Mekem Hat Blong Yumi i Stretgud Long Fes Blong Jeova
Mekem Hat Blong Yumi i Stretgud Long Fes Blong Jeova
“God, plis yu mekem tingting [“hat,” NW ] blong mi i klin olgeta. Plis yu mekem we hat [“tingting,” NW ] blong mi i kam niuwan bakegen, mo i stap strong long yu oltaem.”—OL SAM 51:10.
1, 2. ?From wanem yumi mas tingting gud long hat blong yumi?
FASBON pikinini blong Jese long taem bifo i longfala mo i naes. Taem profet Samuel i luk hem, hem i sapraes tumas nao hem i ting se hem nao we God bambae i jusum blong kam king afta long Sol. Be Jeova i talem se: “Yu no tingbaot we [boe ya] i longfala man mo i naes. Mi mi no wantem man ya. . . . Man i stap lukluk long bodi blong man nomo, be mi mi stap lukluk long tingting [“hat,” NW ] blong hem.” Jeova i jusum Deved, we i lasbon boe blong Jese. Hem i wan man “we i stret gud long fes [no “long hat,” NW ]” blong Jeova.—1 Samuel 13:14; 16:7.
2 God i save luk wanem i stap long hat blong ol man. Hem i soemaot samting ya taem hem i talem se: “Mi, Jeova, mi stap lukluk long hat, mi stap skelem ol kidni. Mi stap givim pei long man we i stret long fasin blong hem, mo mi stap blesem man stret long wok we hem i mekem.” (Jeremaea 17:10, NW ) Yes, “Jeova i stap skelem olgeta samting long hat blong man.” (Ol Proveb 17:3, NW ) ?Be, wanem ya hat blong man we Jeova i stap lukluk? ?Yumi mas mekem wanem blong mekem hat blong yumi i stret gud long fes blong hem?
‘Ol Fasin We Oli Haed Long Hat’
3, 4. ?Plante taem, Baebol i yusum tok ya “hat” blong minim wanem? Talem sam eksampol.
3 Tok ya “hat” i stap klosap wan taosen taem long Tabu Baebol. Plante taem, Baebol i yusum hat blong minim wan narafala samting. Olsem nao, Jeova i talem long profet Moses se: “Bambae yu talem long ol laen ya blong Isrel, se oli mas givim presen i kam long mi. Mo yu yu mas glad blong tekem presen we olgeta oli glad blong givim [no we “hat blong olgeta i pusum olgeta blong givim,” NW ].” Nao “olgeta we tingting [“hat,” NW ] blong olgeta i glad blong givim sam samting i go long Hae God,” oli kam, oli givim presen. (Eksodas 25:2; 35:21) I klia se, samtaem Baebol i yusum hat blong minim tingting no paoa we i pusum man blong mekem wan samting. Mo tu, Baebol i stap yusum hat blong minim ol dip filing blong yumi, mo ol filing we oli pulum yumi blong wantem samting no blong laekem samting. Hat i save fulap long kros mo i save fraet bigwan, hem i save hevi from we i harem nogud no i save jamjam from glad. (Ol Sam 27:3; 39:3; Jon 16:22; Rom 9:2) Hat i save mekem man i flas no i gat tingting daon, hem i save pulum man blong gat lav no i save mekem man i no laekem nating narafala man.—Ol Proveb 16:5; Matiu 11:29; 1 Pita 1:22.
4 Yes, plante taem, “hat” i minim paoa we i pusum yumi blong mekem samting, mo filing we yumi gat. Be long saed blong “tingting,” plante taem hem i joen wetem waes mo save blong man. Hemia nao mining we yumi mas tingbaot taem yumi ridim tufala tok ya, hat mo tingting, long ol vas blong Baebol. (Matiu 22:37; Filipae 4:7) Be i no minim se hat mo tingting tufala i no save wok tugeta. Moses i talem long ol man Isrel se: “Yu mas tingbaot long hat blong yu [no “rimemba long tingting blong yu,” long futnot] se Jeova hem i trufala God.” (Dutronome 4:39, NW ) Jisas i tok long ol tija blong loa we oli mekem plan blong trikim hem, i se: “?From wanem yufala i stap tingting long ol rabis samting long hat blong yufala?” (Matiu 9:4, NW ) Mo tu, hat i save mekem man i “kasem save gud,” i “wantem lan moa,” mo i “gat kwestin” long tingting blong hem. (1 King 3:12; Ol Proveb 15:14; Mak 2:6) Taswe, hat i save joen tu wetem tingting blong yumi mo fasin blong yumi blong kasem save samting.
