Gudfala Rod Blong Winim Wari

“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.”—MATIU 11:28.

1, 2. (a) ?Wanem i stap insaed long Baebol we i save givhan blong mekem se yumi no gat tumas wari? (b) ?Ol tijing blong Jisas oli givhan long man olsem wanem?

 ATING yu yu agri se i nogud blong wari tumas, samting ya i save mekem yumi harem nogud. Baebol i soemaot se olgeta man oli stap harem nogud from ol trabol we i mekem tingting blong olgeta i hevi tumas, ale oli wet nomo blong aot long laef ya we i fulap long wari. (Rom 8:20-22) Be Baebol i soemaot tu, olsem wanem yumi save winim plante wari naoia nomo. Yumi save mekem olsem sipos yumi folem advaes mo eksampol blong wan yangfala man we i stap laef 2,000 yia bifo. Hem i wan man blong wokem ol haos, be hem i laekem moa blong joen wetem ol man. Tok blong hem i tajem hat blong ol man, hem i givim samting we olgeta oli nidim, hem i givhan long olgeta we oli no moa gat paoa, mo hem i leftemap tingting blong olgeta we oli harem nogud. Samting we i moa impoten, hem i givhan long olgeta blong mekem samting we oli naf blong mekem long wok blong God. Olsem nao, ol man ya oli faenem rod blong winim wari we i bitim mak, olsem we yumi tu yumi save mekem.—Luk 4:16-21; 19:47, 48; Jon 7:46.

² Man ya, Jisas blong Nasaret, i no dipen long hae save mo waes blong wol, olsem samfala oli lukaotem long Rom, Atens, mo Aleksandria. Nating se i olsem, ol man oli rimemba yet ol tijing blong hem. Stamba blong ol tijing blong hem, hem i long saed blong gavman we God bambae i yusum blong rulum gud wol ya. Mo tu, Jisas i eksplenem ol stamba rul we ol man oli mas folem long laef, mo ol rul ya oli wokgud yet tede. Olgeta we oli kasem save long ol tijing blong Jisas mo folem olgeta, oli save kasem gudfala frut naoia, olsem oli save winim wari we i hevi tumas long olgeta. ?Yu yu wantem kasem frut ya?

3. ?Wanem ol nambawan tok we Jisas i talem blong singaot ol man?

³ Maet tingting blong yu i hafhaf long saed ya. Maet yu yu askem se: ‘?Wan man olsemia we i laef longtaem bifo, hem i rili save givhan long laef blong mi naoia?’ Traem lesin long tok we Jisas i talem blong singaot yumi, se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Matiu 11:28-30) ?Ol tok ya blong Jisas i minim wanem? Naoia, bambae yumi tingting gud long ol tok ya mo traem luk olsem wanem i save givhan long yumi blong winim wari we i karemaot glad.

4. ?Jisas i stap toktok long wanem kaen man, mo from wanem ol man we oli stap lesin long hem maet oli faenem i had blong folem tok blong hem?

⁴ Jisas i toktok long plante man we oli rili traehad blong mekem i stret, be oli stap “karem ol hevi samting” from we ol lida blong Isrel oli mekem wosip blong olgeta i kam olsem wan bigfala baden. (Matiu 23:4) Oli putumap plante tumas rul we ol man oli mas folem long klosap evri haf long laef blong olgeta. ?Bambae yu yu faenem i hevi tumas sipos yu harem tok ya oltaem se, “yu no mas mekem hemia” mo hemia mo hemia? Be, Jisas i defren. Hem i singaot ol man blong lesin long hem, mo long rod ya, oli save  faenem trutok, stret fasin, mo mekem laef blong olgeta i kamgud moa. Yes, blong save trufala God, oli mas lesingud long Jisas Kraes, from we hem nao i soemaot ol fasin blong Jeova long ol man. Jisas i talem se: “Man we i luk mi, hem i luk Papa blong mi.”—Jon 14:9.

?Yu Gat Tumas Wari Long Laef Blong Yu?

5, 6. ?Ol aoa blong wok long taem blong Jisas mo pei we ol man oli kasem, i sem mak long hemia blong yumi tede?

⁵ Maet yu intres long samting ya from we yu harem se ol wok blong yu insaed long famle no long ples we yu wok long hem evri dei, i hevi long yu. Maet i gat sam narafala wok we yu harem se i bigwan tumas long yu. Sipos i olsem, yu yu sem mak long ol gudfala man we Jisas i toktok mo i givhan long olgeta. Tingbaot wok ya blong winim naf mane blong laef. Hemia wan samting we plante man tede oli faenem i hevi tumas, olsem plante man long taem blong Jisas oli bin faenem.

⁶ Long taem blong Jisas, man i mas wok 6 dei evri wik, 12 aoa evri dei, mo pei blong hem i samting olsem wan denarias blong wan dei. (Matiu 20:2-10) ?Pei ya i sem mak long hemia we yu mo ol fren blong yu oli kasem? I no isi blong skelem pei blong ol man long taem bifo wetem hemia we ol man oli kasem tede. Wan rod blong mekem olsem, i blong tingbaot wanem samting mane blong yumi i naf blong pem. Wan man we i stap stadi long bisnes ya, hem i talem se long taem blong Jisas, oli mas wok wan aoa blong pem wan bred we oli wokem long fo kap wit. Wan narafala man blong stadi i talem se oli mas wok tu aoa blong pem wan kap gudfala waen. From samting ya, yumi luk se ol man long taem bifo oli mas wok strong mo oli mas wok blong plante aoa, blong kasem naf mane blong stap laef. Olgeta ya oli nidim blong spel smol, mo oli nidim wan samting blong mekem olgeta oli harem gud bakegen. Yumi tu, yumi nidim samting ya. Sipos yu yu stap wok samples, ating yu luk se masta i pusum yu oltaem blong yu wok strong moa. Plante man oli faenem se oli no moa gat taem blong tingting gud long ol disisen we oli mas mekem. Ating yu tu yu wantem tumas blong spel smol.

7. ?Ol man oli mekem wanem taem oli harem ol tok ya blong Jisas?

⁷ I klia se, bighaf blong ol man we oli stap lesin long Jisas, oli laekem tumas tok we hem i talem, taem hem i singaot olgeta ‘we oli stap hadwok tumas, mo we oli stap karem ol hevi samting.’ (Matiu 4:25; Mak 3:7, 8) Mo tingbaot promes we Jisas i mekem se: “Bambae mi tekemaot ol hevi samting ya, mi mekem we yufala i spel gud.” Semfala promes ya i stap yet tede. Hem i save kamtru long yumi sipos yumi harem se ‘yumi stap hadwok tumas, mo yumi stap karem ol hevi samting.’ Mo hem i save kamtru long olgeta we yumi laekem olgeta tumas, we olgeta tu oli harem nogud from sem samting ya.

8. ?Olsem wanem wok blong tijimgud pikinini, mo fasin blong kam olfala oli givim moa wari?

 ⁸ I gat plante narafala hevi samting tu we ol man oli karem. Tijimgud ol pikinini, hemia wan bigfala wok. Ol pikinini tu oli kasem plante traem. Plante moa man, woman, mo pikinini, oli stap kasem ol sik long bodi mo tingting. Mo nating se ol man oli laef longtaem naoia mo i gat ol niufala meresin, be ol olfala oli stap kasem plante bigfala trabol we i traem olgeta.—Prija 12:1.

Karem Yok

9, 10. ?Long taem bifo, yok i wan pijatok we i minim wanem? ?Mo from wanem Jisas i singaot ol man blong oli putum yok blong hem long solda blong olgeta?

⁹ ?Yu yu makem narafala tok ya we Jisas i talem long Matiu 11:28, 29 se: “Yufala i mas putum yok blong mi long solda blong yufala, blong yufala i wok wetem mi”? Long taem blong Jisas, maet ol man olbaot oli harem se oli stap wok wetem wan yok long solda blong olgeta. Stat long taem bifo olgeta, yok i olsem wan pijatok we i minim wok slef no man i no fri. (Jenesis 27:40, NW; Levitikas 26:13, NW; Dutronome 28:48, NW ) Plante man blong wok we Jisas i storian wetem olgeta, oli wok wetem wan prapa yok long solda blong olgeta, blong oli karem ol hevi samting. I gat ol defdefren kaen yok. Sam oli sidaon gud long solda blong man, mo i isi blong karem. Be sam yok oli ravem skin long nek mo solda blong man, mo oli givim soa. From we Jisas i wan kapenta, ating hem i mekem plante yok. I sua se hem i save olsem wanem blong katem gud wan wud, blong wokem wan yok we i “isi nomo” blong karem. Maet hem i bin fasem skin blong buluk no wan kaliko long ol yok, long ples we i tajem solda mo nek blong ol man, blong mekem se i no ravem skin.

¹⁰ Taem Jisas i talem se, “Putum yok blong mi long solda blong yufala,” maet hem i stap yusum wan pijatok blong soem se hem i save givim wan yok we i “isi nomo” blong karem, i no givim soa long nek mo solda blong man. Taswe, Jisas i gohed se: “Ol samting we bambae mi givim long yufala blong yufala i karem, oli no hevi.” Tok ya i soemaot se yok we hem i putum long man i no save mekem man i harem nogud, mo wok we hem i givim i no had olsem wok blong slef. I tru, taem Jisas i singaot ol man blong putum yok blong hem long solda blong olgeta, hem i no stap talem se bambae oli kam fri long olgeta trabol we i stap mekem olgeta oli harem nogud. Nating se i olsem, tingting ya we hem i givim long olgeta we i defren long hemia we oli holem fastaem, i save mekem olgeta oli harem gud. Mo tu, bambae oli spel long tingting blong olgeta sipos oli jenisim sam samting long laef blong olgeta, mo sipos oli jenisim sam fasin we oli stap folem. Be samting we i impoten moa hemia blong holem gudfala promes blong fiuja i stap klia long tingting blong olgeta mo bilif strong long hem. Hemia nao bambae i mekem se oli no moa wari tumas long ol samting blong laef.

Yu Yu Save Faenem Pis

11. ?Olsem wanem yumi save se Jisas i no stap talem long ol man blong oli tekemaot yok we oli stap karem mo putum narawan?

¹¹ Plis makem: Jisas i no talem long ol man blong oli tekemaot yok we i stap finis long solda blong olgeta mo putum narafala yok ya long ples blong hem. Gavman blong Rom i gohed blong rul long kantri blong olgeta, olsem we tede ol defdefren gavman oli rul long ol kantri we ol Kristin oli stap long olgeta. Ol man long faswan handred yia, oli no kam fri long bigfala takis we gavman blong Rom i putum long olgeta. Oli kasem ol sik mo trabol long saed blong mane. Sam samtaem oli mestem mo oli mekem sin. Nating se i olsem, taem oli folem ol tijing blong Jisas, oli faenem pis long laef blong olgeta, olsem yumi save faenem tede.

12, 13. ?Jisas i makem wanem wok we bambae i givim pis long tingting blong man, mo samfala oli mekem wanem taem oli harem tok blong hem?

¹² I kam klia se pijatok blong Jisas long saed blong yok i joen bigwan wetem wok blong pulum ol man oli kam disaepol. Bigfala wok blong Jisas i blong tijim ol man, antap moa, long saed blong Kingdom blong God. (Matiu 4:23) Taswe, taem hem i talem se, “Putum yok blong mi long solda blong yufala,” hemia i min se oli mas mekem semfala wok blong tijim ol narafala olsem Jisas i mekem. Ol Gospel oli soem se Jisas i pulum ol man we hat blong olgeta i stret, blong oli livim prapa wok blong olgeta mo folem hem. Wok i wan bigfala wari long laef blong plante man. Traem tingbaot tok we hem i talem blong singaot Pita, Andru, Jemes mo Jon: ‘Yufala i biaen long mi, yufala i kam man blong mi. Bambae mi mi mekem yufala i kam man blong pulum man.’ (Mak 1:16-20) Hem i soemaot long ol man ya blong pulum fis, olsem wanem oli save harem gud sipos oli mekem semfala wok we hem i stap putum long fasples long laef blong hem, mo sipos oli letem hem i lidim olgeta mo givhan long olgeta long wok ya.

¹³ Sam man Isrel oli kasem save long tok blong Jisas mo oli folem. Traem tingbaot samting we i hapen long sanbij, we Luk 5:1-11 i tokbaot. Fo man blong pulum fis oli bin wok strong blong fulnaet, be oli no  kasem wan fis. !Nao wantaem nomo, ol net blong olgeta oli fulapgud long ol fis! Hemia i no kamaot olsem nomo, Jisas nao i mekem samting ya i hapen. Taem ol man ya blong pulum fis oli lukluk i kam long so, oli luk wan bigfala hip man we oli stap lesin long Jisas, oli stap intres gud long ol tijing blong hem. Samting ya i soemaot long ol man ya blong pulum fis, wanem nao mining blong tok we Jisas i talem long olgeta, se: ‘I stat naoia, bambae yufala i man blong pulum man.’ ?Taem oli harem tok ya blong Jisas, oli mekem wanem? “Olgeta oli pul long tufala bot ya, oli gobak long so, nao oli livim olgeta samting blong olgeta, oli biaen long Jisas, oli kam man blong hem.”

