Holem Tingting Oltaem Blong Fraetgud Long Jeova

“Sipos olgeta oli holem tingting ya oltaem nomo, bambae i gud tumas. Mi mi wantem tumas blong oli ona [“fraet,” NW ] long mi oltaem, mo blong oli obei long olgeta tok blong mi.”—DUTRONOME 5:29.

1. ?From wanem yumi save sua se wan dei bambae ol man oli no moa fraet?

 BLONG plante handred yia fasin fraet i stap spolem plante man. Ol man oli fraet blong no gat naf kakae, oli fraet blong kasem wan bigfala sik, oli fraet long ol man blong brekem loa, mo oli fraet long ol faet. Fraet ya i mekem se oli stap wari oltaem. Taswe, Universal Declaration of Human Rights i talem long fastok blong hem se oli wantem tumas blong mekem wol ya i kam wan ples we olgeta man oli no moa fraet. * I gud tumas blong save se, God i promes we bambae wol ya i kam fri long fasin fraet. Be, samting ya bambae i no kamaot from traehad blong ol man. Profet Maeka i talemaot promes blong Jeova se long niufala wol we stret fasin bambae i stap long hem, ‘bambae i no moa gat man blong mekem ol man blong hem oli fraet.’—Maeka 4:4.

2. (a) ?Olsem wanem Baebol i pulum yumi blong fraet gud long God? (b) ?Wanem sam kwestin we maet yumi askem taem yumi tingbaot fasin blong fraet gud long God?

² Be, i no olgeta fasin fraet we i spolem man. I gat wan fasin fraet we i gud. Baebol i talem plante taem se ol man blong Jeova oli mas fraet long Hem. Moses i talem long ol man Isrel se: “Oltaem bambae yufala i mas tinghevi long hem, yufala i mas ona [“fraet,” NW ] gud long hem, mo yufala i mas mekem wosip long hem nomo.” (Dutronome 6:13) Plante handred yia biaen, Solomon i raetem se: “Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.” (Prija 12:13, NW ) Taem yumi joen long wok blong prij we ol enjel oli stap lidim, yumi tu yumi stap pulum olgeta man blong oli ‘ona [“fraet,” NW ] gud long God, mo leftemap nem blong hem.’ (Revelesen 14:6, 7) Antap long fasin ya blong fraet gud long God, wan Kristin i mas lavem God long olgeta hat blong hem. (Matiu 22:37, 38) ?Olsem wanem yumi save lavem God mo long sem taem fraet long hem? ?Sipos God i gat lav, from wanem yumi nidim blong fraet long hem? ?Wanem ol gudfala frut we yumi kasem taem yumi wokem fasin blong fraet long God? Blong ansa long ol kwestin ya, fastaem yumi mas kasem save long mining blong tok ya fraet long God mo olsem wanem fasin ya i impoten tumas sipos yumi wantem frengud wetem Hem.

Sapraes, Respek Mo Fraet

3. ?Fasin blong fraet long God i minim wanem?

³ Gudfala fraet long God, hemia wan filing we olgeta Kristin oli mas gat long Man ya we i Wokem olgeta. Wan mining blong fraet ya, hemia se “sapraes mo bigfala respek long Man we i Wokem olgeta samting, mo filing blong no wantem nating blong mekem Hem i harem nogud.” Taswe, fasin fraet long God i gat paoa long tu impoten samting long laef blong yumi, hemia se: tingting we yumi gat long saed blong God mo tingting we yumi gat long saed blong ol fasin we hem i no laekem nating. I klia se, tufala samting ya oli impoten tumas mo yumi mas tingtinggud long tufala. Buk ya Vine’s Expository Dictionary of New Testament Words i poenemaot se gudfala fasin fraet i ‘wan stamba tingting we i pusum ol Kristin, long saed blong spirit mo long ol fasin tu.’

4. ?Olsem wanem yumi save wokem wan filing blong sapraes mo bigfala respek long Man we i Wokem yumi?

