“Dei Blong Respektem Ol Narafala Jos”

AFTA we woman hed tija blong wan skul long Polan i storian wetem ol Witnes blong Jeova, hem i wantem save moa, nao hem i makemaot wan dei blong skul i holem, “Dei blong Respektem ol Narafala Jos.” Hem i talem long ol studen​—⁠Katolik, Budis, mo Witnes blong Jeova​—⁠se sipos samfala oli wantem, oli save mekem rere wan sotfala toktok long saed blong bilif mo wok blong olgeta. Kwiktaem nomo, tri yangfala Witnes blong Jeova oli agri blong mekem olsem.

Taem dei ya i kam, Malwina, we i gat 15 yia, i faswan blong toktok. Long wan haf blong tok blong hem, hem i talem se: “Taem mifala i no kam long skul ya yet, be plante long yufala i save mifala finis, from we mifala i bin kam long haos blong yufala. Maet yufala i stap askem se from wanem mifala i stap mekem olsem oltaem. Hemia from we mifala i folem eksampol blong Man we i Statem Kristin Skul, Jisas Kraes. Jisas i talemaot gud nius blong Kingdom long evri ples we hem i save faenem man long hem. Ol aposol mo ol faswan Kristin oli mekem sem mak. Long plante ples, ol Witnes blong Jeova oli fesem strong traem long saed blong bilif blong olgeta, be mifala i glad we i gat pis long skul blong mifala, mo yufala evriwan nao i givhan blong mekem se pis ya i stap. !Mifala i talem tangkiu long yufala from!”

Blong finisim tok blong hem, Malwina i talem se: “I gat wan narafala risen from wanem mifala i kam long haos blong yufala. Mifala i kea long yufala. Baebol i talem se klosap nao bambae ol man long wol oli fesem trabol we bambae i seksekem wol ya. Taswe, nekis taem we mifala i noknok long doa blong yufala, plis tekem taem blong lesin. Mifala i glad blong talemaot long yufala olsem wanem yumi save laef blong olwe long paradaes long wol.”

Nekis studen we i toktok hem i Mateusz, hem tu i gat 15 yia. Mateusz i talem long klas se long ol yia we i pas, ol Witnes blong Jeova oli bin yusum plante rod blong mekem gud nius i go olbaot. Long 1914​—⁠hemia taem blong ol sinema we i no gat voes​—⁠ol Witnes oli bin soem “Photo-Drama of Creation,” hem i ol pija mo slaed we ol man oli muvmuf mo saon i kamaot long sem taem.

 Mateusz i tokbaot wok we radio i mekem blong talemaot mesej blong Kingdom i go long evri ples, mo tu, hem i tokbaot wan program blong kompiuta we ol Witnes blong Jeova oli wokem. Program ya MEPS (multilanguage electronic phototypesetting system), i givhan blong wokem ol buk long plante lanwis wantaem. Boe ya i storebaot tu olsem wanem ol Witnes blong Jeova oli bin halpem ol dokta blong oli kasem moa save long saed blong fasin blong no putum blad long ol man. Hem i talem se: “Naoia ol bigfala dokta blong Polan oli talem ol gudfala toktok long mifala from fasin blong no tekem blad i kam long bodi blong mifala. Mo plante moa man we oli no Witnes blong Jeova oli no tekem blad taem dokta i katem olgeta.”

Blong finisim tok blong hem, Mateusz i tokbaot wok blong bildim ol Haos Kingdom, mo hem i talem se: “?Yufala i wantem visitim hemia blong mifala? Yu no pem blong kam insaed, mo i no gat kleksin.” Mateusz i tokbaot haos asembli long Sosnowiec, i talem se: “Yufala i mas go luk bigfala haos ya. I gud yumi evriwan i go long ples ya. Mifala i gat wan plan, mo fren blong yumi Katarzyna bambae i tokbaot samting ya moa.”

Biaen, Katarzyna we i gat 15 yia, i talem wetem glad se: “Yufala i welkam blong kam long Sosnowiec long distrik asembli blong ol Witnes blong Jeova. Bambae oli mekem sam tok long saed blong ol yangfala.” Mo tu, Katarzyna i tokbaot stamba lafet we ol Kristin oli stap mekem​—⁠Memoriol blong ded blong Kraes. Hem i leftemap tingting blong olgeta long klas blong hem, i se: “Las yia, long ful wol, i gat bitim 14 milian man we oli kam long lafet ya. I gud yufala i kam joen wetem mifala nekis taem.”

Afta we Malwina, Mateusz, mo Katarzyna oli finisim ol tok blong olgeta, oli givim buk ya Jehovahʼs Witnesses​—⁠Proclaimers of Godʼs Kingdom long ol tija blong olgeta, wetem tu kaset video we oli tokbaot bilif mo wok blong ol Witnes blong Jeova. * Wetem fasin tangkiu, ol tija oli akseptem buk mo tufala video kaset ya mo oli promes blong yusum olgeta long ol klas blong histri.

Long en blong miting ya, Martyna we i gat 12 yia, i plei singsing ya, “Jeova, Mifala i Tangkiu Long Yu.” Ol yangfala Witnes ya, ‘God i mekem tingting blong olgeta i strong’ mo oli givim wan gudfala witnes. (1 Tesalonaeka 2⁠:⁠2) !Hemia i wan gudfala eksampol blong ol yangfala Witnes long evri ples!

[Futnot]

[Tok blong pija long pej 26]

Malwina i stap rerem tok blong hem sam dei bifo we hem i givim long skul

[Tok blong pija long pej 26]

Katarzyna i stap jusum ol vas we hem i save tokbaot