Jeova God i Gat Longfala Tingting

“Mi mi Hae God, . . . fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap lavem man mo oltaem mi stap holemstrong promes blong mi.”​—⁠EKSODAS 34⁠:⁠6.

1, 2. (a) ?Long taem bifo, hu i kasem blesing from longfala tingting blong Jeova? (b) ?I minim wanem blong gat “longfala tingting”?

 OL MAN long taem blong Noa, ol man Isrel we oli wokbaot long draeples wetem Moses, mo ol man Jiu we oli laef long taem we Jisas i wokbaot long wol, fasin blong laef blong olgeta i no sem mak. Be olgeta evriwan oli kasem blesing from wan gudfala fasin blong Jeova​—⁠hemia longfala tingting. Gudfala fasin ya i bin sevem laef blong sam man. Mo longfala tingting blong Jeova i save sevem laef blong yumi tu.

² ?I minim wanem blong gat longfala tingting? ?Jeova i soem longfala tingting wetaem, mo from wanem? “Longfala tingting” i save minim se “stanap strong longtaem mo wet wetem kwaet fasin taem wan samting i no stret no taem narafala i agensem yu. Mo tu, i save minim blong holemtaet tingting ya se fasin fren we i brok bambae i kamgud bakegen.” Taswe, fasin ya i save mekem gudfala frut i kamaot. Man we i soemaot fasin ya i stap traehad blong givhan long man ya we i stamba blong problem. Be, blong gat longfala tingting i no minim se yu yu agri long rong we narafala i mekem, no gat. Taem longfala tingting blong yu i winim problem ya, no taem yu luk se longfala tingting i no moa save givhan, bambae i no moa gat nid blong mekem tingting i longfala.

3. ?From wanem Jeova i bin soem longfala tingting, mo wetaem fasin ya bambae i kasem mak blong hem?

³ Nating se sam man oli gat longfala tingting, Jeova hem i beswan eksampol blong fasin ya. Long ol yia afta we faswan man i mekem sin mo i spolem fasin fren blong ol man wetem Jeova, Man we i Wokem yumi i soem fasin blong stanap strong longtaem mo blong wet wetem kwaet fasin. Hem i wokem rod blong ol man we oli tanem tingting from sin blong oli save fren wetem hem bakegen. (2 Pita 3⁠:9; 1 Jon 4⁠:10) Be taem longfala tingting blong Jeova i mekem wok blong hem finis, bambae hem i finisim rabis fasin blong wol ya. Bambae hem i spolem olgeta we oli wantem gohed nomo long rabis fasin blong olgeta.​—⁠2 Pita 3⁠:⁠7.

Fasin Ya i Laenap Wetem Ol Stamba Fasin Blong God

4. (a) ?Hibru haf blong Baebol i yusum wanem tok we oli tanem i kam longfala tingting? (Lukluk futnot tu.) (b) Profet Neham i tokbaot wanem fasin blong Jeova, mo samting ya i soemaot wanem long saed blong longfala tingting blong Hem?

⁴ Long Hibru haf blong Baebol, i gat tu Hibru tok blong talem longfala tingting. Stret mining blong tufala tok ya hemia se “longfala nus.” Baebol ya New World Translation i tanem tufala tok ya i kam “slou blong kros.” * Taem profet Neham i tokbaot longfala tingting blong God, hem i talem se: “Hem i gat paoa, be hem i no save kros kwik. Mo hem i no save letem olgeta we oli mekem nogud oli stap nomo olsem, hem i mas givim panis long olgeta.” (Neham 1⁠:​3, NW ) Taswe, longfala tingting blong Jeova i no minim se hem i slak mo se longfala tingting blong hem i no gat mak blong hem, nogat. Jeova, hem i God ya we i gat olgeta paoa be hem i slou blong kam kros tu. Samting ya i pruvum se hem i soem longfala tingting from we hem i jusum blong holembak paoa blong hem. Hem i gat paoa blong givim panis, be hem i no wantem hareap blong yusum paoa ya. Fastaem, Hem i wantem givim janis long man we i mekem sin blong hem i jenisim fasin blong hem. (Esikel 18:31, 32) Taswe, longfala tingting we Jeova i gat, i soemaot se hem i lavem ol man tumas. Mo tu, i soemaot se hem i yusum paoa blong hem long waes fasin.

