,” be ol sinman oli save giaman. (Hibrus 6:18) Man blong raetem Sam i talem se “i no gat wan man nating we mi save trastem hem.” (Ol Sam 116:11) Aposol Pita tu i bin giaman tri taem se hem i no save Jisas. (Matiu 26:69-75) I klia se, yumi mas lukaot gud blong no talem ol giaman tok, from we Jeova i no laekem nating “fasin blong giaman.” (Ol Proveb 6:16-19) Sipos wan dei yumi talem wan giaman tok, i gud blong traem luksave wanem nao i pusum yumi blong mekem olsem. ?Yumi bin fraet long man? ?Yumi fraet blong kasem panis? ?Maet stamba blong problem ya hemia se yumi no wantem sem no yumi tingbaot yumi wan nomo? Nomata wanem samting i pusum yumi blong giaman, i impoten we yumi tingting gud long trabol ya, gat tingting daon mo luksave se yumi mestem, ale yumi askem Jeova blong fogivim yumi mo halpem yumi blong winim slak fasin ya. Ating “ol elda” nao oli beswan blong givhan long yumi olsem yumi nidim.—Jemes 5:14.
9. ?Ol prea blong yumi oli save soemaot wanem samting long saed blong hat blong yumi?
9 Taem yangfala King Solomon i askem Jeova blong givim waes mo save long hem, Jeova i ansa se: “!Yu yu jusumaot wan stret samting ya [“we i impoten long hat blong yu,” NW]! Yu no askem blong yu kam rijman, no blong yu gat ol gudgudfala samting, no blong yu gat gud nem, . . . mo from samting ya, bambae mi givim waes mo save long yu. Mo antap bakegen, bambae mi mekem we yu yu kam rijman, we yu gat ol gudgudfala samting blong yu, mo we yu gat gud nem long fes blong ol man.” (2 Kronikel 1:11, 12) From samting we Solomon i askem mo samting we hem i no askem, Jeova i save wanem i moa impoten long hat blong hem. ?Ol prea we yumi mekem long God oli soemaot wanem long hat blong yumi? ?Oli soemaot se yumi wantem tumas blong kasem save, waes, mo fasin luksave? (Ol Proveb 2:1-6; Matiu 5:3) ?Ol wok blong Kingdom oli impoten long hat blong yumi? (Matiu 6:9, 10) Sipos yumi mekem ol prea blong yumi olsem wan kaset we i no gat filing, maet hemia i soem se yumi mas tekem taem blong tingting dip long ol wok we Jeova i stap mekem. (Ol Sam 103:2) Ol Kristin oli kwik blong luksave wanem we ol prea blong olgeta i soemaot.
?Ol Fasin Blong Yumi Oli Soemaot Wanem?
10, 11. (a) ?Ol nogud fasin blong slip olbaot mo stilim hasban no waef blong narafala oli kamaot wea? (b) ?Wanem bambae i halpem yumi blong no ‘mekem nogud wetem woman’ long hat blong yumi?
10 Sam man oli talem se fasin blong yumi i soemaot moa long saed blong yumi i bitim toktok. I tru tumas se, ol fasin blong yumi oli soemaot fulap samting we i stap insaed long hat blong yumi. Tingbaot, long saed blong ol rabis fasin blong seks. Blong lukaotgud long hat blong yumi, hemia i minim moa i bitim we yumi no slip olbaot mo yumi no stilim woman blong narafala man. Taem Jisas i mekem Bigfala Toktok blong hem antap long Hil, hem i talem se: “Man we i luk wan woman, nao i wantem hem tumas, i olsem we hem i slip wetem woman ya finis [“long hat blong hem,” NW].” (Matiu 5:28) ?Olsem wanem wan man i save blokem samting ya blong i no hapen long hat blong hem?
11 Olfala man ya Job i soem wan gudfala eksampol long ol Kristin man mo woman we oli mared finis. I sua se Job i toktok mo wok wetem sam woman we oli yang moa long hem, mo maet hem i halpem olgeta taem oli gat nid. Be hem i stap tru oltaem long waef blong hem, taswe neva hem i gat filing long ol yangfala woman ya. ?From wanem? From we hem i mekem strong promes blong i neva lukluk long wan woman wetem tingting ya se hem i wantem slip wetem hem. Job i se: “Mi mi mekem wan strong promes finis, se sipos mi luk wan gel, bambae mi no save tingting nogud long hem.” (Job 31:1) I gud sipos yumi tu yumi mekem strong promes olsem mo blokem hat blong yumi long ol samting we oli save spolem hem.
12. ?Olsem wanem yumi save folem advaes blong Luk 16:10 blong blokem hat blong yumi long ol samting nogud?
