“Bambae Mi Luk Yu Bakegen Long Kingdom Blong God”
“Bambae Mi Luk Yu Bakegen Long Kingdom Blong God”
“!Gudfala Fren! Rupert, tede oli jajem mi se mi mas ded. Yu no mas krae from mi. Mi sanem lav blong mi i go long yu mo long evriwan we oli stap long haos. Bambae mi luk yu bakegen long Kingdom blong God.”
LONG Jun 8, 1942, Franc Drozg i raetem daon ol toktok ya sam menet nomo bifo we ol soldia blong Nasi oli sutum hem. ?From wanem oli kilim hem i ded?
Ripot we i stap long Musium blong National Liberation long Maribor, Slovenia, i talem se man ya i gat 38 yia, mo wok blong hem i blong bonem aean long faea mo i kilim blong mekem ol defdefren samting long hem. Taem ol man Jemani oli winim Slovenia, hem i no bin wantem joenem Wehrmannschaft, wan grup blong Jemani we i mekem wok olsem ami. Man ya i wan Bibelforscher, no wan Baebol Studen, hemia nem blong ol Witnes blong Jeova bifo. From we hem i folem wanem we Aesea 2:4 i talem, hem i no save sapotem ol Nasi long faet. Hem i talemaot se hem i wan man blong Kingdom blong God.—Matiu 6:33.
Long Ptuj, taon we Franc i bon long hem, ol man oli savegud hem olsem wan man we i gat strong tingting blong talemaot Kingdom blong God. (Matiu 24:14) Nating we hem i kasem plante hadtaem, be hem i gohed nomo blong talemaot gud nius we i no spel nating gogo kasem we oli holem hem long Mei 1942.
Ol Nasi oli yusum strong fasin blong agensem plante Witnes blong Jeova we oli stap long Slovenia. Franc i wan long ol faswan we oli kilim olgeta oli ded from bilif blong olgeta. Sem mak long ol Kristin blong faswan handred yia, bilif blong hem i kam strong from tok ya: “Long rod blong go insaed long niufala wol ya we God i king long hem, yumi save kasem plante trabol, be nating, yumi mas stanap strong.” (Ol Wok 14:22) From ol laswan toktok blong hem, i klia we hem i bilif se gavman blong heven i rili tru. Hem i se: “Bambae mi luk yu bakegen long Kingdom blong God.”
[Foto Credit Line blong pija long pej 32]
Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia