Wan Kwestin

Fas King 8⁠:8 i soemaot se man we i stap long tempel, long bigfala Rum we i Tabu, i save luk en blong tufala stik ya we oli yusum blong karem bokis blong kontrak. ?Tufala stik ya i stap olsem wanem?

Taem Moses i stap long draeples, Jeova i givim plan blong haos tapolen long hem. Wan impoten samting we i stap long haos tapolen ya, hemia bokis blong kontrak. Bokis ya i longfala lelebet, mo insaed mo afsaed blong hem oli kavremap wetem gol. Insaed long Bokis ya oli putum tufala flat ston we ten komanmen oli stap long tufala, mo sam narafala samting bakegen. Bokis ya i stap long rum we i insaed olgeta, hemia rum ya we i Tabu we i Tabu. Antap long lid blong Bokis ya, i gat tu pija blong jerubim we oli wokem long gol mo tufala i stretem wing blong tufala. Blong man i save karem Bokis ya, i gat ol ring long tufala saed blong hem we oli save pusum tu longfala stik i gotru long olgeta. Tufala stik ya oli wokem long wud ya kasis mo oli kavremap tufala long gol. Tufala stik ya oli gotru long ol ring ya, long tufala saed blong Bokis ya we oli longfala. Bokis ya i stap long rum ya we i Tabu we i Tabu long haos tapolen, we doa blong hem i lukluk i go long is. En blong tufala stik ya i lukluk i go long not, mo narafala en i lukluk i go long saot. Long tempel we Solomon i wokem tu, Bokis ya i stap sem mak.​—⁠Eksodas 25⁠:​10-22; 37⁠:​4-9; 40⁠:​17-21. *

Wan kaliko i seraotem Rum we i Tabu we i Tabu long bigfala Rum we i Tabu. Ol pris we oli stap long bigfala Rum we i Tabu, oli no save lukluk i go insaed long Rum we i Tabu we i Tabu mo oli no save luk Bokis ya, wetem saen we i stap antap long hem we i soemaot se God i stap wetem olgeta. (Hibrus 9⁠:​1-7) Taswe, maet i no isi blong yumi kasem save long ol toktok ya long 1 King 8⁠:8 se: “Tufala stik ya i longfala, nao sipos man i stanap long bigfala Rum ya we i Tabu, stret long doa blong Rum ya we i Tabu we i Tabu, hem i save luk en blong tufala, be sipos i stanap afsaed, hem i no save luk.” 2 Kronikel 5⁠:9 i talem sem samting ya. ?Olsem wanem nao ol man we oli stap long tempel long bigfala Rum we i Tabu oli save luk tufala stik ya?

Sam man oli ting se tufala stik ya i tajem kaliko we i seraotem tufala rum ya, mekem se ol man we oli stap long bigfala Rum we i Tabu oli save luk tufala mak blong hem long kaliko ya. Be sipos wan en blong tufala stik ya i lukluk i go long not mo narafala en i lukluk i go long saot, hemia i min se kaliko ya i stap long saed blong bokis ya i no long en blong hem. (Namba 3⁠:38) I gat wan ansa we maet i moa stret. Sipos kaliko i no fasgud long wol blong tempel, maet ol man oli save luk tufala stik ya tru long smol ples bitwin long wol mo kaliko. No maet oli save luk en blong tufala stik ya, taem hae pris i tajem kaliko blong go insaed long rum ya we i Tabu we i Tabu. Kaliko ya i blokem ol man blong oli no save luk Bokis ya, be from we tufala stik ya i longfala, maet oli save luk en blong tufala tru long smol ples bitwin long wol mo kaliko. I luk olsem se ansa ya i stret, be yumi no mas strong blong talem se i no gat wan narafala ansa bakegen.

I klia se, i gat plante smosmol samting we bambae yumi gohed blong lanem. Aposol Pol i tokbaot sam long ol samting ya long leta blong hem long ol man Hibru. Biaen hem i talem se: “Be, naoia i no gat taem blong tokbaot ol smosmol haf blong ol samting ya.” (Hibrus 9⁠:⁠5) Bambae yumi gat janis blong lanem moa long saed blong haos tapolen, afta we ol man blong bilif, olsem Moses, Eron, Bejalehel, mo sam narafala man we oli savegud ol plan mo wok blong haos tapolen, oli laef bakegen long ded.​—⁠Eksodas 36⁠:⁠1.

[Futnot]