12 Pikinini blong God i talem se: “Man we i save lukaot gud long smol samting nomo, hem i save lukaot gud long bigfala samting tu. Be man we i no save lukaot gud long smol samting nomo, hem i no save lukaot gud long bigfala samting tu.” (Luk 16:10) Yes, yumi mas lukaotgud long fasin blong yumi long ol samting blong laef evri dei, nating se oli ol smosmol samting we oli stap hapen insaed long famle blong yumi nomo. (Ol Sam 101:2) Taem yumi stap long haos blong yumi, maet yumi wajem televisin no lukluk Intenet, be yumi mas lukaotgud blong folem advaes ya blong Baebol se: “From we yufala i tabu, mo yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman mo ol narafala krangke fasin olsem, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok we i save mekem man i sem, mo ol tok we i save mekem man i harem nogud, mo ol tok plei we i nogud.” (Efesas 5:3, 4) ?Olsem wanem long raf fasin we maet i stap long televisin no long ol video gem? Man blong raetem Sam i talem se: “God i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet.”—Ol Sam 11:5.
13. ?Taem yumi tingbaot ol samting we hat i stamba blong olgeta, wanem woning we i stret blong folem?
13 Jeremaea i givim woning se: “Hat i save giaman long yumi moa bitim ol narafala samting mo i wantem win.” (Jeremaea 17:9, NW ) Hat i trikim yumi taem hem i pulum yumi blong mekem eskius from ol mastik blong yumi, ting nating long sin, kavremap sam bigfala slak fasin we yumi mas stretem, mo flas tumas from samting we yumi mekem. Wan hat we i wantem win i naf blong pulum man blong gat tu fes—maet man ya i tok swit, be fasin blong hem i soem defren samting. (Ol Sam 12:2; Ol Proveb 23:7) !Taswe i impoten tumas blong no haedem wanem we yumi faenem taem yumi jekemap hat blong yumi!
?Ae Blong Yu i Klia Gud?
14, 15. (a) ?Ae we i klia “gud” i minim wanem? (b) ?Olsem wanem ae we i klia gud i save halpem yumi blong blokem ol samting nogud we oli save spolem hat blong yumi?
14 Jisas i talem se: “Ae blong man, hem i olsem laet blong bodi blong hem.” Mo hem i gohed se: “Sipos ae blong yu i gud, bambae i olsem we bodi blong yu i fulap olgeta long laet.” (Matiu 6:22) Ae we i klia gud i stap lukluk nomo long wan mak, hem i no letem ol samting raonabaot oli pulum hem i gowe long mak ya. Yes, ae blong yumi i mas stap nomo long wok ya blong “lukaot kingdom mo stret fasin blong [God] fastaem.” (Matiu 6:33, NW ) ?Sipos ae blong yumi i no klia gud, wanem bambae i hapen long hat blong yumi?
15 Tingbaot wok blong winim mane we yumi nidim blong laef. Wan Kristin i mas givim ol samting we famle blong hem i nidim. (1 Timoti 5:8) ?Be olsem wanem sipos yumi stat blong wantem tumas blong kasem ol kakae, klos, haos, mo narafala samting we oli niuwan mo beswan, olsem fulap narafala oli wantem? Ating hat mo tingting blong yumi i save kam slef blong ol samting ya, mekem se yumi no moa wosip wetem fulhat blong yumi. (Ol Sam 119:113; Rom 16:18) ?I stret blong bisi tumas long ol samting blong laef, we yumi tingbaot famle, bisnes, mo olting we yumi gat nomo? Rimemba advaes ya we i kamaot long tabu spirit se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap, from we dei ya bambae i kasem olgeta man long wol.”—Luk 21:34, 35.
16. ?Jisas i givim wanem advaes long saed blong ae, mo from wanem hem i talem olsem?
16 Ae i olsem doa we ol samting oli save pas long hem blong go insaed long tingting mo hat. Taswe, ol samting we ae blong yumi i lukluk, oli save gat bigfala paoa long tingting, filing, mo ol samting we yumi mekem. Taem Jisas i tokbaot paoa we ae i gat blong pulum yumi, hem i yusum pijatok ya i se: “Sipos raet ae blong yu i mekem yu yu foldaon long sin, i gud yu tekemaot, yu sakem. I moa gud yu lusum wan haf blong bodi blong yu, i winim we olgeta haf blong bodi blong yu i go lus long [“Gehena,” NW ].” (Matiu 5:29) Yumi mas blokem ae blong yumi blong i no stap longtaem long ol samting we oli nogud blong lukluk. Olsem nao, yumi no mas letem ae blong yumi i lukluk ol buk mo sinema we oli pulum filing blong yumi long saed blong seks.
