Ripot Long Wok Blong Kingdom

“Yu Yu Ring Long Rong Namba Ya”

LONG Johannesburg, Saot Afrika, Leslie mo Caroline oli toktok long telefon, blong prij long ol man we oli laef long wan vilej we oli no gat raet blong go insaed long hem. Fastaem, Leslie i toktok long telefon, nao taem hem i finis, Caroline i mekem i sem mak, mo tufala i gohed olsem. Tufala i faenem sam man nomo long haos mo ol man ya oli no soem bigfala intres long Kristin mesej we tufala i stap talemaot. Be Caroline i harem gud taem wan woman i ansa long telefon.

Caroline i askem se: “?Yu yu Misis B—?”

Woman ya i talem wetem kaen fasin se: “No, mi mi Misis G—. Yu yu ring long rong namba ya.”

Caroline i harem we voes blong woman ya i kaen gud, nao hem i talem se: “Oraet, be nating, bambae mi eksplenem long yu wanem samting mi wantem talem long Misis B—.” Nao hem i gohed blong tokbaot ol blesing we Kingdom blong God bambae i karem long ol man i no longtaem. Tufala i mekem plan se Caroline bambae i karem buklet ya ?Wanem Samting We God i Wantem Yumi Blong Mekem? i go long woman ya. Nao, Misis G— i askem se: “?Be, yufala i blong wanem skul?”

Caroline i ansa se: “Mifala i Witnes blong Jeova.”

“!No, mi no laekem skul ya! Mi mi no wantem luk yu.”

Caroline i ansa wetem kaen fasin se: “Be Misis G—, long 20 menet we i jes pas, mi mi serem wan nambawan promes blong fiuja wetem yu, mi ridim long Baebol ol samting we i no longtaem bambae Kingdom blong God i mekem long ol man. Yu bin soem se yu hapi mo glad tumas blong harem ol samting ya, mo yu bin wantem save moa. ?Yu yu save wanem long saed blong ol Witnes blong Jeova? ?Sipos yu yu sik, bambae yu go luk wan mekanik? ?From wanem yu no wantem letem mi mi soemaot bilif blong ol Witnes blong Jeova long yu?

Woman ya i stap kwaet blong smoltaem, afta hem i ansa se: “Mi ting se samting we yu talem i stret. I moa gud yu kam. !Be yu mas kasem save se bambae yu neva pulum mi mi go long skul blong yu!”

Caroline i talem se: “Misis G—, neva mi mi save pulum yu yu kam long skul blong mi. Jeova nomo i save mekem samting ya.”

Taem Caroline i karem buklet i go, ol samting i go gud, mo Misis G— (Betty) i agri blong hem i kam luk hem bakegen. Taem Caroline i gobak, Betty i talem se hem i bin talemaot long ol woman we oli kakae wanples wetem hem se hem i stap storian wetem ol Witnes blong Jeova. Ol woman ya oli sakem han blong olgeta i go antap mo oli askem se: “?From wanem yu mekem olsem? !Ol man ya oli no bilif long Jisas nating!”

Kwiktaem nomo Caroline i mekem Betty i tingbaot bigfala poen we tufala i bin tokbaot long saed blong Kingdom blong God.

Caroline i askem se: “?Hu bambae i King blong Kingdom ya?”

Betty i ansa se: “!Be, Jisas nomo!”

Caroline i se: “Hemia nao.” Hem i gohed blong eksplenem we ol Witnes blong Jeova oli bilif se Jisas i Pikinini blong God, be hem i no wan haf blong Triniti, olsem we hem i sem mak long God.—Mak 13:32; Luk 22:42; Jon 14:28.

Afta we tufala i storian bakegen plante taem lelebet, i kam klia se nating we Betty i glad mo i gat gudfala tingting, be helt blong hem i nogud. Hem i kasem kansa mo hem i fraet blong ded. Hem i talem se: “Mi glad tumas sipos mi bin harem ol samting ya plante yia bifo, mo mi save gat bilif olsem yu.” Caroline i leftemap tingting blong hem taem hem i soem ol vas blong Baebol we oli tokbaot ded olsem wan slip, mo we man i save wekap long slip ya taem bambae hem i girap bakegen long ded. (Jon 11:11, 25) Samting ya i rili leftemap tingting blong Betty, mo naoia hem i gohed blong stadi long Baebol. Wan samting nomo i blokem hem blong no joen long ol miting long Haos Kingdom, hemia from we helt blong hem i nogud tumas.

Caroline i talem se: “Mi kasem save se ol enjel oli stap lidim wok ya. !Mi mi mestem nomo taem mi ring long namba blong Betty, mo traem tingbaot, hem i gat 89 yia!”—Revelesen 14:6.