Wan Kwestin

?Tok we God i talem long Jeremaea 7:16 i minim se ol Kristin oli no save prea from wan man we Kristin kongregesen i putumaot hem from we hem i no tanem tingting blong hem from sin blong hem?

Laen blong Juda i no stap tru long God, taswe Jeova i talemaot jajmen blong hem agens long olgeta. Biaen, hem i talem long Jeremaea se: “I nogud yu stap prea from ol man ya, mo yu no krae i kam long mi long nem blong olgeta. I nogud yu traem askem long mi blong mi givhan long olgeta, from we bambae mi no save lesin long yu.”—Jeremaea 7:16.

?From wanem Jeova i blokem Jeremaea blong hem i no prea from ol man Isrel? I klia we Jeova i mekem olsem from we oli mekem ol samting we i nogud bitim mak blong brekem Loa blong God. Long fored blong evriwan, oli no sem blong ‘stil, kilim man i ded, go long narafala woman. Oli stap mekem strong promes, mo biaen oli stap brekem bakegen. Oli stap mekem wosip long god ya Bal, mo oli stap biaen long ol narafala god.’ Taswe, Jeova i talem long ol man Jiu ya we oli no gat bilif se: “Mi bambae mi ronemaot yufala long fes blong mi, long sem fasin we bifo mi bin ronemaot ol laen blong Isrel ya long not, long kantri ya Isrel.” Bambae i no stret sipos Jeremaea, no eni narafala man, i prea blong Jeova i karemaot jajmen blong hem.—Jeremaea 7:9, 15.

Tok blong aposol Jon i laenap wetem poen ya, taem hem i tokbaot stret fasin blong mekem prea long God. Fastaem, hem i mekem promes long ol Kristin se: “Nomata wanem samting yumi askem long hem, i stret long ol samting we hem i wantem, be hem i save harem yumi.” (1 Jon 5:14, NW ) Biaen, Jon i gohed blong tokbaot fasin blong prea from ol narafala, i se: “Sipos wan long yufala i luk wan brata blong hem we i stap mekem sin we i no sin blong ded, hem i mas prea from brata ya blong hem. Nao bambae God i givim laef long man ya we i mekem sin. God i save givim laef long olgeta we sin blong olgeta i no blong ded, be i gat sin we i blong ded, mo mi no talem se yufala i mas prea from hemia.” (1 Jon 5:16) Jisas tu i tokbaot sin we  “bambae God i no save tekemaot,” hemia sin agens long tabu spirit.—Matiu 12:31, 32.

?Hemia i minim se, olgeta we oli no tanem tingting blong olgeta from sin, ale Kristin kongregesen i putumaot olgeta, oli bin mekem sin we “i blong ded,” taswe yumi no mas prea from olgeta? I no rili olsem from we sam long ol sin ya oli no sin we i blong ded. I hadwok blong talem stret sipos oli sin we “i blong ded,” no nogat. Tingbaot King Manase blong Juda. Hem i wokem ol olta blong wosip long ol giaman god, i kilim pikinini blong hem blong mekem sakrefaes, i wok wetem rabis spirit, mo i putum ol aedol insaed long haos tempol blong Jeova. Baebol i talem se Manase mo ol man oli “mekem ol fasin we i nogud moa, i winim ol rabis fasin blong ol hiten man ya bifo, we Hae God i bin kilim olgeta long taem ya we hem i tekem ol bubu blong olgeta oli kam stap long kantri ya.” From olgeta samting ya, Jeova i panisim Manase, i sanem hem i go long Babilon, olsem wan presina we ol jen oli fasem hem.—2 King 21:1-9; 2 Kronikel 33:1-11.

?Ol sin blong Manase oli nogud bitim mak, we oli blong ded? I luk olsem se nogat, from we stori i gohed blong talem long saed blong hem se: “Long taem ya, hem i stap harem i nogud tumas, nao hem i tanem tingting blong hem, i mekem tingting blong hem i stap daon. Nao hem i luk long Hae God ya we i God blong hem, mo i krae long hem blong i givhan long hem. Mo Hae God i harem prea blong hem, mo i letem hem i kambak long Jerusalem, i rul bakegen. Nao from samting ya, hem i luksave we Hae God ya, hem i God tru.”—2 Kronikel 33:12, 13.

Taswe, sipos kongregesen i putumaot wan man, yumi no mas kwik blong jajem hem se hem i mekem wan sin we i blong ded. I tekem taem blong luksave sipos hat blong wan man i gud no i nogud. Mo tu, wan risen from wanem kongregesen i putumaot wan man we i sin, i blong mekem hem i luksave rong blong hem, mo blong i tanem tingting blong hem from sin blong hem.

From we man ya i no moa stap long kongregesen, olgeta we oli moa klosap long hem, olsem hemia we hem i mared wetem no ol memba blong famle, oli ol faswan blong luksave sipos hat mo fasin blong hem i jenis. Taem oli luk ol jenis ya maet oli bilif se man ya i no mekem wan sin we i blong ded. Maet samting ya i save pusum olgeta blong oli prea blong man ya i save kasem paoa from Tok blong God, mo blong Jeova bambae i mekem long man ya ol samting we i stret long tingting blong Hem.—Ol Sam 44:21; Prija 12:14.

Nating sipos samfala oli save luk se man ya i jenis, mo oli bilif se hem i tanem tingting blong hem finis from sin blong hem, be maet ful kongregesen i no save luksave samting ya. Sipos oli harem wan brata i prea long fored blong ol narafala from wan we kongregesen i putumaot hem, bambae oli sapraes bigwan, tingting blong olgeta i save trabol, mo tu, maet oli save foldaon from. Taswe, olgeta we oli harem se oli wantem prea from man ya we i mekem sin, oli save prea taem oli stap olgeta wan nomo. Oli lego ol narafala samting i stap long han blong ol elda long kongregesen.

[Tok blong pija long pej 31]

Taem Manase i mekem tingting blong hem i stap daon long fored blong Jeova, Jeova i fogivim bigfala sin blong hem

[Foto Credit Line blong pija long pej 30]

Reproduced from Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s