“Blesing Blong Jeova​—⁠Hemia Nao Samting We i Mekem Man i Rij”

YUMI evriwan i wantem kasem blesing. Wan buk, The American Heritage College Dictionary i talem se ol blesing oli givim “glad, mekem man i harem gud long laef, mo givim plante samting.” From we Jeova nao i Man we i Givim “evri samting we oli gud mo evri presen we oli nambawan,” ale, evri trufala blesing we i blong olwe i stap kamaot long Man ya we i Wokem yumi, mo we i lavem yumi. (Jemes 1:​17) Hem i givim plante blesing long olgeta man, nating sipos oli save hem no oli no save hem. Jisas i tokbaot Papa blong hem, i se: “Hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:​45) Be, Jeova i tingbaot moa olgeta we oli lavem hem.​—⁠Dutronome 28:​1-​14; Job 1⁠:1; 42⁠:⁠12.

Man we i raetem ol Sam i talem se: “Yu yu no save holemtaet ol gudgudfala samting blong yu, oltaem yu stap givim long olgeta we oli stap mekem ol stret fasin.” (Ol Sam 84⁠:11) Yes, laef blong olgeta we oli wosipim Jeova i fulap long ol gudfala samting, mo i no blong nating nomo. Oli save se “blesing blong Jeova, hemia nao samting we i mekem man i rij. Mo hem i no givim soa wetem.” Mo tu, Baebol i talem se: “Olgeta we Hae God i blesem olgeta bambae oli tekem graon ya i blong olgeta.” (Ol Proveb 10⁠:​22, NW; Ol Sam 37⁠:​22, 29) !Hemia bambae i wan nambawan blesing!

?Olsem wanem yumi save kasem blesing blong Jeova? Fastaem, yumi mas wokem ol fasin we Jeova i laekem. (Dutronome 30⁠:​16, 19, 20; Maeka 6⁠:⁠8) Yumi luk samting ya long eksampol blong tri man we oli wosipim Jeova long taem bifo.

Jeova i Blesem Ol Man We Oli Wosipim Hem

Noa i wan nambawan man we i wosipim God. Jenesis 6⁠:8 i talem se: “Noa nomo, Hae God i stap glad long hem.” ?From wanem i olsem? From we Noa i stap obei long God. Stori i gohed i se: “Noa i stap wokbaot wetem trufala God.” Noa i folem ol gudfala rul blong Jeova mo i mekem ol samting we Jeova i talem. Long wan taem we wol i fulap long raf fasin mo ol rabis fasin, Noa i mekem i “stret olsem we God i givim oda long hem. Hem i mekem olsem nomo.” (Jenesis 6:​9, 22, NW ) Jeova i talem long Noa blong wokem “wan bigfala sip blong sevem olgeta famle blong hem.” (Hibrus 11⁠:⁠7) Long rod ya, Noa mo famle blong hem​—⁠wetem olgeta man we oli kamaot biaen long Noa​—⁠oli no ded long bigfala wota we i spolem ol rabis man long taem ya. Mo biaen, taem Noa i ded, hem i gat promes se bambae hem i save laef bakegen blong olwe long paradaes long wol. !Tru ya, hem i bin kasem ol gudfala blesing!

Mo tu, Ebraham i gat ol fasin we Jeova i laekem. Nambawan blong ol fasin ya, hemia bilif. (Hibrus 11:​8-​10) Ebraham i lego wan gudfala laef long Uru, mo biaen bakegen long Haran, from we hem i bilivim promes we Jeova i givim se bambae laen blong hem i kam plante mo i karem blesing i kam long olgeta nesen. (Jenesis 12:​2, 3) Nating we hem i kasem ol traem blong plante yia, be hem i gat wan nambawan blesing from bilif blong hem, taem boe blong hem Aesak i bon. Tru long Aesak, Ebraham i kam olsem bubu blong nesen we God i jusumaot, Isrel, mo biaen, hem i kam bubu blong Mesaea. (Rom 4:​19-​21) Mo tu, Ebraham hem i “papa ya blong olgeta we oli gat bilif,” mo ol man oli singaot  hem se, “Fren blong God.” (Rom 4:​11, NW; Jemes 2:​23; Galesia 3:​7, 29) !Laef blong Ebraham i fulap long ol gudfala wok, mo hem i kasem plante bigfala blesing!

