Jeova i Olsem Sefples Blong Yumi

“Hae God [“Jeova,” NW ] . . . i stap blokemgud yu, i stap lukaot gud long yu [“hem i olsem sefples blong yu,” NW ]. Nao from samting ya, i no gat wan samting nogud we bambae i save kam spolem yu.”—OL SAM 91:9, 10.

1. ?From wanem yumi save talem se Jeova i olsem sefples blong yumi?

 JEOVA i rili wan trufala sefples blong ol man blong hem. Taem yumi ona long hem fulwan, i tru ‘plante taem yumi gat trabol, be neva tingting blong yumi i foldaon. Samtaem, yumi no save rod, be neva yumi lus olgeta. Nating we ol man oli stap ronem yumi, be oltaem yumi gat ol fren we oli stap givhan long yumi. Ol man oli save kilim yumi, be neva yumi ded olgeta.’ ?From wanem i olsem? From we Jeova i stap givim paoa long yumi, hemia ‘paoa ya we i bigwan tumas i blong Hem, i no blong yumi.’ (2 Korin 4:7-9) Yes, Papa blong yumi long heven i stap givhan long yumi blong laef folem fasin we hem i wantem, mo yumi save bilif strong long tok blong Sam 91 se: “Hae God [“Jeova,” NW ] i hae we i hae, mo from we yu yu stap putum tingting blong yu i stap long hem, hem bambae i stap blokemgud yu, i stap lukaot gud long yu [“hem i olsem sefples blong yu,” NW ]. Nao from samting ya, i no gat wan samting nogud we bambae i save kam spolem yu.”—Ol Sam 91:9, 10.

2. ?Yumi save talem wanem long saed blong Sam 91 mo promes we i stap long hem?

² Maet Moses nao i raetem ol tok ya blong Sam 91. Smol stamba tok long stat blong Sam 90 i talem se Moses i raetem Sam ya, mo i no gat nem blong wan defren man long Sam 91 we i kam stret biaen. Taem oli singim Sam ya, maet wan man nomo i bin singsing fastaem (91:1, 2), nao wan grup i singsing biaen (91:3-8). Nao, ating wan man nomo i singsing bakegen (91:9a), mo wan grup i ansa bakegen (91:9b-13). Nao ol lastok blong hem, maet wan man nomo i singim (91:14-16). Nating se oli bin mekem olsem wanem, be Sam 91 i givim promes se ol tabu Kristin bambae oli stap sef olsem wan grup. Mo promes ya i go tu long grup we i stap wok wetem ol tabu Kristin ya, we olgeta wanwan oli givim laef blong olgeta i go long Jeova finis. * Naoia,  yumi we i joen long tufala grup ya, bambae yumi lukluk gud long Sam ya.

Stap Sef Long ‘Ples Haed Blong God’

3. (a) ?Wanem ya “ples haed blong Hae God”? (b) ?Yumi harem save wanem, taem ‘yumi stap long sado blong hemia we i gat olgeta paoa’?

³ Man blong raetem Sam 91 i singsing se: “Man we i stap long ples haed blong Hae God, bambae i stap sef long sado blong hemia we i gat olgeta paoa. Bambae mi mi talem long Jeova se: ‘Yu yu olsem wan sef ples, yu yu olsem strongfala haos we man i save go haed long hem. Yu yu God blong mi, mi mi trastem yu.’ ” (Ol Sam 91:1, 2, NW ) “Ples haed blong Hae God” i no wan prapa ples, be i min se God i stap blokem gud yumi, antap moa, ol tabu man blong hem we Setan i stap traehad tumas blong spolem olgeta. (Revelesen 12:15-17) Sipos yumi no stap klosap long God long saed blong spirit we hem i save blokemgud yumi, bambae Setan i save spolem yumi evriwan. Yumi “stap sef long sado blong hemia we i gat olgeta paoa,” taswe yumi harem save se God i stap lukaot gud long yumi, i stap blokem yumi olsem wan sado. (Ol Sam 15:1, 2; 121:5) I no gat wan ples we i sef moa no wan strong haos blong haed we ol enemi oli fraet moa long hem, i winim King mo Masta blong yumi, Jeova.—Ol Proveb 18:10.

4. ?Wanem sam trik we Setan, “man blong ronem pijin,” i stap yusum, mo olsem wanem yumi save ronwe long ol trap blong hem?

⁴ Man blong raetem Sam 91 i gohed olsem: “Hem [“Jeova,” NW ] bambae i tekemaot yumi long trap blong man blong ronem pijin, mo long sik we i mekem man i safa.” (Ol Sam 91:3, NW ) Long Isrel bifo, plante man oli yusum ol trap blong kasem ol pijin. Sam trap we Setan, “man blong ronem pijin,” i stap yusum, i gat rabis wol ya wetem ol man blong hem, mo “ol giaman trik.” (Efesas 6:11, futnot long NW ) Hem i stap putum long fored blong yumi ol trap we oli haed, we oli save pulum yumi blong mekem rabis fasin, mo oli save spolem yumi long saed blong spirit. (Ol Sam 142:3) Be from we yumi sakemaot finis ol fasin we oli no stret, yumi “olsem wan pijin we i kamaot long trap, i ronwe.” (Ol Sam 124:7, 8) !Yumi talem tangkiu tumas long Jeova we i stap sevem yumi long rabis ‘man ya blong ronem pijin’!—Matiu 6:13.

5, 6. ?Wanem “sik” ya we i mekem plante man i “safa,” mo from wanem ol man blong Jeova oli no kasem sik ya?

⁵ Man blong raetem Sam 91 i tokbaot “sik we i mekem man i safa.” I gat samting olsem wan sik we i save kasem fulap man kwiktaem, i stap mekem olgeta man long wol oli “safa,” wetem ol man we oli stanap strong long saed blong hae rul blong Jeova tu. Long saed blong samting ya, Arnold Toynbee we i stap stadi long histri i raetem se: “Stat long en blong Seken Wolwo kasem naoia, fasin ya blong flas from kantri blong yumi i mekem se plante moa kantri oli kam independen, namba blong olgeta i tu taem antap long hemia blong bifo . . . Tingting blong ol man naoia se oli wantem seraot moa.”

⁶ Long ol handred yia we oli pas finis, sam lida blong wol oli bin mekem se trabol we i stap seraotem ol man, i kam antap moa long olgeta ples blong wol. Mo tu, ol lida ya oli talem long ol man blong givim ona long olgeta mo long sam aedol no saen. Be Jeova i no save letem ol gudfala man blong hem oli foldaon long wan “sik” olsem. (Daniel 3:1, 2, 20-27; 6:7-10, 16-22) Long fulwol, yumi givim ona i go long Jeova nomo, olsem wan kampani blong ol Kristin brata we oli laeklaekem olgeta. Mo from samting ya, yumi folem rul blong Baebol blong no joen long politik, mo no faet, mo yumi no mekem i moa gud long samfala i winim ol narafala. Yumi save se “sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35; Eksodas 20:4-6; Jon 13:34, 35; 17:16; 1 Pita 5:8, 9) Nating se ol man oli ronem yumi mo yumi “safa” from we yumi trufala Kristin, be yumi glad mo yumi stap sef long saed blong spirit “long ples haed blong Hae God.”

7. ?Olsem wanem ‘yumi stap gud aninit long wing’ blong Jeova?

⁷ From we Jeova i sefples blong yumi, yumi harem gud long tok ya: “Bambae hem i blokem yu yu stap gud olsem we pikinini blong faol i stap gud aninit long wing blong mama blong hem. Oltaem tingting blong hem bambae i stap strong long yu, nao bambae hem i lukaot gud long yu, i blokemgud yu [“i olsem wan bigfala sil no wan stonwol we yu haed biaen long hem,” NW ].” (Ol Sam 91:4) God i stap blokem yumi, olsem wan mama faol i mekem long ol pikinini blong hem. (Aesea 31:5) ‘Hem i blokem yumi i stap gud . . . aninit long wing’ blong hem. Faol i yusum wing blong hem blong kavremap ol pikinini blong hem, nao i no gat samting i save kam spolem olgeta. Yumi olsem ol pikinini faol ya, we yumi stap sef aninit long wing blong Jeova, from we yumi stap gud long trufala Kristin ogenaesesen blong hem.—Rut 2:12; Ol Sam 5:1, 11.

8. ?Olsem wanem fasin blong Jeova blong putum ‘tingting blong hem i stap strong long yumi’ i olsem wan sil mo wan stonwol blong blokem yumi?

⁸ Yumi trastem God se ‘tingting blong hem i stap strong long yumi,’ mo hem i stap tru long yumi. Fasin  ya i olsem wan bigfala sil we oli yusum long ol faet long taem bifo. Plante taem ol sil ya oli luk olsem wan doa blong haos, we oli naf blong blokem bodi blong man fulwan. (Ol Sam 5:12) Sipos yumi bilif strong se God i stap blokem gud yumi olsem, bambae yumi no save fraet long wan samting. (Jenesis 15:1; Ol Sam 84:11) Fasin ya blong God blong putum tingting blong hem i stap strong long yumi, wetem fasin blong yumi blong bilif, oli olsem wan bigfala sil we i stap blokem gud yumi, nao ol ara blong Setan we faea i laet long olgeta oli no save kasem yumi, mo ol enemi oli no save kilim yumi. (Efesas 6:16) Fasin ya blong hem i olsem wan bigfala hip graon, no wan stonwol, we yumi save haed biaen long hem mo stanap strong.

‘Bambae Yumi No Save Fraet’

9. ?From wanem naet i wan taem we man i save fraet long hem, be from wanem yumi no stap fraet?

⁹ From we God i stap blokem gud ol man blong hem, Sam 91 i talem se: “Long naet, bambae yu no save fraet long ol samting we oli stap mekem man i fraet, mo long dei, bambae yu no save fraet long ol man we oli girap blong kam kilim yu [“ara we i stap flae long dei,” NW ]. Bambae yu no moa save fraet nating long ol rabis sik ya we oli stap kasem man long tudak, mo long ol rabis fasin ya we oli stap kilim man long delaet [“medel dei,” NW ].” (Ol Sam 91:5, 6) I gat plante nogud samting we i stap kamaot long tudak, taswe naet i wan taem we man i save fraet long hem. Naoia, tudak long saed blong spirit i stap kavremap fulwol. Plante taem, ol enemi blong yumi oli wok haed blong spolem yumi long saed blong spirit mo blong blokem wok blong prij. Be ‘yumi no save fraet long ol samting long naet,’ from we Jeova i stap lukaot gud long yumi.—Ol Sam 64:1, 2; 121:4; Aesea 60:2.

10. (a) ?Maet “ara we i stap flae long dei” i minim wanem, be yumi mekem wanem taem ara ya i kam from yumi? (b) ?Wanem ‘ol rabis sik we oli stap kasem man long tudak,’ mo from wanem yumi no fraet long samting ya?

¹⁰ I luk olsem se “ara we i stap flae long dei” i minim ol tok agens. (Ol Sam 64:3-5; 94:20) Taem yumi gohed nomo blong talemaot ol save we i tru, ol klia toktok we ol man oli sakem blong agensem tabu wok blong yumi i no gat paoa. Mo tu, yumi no fraet long ‘ol rabis sik we oli stap kasem man long tudak.’ Hemia i no ol prapa sik, be hem i minim sik long saed blong fasin mo long saed blong bilif. Wol ya blong Setan i fulap long sik ya from we hem i stap long tudak. (1 Jon 5:19) Sik ya i mekem tingting mo hat blong ol man i kam olsem we i ded, nao oli stap long tudak long saed blong Jeova, ol stamba tingting blong hem, mo ol rod we hem i stap yusum blong givhan long yumi wetem lav. (1 Timoti 6:4) Long medel blong tudak ya, yumi no fraet, from we yumi harem gud long fulap save we yumi kasem, we i olsem laet long saed blong spirit.—Ol Sam 43:3.

11. ?Wanem i stap hapen long olgeta we ‘rabis fasin i stap kilim olgeta long medel dei’?

¹¹ Yumi no fraet long ‘ol rabis fasin we oli stap kilim man long medel dei.’ Maet “medel dei” i minim ol save blong wol we i luk olsem se i givim laet long ol man. Olgeta we oli folem tingting blong wol blong ronem ol sas samting, bambae oli harem nogud, from we fasin ya bambae i spolem olgeta long saed blong spirit. (1 Timoti 6:20, 21) Taem yumi gohed wetem strong tingting blong talemaot gud nius blong  Kingdom, yumi no save fraet long ol enemi blong yumi, from we Jeova i stap lukaot gud long yumi.—Ol Sam 64:1; Ol Proveb 3:25, 26.

12. ?Plante taosen oli “foldaon” klosap long hu, mo olsem wanem oli foldaon?

¹² Man blong raetem Sam 91 i gohed olsem: “Maet wan taosen man we oli stap klosap long yu oli save foldaon, oli ded. Maet ten taosen man we oli stap raonabaot long yu oli save lus evriwan, be ol trabol ya bambae oli no save spolem yu. Bambae yu save luk stret long ae blong yu, we ol man nogud oli stap kasem panis.” (Ol Sam 91:7, 8) Plante ‘we oli stap klosap long yumi’ oli “foldaon” oli ded long saed blong spirit, from we oli no trastem Jeova olsem sefples blong olgeta. I olsem we “ten taosen man” oli foldaon finis “raonabaot” long ol man Isrel long saed blong spirit tede. (Galesia 6:16) Be, nating se yumi wan tabu Kristin no yumi wok wetem olgeta olsem wan man we i givim laef blong hem i go long Jeova finis, yumi stap sef long “ples haed” blong God. Yumi ‘luk stret long ae blong yumi we ol man nogud oli stap kasem panis.’ Olgeta oli stap kasem trabol long saed blong bisnes, skul, mo long plante narafala samting bakegen.—Galesia 6:7.

‘I No Gat Samting Nogud i Save Spolem Yumi’

13. ?Wanem ol samting nogud we oli no save spolem yumi, mo from wanem?

¹³ Ol samting blong wol we fastaem oli mekem man i harem se i stap sefgud, naoia oli stap brokdaon. Be yumi putum God long fasples long laef blong yumi, mo tok blong Sam ya i mekem tingting blong  yumi i strong. Hem i se: “Hae God i hae we i hae, mo from we yu yu stap putum tingting blong yu i stap long hem [“hem i wan strong haos we yu yu stap long hem,” NW ], hem bambae i stap blokemgud yu, i stap lukaot gud long yu [“hem i sefples blong yu,” NW ]. Nao from samting ya, i no gat wan samting nogud we bambae i save kam spolem yu, i no gat wan rabis sik we bambae i save kam klosap long haos [“tapolen,” NW ] blong yu.” (Ol Sam 91:9, 10) Yes, Jeova i sefples blong yumi. Mo tu, yumi mekem Hae God i kam olsem ‘wan strong haos’ we yumi save haed long hem. Yumi presem Jeova olsem King blong heven mo wol, yumi ‘putum tingting blong yumi i stap’ long hem olsem wan strong haos we yumi harem se yumi sef oltaem long hem, mo yumi talemaot gud nius blong Kingdom blong hem. (Matiu 24:14) From samting ya, ‘i no gat wan samting nogud we bambae i save kam spolem yumi,’ hemia ol nogud samting we Sam ya i tokbaot finis. Nating se yumi kasem ol semfala trabol olsem ol narafala man, taem graon i seksek, i gat hariken, wota i ron bigwan, hanggri, faet long kantri, be ol trabol ya oli no save spolem bilif blong yumi mo fasin blong yumi blong stap sef long saed blong spirit.

14. ?From wanem i no gat samting we i olsem wan rabis sik we bambae i kasem ol man blong Jeova?

¹⁴ Ol tabu Kristin oli stap longwe long ol fasin blong wol ya. Oli olsem ol strenja we oli stap long ol haos tapolen. (1 Pita 2:11) ‘I no gat wan rabis sik we bambae i save kam klosap long haos tapolen blong olgeta.’ Nating se yumi blong grup ya we bambae i laef long heven long fiuja, no grup we bambae i laef long wol ya, yumi no joen long ol fasin blong wol. Taswe, yumi no kasem ol rabis sik blong wol we oli mekem man i ded long saed blong spirit. Hemia ol sik olsem, ol rabis fasin blong seks, fasin blong ronem mane mo ol sas samting, ol giaman skul, mo wosip blong wael “anamol” wetem “pija” blong hem we i minim Yunaeted Nesen.—Revelesen 9:20, 21; 13:1-18; Jon 17:16.

15. ?Ol enjel oli givhan long yumi olsem wanem?

¹⁵ Nao man blong raetem Sam 91 i tokbaot olsem wanem Jeova i stap lukaot gud long yumi, i se: “Hae God bambae i putum ol enjel blong hem oli stap raonabaot long yu blong oli stap lukaot gud long yu long weples yu yu pas long hem. Bambae oli holem yu long han blong olgeta, oli leftemap yu i go antap, blong yu no save kikim ston long leg blong yu.” (Ol Sam 91:11, 12) Jeova i givim paoa long ol enjel blong oli lukaot gud long yumi. (2 King 6:17; Ol Sam 34:7-9; 104:4; Matiu 26:53; Luk 1:19) Oli lukaot gud long yumi ‘long weples yumi pas long hem.’ (Matiu 18:10) Yumi harem gud se ol enjel oli lidim yumi mo lukaot long yumi taem yumi talemaot Kingdom, mo yumi no foldaon long saed blong spirit. (Revelesen 14:6, 7) Ol “ston,” hemia tabu we sam gavman oli putum long wok blong yumi. Be samting ya tu, i no save mekem yumi foldaon we God i no moa glad long yumi.

16. ?Olsem wanem “laeon” mo “snek” i no gat semfala fasin blong agensem ol enemi blong olgeta, mo yumi mekem wanem taem olgeta we oli olsem laeon mo snek oli agensem yumi?

¹⁶ Man blong raetem Sam i gohed se: “Bambae yu save purumbut long ol laeon mo long ol snek blong kilim olgeta. Ol laeon ya we ol man oli fraet long olgeta, mo ol posen snek ya, be bambae yu save purumpurumbut long olgeta.” (Ol Sam 91:13) Taem laeon i wantem kilim i ded wan anamol, hem i go stret long hem, i kilim hem long open ples nomo. Long sem fasin, sam enemi blong yumi oli no haedem fasin agens blong olgeta, oli putumap ol klia loa blong traem blokem wok blong prij we yumi mekem. Antap long hemia, i gat ol narafala fasin agens we yumi sek long olgeta, oli olsem wan posen snek we i haed, be wantaem nomo, hem i girap i kakae man. Sam samtaem, ol lida blong skul oli haed, nao oli pusum ol man we oli putumap ol loa, wetem ol jaj, mo sam narafala man, blong oli agensem yumi. Be, Jeova i stap givhan long yumi blong stretem ol trabol ya long kot, long fasin we i gat pis. Olsem nao, ‘yumi blokem ol enemi blong gud nius, mo mekem hem i stanap strong long saed blong loa.’—Filipae 1:7, NW; Ol Sam 94:14, 20-22.

