?Yu Mekem Wanem Taem Wan Man i Gat Fasin Tu Fes?

LONG garen blong Getsemane, Judas Iskariot i go long Jisas mo i “kis long hem.” Hemia i wan kastom blong soemaot long narafala se yu lavem hem. Be samting we Judas i mekem, hem i jes wan trik blong soemaot Jisas long ol man we oli kam long tudak blong holem hem. (Matiu 26:48, 49) Judas i gat tu fes—hem i wan man we i stap giaman long fasin blong hem. Olsem wan man we i putum wan giaman fes, hem i mekem olsem se hem i wan stret man, be hem i stap haedem ol rabis tingting blong hem. Grik tok we oli tanem i kam “tu fes” i minim “man we i givim ansa” mo i minim tu se wan man we i plei long sinema. Biaen oli yusum tok ya blong talem eniwan we i stap giaman long fasin blong hem blong trikim ol narafala.

?Wanem tingting blong yu long saed blong fasin tu fes? Wan eksampol: ?Yu yu kam kros taem yu luk ol man we oli wokem mo salem sigaret, oli stap pusum ol man blong oli smok, nating se ol dokta oli pruvum se ol sigaret ya oli stap spolem bodi blong man? ?Yu kros taem yu luk fasin tu fes blong ol man we oli gat wok blong lukaot long ol narafala, ale oli bitim mak, oli mekem nogud fasin blong spolem olgeta we oli stap long kea blong olgeta? ?Yu harem nogud taem yu faenemaot se wan man we yu ting se hem i wan tru fren, i stap giaman long yu nomo? ?Yu yu tingting olsem wanem long saed blong fasin tu fes blong ol jos?

“Sore Tumas Long Yufala, Yufala i Gat Tu Fes”

Tingbaot fasin blong ol man blong jos, taem Jisas i bin stap long wol. Ol tija blong loa mo ol Farisi oli mekem olsem se olgeta oli trufala man blong tijim Loa blong God. Be rili, oli stap tijim ol tijing blong man we i pulum tingting i go longwe long God. Ol tija blong loa mo ol Farisi oli strong blong mekem ol man oli folem gud ol toktok blong loa, be oli no wantem save long ol bigfala tingting biaen long loa ya we i leftemap lav mo fasin sore. Long fes blong ol man, oli mekem olsem se oli onagud long God, be taem oli stap olgeta nomo, oli mekem fulap rabis fasin. Oltaem samting we oli mekem i defren long samting we oli talem. Taem oli mekem wan samting, oli mekem blong “ol man oli luk olgeta.” Oli sem mak long “gref blong dedman we man i pentem i waet gud. Afsaed, i waet gud, i naes, be insaed i fulap long bun blong dedman, wetem bodi blong hem we i roten i stap.” Jisas i no fraet nating blong mekem fasin tu fes blong olgeta i kam long klia ples, hem i talem plante taem long olgeta se: “Ol tija blong Loa mo ol Farisi. Sore tumas long yufala. Yufala i gat tu fes.”—Matiu 23:5, 13-31.

Sipos yu bin laef long taem blong Jisas, maet yu sem mak olsem ol narafala man we oli gat hat we i stret, maet yu tu yu harem nogud blong luk fasin tu fes blong ol lida blong skul ya. (Rom 2:21-24; 2 Pita 2:1-3) ?Be bambae yu letem fasin tu fes blong ol tija blong loa mo ol Farisi i mekem se yu kam kros ale yu sakemaot olgeta skul wantaem, wetem skul ya tu we Jisas Kraes mo ol disaepol blong hem oli folem mo tijim? ?Yu no ting se fasin olsem i save spolem yu wan bakegen?

Fasin tu fes blong ol man blong skul i save mekem se yumi no laekem nating olgeta skul mo yumi stap longwe long olgeta. Be fasin olsem i save blokem yumi blong luksave ol trufala man blong God we oli wosip wetem ful hat blong olgeta. Strong fasin we yumi wan i wokem blong blokem fasin tu fes, i save mekem se yumi stap longwe long ol trufala fren. Taswe, yumi mas skelem gud fasin blong yumi blong yumi save gat stret tingting long saed blong fasin tu fes.

