Jisas i Sevem Man—?Olsem Wanem?

“!Jisas i sevem man!” “!Jisas i Sevia blong yumi!” Long plante kantri blong wol, ol mesej olsem oli stap olbaot long wol blong ol haos mo long ol pablik ples. Plante milian man oli rili bilif long hat blong olgeta se Jisas i Sevia blong olgeta. Sipos yu yu askem long olgeta se, “?Olsem wanem Jisas i sevem yumi?” maet bambae oli ansa se, “Jisas i ded from yumi” no, “Jisas i ded from sin blong yumi.” Yes, ded blong Jisas i rod blong sevem yumi. ?Be olsem wanem ded blong wan man nomo i save pemaot sin blong plante man? ?Sipos wan man i askem long yu se, “?Olsem wanem ded blong Jisas i sevem yumi?” bambae yu yu ansa olsem wanem?

ANSA we Baebol i givim long kwestin ya i isi mo i klia, be mining blong hem i bigwan. Blong kasem save se hem i impoten olsem wanem, fastaem yumi nidim blong tingting long laef mo ded blong Jisas olsem rod blong stretem wan problem we i strong tumas. Biaen nomo, bambae yumi naf blong kasem save se ded blong Jisas i wan samting we i sas tumas.

Taem we God i mekem se Jisas i givim laef blong hem, Hem i stap stretem wan problem we i stat long taem we Adam i mekem sin. !Sin ya i mekem wan bigfala trabol tumas! Faswan man mo woman blong hem, Iv, tufala i stret gud olgeta fastaem. Naesfala garen blong Iden i hom blong tufala. God i givim gudfala wok long tufala blong tufala i lukaot gud long garen ya. Wetem lav, tufala i mas lukaot gud long ol anamol long  wol. Mo taem ol man oli kam plante mo fulumap wol wetem plante milian man moa, oli mas mekem paradaes i kavremap ful wol. (Jenesis 1:28) !Tufala i kasem wan wok we i gud tumas mo we i save givim glad long tufala! Mo tu, tufala i save frengud mo soem lav long tufala. (Jenesis 2:18) Tufala i no sot long wan samting. Wan hapi laef we i no save finis i stap long fored blong tufala.

I had blong tingbaot se Adam mo Iv i save mekem sin. Be faswan man mo woman ya tufala i rebel agens long hemia we i wokem tufala, Jeova God. Spirit man ya Setan i yusum wan snek blong trikim Iv blong hem i no moa obei long Jeova, mo Adam i folem woman blong hem.—Jenesis 3:1-6.

Samting we Man blong Wokem olgeta samting bambae i mekem long Adam mo Iv, i klia nomo. Hem i bin talem finis samting we bambae i kamaot sipos tufala i no moa obei, hem i se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:16, 17) Wan problem we i bigwan moa i stat nao mo i nidim rod blong stretem.

Ol Man Oli Fesem Wan Problem We i Strong Tumas

Faswan sin i statem wan bigfala problem we i hadwok tumas blong ol man oli stretem. Taem Adam i jes laef, hem i wan man we i stretgud olgeta. Taswe, ol pikinini blong hem tu oli save gat wan laef we i stretgud mo we i no save finis samtaem. Be, Adam i mekem sin bifo we hem i gat pikinini. Fulwan laen blong man i no bon yet taem hem i kasem jajmen ya: “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.” (Jenesis 3:19) Taswe taem Adam i mekem sin mo i stat long rod blong ded olsem God i talem, olgeta man long wol tu oli kasem panis blong ded wantaem wetem hem.

Biaen, aposol Pol i raetem samting we i kamaot, i se: “Bifo olgeta, wan man nomo [Adam] i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Yes, God i wantem fastaem se ol pikinini we oli bon oli mas stretgud olgeta mo bambae oli laef olwe. Be faswan sin i mekem se taem oli bon, fiuja blong olgeta i blong kasem sik, kam olfala, mo ded.

Maet samfala oli talem se, “Hemia i no stret. I no mifala we i jusum blong no obei long God—Adam nao i mekem olsem. ?From wanem mifala i mas lusum janis blong gat glad mo blong laef olwe?” Yumi save se sipos wan kot i putum loa se wan boe i mas kalabus from we papa blong hem i stilim wan trak, boe ya i gat raet blong komplen se: “!Fasin ya i no stret! Mi mi no mekem wan samting we i rong.”—Dutronome 24:16.

Taem Setan i lidim faswan man mo woman blong tufala i mekem sin, maet hem i tingting se hem i mekem wan problem we God i no save stretem. Hem i agensem God long stat blong laef blong ol man nomo, taem i no gat wan pikinini i bon yet. Stret long taem we Adam i sin, wan impoten kwestin i stanap se: ?Bambae Jeova i mekem wanem long ol pikinini blong Adam mo Iv?

Jeova God i mekem samting we i stret. Stret man ya Elihu i talem se: “!Yufala i stap talem se yufala i gat hed! !Plis yufala i lesin long mi! !God i gat olgeta paoa! ?Yufala i ting se hem i save mekem samting we i no stret?” (Job 34:10) Mo profet Moses i raetem long saed blong Jeova se: “Hem i Bigfala Ston ya, ol wok blong hem oli stret gud olgeta, from we olgeta fasin blong hem oli stret. God ya i holem olgeta promes blong hem, i no save mekem i no stret. Hem i stret we i stret.” (Dutronome 32:4, NW ) Rod we Jeova i yusum blong stretem problem we i kamaot from sin blong Adam, i no spolem janis blong  yumi blong kasem laef blong olwe long wan paradaes long wol.