5. ?Taem yumi tokbaot hat olsem wan pijatok hem i minim wanem?
5 Wan buk i talem se, yumi save yusum hat olsem pijatok blong minim “stamba haf blong man, fasin we i stap insaed long hem, hemia se, ol fasin mo filing blong man we oli haed mo we hem i stap soemaot long ol defren kaen wok blong hem, long samting we hem i wantem mo i laekem, long ol filing mo ol plan blong hem, long ol tingting blong hem mo ol samting we hem i luksave, long ol drim blong hem, long waes mo save blong hem, long ol samting we hem i gat gudhan blong mekem, long ol bilif blong hem mo fasin blong hem blong skelem ol samting, long ol samting we hem i rimemba mo i makem.” Hem i pija blong olgeta trufala fasin blong yumi, hemia “ol fasin we oli stap haed long hat blong [yumi].” (1 Pita 3:4, NW ) Hemia nao wanem we Jeova i luk mo i skelem. Taswe, Deved i save prea se: “God, plis yu mekem tingting [“hat,” NW ] blong mi i klin olgeta. Plis yu mekem we hat [“tingting,” NW ] blong mi i kam niuwan bakegen, mo i stap strong long yu oltaem.” (Ol Sam 51:10) ?Olsem wanem yumi save gat wan hat we i klin olgeta?
Letem Tok Blong God i ‘Kasem Hat’
6. ?Wanem tok we Moses i talem long ol man Isrel taem oli stap long levelples ya Moab?
6 Bifo we ol man Isrel oli go insaed long Promes Lan, oli hivap long levelples ya Moab, nao Moses i talem long olgeta se: “Yufala i mas letem olgeta tok we mi stap talem long yufala tede olsem woning, oli kasem hat blong yufala, nao bambae yufala i givim oda long ol pikinini blong yufala blong oli lukaotgud blong folem olgeta tok blong loa ya.” (Dutronome 32:46, NW ) Ol man Isrel oli mas “lukaot gud blong obei long olgeta loa ya.” (Baebol Long Bislama) Oli mas savegud ol loa blong God fastaem. Long rod ya nomo, oli save tijimgud ol pikinini blong olgeta long ol loa ya.—Dutronome 6:6-8.
7. ?Olsem wanem yumi save letem Tok blong God ‘i kasem hat blong yumi’?
7 Blong mekem hat blong yumi i klin, i impoten blong kasem save long stamba tingting blong God mo ol samting we hem i wantem. Yumi faenem ol save ya long wan ples nomo, hemia long Tok blong God we tabu spirit i pusum ol man blong raetem. (2 Timoti 3:16, 17) Be, sipos yumi fulumap hed blong yumi wetem save, hemia nomo i no save givhan long yumi blong gat wan hat we i mekem Jeova i glad. Blong save ya i gat paoa long ol trufala fasin insaed long yumi, yumi mas letem ol samting we yumi lanem ‘i kasem hat blong yumi,’ no yumi mas “tinghevi” long hem. (Dutronome 32:46, An American Translation) ?Olsem wanem yumi save mekem samting ya? Deved, man blong raetem ol Sam, i eksplenem se: “Mi stap tingtingbak long ol dei ya we i pas finis, mi stap tingbaot olgeta wok ya we yu yu mekem, mo mi stap tingting long olgeta samting ya we yu yu mekem long mi.”—Ol Sam 143:5.
8. ?Wanem ol kwestin we yumi mas tingbaot taem yumi stap stadi?
8 Yumi tu, yumi mas tingting dip mo gat tangkiu from ol wok blong Jeova. Taem yumi ridim Baebol no ol buk we oli tokbaot Baebol, yumi mas tingbaot ol kwestin olsem: ‘?Samting ya i tijim mi long wanem samting long saed blong Jeova? ?Wanem fasin blong Jeova we mi mi ridim long ples ya? ?Mi mi lanem wanem long saed blong ol samting we Jeova i laekem mo ol samting we hem i no laekem? ?Wanem frut i save kamaot taem man i folem rod we Jeova i glad long hem mo taem man i folem rod we Jeova i no laekem nating? ?Olsem wanem samting ya we mi ridim i laenap wetem ol samting we mi lanem finis?’
9. ?Fasin blong stadi mo tingting dip i impoten olsem wanem?