17. ?Olsem wanem yumi save purumbut long “laeon”?

¹⁷ Man blong raetem Sam 91 i talem se yumi save purumbut “long ol laeon mo long ol snek.” Wan laeon i save kros tumas, mo maet wan snek i bigwan we i mekem man i fraet. (Aesea 31:4) Be nating se laeon i kros olsem wanem taem hem i kam blong agensem yumi, yumi save mekem olsem we yumi purumbut long hem taem yumi obei long God i bitim we yumi obei long ol man mo ol ogenaesesen blong wol ya we oli gat fasin olsem laeon. (Ol Wok 5:29) Ale, “laeon” ya we i denja, i no save givim kil long yumi long saed blong spirit.

18. ?Ating “snek” i save mekem yumi tingbaot hu, mo yumi mas mekem wanem taem hem i agensem yumi?

¹⁸ Baebol ya Septuagint long Grik i yusum tok ya “algita” long ples blong “snek.” Maet samting ya i pulum yumi blong tingbaot “bigfala algita ya, . . . snek ya blong bifo we nem blong hem ‘Setan’ no ‘Man we i agensem man.’ ” (Revelesen 12:7-9; Jenesis 3:15) Yes, Setan i olsem wan bigfala algita no posen snek we hem i naf blong skwisim enemi blong hem gogo i ded, nao i swolemdaon. (Jeremaea 51:34) Setan i stap yusum ol  wari blong wol ya blong traem skwisim yumi mo swolemdaon yumi. Blong kamaot long han blong hem, yumi mas faet agensem hem mo purumbut long “snek” ya. (1 Pita 5:8) Smol grup blong ol tabu Kristin we oli stap yet long wol ya oli mas mekem samting ya sipos oli wantem givhan blong mekem Rom 16:20 i kamtru.

Jeova Nomo i Save Sevem Yumi

19. ?From wanem yumi mekem Jeova i olsem sefples blong yumi?

¹⁹ Man we i wokem Sam 91 i raetem tok we God i talem long ol man we oli stap wosip long hem tru, i se: “Mi bambae mi sevem olgeta we oli laekem mi tumas. Mi bambae mi lukaot gud long olgeta we oli savegud nem blong mi.” (Ol Sam 91:14, NW ) Ol tok ya “mi bambae mi lukaot gud long olgeta,” i save minim tu se “mi bambae mi putum olgeta long wan ples we i hae.” From we oli stap long wan ples we i hae, i no gat wan samting nogud i save kasem olgeta. Yumi wosip long Jeova mo yumi mekem hem i kam sefples blong yumi, from we ‘yumi laekem hem tumas.’ (Mak 12:29, 30; 1 Jon 4:19) Taswe, ‘God i sevem yumi’ long ol enemi blong yumi. Bambae hem i no save letem olgeta oli waepemaot fulwan grup blong yumi long wol ya. Bambae Hem i sevem yumi from we yumi savegud nem blong hem mo yumi stap singaot long hem wetem bilif. (Rom 10:11-13) Mo tu, yumi gat strong tingting blong ‘wokbaot long nem blong hem, gogo i no save finis.’—Maeka 4:5, NW; Aesea 43:10-12.

20. ?Long en blong Sam 91, Jeova i mekem wanem promes long ol gudfala man blong hem?