Mo tu, tingbaot man ya Moses, we hem i bin stap tru long God. Wan nambawan fasin blong hem, se hem i tinghae long ol samting long saed blong wosip. Moses i tanem baksaed blong hem long ol sas samting blong Ijip, mo “i stap gohed olwe nomo, olsem we i stap luk God ya we man i no save luk long ae blong hem.” (Hibrus 11⁠:27) Afta we hem i stap 40 yia long Midian, hem i gobak long Ijip we hem i olfala finis. Hem i stanap fored long king blong Ijip, we hem i gat moa paoa bitim ol narafala long taem ya, mo hem i talem long king ya se hem i mas letem ol brata blong hem oli gofri. (Eksodas 7:​1-7) Moses i bin luk ten bigfala trabol ya, mo i luk we God i mekem Red Si i seraot, mo ol ami blong king blong Ijip i lus. Jeova i bin yusum hem blong givim Loa long Isrel mo blong mekem kontrak blong Hem wetem niufala nesen ya. Blong 40 yia, Moses i lidim nesen blong Isrel taem oli wokbaot long draeples. Hem i harem gud long laef blong hem, mo God i givim ol gudfala wok long hem olsem ol nambawan blesing.

Ol Blesing Tede

Ol stori ya oli soemaot we laef blong olgeta we oli wosipim God, i no blong nating nomo. Taem ol man we oli wosipim Jeova oli wokem ol gudfala fasin olsem fasin obei, bilif, mo fasin tangkiu from ol samting long saed blong wosip, oli stap kasem ol rij blesing.

?Yumi stap kasem wanem kaen blesing? Tingbaot, plante milian man blong Krisendom oli safa from oli no gat save blong Baebol olsem kakae, be yumi “harem gud, [yumi] glad, from we Jeova i gud.” (Jeremaea 31⁠:​12, NW ) Tru long Jisas Kraes  mo “slef we i stret mo waes,” oltaem Jeova i givim plante save, olsem kakae, we i givhan long yumi blong gohed long ‘rod ya blong kasem laef.’ (Matiu 7:​13, 14, 24⁠:​45, NW; Jon 17⁠:⁠3) Fasin blong joen wetem ol Kristin brata blong yumi i wan narafala rij blesing. Long ol miting, mo long ol narafala taem tu, fasin blong joen wetem ol Kristin brata mo sista blong yumi we oli soemaot lav mo oli stap traehad blong putum “niufala laef ya,” i mekem yumi glad tumas. (Kolosi 3:​8-​10; Ol Sam 133⁠:⁠1) Be, blesing blong yumi wanwan we i bigwan moa, hemia janis blong fren wetem Jeova God, mo blong folem eksampol blong Pikinini blong hem, Jisas Kraes.​—⁠Rom 5:​1, 8; Filipae 3⁠:⁠8.

Taem yumi tingbaot ol blesing olsem, yumi luksave se wosip we yumi mekem i go long God i rili wan sas samting. Maet yumi tingbaot parabol we Jisas i talem long saed blong wan bisnesman we hem i stap lukaot ol gudgudfala ston ya perel. Jisas i tokbaot man ya se: “Taem hem i faenem wan perel we i nambawan, hem i go salemaot olgeta samting we hem i gat, nao i go pem perel ya i tekem i blong hem.” (Matiu 13⁠:46) Ating yumi gat sem filing long saed blong fasin fren blong yumi wetem God, nambawan janis we yumi gat blong mekem wok blong hem, fasin blong joen wetem ol Kristin brata, promes blong laef long fiuja we ol Kristin oli gat, mo ol narafala blesing we oli joen wetem bilif blong yumi. I no gat wan samting long laef blong yumi we i sas moa.