5. ?Olsem wanem longfala tingting blong Jeova i laenapgud wetem stret fasin blong hem?

⁵ Longfala tingting blong Jeova i laenap gud wetem  stret fasin blong hem. Hem i talem long Moses se: “Mi gat sore long man, mo mi stap givhan long man long gladhat blong mi. Mi mi no save kros kwik [“mi mi gat longfala tingting,” King James Version]. Oltaem mi stap lavem man mo oltaem mi stap holemstrong promes blong mi.” (Eksodas 34⁠:⁠6) Sam yia biaen, Moses i presem Jeova long wan singsing se: “Olgeta fasin blong hem oli stret. God ya i holem olgeta promes blong hem, i no save mekem i no stret; hem i stret we i stret.” (Dutronome 32⁠:​4, NW ) Yes, ol fasin ya blong Jeova olsem sore, longfala tingting, mo stret fasin, oli joen wanples blong mekem gudfala frut i kamaot.

Jeova i Soem Longfala Tingting Bifo We Wota i Ron Bigwan

6. ?Long wanem nambawan fasin Jeova i soemaot longfala tingting long ol pikinini blong Adam mo Iv?

⁶ Fasin rebel blong Adam mo Iv long Iden i spolem gud fasin fren we tufala i bin gat wetem Man ya we i Wokem tufala, mo we i lavem tufala tumas, Jeova. (Jenesis 3⁠:​8-13, 23, 24) Fasin seraot ya i spolem ol pikinini blong tufala, from we oli bon wetem sin mo ded. (Rom 5:17-19) Nating se faswan man mo woman i jusum blong mekem sin, Jeova i letem tufala blong karem pikinini. Biaen, from we Jeova i lavem tumas ol man, hem i wokem rod blong ol man we oli kamaot biaen long tufala oli save fren wetem hem bakegen. (Jon 3:16, 36) Aposol Pol i eksplenem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet. Mo from we blad blong Kraes i ron, God i mekem yumi kam stret man finis long fes blong hem. Mo from we Kraes i ded olsem, i klia moa, se God bambae i no jajem yumi, bambae hem i sevem yumi. Fastaem yumi ol enemi blong hem, be from we Pikinini blong hem i ded, hem i mekem yumi kam ol fren blong hem. Mo naoia, we yumi kam fren blong hem finis, i klia moa, se from we Kraes i laef, bambae God i sevem yumi.”​—⁠Rom 5⁠:​8-10.

7. ?Olsem wanem Jeova i soem longfala tingting bifo we wota i ron bigwan, mo from wanem i stret we hem i spolem ol man long taem ya?