⁴ ?Olsem wanem yumi save wokem ol filing ya we yumi gat bigfala respek mo yumi sapraes long Man ya we i Wokem yumi? Taem yumi luk wan ples we i naes tumas, olsem wan bigfala wotafol, no ol naesfala kala blong skae taem san i stap godaon, wan filing blong sapraes i save kasem yumi. Taem yumi lukluk wetem bilif, filing ya i save kam bigwan moa from we yumi luksave se han blong God nao i wokem ol nambawan samting ya. Mo tu, taem yumi luk ol samting blong sapraes we Jeova i wokem, yumi luksave, olsem King Deved, se yumi man nating nomo. Deved i talem se:  “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta, mi luk man se hem i nating nomo. I no stret blong yu yu tingbaot hem.” (Ol Sam 8:3, 4) Fasin ya blong sapraes long ol samting we Jeova i wokem i save lidim yumi blong gat bigfala respek long Hem. Mo respek ya bambae i pusum yumi blong gat tangkiu mo presem Jeova from olgeta samting we hem i stap mekem blong givhan long yumi. Deved i raetem tu se: “Yu yu mekem mi long fasin we i narafala, mo i nambawan olgeta. Mi mi ona long yu, mo mi presem nem blong yu from. Olgeta samting we yu yu mekem oli gud we i gud tumas. Samting ya, mi mi save we, mi savegud.”—Ol Sam 139:14.

5. ?From wanem yumi mas fraet long Jeova, mo hu i soemaot wan gudfala eksampol long saed ya?

⁵ Filing blong sapraes mo bigfala respek long God bambae i lidim yumi blong fraet long paoa we hem i gat olsem Man we i Wokem olgeta samting, mo long raet we Hem i gat blong rul long heven mo wol. Long wan vison, aposol Jon i luk “ol man ya we bifo oli stap faet agens long anamol ya we i nogud, wetem pija blong hem, . . . mo oli winim hem.” Hemia ol tabu brata blong Kraes long heven. Olgeta oli talemaot se: “Hae God, Masta blong mifala, yu yu gat olgeta paoa. Ol wok blong yu oli bigwan olgeta, mo oli gudfala tumas. Yu yu King blong olgeta kantri, mo ol fasin blong yu oli stret gud, oli tru. Hae God. ?Hu man i no save ona [“fraet,” NW ] long yu? ?Hu man i no save leftemap nem blong yu?” (Revelesen 15:2-4) Ol man ya we oli rul wetem Kraes long Kingdom blong heven oli fraet long God, mo samting ya i kamaot from bigfala respek we oli gat long haenem blong Hem. Fasin fraet ya i lidim olgeta blong ona long God olsem Man ya we i gat olgeta paoa. Taem yumi tingbaot olgeta samting we Jeova i mekem finis mo stret fasin blong hem blong rulum heven mo wol, i stret nomo we yumi tu, yumi mas fraet gud long hem.—Ol Sam 2:11; Jeremaea 10:7.

6. ?From wanem yumi mas fraet blong mekem God i harem nogud?

⁶ Be, antap long fasin blong sapraes mo gat bigfala respek long God, olgeta we oli fraetgud long hem oli no wantem nating blong mekem hem i harem nogud mo oli no wantem gat fasin blong no obei long hem. ?From wanem? From we, nating se Jeova i ‘no save kros kwik mo oltaem hem i stap lavem man,’ be yumi no mas fogetem se ‘olgeta we oli stap holem ol fasin nogud, hem i stap panisim olgeta.’ (Eksodas 34:6, 7) I tru se Jeova i gat lav mo sore, be hem i givim panis tu long ol man we oli mekem i no stret mo ol man we oli gohed nomo blong mekem nogud. (Ol Sam 5:4, 5; Habakuk 1:13) Jeova bambae i panisim olgeta we oli  no tanem tingting from sin, we oli gohed blong mekem ol fasin we oli save se i no stret long ae blong hem, mo we oli soemaot se oli agensem hem. Olsem aposol Pol i talem: “God ya i laef, i stap we i stap. !Mo sipos yumi pas long han blong hem blong hem i jajem yumi, hemia i wan samting blong fraet we i nogud olgeta!”—Hibrus 10:31.

“Yufala i Mas Strong Long Hem Oltaem”

7. ?Wanem ol risen we yumi gat blong trastem paoa blong Jeova blong sevem yumi?