Givim Samting i Gobak Long Jeova

From we yumi luksave se Jeova hem i Man we i Givim ol samting we oli gud, samting ya i stap pusum hat blong yumi blong soemaot tangkiu from ol blesing we yumi kasem. ?Olsem wanem yumi save mekem olsem? Wan rod, hemia blong halpem ol narafala blong kasem ol semfala blesing ya. (Matiu 28⁠:19) Blong mekem samting ya, ol Witnes blong Jeova long bitim 230 kantri, oli bisi long wok blong visitim ol man we oli stap raonabaot long olgeta. Taem oli mekem wok ya, oli yusum ol samting we olgeta nomo oli gat​—⁠i min se taem,  paoa mo olting blong olgeta​—⁠blong givhan long ol narafala blong “kasem stret save long trutok.”​—⁠1 Timoti 2⁠:​4, NW.

Tingbaot sam paenia we oli laef long Glendale, California, Yunaeted Stet. Evri Sarede moning oli visitim wan prisen we oli mas ron 50 kilometa long trak blong go long hem, mo 50 kilometa blong kambak. Nating se oli save spenem smol taem nomo wetem ol prisena, tingting blong olgeta i no foldaon. Wan long olgeta i talem se: “Mifala i haremgud blong mekem wok long spesel teritori ya. Mifala i mekem wok ya wetem bigfala glad. I gat plante man we oli intres, mo i hadwok blong mifala i mekem stadi blong olgeta evriwan. Naoia, mifala i stap mekem stadi wetem faef man, mo i gat fo narafala we oli bin askem wan Baebol stadi.”

Ol Kristin man blong talemaot gud nius we oli gat strong tingting, oli glad blong mekem wok ya we oli no kasem pei from, blong givhan blong sevem laef blong man. Oli soem sem tingting we Jisas i soem, taem hem i talem se: “Yufala i kasem we yufala i no pem, mo yufala i mas givim, we oli no pem yufala from.” (Matiu 10⁠:​8, NW ) Long ful wol, plante milian man oli stap mekem sem wok blong givhan long narafala, mo from samting ya, plante man we hat blong olgeta i stret, oli lesin mo oli stap kam disaepol. Long ol faef yia nomo we i pas, klosap 1.7 milian man oli givim laef blong olgeta i go long Jeova. Blong lukaot long bigfala wok ya we i stap gohed oltaem, i gat nid blong wokem ol Baebol mo ol buk we oli tokbaot Baebol. Mo tu, i gat nid blong bildim ol niufala Haos Kingdom mo ol narafala ples blong miting. ?Mane blong wokem ol samting ya i kam wea? Long ol presen mane nomo.

From we i gat trabol long saed blong mane long sam ples long wol, plante man oli mas hadwok blong kasem ol samting we famle blong olgeta i nidim blong stap laef. Wan magasin, New Scientist, i talem se blong pem kakae nomo, wan bilian man oli spenem bighaf (samwe long 70 pesen) blong mane we famle i stap kasem. Laef blong plante Kristin brata sista blong yumi i olsem. Sipos oli no kasem help we ol narafala Kristin brata sista oli givim, bambae oli no save kasem ol samting olsem ol buk we Sosaeti i prentem, mo oli no save wokem ol Haos Kingdom we oli strong.

Hemia i no min se olgeta oli sakem baden blong olgeta long narafala. Be oli nidim help. Taem Moses i leftemap tingting blong ol man Isrel blong givim sam samting blong soem tangkiu long Jeova from ol blesing we oli kasem, hem i talem se: “Fasin blong man blong givim presen bambae i folem fasin we Hae God i stap blesem hem.” (Dutronome 16⁠:17) Taswe, taem Jisas i luk wan wido woman i putum “tu smol mane we i olsem twanti vatu nomo” long bokis long haos prea, hem i talem ol gudfala toktok long ol disaepol blong hem, long saed blong woman ya. Wido woman ya i bin givim wanem we hem i naf blong givim. (Luk 21:​2, 3) Sem mak nomo, ol Kristin we oli no gat plante samting oli givim wanem we oli naf blong givim. Mo sipos oli no gat plante samting blong givim, ol Kristin we oli no pua olsem, oli save givim presen mane we i bigwan moa.​—⁠2 Korin 8:​13-​15.