⁷ Jeova i mekem tingting blong hem i longfala long taem blong Noa. Bitim wan handred yia bifo we wota i ron bigwan, “God i luk long wol ya, [mo] hem i luk we wol i kam nogud tumas from ol rabis fasin blong ol man ya.” (Jenesis 6⁠:12) Nating se wol i fulap long ol nogud fasin, Jeova i gohed sam yia blong soemaot longfala tingting long ol man. Hem i talem se: “I nogud mi letem laef blong mi i stap olwe long ol man ya. Olgeta oli man blong wol nomo, we oli save ded. I stat naoia, bambae oli save stap kasem wan handred twanti yia nomo.” (Jenesis 6⁠:⁠3) Long ol 120 yia ya, trifala pikinini blong stret man ya Noa i bon. Mo tu, folem oda blong Jeova, Noa i bildim wan bigfala sip mo i givim woning long ol man se bambae wota i ron bigwan. Aposol Pita i talem se: “Long taem blong Noa, taem hem i stap wokem bigfala sip blong hem, God i stap wet long olgeta [ol man], we tingting blong hem i longfala, be olgeta oli no obei long hem. Nao long sip ya i gat eit man nomo, we God i yusum wota blong sevem olgeta.” (1 Pita 3⁠:20) Yes, stret famle blong Noa  nomo i lesin long mesej we hem i talemaot. Olgeta narafala man oli “no harem” woning we Noa i givim. (Matiu 24⁠:​38, 39, NW ) Blong plante yia Noa i bildim bigfala sip mo i mekem wok olsem “wan prija we i stap talemaot stret fasin.” Long ol yia ya, Jeova i givim janis long ol man blong tanem tingting blong olgeta from ol raf fasin mo mekem wok blong hem. (2 Pita 2⁠:5; Hibrus 11⁠:⁠7) Taswe, i stret nomo we Jeova i spolem ol man nogud long taem ya.

Jeova i Soem Longfala Tingting Long Ol Man Isrel

8. ?Olsem wanem Jeova i soem longfala tingting long ol man Isrel?

⁸ Ol yia we Jeova i soem longfala tingting long ol man Isrel oli moa long 120 yia. Long bitim 1,500 yia, oli stap olsem ol man we God i jusumaot olgeta. Be long ol yia ya, klosap oltaem oli stap traem longfala tingting blong Hem. Sam wik nomo afta we Jeova i mekem ol merikel blong oli kam fri long Ijip, oli girap oli mekem wosip long aedol. Fasin ya i soem se oli no gat respek nating long Man ya we i Sevem olgeta. (Eksodas 32⁠:4; Ol Sam 106⁠:21) Long ol yia we i kam biaen, taem ol man Isrel oli stap long draeples, oli komplen from kakae we Jeova i givim long olgeta tru long wan merikel. Oli toktok smol agens long Moses mo Eron, mo agens long Jeova tu. Oli slip olbaot wetem ol hiten woman, mo oli joen long wosip blong Bal. (Namba 11:​4-6; 14⁠:​2-4; 21⁠:5; 25⁠:​1-3; 1 Korin 10⁠:​6-11) Jeova i gat gudfala risen blong spolem ol man blong hem, be hem i no mekem olsem. Hem i mekem tingting blong hem i longfala.​—⁠Namba 14⁠:​11-21.

9. ?Long taem we ol Jaj mo king oli rul, olsem wanem Jeova i soem se hem i gat longfala tingting?

⁹ Long taem blong ol Jaj, ol man Isrel oli foldaon long wosip blong ol aedol bakegen mo bakegen. Taem oli mekem olsem, Jeova i letem olgeta oli go long han blong ol enemi blong olgeta. Be taem oli tanem tingting blong olgeta mo oli askem Jeova blong i givhan long olgeta, hem i mekem tingting blong hem i longfala mo i sanem ol jaj blong sevem olgeta. (Jajes 2⁠:​17, 18) Long ol yia we ol king oli rul, i no gat plante king we oli wosip long Jeova nomo. Mo aninit long rul blong ol gudfala king tu, ol man oli joenem trufala wosip wetem giaman wosip. Taem Jeova i sanem ol profet blong givim woning long olgeta blong stap tru long hem, oli no lesin long olgeta. Oli wantem lesin nomo long ol pris we oli stap mekem kruked fasin, mo ol giaman profet. (Jeremaea 5⁠:31; 25⁠:​4-7) Yes, ol man Isrel oli ronem ol profet we oli stap tru long God mo oli kilim sam long olgeta oli ded. (2 Kronikel 24⁠:​20, 21; Ol Wok 7⁠:​51, 52) Nating se i olsem, Jeova i gohed blong soem longfala tingting long olgeta.​—⁠2 Kronikel 36⁠:⁠15.