⁷ Blong trastem Jeova fulwan, fastaem yumi mas gat gudfala fasin fraet ya long hem mo yumi mas luksave se hem i gat bigfala paoa. Olsem wan smol pikinini we i harem i sef taem papa blong hem i stap klosap long hem, yumi tu yumi harem se yumi stap sefgud taem han blong Jeova i lidim yumi. Makem samting we ol man Isrel oli mekem afta we Jeova i lidim olgeta oli aot long Ijip: “Taem olgeta oli luk paoa ya blong Hae God, we hem i sevem olgeta, i tekemaot olgeta long han blong ol man Ijip ya, oli tinghevi tumas long hem, mo oli ona [“fraet,” NW ] long hem. Nao oli trastem hem.” (Eksodas 14:31) Stori blong Elisa tu i pruvum se “oltaem enjel blong [God] i stap lukaot gud long olgeta we oli ona [“fraet gud,” NW ] long hem, mo i stap tekemaot olgeta long trabol.” (Ol Sam 34:7; 2 King 6:15-17) Histri blong ol man blong Jeova tede mo maet ol samting we i hapen long prapa laef blong yumi, i pruvum se God i stap yusum paoa blong hem blong givhan long olgeta we oli mekem wok blong hem. (2 Kronikel 16:9) Long rod ya, yumi luksave se “fasin fraetgud long Jeova i mekem se man i trastem God fulwan.”—Ol Proveb 14:26, NW.

8. (a) ?Olsem wanem fasin fraetgud long God i save pulum yumi blong wokbaot long ol rod blong hem? (b) Eksplenem olsem wanem yumi gat tingting we ‘i stap strong oltaem’ long Jeova.

⁸ Gudfala fasin fraet long God i mekem se yumi trastem hem fulwan. Antap long hemia, fasin ya i pulum yumi blong wokbaot long ol rod blong Hem. Taem Solomon i dediketem tempol long Jeova, hem i prea se: “Blong bambae mifala [Isrel] i save stap long kantri ya we yu givim long ol bubu blong mifala bifo, mifala i mas ona [“fraet,” NW ] gud long yu mo mifala i mas obei long yu oltaem long laef blong mifala.” (2 Kronikel 6:31) Bifo long taem ya, Moses i givim advaes long ol man Isrel se: “Oltaem bambae yufala i mas biaen long hem [God] nomo, mo yufala i mas ona [“fraet,” NW ] long hem, yufala i mas obei long hem, mo yufala i mas holem ol tok blong hem. Yufala i mas mekem wosip long hem, mo tingting blong yufala i mas strong long hem oltaem.” (Dutronome 13:4) Ol vas ya oli soemaot klia se, taem yumi trastem Jeova mo bilif long hem, yumi wantem tumas blong wokbaot long ol rod blong hem mo yumi wantem we ‘tingting blong yumi i strong long hem oltaem.’ Yes, olsem wan smol pikinini we i trastem papa blong hem fulwan i holem strong han blong hem, fasin fraetgud long Jeova bambae i lidim yumi blong obei long hem, mekem wok blong hem, mo tingting strong long hem oltaem.—Ol Sam 63:8; Aesea 41:13.

Man We i Lavem God i Fraetgud Long Hem

9. ?Olsem wanem fasin blong lavem God i joen wetem fasin blong fraet long God?

⁹ Baebol i soemaot se, taem man i fraet long God samting ya i no minim se hem i no save lavem hem tu. Defren olgeta, ol man Isrel oli kasem advaes blong ‘fraet long Jeova . . . blong bambae oli save wokbaot long ol rod blong hem mo blong oli laekem hem.’ (Dutronome 10:12, NW ) Taswe, fasin blong fraet long God i joen wetem fasin blong lavem Hem. Fasin fraet long God i pulum yumi blong wokbaot long ol rod blong hem. Mo, taem yumi wokbaot long ol rod blong hem, yumi pruvum se yumi rili lavem hem. (1 Jon 5:3) Yumi luk se samting ya i stret, from we taem yumi lavem wan man, yumi fraet blong mekem hem i harem nogud. Ol man Isrel oli mekem Jeova i harem nogud taem oli mekem stronghed fasin long draeples. I sua se, yumi no wantem mekem Papa blong yumi long heven i harem nogud olsem. (Ol Sam 78:40, 41) Jeova “i glad moa long ol man we oli stap ona [“fraet,” NW ] long hem,” taswe fasin blong yumi blong obei mo stap tru long hem i mekem hem i glad. (Ol Sam 147:11; Ol Proveb 27:11) Ale, fasin blong lavem God i pusum yumi blong mekem hem i glad mo fasin blong fraet long God i blokem yumi blong mekem hem i harem nogud. Tufala fasin ya i joen, wan i no agensem narawan.

10. ?Olsem wanem Jisas i soemaot se hem i haremgud tumas blong fraet long Jeova?