17. ?Olsem wanem advaes blong Kolosi 3 :5 i save halpem yumi blong lukaot gud long hat blong yumi?
17 I tru se i no ae nomo we i tekem ol save raonabaot long yumi i kam insaed long tingting blong yumi. Ol samting we yumi tajem mo harem, olgeta tu oli save gat paoa long yumi mo yumi mas lukaot gud long samting ya. Aposol Pol i givim advaes se: “Yufala i mas blokem ol haf blong bodi blong yufala we oli stap long wol ya, blong mekem oli ded long saed blong ol rabis fasin. Hemia se, yufala i no mekem nogud wetem man no woman, yufala i no mekem doti fasin, yufala i no wantem tumas ol samting blong seks, yufala i no wantem ol rabis samting, yufala i no wantem ol samting blong narafala man, from we fasin ya i olsem wosip long ol giaman god.”—Kolosi 3:5, NW.
18. ?Yumi mas mekem wanem taem yumi stat tingting long wan nogud samting?
18 Maet yumi stat wantem wan samting we i nogud, mo samting ya i haed i stap long tingting blong yumi. Sipos yumi holem samting ya i stap longtaem long tingting blong yumi bambae yumi wantem samting ya moa, nao maet i pulum hat blong yumi. “Taem [man] i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from.” (Jemes 1:14, 15) Plante man oli agri se hemia nao rod we i bin pulum olgeta blong pleplei wetem seks blong olgeta. !Tru, i impoten tumas blong fulumap tingting blong yumi oltaem wetem ol samting long saed blong spirit! (Filipae 4:8) Mo sipos i gat wan nogud tingting i kam long yumi, yumi mas sakemaot tingting ya kwiktaem.
‘Mekem Wok Blong Jeova Wetem Olgeta Hat’
19, 20. ?Olsem wanem bambae yumi naf blong mekem wok blong Jeova wetem olgeta hat blong yumi?
19 Taem King Deved i olfala finis, hem i talem long boe blong hem se: “Pikinini blong mi, Hae God i God blong yumi, mo oltaem mi mi stap obei long hem. Mi mi talem strong long yu, se yu tu yu mas obei long hem, mo yu mas wok blong hem long olgeta tingting [“hat,” NW ] blong yu, we tingting blong yu i glad. Hem i save olgeta tingting blong yumi, mo olgeta samting we yumi wantem.” (1 Kronikel 28:9) Solomon tu, hem i prea se hat blong hem “i save mekem hem i obei.” (1 King 3:9, NW ) Nating se i olsem, long ful laef blong hem, hem i mas wokhad blong mekem se hat blong hem i stap gud.
20 Sipos yumi wantem win long saed ya, hat blong yumi i mas stret gud long fes blong Jeova, be tu, yumi mas blokem ol samting nogud we oli save spolem hat blong yumi. Blong mekem olsem, yumi mas holem ol Tok blong God i stap oltaem long hat blong yumi—yes, yumi mas “holemtaet” tok ya. (Ol Proveb 4:20-22) Yumi mas jekemap hat blong yumi oltaem, prea mo tingting gud long wanem we ol tok mo fasin blong yumi oli soemaot. Be, i impoten tumas we taem yumi mekem olsem, yumi lukaot help blong Jeova blong stretem eni slak fasin we yumi faenem long yumi. Mo i impoten tu blong lukaot gud long wanem we yumi tekem i kam insaed long tingting mo hat blong yumi. Sipos yumi mekem olsem, yumi sua se “pis we [God] i givim, we i bigfala moa, i bitim save blong yumi, bambae hem i putum long tingting blong [yumi], blong lukaot gud long [yumi] ya we i joen long Jisas Kraes.” (Filipae 4:6, 7) Yes, i gud yumi gat strong tingting blong blokem hat blong yumi long ol nogud samting, mo blong mekem wok blong Jeova wetem olgeta hat blong yumi.
?Yu Yu Tingbaot?
• ?From wanem i impoten blong lukaot gud long hat blong yumi?
• ?Olsem wanem fasin blong jekem ol tok blong yumi i save givhan blong blokem hat blong yumi long ol samting nogud?
• ?From wanem yumi mas gat wan ae we i “klia gud”?
[Kwestin]
[Tok blong pija long pej 23]
?Yumi tokbaot wanem samting taem yumi joen long wok blong prij, ol miting, mo taem yumi stap long haos?
[Tok blong pija long pej 25]
Ae we i klia gud i no save letem wan samting i pulum hem i gowe long mak blong hem