9 Lisa * we i gat 32 yia, i talem olsem wanem hem i stat tinghae long fasin blong stadi mo tingting dip, hem i se: “Afta we mi baptaes long 1994, mi strong blong folem trutok blong tu yia. Mi joen long olgeta Kristin miting, mi spenem samwe long 30 kasem 40 aoa long wok blong prij evri manis, mo mi joen oltaem wetem ol narafala Kristin. Be afta, mi stat blong kam slak. Mi kam slak gogo mi brekem loa blong God. Be biaen, mi stretem tingting blong mi mo mi mekem disisen blong sakemaot ol nogud fasin. !Mi mi glad tumas we Jeova i fogivim mi taem mi tanem tingting blong mi mo i tekem mi mi kambak! Plante taem mi tingting se: ‘?From wanem mi bin kam slak?’ Ansa we mi stap kasem oltaem hemia se, mi no bin tektaem blong stadi gud mo tingting dip. Ol trutok blong Baebol oli no bin kasem hat blong mi. Taswe, i stat naoia, fasin blong stadi mo tingting dip bambae i stap oltaem olsem wan impoten haf blong laef blong mi.” !Yes, taem yumi kasem moa save long saed blong Jeova, Pikinini blong hem, mo Tok blong hem, i impoten tumas we yumi tektaem blong tingting dip!
10. ?From wanem i impoten tumas we yumi pemaot taem blong stadi mo tingting dip?
10 Long wol ya we i bisi tumas, i had blong faenem taem blong stadi mo tingting dip. Be, ol Kristin tede oli stap klosap tumas long nambawan Promes Lan—hemia niufala wol we God bambae i mekem stret fasin nomo i stap long hem. (2 Pita 3:13) Ol bigbigfala samting oli mas hapen yet, olsem ‘Bigfala Babilon’ bambae i lus olgeta, mo ‘Gog blong Magog’ bambae i agensem ol man blong Jeova fulwan. I no longtaem nating, ol samting ya bambae oli hapen. (Revelesen 17:1, 2, 5, 15-17; Esikel 38:1-4, 14-16; 39:2) Maet ol samting ya oli traem lav we yumi gat long Jeova. !I impoten we yumi pemaot taem naoia blong letem Tok blong God i kasem hat blong yumi!—Efesas 5:15, 16.
‘Mekemrere Hat Blong Yu Blong Ridim Tok Blong God’
11. ?Olsem wanem hat blong yumi i olsem graon?
11 Hat we i pija blong ol filing mo fasin blong yumi we oli haed, i olsem graon we yumi save planem sid blong trutok long hem. (Matiu 13:18-23) Plante taem, ol man blong wokem garen oli tantanem graon blong meksua se ol sid we oli planem bambae oli grugud. Long sem fasin, yumi mas mekemrere hat blong yumi blong i glad blong kasem Tok blong God. Pris ya Esra, i ‘mekemrere hat blong hem blong ridimgud loa blong Jeova, mo blong mekem i wok.’ (Esra 7:10, NW ) ?Olsem wanem yumi save mekemrere hat blong yumi?
12. ?Wanem bambae i halpem yu blong rerem hat blong yu blong stadi?
12 Wan gudfala rod blong rerem hat blong yumi bifo we yumi ridim Tok blong God, hemia prea. Ol trufala man blong God oli statem mo finisim ol Kristin miting blong olgeta wetem prea. !I stret nomo we yumi prea wetem fulhat blong yumi blong statem Baebol stadi blong yumi wanwan, mo taem yumi gohed blong stadi, yumi mas holem sem tingting ya we yumi gat taem yumi prea!
13. ?Blong mekem hat blong yumi i stret long fes blong Jeova, yumi mas mekem wanem?
13 Hat we i pija blong ol filing mo fasin blong yumi we oli haed, i mas rere blong sakemaot enikaen rong tingting no bilif we yumi gat bifo. Ol lida blong skul long taem blong Jisas oli no rere blong mekem olsem. (Matiu 13:15) Be Meri, mama blong Jisas i defren olgeta. Hem i kasem save long plante samting “long hat blong hem” folem ol trutok we hem i bin harem. (Luk 2:19, 51, NW ) Hem i kam wan disaepol blong Jisas we i holem strong bilif. Lidia blong Tuatira i lesin long Pol, “nao Masta blong yumi i openem tingting [“hat,” NW ] blong hem blong i bilif.” Hem tu i kam wan disaepol blong Kraes. (Ol Wok 16:14, 15) I nogud yumi fas strong long prapa tingting blong yumi no long sam bilif we yumi gat bifo. I moagud we yumi rere blong luksave se “olgeta man oli save giaman, be God i no save giaman, hem i tru oltaem nomo.”—Rom 3:4.