¹⁰ Jisas Kraes i soemaot klia long laef blong hem, olsem wanem blong lavem God mo long sem taem, blong fraet gud long hem. Profet Aesea i tokbaot Jisas i se: “Spirit blong Jeova bambae i stap long hem, hemia spirit blong waes mo dip save, spirit blong gudfala plan mo bigfala paoa, spirit blong save mo fasin fraet long Jeova. Mo bambae hem i glad long fasin fraet long Jeova.” (Aesea 11:2, 3, NW ) Profet tok ya i soemaot se spirit blong God i pulum Jisas blong fraet gud long Papa blong hem long heven. Mo tu, yumi makem se fraet ya i no spolem Jisas, be i stamba blong  glad blong hem. Jisas i glad tumas blong mekem ol samting we God i wantem. Long ol hadtaem tu, hem i wantem mekem Papa blong hem i glad. Jes bifo we hem i ded long pos, hem i talem long Jeova se: “Yu no mekem olsem we mi mi wantem, yu mekem olsem we yu nomo yu wantem.” (Matiu 26:39) From we Jisas i fraet long God, Jeova i lesin long ol prea blong hem, i givim paoa long hem, mo i mekem hem i laef bakegen long ded.—Hibrus 5:7.

Lanem Blong Fraet Long Jeova

11, 12. (a) ?From wanem yumi mas lanem blong fraet long God? (b) ?Olsem wanem Jisas i tijim yumi blong fraet long God?

¹¹ Taem yumi luk ol bigbigfala paoa long ol samting raonabaot long yumi we God i wokem, wantaem nomo yumi sapraes. Be fasin fraet long God i no kamaot hem wan nomo olsem. Taswe, long wan profet tok, Jisas Kraes we hem i Bigfala Deved, i singaot yumi se: “Yufala ol yang fren blong mi, yufala i kam, yufala i lesin long mi. Bambae mi tijim yufala blong yufala i ona [“fraet,” NW ] long Hae God.” (Ol Sam 34:11) ?Olsem wanem Jisas i save tijim yumi blong fraet no ona long Jeova?

¹² Jisas i tijim yumi blong fraet long Jeova taem hem i halpem yumi blong kasem save long ol nambawan fasin blong Papa blong yumi long heven. (Jon 1:18) Jisas i stret pija blong Papa blong hem. Taswe, Jisas i soemaot ol tingting blong God long yumi mo olsem wanem Hem i mekem long ol man. (Jon 14:9, 10) Mo tu, from sakrefaes blong Jisas, yumi save kam klosap long Jeova long prea mo askem Hem blong fogivim ol sin blong yumi. Nambawan fasin ya blong God blong soem sore, i wan strongfala risen blong fraet long Hem. Man blong raetem Sam i talem se: “Be yu yu stap fogivim mifala, yu stap tekemaot ol sin blong mifala, nao mifala i stap bodaon long yu, mifala i stap ona [“fraet,” NW ] long yu.”—Ol Sam 130:4.

13. ?Wanem ol step we buk blong Ol Proveb i tokbaot, we oli save halpem yumi blong fraet gud long Jeova?

¹³ Buk blong Ol Proveb i tokbaot sam step we yumi save folem blong wokem fasin fraet long God. “Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem. Yu mas lesin long ol waestok ya, mo yu mas traehad blong haremsave olgeta. Yes, yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting, . . . Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona [“fraet,” NW ] gud long hem.’ ” (Ol Proveb 2:1-5) Taswe, blong fraet gud long God, yumi mas stadi long Tok blong hem. Yumi mas traehad blong kasem save long ol tijing blong hem, mo lesin gud long ol advaes blong hem.

14. ?Olsem wanem yumi save folem oda ya we ol king blong Isrel oli kasem?

¹⁴ Evri king blong Isrel bifo i kasem oda ya se hem i mas mekem wan kopi blong Loa mo hem i “mas ridim oltaem long laef blong hem, blong mekem we oltaem, hem i save [“lanem blong fraet,” NW ] ona long Hae God, mo i save obei long olgeta samting we i stap long buk ya.” (Dutronome 17:18, 19) Tede tu, sipos yumi wantem lanem blong fraet long Jeova, i impoten tumas we yumi ridim Baebol mo stadi long hem. Taem yumi mekem ol rul blong Baebol oli wok long laef blong yumi, sloslou bambae yumi kasem waes mo save blong God. Bambae yumi ‘kasem mining blong tok ya se fraet long Jeova,’ taem yumi luk ol gudfala frut long laef blong yumi, nao bambae yumi tinghae long fasin fren blong yumi wetem Hem. Mo tu, ol yangfala mo ol olfala oli save lesin long ol tijing blong God taem oli joen long ol miting wetem ol narafala man blong bilif. Oli save lanem blong fraet long God, mo blong wokbaot long ol rod blong hem.—Dutronome 31:12.