Tingting Blong Jeova i Longfala Yet

10. ?Wetaem longfala tingting blong Jeova i bin kasem mak blong hem?

¹⁰ Be, histri i soemaot se longfala tingting blong Jeova i gat mak blong hem. Long 740 B.K.T., * Hem i letem ol man Asiria oli winim ten laen blong Isrel mo tekem ol man Isrel oli go kalabus. (2 King 17⁠:​5, 6) Afta wan handred yia bakegen, hem i letem ol man Babilon oli kam agensem tufala laen blong Juda, mo oli spolem Jerusalem mo tempel blong hem.​—⁠2 Kronikel 36⁠:​16-19.

11. ?Olsem wanem Jeova i soem longfala tingting taem hem i mekem jajmen blong hem i kamaot?

¹¹ Be, long taem we Jeova i mekem jajmen blong hem i kamaot long ol man Isrel mo Juda, hem i soem longfala tingting tu. Tru long profet blong hem Jeremaea, Jeova i talemaot se ol man blong hem bambae oli gobak long kantri blong olgeta. Hem i talem se: “Bambae yufala i stap long Babilonia gogo kasem seventi yia, mo biaen, bambae mi kam tekemaot yufala, mi tekem yufala i kambak long stret ples blong yufala  bakegen, olsem we mi promes finis long yufala. Bambae yufala i faenem mi, mo . . . bambae mi tekem yufala i kambak long kantri ya we yufala i stap long hem fastaem.”​—⁠Jeremaea 29⁠:​10, 14.

12. ?Olsem wanem God i yusum smol grup blong ol man Jiu we oli gobak long Juda blong oli givhan long plan blong Hem long saed blong Mesaea?

¹² Wan smol grup blong ol man Jiu we oli kalabus, oli kambak long Juda. Long tempel we oli bildim bakegen long Jerusalem, oli stanemap wosip blong Jeova bakegen. Blong mekem ol promes blong God oli kamtru, smol grup ya bambae i kam “olsem wota blong naet, no smosmol ren, we Hae God i stap sanem i kam” blong mekem ol man oli haremgud mo blong givim plante samting long olgeta. Bambae oli no fraet mo oli strong ‘olsem laeon we i stap lukaot anamol long bus.’ (Maeka 5⁠:​7, 8) Maet lashaf blong profet tok ya i kamtru long taem blong ol Makabi. Long taem ya, famle blong Makabi i lidim ol man Jiu blong ronem ol enemi blong olgeta oli aot long Promes Lan, mo tempel we ol man oli bin mekem i kam doti, oli klinim mo dediketem bakegen. From samting ya, kantri mo tempel i stap gud blong wan narafala smol grup blong man we oli stap tru long God, oli save mekem welkam long pikinini blong God taem hem i kamtru olsem Mesaea.​—⁠Daniel 9⁠:25; Luk 1⁠:​13-17, 67-79; 3⁠:​15, 21, 22.

13. ?Afta we ol man Jiu oli kilim Pikinini blong God i ded, olsem wanem Jeova i gohed blong soem longfala tingting long olgeta?

¹³ Afta we ol man Jiu oli kilim Pikinini blong God i ded, Jeova i gohed blong tri yia haf, blong soem longfala tingting long olgeta. Hem i gohed blong givim janis long ol man Jiu nomo, blong oli kam haf blong laen blong Ebraham long saed blong spirit. (Daniel 9⁠:27) * Bifo mo afta long yia 36 K.T., * sam man Jiu oli joen long laen ya. Olsem Pol i talem, long rod ya, “i gat smol kampani i stap, we God i jusumaot olgeta finis, long gladhat blong hem.”​—⁠Rom 11⁠:⁠5.

14. (a) ?Long 36 K.T., hu i kasem janis ya blong joen long laen blong Ebraham long saed blong spirit? (b) ?Wanem filing blong Pol long saed blong fasin blong Jeova blong jusumaot ol memba blong Isrel long saed blong spirit?