God i Yusum Wan Rod We i Stretgud

Tingbaot plan blong Jeova taem hem i talemaot jajmen long Devel Setan. Jeova i talem se: “Yu mo woman ya [ogenaesesen blong God long heven], bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu [wol we Setan i kontrolem], mo ol pikinini we bambae oli kamaot biaen long hem [Jisas Kraes], bambae oli stap badfren long olgeta. Nao ol pikinini ya blong hem bambae oli stap smasem hed blong ol pikinini ya blong yu [Setan], mo ol pikinini ya blong yu bambae oli stap kakae leg blong ol pikinini ya blong hem [ded blong Jisas].” (Jenesis 3:15) Long faswan profet tok ya blong Baebol, Jeova i tokbaot stamba tingting blong hem blong mekem spirit Pikinini blong hem i kamdaon long wol ya. Bambae hem i laef olsem man ya, Jisas, we i stret gud olgeta. Taem hem i stap olsemia we i no gat sin nating, bambae oli kilim hem i ded, hemia se, bambae snek i kakae leg blong hem.

?From wanem God i wantem se wan man we i stret gud olgeta i ded? Traem tingbaot: ?Jeova God i bin givim wanem panis long Adam taem hem i mekem sin? ?Panis ya i no ded? (Jenesis 2:16, 17) Aposol Pol i raetem se: “Ol man we oli stap mekem sin, pei blong olgeta, bambae oli ded from.” (Rom 6:23) Adam i pemaot sin blong hem wetem prapa ded blong hem. God i bin givim laef long hem, ale hem i jusum blong mekem sin, mo hem i kasem panis blong ded from sin ya. (Jenesis 3:19) ?Be olsem wanem long panis we fulwan laen blong ol man long wol oli mas kasem from sin ya? Wan man i mas ded blong pemaot olgeta long sin. ?Be ded blong hu i save kavremap sin blong olgeta man long wol evriwan?

Loa we God i givim long ol man Isrel bifo i talem se: “Sipos i gat ded, oli mas givim sol blong wan man blong jenisim sol blong hemia we i ded [no laef blong wan man i mas jenisim laef blong narafala man].” (Eksodas 21:23, NW ) Folem rul ya, man we i ded blong kavremap sin blong ol man long wol, i mas gat wan gudfala laef olsem Adam fastaem. Ded blong wan man we i stretgud olgeta, hemia nomo i save kavremap sin. Jisas i wan man olsem. Yes, Jisas hem i “wan ransom, mo praes ya i stret blong pemaot olgeta man,” mo blong sevem olgeta man we oli wantem kamaot long sin blong Adam.—1 Timoti 2:6, NW; Rom 5:16, 17.

Ded Blong Jisas i Sas Tumas

Ded blong Adam i no sas nating; hem i ded from sin blong hem. Be, ded blong Jisas i sas tumas from we hem i no gat sin taem hem i ded. Jeova i save agri long laef blong Jisas we i stret gud olgeta, olsem wan ransom blong ol pikinini blong Adam we oli obei long Hem. Mo sakrefaes blong Jisas i no jes pemaot ol sin we yumi mekem bifo nomo. Sipos hem i pemaot ol sin blong bifo nomo, bambae yumi no gat fiuja. Taem yumi stap long bel blong mama blong yumi, yumi gat sin finis, taswe bambae yumi mekem rong bakegen mo bakegen. (Ol Sam 51:5) !Yumi save gat bigfala tangkiu from we ded blong Jisas i givim janis long yumi blong kam stretgud olgeta, olsem Jeova i bin wantem blong ol pikinini blong Adam mo Iv fastaem!

Adam i sem mak long wan papa we i ded mo i livim wan bigfala kaon (sin), nao yumi no gat rod blong pembak kaon ya. Defren olgeta, Jisas i olsem wan gudfala papa we i ded mo i livim ol rij samting we oli save mekem yumi kam fri long bigfala kaon we Adam i livim olsem wan baden long yumi. Mo tu, Jisas i livim fulap samting we oli save givhan long yumi blong laef foreva. Ded blong Jisas i no tekemaot ol sin we yumi mekem bifo nomo; be hem i gudfala rod we i save givhan long fiuja blong yumi tu.

Jisas i Sevia blong yumi, from we hem i ded blong pemaot yumi. !Mo ded blong hem i sas tumas! Taem yumi luksave se ded blong hem i olsem wan haf blong rod we Jeova i yusum blong stretem strongfala problem we sin blong Adam i mekem, bilif we yumi gat long Jeova mo long ol rod we hem i yusum bambae i kam strong moa. Yes, ded blong Jisas i rod blong sevem “olgeta man we oli bilif” long hem, oli aot long sin, sik, fasin blong kam olfala, mo ded. (Jon 3:16) ?Yu yu gat tangkiu long God we i gat lav, mo i mekem rod ya blong sevem yumi?

[Tok blong pija long pej 5]

Adam i givim sin mo ded long ol man

[Tok blong pija long pej 6]

Jeova i yusum wan rod we i stretgud blong winim problem ya