14. (a) ?Olsem wanem yumi save faenem pis long laef blong yumi tede? (b) ?Jisas i talemaot wanem gud nius we i mekem man i harem gud?

¹⁴ Yu tu yu save mekem olsemia. Wok blong tijim ol man long trutok blong Baebol i stap gohed yet. Samwe long sikis milian Witnes blong Jeova long wol oli obei finis long tok blong Jisas blong ‘putum yok blong hem long solda blong olgeta.’ Olgeta ya oli kam ol “man blong pulum man.” (Matiu 4:19) Sam long olgeta oli mekem wok ya fultaem olsem we hemia faswan wok long laef blong olgeta. Samfala, oli naf blong mekem wok ya haftaem. Olgeta evriwan oli faenem se oli gat pis long tingting blong olgeta from wok ya, ale oli no moa wari tumas long saed blong laef. Oli stap mekem samting we oli harem gud long hem, hemia wok blong talemaot gud nius—“gud nius blong kingdom.” (Matiu 4:23, NW ) Oltaem yumi glad blong tokbaot gud nius, be hemia i tru moa long saed blong spesel gud nius ya. Baebol i givim ol stamba save we yumi nidim blong halpem plante man blong oli bilif strong se oli save daonem wari long laef blong olgeta.—2 Timoti 3:16, 17.

15. ?Olsem wanem ol tijing blong Jisas long saed blong laef oli save givhan long yu?

¹⁵ Samfala we oli jes stat blong kasem save long  Kingdom blong God, oli kasem sam gudfala frut finis from ol tijing blong Jisas long saed blong laef. Plante oli save talem stret se ol tijing blong Jisas oli bin putum pis long laef blong olgeta mo halpem olgeta blong jenisim laef blong olgeta fulwan. Yu tu yu save kasem gudfala frut ya, sipos yu stadi gud long ol rul we yumi faenem long ol stori blong laef mo wok blong Jisas, antap moa, ol Gospel blong Matiu, Mak, mo Luk.

Rod Blong Harem Gud

16, 17. (a) ?Weples yumi save faenem sam stamba tijing blong Jisas? (b) ?Yumi mas mekem wanem blong faenem pis long laef blong yumi from ol tijing blong Jisas?

¹⁶ Klosap long hot taem blong yia 31 K.T., * Jisas i mekem wan tok we olgeta man long wol oli save long hem, hemia Bigfala Toktok blong hem Antap long Hil. Tok ya we i talemaot plante tijing blong Jisas, i stap long Matiu japta 5 kasem 7. Yu save faenem sam moa tijing blong Jisas long ol narafala ples long ol Gospel tu. Plante samting we Jisas i talem i isi nomo blong kasem save long hem, be maet i hadwok blong folem long laef blong yu. I gud we yu tekem taem blong ridim ol japta ya, mo tingting gud long olgeta. Letem ol toktok blong hem oli gat paoa long tingting mo fasin blong yu.

¹⁷ I klia se yumi save folem plante defren plan blong stadi long ol tijing blong Jisas. Be i gud yumi putum ol stamba tijing blong Jisas long ol grup, nao yumi traem mekem wan grup i wok long laef blong yumi evri dei blong manis. ?Olsem wanem blong mekem olsem? Yumi no mas ridim olgeta hareap nomo. Tingbaot rij haeman ya we i askem long Jisas Kraes se: “?Bambae mi mas mekem olsem wanem blong kasem laef ya we i no save finis?” Taem Jisas i talemaot sam impoten haf long Loa blong God, hem i talem se hem i stap folem olgeta finis. Be, hem i save se i mas mekem moa. Jisas i  talem long hem blong traehad moa blong folem ol rul blong God long laef blong hem wan, mo blong mekem wok olsem wan disaepol. Be i luk olsem se man ya i no wantem traehad olsem. (Luk 18:18-23) Taswe, wan man we i wantem kasem save long ol tijing blong Jisas tede, i mas rimemba se i no naf jes blong agri wetem ol tijing ya. Sipos hem i wantem daonem wari long laef blong hem, hem i mas bilif fulwan long ol tijing ya mo folem olgeta.