“Yufala i Mas Lukaot”

Fastaem, yumi mas lanem blong luksave ol man we oli gat fasin tu fes. Samting ya i no isi oltaem. Wan famle i jes lanem samting ya afta we wan trabol i kasem olgeta nao oli lus bigwan long saed blong mane. Mama long famle ya i sik bigwan, hem i slip we i no moa save wekap. Ale famle ya i putum hospital long kot from we oli no mekem gud wok blong olgeta, mo  oli pem wan loea, we hem i wan prija long wan lokol jos tu. Ale, hospital i pembak samwe 50 milian vatu long famle ya. Be, biaen, trabol blong olgeta i kam moa nogud. Taem mama ya i ded, i no gat naf mane blong pem ol samting blong berem hem. ?From wanem? From we loea i stilim bighaf blong mane ya. Wan niuspepa blong loa i talem long saed blong loea ya i se: “Sipos tok we hem i prijimaot i laenap wetem fasin we hem i stap mekem . . . , ating taem hem i prij hem i stap talemaot se: i gud yumi trikim man blong stilim mane blong hem.” ?Olsem wanem yumi save blokem yumi wan blong ol man olsemia oli no spolem yumi?

“Yufala i mas lukaot,” hemia advaes we Jisas i bin givim long ol man long taem blong hem we oli stap harem nogud long fasin tu fes blong ol man blong skul. (Matiu 16:6; Luk 12:1) Yes, yumi mas lukaot gud. Maet sam man oli save talem se oli wantem mekem ol gudfala samting blong halpem ol narafala, mo i luk olsem se oli tru. Be yumi nidim blong skelem gud mo no hareap blong bilivim evri toktok blong olgeta. Sipos yumi save se sam giaman mane i stap goraon, bambae yumi jekem gud mane blong yumi. ?I tru no?

Sam samtaem i save gat man we i gat tu fes insaed long trufala Kristin kongregesen tu. Disaepol Jemes i givim woning agensem olgeta ya, mo i talem se: “Taem yufala i stap mekem ol gudfala lafet ya blong yufala blong soemaot we yufala i stap lavlavem yufala, olgeta ya oli olsem wan rif afsaed we sip i save pas long hem, nao i brok. Bambae oli spolem ol lafet ya blong yufala from we oli stap kakae, oli stap dring we oli no gat sem, oli stap tingbaot olgeta nomo. Oli olsem klaod we win i karem i kam, be i no gat ren. Oli olsem wan tri we nating we long stret taem blong hem blong karem frut be hem i no gat frut blong hem nating, mo ol man oli pulumaot, nao i ded olgeta.”—Jud 12.

Blong ‘lukaot gud,’ i minim se yumi no letem narafala man i giaman long yumi. Maet man ya i mekem olsem se hem i lavem yumi, be hem i rili intres long hem wan nomo mo hem i stap talemaot ol tingting we oli no stanap long Tok blong God. Hem i olsem rif we i haed jes aninit long solwota, nao taem sip i pas long hem, hem i rek wantaem. Long sem fasin, man ya we i gat tu fes i save spolem bilif blong ol man we oli no lukaot gud, olsem we sip i rek long rif. (1 Timoti 1:19) Man we i gat tu fes i save mekem plante promes long ol narafala se bambae hem i mekem olgeta oli haremgud long saed blong spirit, be hem i olsem wan “klaod we win i karem, be i no gat ren.” Hem i olsem wan tri we i no gat frut nating, from we wan man blong giaman i no save karem ol trufala Kristin frut. (Matiu 7:15-20; Galesia 5:19-21) Yes, yumi mas lukaot gud se ol man olsem oli no giaman long yumi. Be hemia i no min se yumi mas tingting nogud long evri man.

