Wan Kwestin

?Snek long garen blong Iden, i mekem wanem blong givim tingting long Iv blong brekem loa blong God long saed blong tri ya we i save mekem man i save long ol fasin we i gud mo ol fasin we i nogud?

Jenesis 3:1 i talem se: “Hae God i God blong yumi, mo hem i mekem olgeta samting we i gat laef we oli stap, be snek i wan samting we i waes tumas long fasin blong wokem trik. Hem i waes moa long saed ya, i winim ol narafala samting ya evriwan. Nao wan dei, snek i kam askem long woman ya se, ‘?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?’ ” I gat plante defren tingting long saed blong fasin we snek ya i bin yusum blong toktok wetem Iv. Wan tingting hemia se snek ya i no rili bin toktok wetem maot blong hem, be hem i bin muvmufum bodi blong hem long fasin we i givim tingting ya long Iv. Wan pasta long Inglan, Joseph Benson, i talem se: “I luk olsem se snek ya i mekem ol saen wetem bodi blong hem. Sam man oli talem se long taem bifo, olgeta snek oli save tingting mo toktok, . . . be i no gat pruf blong samting ya.”

?Be, sipos snek ya i mekem ol saen wetem bodi blong hem nomo, olsem wanem hem i save givim tingting ya long Iv se, sipos hem i kakae frut blong tri ya we God i putum tabu long hem, bambae hem i kam olsem God, we hem i save jusum wanem fasin i gud mo wanem fasin i nogud? Mo tu, Iv i joen long storian ya, from we hem i bin ansarem kwestin we snek i askem long hem. (Jenesis 3:2-5) Sipos i tru we snek ya i bin muvmufum bodi no mekem ol saen wetem bodi blong hem blong toktok long Iv, samting ya i minim se Iv tu i bin mekem ol saen wetem bodi blong hem blong ansa. Be Baebol i talem klia se Iv i toktok long maot blong hem.

Aposol Pol i stap tokbaot stori ya, taem hem i givim woning long ol Kristin brata sista se: “Mi mi fraet se bambae tingting blong yufala i gorong, nao bambae yufala i foldaon olsem we fas woman ya Iv i foldaon fastaem, we snek i giaman long hem long ol giaman toktok blong hem.” Trabol ya we Pol i tokbaot i save kamaot from “ol man ya [we] oli no tru aposol ya, oli giaman aposol nomo.” Be denja ya we ‘ol aposol ya we ol man oli stap talem se oli nambawan’ oli givim long ol Kristin, i no kamaot from ol saen we oli mekem wetem han mo bodi blong olgeta nomo, nogat. Hem i kamaot from ol toktok blong olgeta tu—ol giaman toktok we oli talem blong trikim ol narafala mo pulum olgeta oli go krangke.—2 Korin 11:3-5, 13.

Nating se snek ya long garen blong Iden, i yusum ol toktok blong pulum Iv blong brekem loa blong God, samting ya i no minim se snek ya i gat wan bokis blong voes we i mekem se hem i save toktok. * Snek ya i no nidim samting ya. Taem enjel blong God i mekem wan dongki i toktok blong givim mesej long Balam, anamol ya i no nidim wan bokis blong voes blong toktok olsem man. (Namba 22:26-31) I klia se, taem anamol ya we i no save toktok i girap ‘i toktok olsem man,’ paoa ya i kamaot long ples blong ol spirit man.—2 Pita 2:16.

Baebol i talem se spirit man we i toktok long Iv tru long snek, hem i “snek ya blong bifo we nem blong hem ‘Setan.’ ” (Revelesen 12:9) Ol toktok we Iv i harem mo i ansa long hem oli kamaot long Setan, we i save “tanem fasin blong hem, blong mekem ol man oli luk hem olsem we hem i wan enjel blong laet.”—2 Korin 11:14.

[Futnot]

[Tok blong pija long pej 27]

“Bambae yutufala i kam olsem hem [God], we i save ol fasin we i nogud mo ol fasin we i gud”