14. ?Olsem wanem yumi save mekemrere hat blong yumi blong lesin long ol Kristin miting?
14 I impoten tumas blong mekemrere hat blong yumi blong lesin gud long ol Kristin miting. I gat fulap samting we oli save pulum tingting blong yumi i gowe long ol tok we i stap kamaot long miting. Sipos yumi stap tingbaot ol samting we oli bin hapen long dei, no sipos yumi wari long sam samting blong nekis dei, ol tok we oli kamaot long miting bambae i no save gat paoa long yumi. Sipos yumi wantem se ol tok long miting i givhan long yumi, yumi mas gat strong tingting blong lesin mo kasem save. !Bambae yumi mekem i gud long yumi wan sipos yumi traem kasem save long ol vas we yumi ridim mo mining blong olgeta we oli eksplenem long miting!—Nehemaea 8:5-8, 12.
15. ?From wanem i isi moa blong kasem tijing taem yumi gat tingting daon?
15 Samtaem yumi nidim blong meksem gudfala graon i go wetem graon we yumi wokem garen long hem sipos yumi wantem we ol sid oli grugud. Sem mak long hat blong yumi we i minim ol filing mo fasin blong yumi we oli haed. Ol fasin olsem tingting daon, fasin blong wantem tumas ol kakae long saed blong spirit, tras, onagud long God mo lav long God, oli save mekem hat ya i kamgud moa. I isi blong Jeova i tijim yumi taem tingting blong yumi i stap daon, from we hat blong yumi i no strong. Jeova i talem long King Josaea blong Juda, se: “Taem yu harem tok ya . . . , yu harem nogud, mo yu tanem tingting blong yu from ol sin blong yu [“from we hat blong yu i no strong,” NW ]. Yu yu mekem tingting blong yu i stap daon long fes blong mi . . . mo yu stap krae . . . mi harem prea blong yu.” (2 King 22:19) Hat blong Josaea i no strong, hem i gat tingting daon mo i rere blong lesin. Ol disaepol blong Jisas we oli ‘no gat nem mo oli no skul gud tu,’ oli gat tingting daon mo samting ya i givhan long olgeta blong kasem save long trutok mo mekem i wok long laef blong olgeta. Trutok ya, “ol man we oli waes mo ol man we oli skul gud,” oli no naf blong kasem save long hem. (Ol Wok 4:13; Luk 10:21) Yes, i gud yumi “kam long fes blong God we tingting blong yumi i stap daon taem yumi traem mekem hat blong yumi i stret long fes blong Jeova.—Esra 8:21, NW.
16. ?From wanem i nidim fasin traehad, blong yumi kam olsem we yumi hanggri from ol kakae blong spirit?
16 Jisas i talem se: “Olgeta we oli luksave se oli nidim ol samting long saed blong spirit, oli save glad.” (Matiu 5:3, NW ) God i wokem yumi long wan fasin we yumi nidim ol samting long saed blong spirit. Be, ol traem blong rabis wol ya mo ol fasin olsem fasin les, maet oli mekem we yumi no luksave nid ya. (Matiu 4:4) Yumi mas traehad blong gat fasin ya we yumi wantem tumas ol kakae long saed blong spirit. Maet fastaem yumi no harem gud blong ridim Baebol no blong stadi yumi wan. Be sipos yumi gohed, bambae ‘sol blong yumi i harem gud long save’ we yumi kasem, nao sloslou bambae yumi wantem tumas blong stadi.—Ol Proveb 2:10, 11, NW.
17. (a) ?From wanem i stret we yumi trastem Jeova fulwan? (b) ?Olsem wanem yumi save kasem fasin ya blong trastem God?
17 King Solomon i givim advaes ya se: “Yu mas trastem Jeova long ful hat blong yu. Yu no mas stanap long prapa waes blong yu.” (Ol Proveb 3:5, NW ) Wan man we i trastem Jeova long hat blong hem, hem i save se nomata wanem samting we Jeova i askem no i talem long hem blong mekem long Tok blong hem, be i stret oltaem. (Aesea 48:17) I stret nomo we yumi trastem Jeova fulwan. Hem i naf blong mekem olgeta stamba tingting blong hem oli kamtru. (Aesea 40:26, 29) !Tingbaot prapa nem blong hem we i minim se “Hem i Mekem i Kamaot”! From samting ya nomo, yumi sua se Jeova i naf blong mekem ol promes blong hem oli kamtru. “Olgeta rod blong Jeova oli stret, mo long olgeta wok blong hem, hem i holem strong long ol promes blong hem.” (Ol Sam 145:17, NW ) Be i tru se, tras ya i no save kam hem wan, yumi mas “traem trastem Jeova mo bambae yumi luk we hem i gud.” Blong mekem olsem, yumi mas mekem wanem we yumi lanem long Baebol i wok long laef blong yumi evri dei, mo yumi mas tingbaot ol gudfala frut we oli kamaot taem yumi mekem olsem. —Ol Sam 34:8, NW.