 Olgeta We Oli Fraet Long Jeova Oli Haremgud

15. ?Olsem wanem fasin blong fraet long God i joen wetem wosip we yumi mekem i go long hem?

¹⁵ Long ol poen we yumi tokbaot finis, yumi lanem se fraet ya we yumi mas gat long God i wan gudfala fasin fraet. Yumi evriwan i mas traehad blong wokem fasin ya, from we hem i wan impoten haf blong wosip we yumi mekem i go long Jeova. Fasin ya blong fraet gud long God bambae i lidim yumi blong trastem hem fulwan, wokbaot long ol rod blong Hem, mo fasgud long Hem. Mo tu, folem eksampol blong Jisas, fasin blong fraet long God i save pusum yumi naoia mo blong olwe i go long fiuja, blong yumi holemtaet promes we yumi bin mekem taem yumi givim laef blong yumi i go long God.

16. ?From wanem Jeova i pulum yumi blong fraet long hem?

¹⁶ Fasin blong fraet long God i no wan rabis fraet we i mekem yumi harem nogud. Fraet ya i no blokem yumi tumas long ol samting we yumi wantem mekem. Baebol i talem se: “Ol man we oli stap ona [“fraet,” NW ] long Hae God, mo we oli stap folem ol tok we hem i putum, bambae oli save harem gud.” (Ol Sam 128:1) Jeova i pulum yumi blong fraet long hem from we hem i save se fasin ya bambae i lukaotgud long yumi. Long ol tok we God i talem long Moses yumi luksave se Hem i lavem ol man blong hem tumas, i se: “Sipos olgeta oli holem tingting ya oltaem nomo, bambae i gud tumas. Mi mi wantem tumas blong oli ona [“fraet,” NW ] long mi oltaem, mo blong oli obei long olgeta tok blong mi, mo sipos oli mekem olsem, evri samting long laef blong olgeta, mo long laef blong ol pikinini blong olgeta, mo long laef blong olgeta we bambae oli stap kamaot biaen long olgeta, bambae i ron gud.”—Dutronome 5:29.

17. (a) ?Yumi kasem wanem blesing from fasin blong fraet long God? (b) ?Long stadi we i kamaot biaen, bambae yumi lanem wanem long saed blong fasin blong fraet long God?

¹⁷ Long sem fasin, sipos yumi holem wan tingting oltaem we yumi fraet long God, bambae laef blong yumi i ron gud. ?Olsem wanem bambae i rongud? Fastaem, fasin ya bambae i mekem God i glad mo i pulum yumi i kam klosap moa long hem. Ol samting we oli hapen long laef blong Deved i mekem hem i save gud se “olgeta we oli stap ona [“fraet,” NW ] long hem [God], oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta.” (Ol Sam 145:19) Seken samting se, fasin blong fraet long God bambae i mekem i gud long yumi, from we bambae hem i gat paoa long tingting blong yumi long saed blong fasin we i nogud. (Ol Proveb 3:7) Stadi we i kamaot biaen bambae i tokbaot olsem wanem fasin fraet i save blokem yumi blong yumi no kasem trabol long saed blong spirit. Haf ya bambae i tokbaot sam man long Baebol we oli fraet gud long God mo oli lego ol fasin nogud.

[Futnot]

?Yu Yu Save Ansa Long Ol Kwestin Ya?

• ?Fasin blong fraet long God i minim wanem, mo fasin ya i mekem wanem long yumi?

• ?Olsem wanem fasin blong fraet long God i joen wetem fasin blong wokbaot wetem God?

• ?Olsem wanem Jisas i soemaot se fasin blong fraet long God i joen wetem fasin blong lavem hem?

• ?Olsem wanem yumi save holem wan tingting blong fraet gud long Jeova oltaem?

[Kwestin]

[Tok blong pija long pej 17]

Ol king blong Isrel oli kasem oda blong mekem wan kopi blong Loa mo ridim evri dei

[Tok blong pija long pej 18]

Fraet long Jeova bambae i lidim yumi blong trastem hem olsem wan pikinini we i trastem papa blong hem

[Foto Credit Line blong pija long pej 15]

Stars: Photo by Malin, © IAC/RGO 1991