Wan Kwestin

?Weples Jeova i mekem promes wetem Ebraham? ?Long Uru no Haran?

Faswan taem we yumi ridim stori blong promes we Jeova i mekem wetem Ebraham, hemia long Jenesis 12⁠:​1-3, we i talem se: “Hae God i talem long Ebram se, ‘Ebram. Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu. Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante . . . Mi bambae mi yusum yu blong blesem ol man blong olgeta narafala kantri long wol.’ ” * Maet Jeova i mekem promes ya wetem Ebraham taem Ebraham i stap long Uru, mo biaen, hem i mekem promes ya bakegen wetem hem long Haran.

Long faswan handred yia, Steven i tokbaot taem ya we Jeova i talem long Ebraham blong muf i go long Kenan. Taem Steven i stap toktok long Sanhedrin, hem i talem se: “God ya, nem blong hem i hae we i hae, mo hem nomo i soemaot hem long olfala blong yumi Ebraham, long taem ya we Ebraham i stap yet long kantri blong hem, Koldia long Mesopotemia. Long taem ya hem i no go mekem ples blong hem long taon ya Haran yet. God i talem long hem se, ‘Yu mas aot long famle blong yu, mo ples blong yu, blong go long wan ples we mi bambae mi soemaot long yu.’ ” (Ol Wok 7:​2, 3) Ebraham, hem i blong Uru, mo olsem Steven i soemaot, Ebraham i stap yet long Uru taem Jeova i talem long hem fastaem blong go long Kenan. (Jenesis 15⁠:7; Nehemaea 9⁠:⁠7) Steven i no tokbaot promes we God i mekem wetem Ebraham, be Jenesis 12:​1-3 i soem se God i mekem promes ya long semtaem we hem i talem long Ebraham blong go long Kenan. Taswe, i stret nomo blong talem se Jeova i mekem promes ya wetem Ebraham long Uru.

Be taem yumi ridimgud stori blong Jenesis, yumi luk we Jeova i talem promes ya bakegen long Ebraham taem hem i stap long Haran. Biaen, long Kenan, hem i talemaot promes ya plante taem bakegen, mo i mekem sam haf blong hem oli kam moa klia. (Jenesis 15⁠:5; 17:​1-5; 18⁠:18; 22⁠:​16-​18) Folem Jenesis 11⁠:​31, 32, papa blong Ebraham, Tera, hem i tekem Ebraham, Sera, mo Lot, oli aot long Uru blong go long Kenan. Oli kamtru long Haran mo oli stap long ples ya kasem we Tera i ded. Ating Ebraham i stap longtaem lelebet long Haran, nao hem i kam rij. (Jenesis 12⁠:⁠5) Mo biaen, Naho, brata blong Ebraham, hem tu i muf i kam long ples ya.

Afta we Baebol i tokbaot ded blong Tera, hem i talem ol tok we Jeova i bin talem long Ebrabam, nao i gohed se: “Ebraham i mekem stret olsem we Jeova i talem long hem.” (Jenesis 12⁠:​4, NW ) Taswe, Jenesis 11:⁠31 kasem 12⁠:4 i givim tingting ya se Jeova i talem ol tok we i stap long Jenesis 12:​1-3 afta long ded blong Tera. Sipos i tru olsem, hemia i min se Ebraham i aot long Haran mo i go long ples we Jeova i talem long hem blong go, folem wan oda we hem i jes kasem, wetem wan narafala oda we hem i bin harem long Uru sam yia bifo.

Long Jenesis 12⁠:​1, Jeova i talem long Ebraham se: “Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu.” Fastaem, “kantri” blong Ebraham hem i Uru, mo “famle” blong papa blong hem i stap long ples ya. Be, papa blong Ebraham i tekem famle blong hem i go long Haran, nao Ebraham i tingbaot Haran olsem stret ples blong hem. Afta we Ebraham i stap plante yia long Kenan, hem i sanem wan man blong wok blong hem i go long ‘kantri ya we hem i bon long hem,’ blong faenem wan waef blong Aesak. Nao, man blong wok ya i go long “taon ya we Naho i stap long hem” (maet Haran no wan taon klosap). (Jenesis 24:​4, 10) Long ples ya, man blong wok ya i jusumaot Rebeka long laen blong Ebraham, hemia long bigfala famle blong Naho.​—⁠Jenesis 22⁠:​20-​24; 24:​15, 24, 29; 27⁠:​42, 43.

Taem Steven i stap toktok long Sanhedrin, hem i talem se: “Taem papa blong hem [Ebraham] i ded, God i tekem hem i kam stap long kantri ya we yufala i stap long hem naoia.” (Ol Wok 7⁠:⁠4) Samting ya i soemaot se Jeova i toktok long Ebraham long Haran. I stret nomo blong bilif se long taem ya, Jeova i talem bakegen promes blong hem long Ebraham, olsem Jenesis 12:​1-3 i talem, from we promes ya i stat kamtru taem Ebraham i muf i go long Kenan. Taswe, taem yumi stadigud long stori ya, yumi faenemaot se ating fastaem, Jeova i mekem promes blong hem wetem Ebraham long Uru, mo biaen, Hem i talemaot promes ya bakegen taem Ebraham i stap long Haran.

[Futnot]