18. ?Olsem wanem fasin fraetgud long God i save halpem yumi blong letem hem i lidim yumi?
18 Solomon i tokbaot wan narafala impoten samting we i save mekem hat blong yumi i rere blong letem God i lidim yumi. Hem i se: “Yu mas ona gud [“fraetgud,” NW ] long hem [Jeova], mo yu mas tanem baksaed long ol fasin nogud.” (Ol Proveb 3:7) Jeova i tokbaot Isrel blong bifo i se: “Sipos olgeta oli holem tingting ya oltaem nomo [“long hat blong olgeta,” NW ], bambae i gud tumas. Mi mi wantem tumas blong oli ona [“fraetgud,” NW ] long mi oltaem, mo blong oli obei long olgeta tok blong mi, mo sipos oli mekem olsem, evri samting long laef blong olgeta, mo long laef blong ol pikinini blong olgeta, mo long laef blong olgeta we bambae oli stap kamaot biaen long olgeta, bambae i ron gud.” (Dutronome 5:29) Yes, ol man we oli fraetgud long God, oli obei long hem. Jeova i save “yusum paoa blong hem blong givhan long olgeta we oli ona long hem long ful hat blong olgeta,” mo blong givim panis long olgeta we oli no obei long hem. (2 Kronikel 16:9, NW ) Fraet long God no ona long hem bambae i mekem se yumi no wantem mekem samting we hem i harem nogud from. I gud sipos yumi letem fraet ya i lidim yumi long olgeta fasin, tingting, mo filing blong yumi.
‘Lavem Jeova Wetem Olgeta Hat Blong Yu’
19. ?Olsem wanem lav i save mekem hat blong yumi i rere blong letem Jeova i lidim yumi?
19 Lav i gat moa paoa i bitim ol narafala fasin blong mekem hat blong yumi i rere blong letem Jeova i lidim yumi. Hat we i fulap wetem lav long God bambae i pusum man blong wantem tumas blong kasem save long samting we i mekem God i glad, mo samting we i save mekem hem i no glad. (1 Jon 5:3) Jisas i talem se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) Yumi mas mekem lav blong yumi long God i kam bigwan moa. Blong mekem olsem, yumi mas lan blong tingting oltaem long kaengud fasin blong hem, toktok long hem oltaem olsem we hem i gud fren blong yumi, mo glad blong tokbaot hem long ol narafala man.
20. ?Olsem wanem yumi save mekem hat blong yumi i stretgud long fes blong Jeova?
20 I gud yumi tingtingbak naoia: Blong mekem hat blong yumi i stretgud long fes blong Jeova, yumi mas letem Tok blong God i gat paoa long ol samting insaed long yumi, hemia ol fasin mo tingting blong yumi we oli haed. I impoten tumas blong stadi gud long Baebol mo tingting dip blong yu gat tangkiu from ol samting we yu lanem. Beswan rod blong mekem olsem, hemia blong rerem hat blong yumi. !Rerem hat i minim se yumi sakemaot ol olfala bilif mo tingting, mo yumi gat ol gudfala fasin we oli mekem i isi long yumi blong kasem tijing! Yes, wetem help blong Jeova, yumi save mekem hat blong yumi i stretgud. ?Be wanem samting we yumi save mekem blong blokem hat blong yumi long ol nogud samting?
[Futnot]
^ Mifala i jenisim nem ya.
?Bambae Yu Yu Ansa Olsem Wanem?
• ?Wanem ya hat we Jeova i stap lukluk mo skelem?
• ?Olsem wanem yumi save letem Tok blong God ‘i kasem hat blong yumi’?
• ?Olsem wanem blong rerem hat blong yumi bifo we yumi ridim Tok blong God?
• ?Stadi ya i pusum yu blong wantem mekem wanem?
[Kwestin]
[Tok blong pija long pej 17]
Deved i tingting dip blong hem i gat tangkiu from ol samting blong spirit. ?Yu yu stap mekem olsem?
[Tok blong pija long pej 18]
Mekemrere hat blong yu bifo we yu stadi long Tok blong God