Taem yumi givim samting i gobak long God long ol rod ya, i impoten blong gat stret tingting long saed ya. (2 Korin 8:​12) Pol i talem se: “Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9⁠:⁠7) Taem yumi givim samting long gladhat blong yumi, yumi sapotem kampani blong ol man blong God, we i stap kam bigwan moa, mo yumi kasem moa glad tu.​—⁠Ol Wok 20⁠:⁠35.

Fasin blong joen long wok blong prij mo givim presen mane, hemia tufala rod we yumi save folem blong givim samting i gobak long Jeova from ol blesing we hem i givim long yumi. !Mo i leftemap tingting blong yumi blong save se Jeova i wantem givim blesing long plante moa man we hat blong olgeta i stret, we maet oli no save hem yet! (2 Pita 3⁠:⁠9) Taswe, i gud we yumi gohed blong yusum ol samting we yumi gat blong mekem wok blong God, blong yumi save faenem olgeta we hat blong olgeta i stret, mo givhan long olgeta blong wokem ol gudfala fasin olsem fasin obei, bilif, mo tangkiu. Long rod ya, bambae yumi kasem glad from we yumi stap halpem olgeta blong ‘traem trastem Jeova mo blong faenemaot we hem i gud tumas.’​—⁠Ol Sam 34⁠:⁠8.

[Bokis blong pija long pej 28, 29]

Ol Rod We Samfala Oli Folem Blong Givim Presen Mane

BLONG SAPOTEM WOK LONG OLGETA PLES LONG WOL

Plante man oli makemaot, no mekem plan, blong stret mane we bambae oli putum long bokis blong presen mane, we oli raetem long hem se: “Presen Mane Blong Sapotem Wok Blong Prij Long Ful Wol​—⁠Matiu 24⁠:14.”

Evri manis, ol kongregesen oli sanem mane ya i go long hedkwota blong ol Witnes blong Jeova long Brooklyn, New York, no long ofis we i lukaot long wok blong kantri blong olgeta. Yu tu, yu save sanem presen mane i go long branj ofis we i lukaot long kantri blong yu. Ol gol jen, sas ston mo ol narafala sas samting, yu save givim tu olsem presen. Yu mas sanem wan sotfala leta i go wetem ol presen ya blong talemaot se yu givim samting ya olsem wan presen nomo.

PRESEN MANE WE MAN I SAVE KASEMBAK SIPOS I NIDIM

Man i save givim mane blong oli kipim go kasem we man ya i nidim mane ya, bambae sosaeti i givimbak long hem. Blong kasem moa save long saed ya, plis raet i go long branj ofis we i lukaot long kantri blong yu.

PLAN WE MAN I FOLEM BLONG GIVIM PRESEN MANE

Antap long ol presen mane we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples long wol. Sam long olgeta ya hemia:

Insurens: Man i save mekem se Watch Tower Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala.

Ol Bang Kaon: Folem ol rul blong bang long ples blong hem, man i save mekem se mane we bang i holem long kaon blong hem, mane we hem i putum long wan spesel kaon go kasem wan stret taem, no mane we hem i kasem taem hem i ritae, i go long han blong Watch Tower Sosaeti no i givim long olgeta taem hem i ded.

Ol Stok Mo Bon: Man i save givim stok mo bon oli go fulwan long Watch Tower Sosaeti olsem presen nomo.

Graon Mo Haos: Man i save givim graon no haos blong hem i go long Watch Tower Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Yu mas toktok wetem branj ofis we i lukaot long kantri blong yu bifo we yu givim graon no haos long Sosaeti.

Lastok Blong Man Bifo We Hem i Ded Mo Plan Blong Holem Mane i Stap Kasem Ded: Man i save givim graon no haos no mane blong hem long Watch Tower Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem mane blong man ya i stap, blong i go long Watch Tower Sosaeti taem man ya i ded. Mane we bang i holem blong givhan long wan skul, maet man ya i no nidim blong pem takis long hem.

Ol man we oli intres long eniwan long olgeta plan ya blong givim presen, oli mas raetem leta i go long ofis blong Sosaeti we i lukaot long kantri blong olgeta.