²⁰ Long en blong Sam 91, Jeova i tokbaot ol gudfala man blong wok blong hem se: “Sipos oli singaot long mi, mi bambae mi ansa long olgeta, mo sipos oli stap long trabol, mi bambae mi stap wetem olgeta. Mi bambae mi tekemaot olgeta long trabol, mi leftemap olgeta, mi givim hae nem long olgeta. Mi bambae mi sevem olgeta, mi givim longfala laef long olgeta.” (Ol Sam 91:15, 16) Taem ol prea blong yumi blong singaot long God oli laenap wetem samting we hem i wantem, hem i ansa long olgeta. (1 Jon 5:13-15) Yumi fesem plante trabol finis from we Setan i pusum ol man blong hem blong agensem yumi. Be ol tok ya se, “sipos oli stap long trabol, mi bambae mi stap wetem olgeta,” i mekem yumi rere from ol traem long fiuja, mo i olsem wan promes se God bambae i givhan long yumi blong stanap strong taem hem i spolem rabis fasin blong wol ya.

21. ?Olsem wanem God i leftemap ol tabu man blong hem finis, i givim haenem long olgeta?

²¹ Nating se Setan i kros bitim mak long yumi, fulnamba blong ol tabu man we oli stap yet long wol ya bambae oli kasem gudfala laef long heven long stret taem blong Jeova, afta we oli gat wan “longfala laef” long wol ya. Plante taem finis, God i sevem ol tabu man blong hem, mo samting ya i leftemap olgeta mo i givim haenem long olgeta long saed blong spirit. !Mo tu, oli kasem bigfala blesing ya blong lidim wok blong ol Witnes blong Jeova long wol long ol las dei ya! (Aesea 43:10-12) Long bigfala faet blong Amagedon, Jeova bambae i mekem hae rul blong hem i win mo bambae hem i leftemap tabu nem blong hem. Long faet ya, bambae hem i sevem ol man blong hem long wan fasin we i bigwan moa i bitim olgeta taem bifo.—Ol Sam 83:18; Esikel 38:23; Revelesen 16:14, 16.

22. ?Jeova bambae i “sevem” hu?

²² Nating se yumi wan tabu Kristin no yumi wok wetem olgeta olsem wan man we i givim laef blong hem i go long Jeova finis, yumi lukluk i go long God nomo blong sevem yumi. Long ‘bigfala dei blong Jeova we bambae ol man oli fraet gud’ long hem, God bambae i sevem olgeta we oli stap tru long hem mo we oli stap mekem wok blong hem. (Joel 2:30-32) ‘Longfala laef we hem i givim,’ hemia laef we i no save finis. Yumi save kasem laef ya sipos yumi stap wetem “bigfala hip blong man” we oli laef tru long bigfala dei blong Jeova i go long niufala wol, mo sipos yumi stap tru long God long laswan bigfala traem. Mo bambae hem i mekem plante milian dedman oli laef bakegen tu. (Revelesen 7:9; 20:7-15) Tru ya, Jeova bambae i glad tumas blong yusum Jisas Kraes blong ‘sevem yumi.’ (Ol Sam 3:8) Wetem tingting we i strong long nambawan fiuja ya, yumi mas gohed blong lukluk i go long God blong givhan long yumi blong kaontem ol dei blong yumi, blong bambae oli givim ona long hem. Long ol toktok mo fasin blong yumi, yumi mas gohed blong soemaot gud se Jeova i olsem sefples blong yumi.

[Futnot]

?Bambae Yu Yu Ansa Olsem Wanem?

• ?Wanem ya “ples haed blong Hae God”?

• ?From wanem yumi no fraet long wan samting?

• ?Olsem wanem ‘i no gat wan samting nogud we bambae i save spolem yumi’?

• ?From wanem yumi talem se Jeova nomo i save sevem yumi?

[Kwestin]

[Tok blong pija long pej 17]

?Olsem wanem fasin blong Jeova blong putum tingting blong hem i stap strong long yumi i olsem wan bigfala sil blong yumi?

[Tok blong pija long pej 18]

Jeova i stap givhan long ol man blong hem blong oli prij, nating se samfala oli agensem olgeta stret no long fasin haed

[Credit Line]

Cobra: A. N. Jagannatha Rao, Trustee, Madras Snake Park Trust