¹⁴ Stat long 36 K.T., olgeta we oli no man Jiu mo we oli no proselaet, * oli kasem nambawan janis ya blong joen long laen blong Ebraham long saed blong spirit. Olgeta we oli soem se oli wantem joen long laen ya oli kasem gladhat mo longfala tingting blong Jeova tu. (Galesia 3:26-29; Efesas 2⁠:​4-7) Pol i soemaot fasin tangkiu from waes blong Jeova mo from frut we i kamaot long longfala tingting mo sore blong hem. From ol fasin ya, Isrel long saed blong spirit i kasem fulnamba blong hem. Pol i se: “!Olgeta! !Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem.”​—⁠Rom 11⁠:​25, 26, 33; Galesia 6⁠:​15, 16.

Longfala Tingting Blong Leftemap Nem Blong Hem

15. ?Wanem faswan risen from wanem God i mekem tingting blong hem i longfala, mo i nidim taem blong stretem wanem bisnes?

¹⁵ ?From wanem Jeova i mekem tingting blong hem i longfala? Faswan risen i blong leftemap tabu nem blong Hem mo blong pruvum se hae rul blong Hem i stret. (1 Samuel 12:20-22) Setan i bin stanemap wan kwestin long saed blong fasin blong Jeova blong rul. I nidim taem blong stretem bisnes ya long fes  blong olgeta samting we God i mekem. (Job 1⁠:​9-11; 42⁠:​2, 5, 6) Taswe, taem ol man blong Jeova oli stap harem nogud long Ijip, hem i talem long Fero se: “Mi wantem soemaot long yu we mi mi gat paoa, nao mi letem yu yu stap laef kam kasem naoia, blong mekem nius blong paoa blong mi bambae i kavremap olgeta ples long wol.”​—⁠Eksodas 9⁠:⁠16.

16. (a) ?Olsem wanem longfala tingting blong Jeova i givhan blong rerem wan kampani blong ol man we oli holem nem blong hem? (b) ?Olsem wanem bambae Jeova i leftemap nem blong hem mo pruvum se hae rul blong hem i stret?

¹⁶ Aposol Pol i talem bakegen ol tok we Jeova i bin talem long Fero, blong eksplenem olsem wanem longfala tingting blong Jeova i leftemap tabu nem blong Hem. Nao, biaen Pol i talem se: “Be God . . . i wantem soemaot, we hem i kros tumas long ol man we oli mekem sin, we i stret nomo blong oli lus, mo i wantem mekem olgeta oli save we hem i gat paoa. Be from we hem i gat longfala tingting, hem i no kwik blong panisim olgeta. Mo hem i wantem soemaot gudfala laef ya blong hem we i blong heven, we laef ya i gudfala tumas. Nao hem i givim laef ya long yumi ya, we hem i gat sore long yumi, mo we hem i mekem yumi rere finis blong kasem laef ya. Yumi ya, hem i singaot yumi finis, we bifo, sam long yumi oli laen blong Isrel, mo sam oli no laen blong Isrel. Long buk blong Profet Hosea, God i talem se, ‘Ol man ya we oli no man blong mi bifo, bambae mi singaot olgeta se, “Ol man blong mi.” ’ ” (Rom 9⁠:​17, 22-25) From we Jeova i mekem tingting blong hem i longfala, hem i save tekemaot long olgeta nesen, ‘wan kampani blong oli holem nem blong hem.’ (Ol Wok 15⁠:​14, NW ) Ol “tabu man” ya we oli obei long hed blong olgeta Jisas Kraes, oli rul long Kingdom we Jeova bambae i yusum blong leftemap tabu nem blong Hem mo blong pruvum se hae rul blong Hem i stret.​—⁠Daniel 2⁠:44; 7⁠:​13, 14, 27; Revelesen 4⁠:​9-11; 5⁠:​9, 10.