“No Jajem Narafala Man”

!I isi nomo blong ol sinman oli makem ol mastik blong ol narafala man, be oli no luksave ol mastik we olgeta wanwan oli mekem! Fasin ya i mekem se i isi blong yumi gat tu fes. Jisas i talem se: “!Man we i gat tu fes! Fastaem yu mas tekemaot bigfala wud ya we i stap long ae blong yu, nao bambae yu save lukluk gud blong tekemaot smol doti ya we i stap long ae blong brata blong yu.” (NW ) I gud we yumi lesin long advaes ya blong hem se: “Bambae yufala i no jajem narafala man, i nogud God i jajem yufala. Fasin we yufala i folem blong jajem man, hemia sem fasin nomo we God bambae i folem blong jajem yufala. . . . ?From wanem yu stap tokbaot smol doti ya we i stap long ae blong brata blong yu, be yu no save luk bigfala wud ya we i stap long ae blong yu?”—Matiu 7:1-5.

Sam samtaem, maet i luk olsem se samfala oli wok wetem fasin tu fes, be yumi no mas hareap blong talem se olgeta oli gat tu fes. Tingbaot aposol Pita. Taem sam man Jiu oli aot long Jerusalem blong kam visitim ples ya, Pita i wantem mekem oli harem gud nao hem “i finis, i no moa save kakae bakegen” wetem ol Kristin brata blong hem long Antiok,  we oli blong ol narafala nesen. “Fasin ya i pulum Banabas” tu, nao hem i biaen long Pita wetem sam narafala long giaman fasin ya. Pita i mekem fasin ya, nating se hem nao i bin kasem blesing blong openem rod long ol man blong ol narafala nesen, blong oli save kam insaed long Kristin kongregesen. (Galesia 2:11-14; Ol Wok 10:24-28, 34, 35) Be, taem Banabas mo Pita tufala i mekem mastik ya, hemia i no minim se tufala i sem mak long ol tija blong loa mo ol Farisi, no sem mak long Judas Iskariot.

“Yufala i Mas Lavem Ol Man, We Yufala i No Giaman”

Jisas i talem se: “Taem yu mekem i gud long ol narafala man, yu no mas pem wan man blong hem i wokbaot fastaem long yu, i blou pupu, olsem ol man ya we oli mekem sinema insaed long ol haos prea mo long ol rod, blong pulum ol man blong tinghae long olgeta.” (Matiu 6:2, Phillips) Aposol Pol i raetem se: “Yufala i mas lavem ol man, we yufala i no giaman.” (Rom 12:9) Hem i leftemap tingting blong yangfala Timoti blong gat “lav we i kamaot long wan hat we i klin . . . mo long wan bilif we i no giaman.” (1 Timoti 1:5, NW ) Sipos lav mo bilif blong yumi oli tru—we fasin blong tingbaot yumi wan mo fasin blong trikim narafala i no spolem—ale, bambae ol narafala oli save trastem yumi. Bambae yumi rili save leftemap tingting blong olgeta we oli stap raonabaot long yumi mo mekem se olgeta oli gat paoa blong gohed. (Filipae 2:4; 1 Jon 3:17, 18; 4:20, 21) Antap moa, Jeova bambae i glad long yumi.

Be, fasin ya, hemia fasin tu fes, bambae i givim ded long man we i folem. Bambae hem i kam long klia ples. Jisas Kraes i talem se: “Olgeta samting we man i stap kavremap, bambae God i tekem i kam long klia ples. Mo olgeta samting we man i stap haedem, bambae God i tekem i kam long fes blong olgeta man.” (Matiu 10:26; Luk 12:2) Waes King Solomon i bin talem se: “Olgeta samting we yumi mekem, nating we i gud no i nogud, go kasem ol samting we yumi haed nomo blong mekem, be hem bambae i mekem kot long yumi from olgeta evriwan.”—Prija 12:14.

Taswe, yumi no mas letem fasin tu fes blong samfala i mekem we yumi no moa trastem ol trufala fren blong yumi we oli stap laekem yumi tru. Yumi save lukaot gud, be yumi no nid blong kam olsem we yumi no trastem nating ol narafala. Mo samting we i impoten tumas, yumi mas meksua se yumi soemaot lav mo bilif long fasin we yumi no gat tu fes.—Jemes 3:17; 1 Pita 1:22.

[Tok blong pija long pej 22]

?Bambae yu yu letem fasin tu fes blong ol tija blong loa mo ol Farisi i mekem yu kam kros, ale yu sakemaot skul we Jisas Kraes mo ol disaepol blong hem oli folem mo tijim?