Longfala Tingting Blong Jeova Bambae i Sevem Man

17, 18. (a) ?Maet yumi mekem wanem fasin we i olsem se yumi daonem longfala tingting blong God? (b) ?Baebol i pulum yumi blong gat wanem tingting long saed blong longfala tingting blong Jeova?

¹⁷ I stat long taem we faswan man i mekem sin kam kasem taem blong yumi, Jeova i soemaot se hem i gat longfala tingting. Hem i mekem tingting blong hem i longfala bifo we wota i ron bigwan. From samting ya, i gat naf taem blong givim woning long ol man mo blong wokem rod blong sevem ol man. Be longfala tingting blong God i kasem mak blong hem, nao wota i ron bigwan. Sem mak tede, Jeova i mekem tingting blong hem i longfala bakegen. Maet, sam oli ting se God i stap wet longtaem tumas. Be, sipos yu letem tingting blong yu i foldaon from, i olsem we yu yu stap daonem God from longfala tingting blong hem.  Pol i talem se: “!Yufala i no tinghevi long fasin blong God nating! Hem i kaen tumas long yufala, mo i no save kros kwik long yufala, mo tingting blong hem i longfala tumas long yufala, be yufala i stap lukluk ol gudfala fasin ya blong hem olsem nating nomo. ?Yufala i no save we hem i kaen tumas long yufala blong pulum yufala, blong yufala i tanem tingting blong yufala, blong yufala i lego ol fasin nogud blong yufala?”​—⁠Rom 2⁠:⁠4.

¹⁸ I no gat wan long yumi we i save se tingting blong God i mas longfala olsem wanem, blong yumi kasem mak we Hem i glad long yumi mo i sevem yumi. Pol i givim advaes se: “Yufala i mas gohed blong wokem rod blong God i sevem yufala, mo yufala i fraet tu long hem.” (Filipae 2⁠:​12, NW ) Aposol Pita i raet i go long ol Kristin long taem blong hem se: “Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.”​—⁠2 Pita 3⁠:⁠9.

19. ?Yumi save mekem wanem long taem ya we Jeova i stap soemaot longfala tingting yet?

¹⁹ Taswe, yumi no mas kam taed blong wet long Jeova blong stretem ol samting. I gud yumi folem advaes we Pita i givim se: “Masta blong yumi i gat longfala tingting blong wet long yufala. Mo yufala i mas luk fasin ya blong hem olsem janis blong yufala blong God i sevem yufala.” ?God bambae i sevem hu? Yumi, mo plante narafala we oli no gat janis blong harem “gud nius ya blong Kingdom” yet. (2 Pita 3⁠:15; Matiu 24⁠:14) Samting ya bambae i givhan long yumi blong gat tangkiu from longfala tingting blong Jeova we i bigwan tumas. Mo bambae i pusum yumi blong soem longfala tingting long ol narafala.

[Ol futnot]

?Yu Yu Save Eksplenem?

• ?Long Baebol, tok ya “longfala tingting” i minim wanem?

• ?Olsem wanem Jeova i soem longfala tingting bifo we wota i ron bigwan, afta we ol man Isrel oli gofri long Babilon, mo long faswan handred yia K.T.?

• Talem ol impoten risen from wanem Jeova i bin soem longfala tingting.

• ?Yumi mas gat wanem tingting long saed blong longfala tingting blong Jeova?

[Kwestin]

[Tok blong pija long pej 9]

Longfala tingting we Jeova i soem bifo we wota i ron bigwan, i givim janis long ol man blong oli tanem tingting blong olgeta from sin

[Tok blong pija long pej 10]

Afta we Babilon i lus, ol man Jiu oli kasem blesing from longfala tingting blong Jeova

[Tok blong pija long pej 11]

Long faswan handred yia, ol man Jiu wetem ol man blong narafala nesen oli kasem blesing from longfala tingting blong Jeova

[Tok blong pija long pej 12]

Ol Kristin tede oli tekem evri janis blong kasem blesing from longfala tingting blong Jeova