18. Soemaot olsem wanem blong yusum gud bokis we i joen wetem stadi ya.

¹⁸ Faswan samting we yu save mekem blong lukluk gud long ol tijing blong Jisas mo folem olgeta, i blong ridim faswan poen long bokis we i joen wetem stadi ya. Hem i tokbaot Matiu 5:3-9. I tru, yumi evriwan i save tingting longtaem long ol nambawan advaes long ol vas ya. ?Be, sipos yumi traem luksave ol bigfala tingting long olgeta, yumi faenemaot wanem long saed blong stret tingting mo fasin we yumi mas gat? ?Wanem samting bambae i rili givhan long yu blong winim ol wari long laef? ?Sipos yu yu putum tingting blong yu moa long ol samting long saed blong spirit, mo yusum moa taem blong mekem olgeta, olsem wanem samting ya bambae i mekem i gud long yu? ?I gat wan samting long laef blong yu we yu nidim blong lego hem, blong yu save spenem moa taem long ol samting long saed blong spirit? Sipos yu mekem olsem, bambae yu glad moa long laef blong yu naoia.

19. ?Yumi save mekem wanem blong kasem save we i dip moa?

¹⁹ I gat wan samting moa we yu save mekem. I gud blong tokbaot ol vas ya wetem wan narafala man blong God, maet man no woman blong yu, wan famle no wan fren blong yu. (Ol Proveb 18:24; 20:5) Tingbaot se haeman ya we i rij i askem kwestin long wan narafala man, hemia Jisas, long saed blong samting we i joen wetem laef blong hem. Ansa long kwestin ya i save mekem laef blong hem long fiuja i glad moa mo i longfala. I tru, Kristin brata no sista blong yu we yu storian wetem hem, bambae i no olsem Jisas. Be nating, storian long saed blong ol tijing blong Jisas bambae i givhan long yutufala evriwan. Yu no mas wet blong mekem samting ya.

20, 21. ?Yu save folem wanem plan blong kasem save long ol tijing blong Jisas, mo olsem wanem blong luksave sipos yu stap kamgud moa?

²⁰ Lukluk bakegen long bokis ya “Ol Tijing Blong Givhan Long Yu.” I gat plante grup blong ol tijing ya, hemia blong mekem se yu save tingbaot wan grup evri dei. Fastaem, ridim tok blong Jisas long ol vas we oli stap. Nao tingting gud long ol tok blong hem. Tingbaot olsem wanem yu save mekem tok ya i wok long laef blong yu. Sipos yu harem se yu stap mekem samting ya finis, ale, tingbaot wanem samting moa we yu save mekem blong folem tijing ya. Traem folem long ful dei ya. Sipos i hadwok long yu blong kasem save long hem no blong luksave olsem wanem blong mekem i wok, gohed long hem long nekis dei. Be, yu no nid blong kasem hem fulwan bifo we yu go long nekis tijing. Ale, long nekis dei bakegen, yu save tingting long wan narafala tijing. Long en blong wik, traem tingtingbak long wanem we yu bin mekem blong folem fo no faef long ol tijing ya blong Jisas. Long seken wik, yu save gohed long sam moa tijing, wan niuwan evri dei. Yu no mas letem tingting blong yu i foldaon sipos yu luk se yu kam slak bakegen blong folem wan tijing. Samting ya i stap hapen long evri Kristin. (2 Kronikel 6:36; Ol Sam 130:3; Prija 7:20; Jemes 3:8) Long namba tri mo fo wik, gohed blong folem ol tijing ya.

²¹ Long en blong wan no tu manis, ating yu wok finis long olgeta 31 tijing ya. ?Bambae yu harem olsem wanem? Bambae yu glad moa, ating yu no moa wari tumas. Nating se yu kamgud smol nomo, ating bambae wari i godaon, no yu faenem rod blong winim plante wari, mo yu gat wan plan we yu save gohed long hem. Yu no mas fogetem se, i gat plante narafala nambawan tijing blong Jisas we oli no stap long lis ya. Traem faenem sam long olgeta, mo mekem oli wok long laef blong yu.—Filipae 3:16.

22. ?Wanem i save kamaot sipos yumi folem ol tijing blong Jisas, mo bambae yumi stadi long wanem narafala poen?

 ²² Ating yu luksave finis se, nating we yumi mas wok blong karem yok blong Jisas, be hem i isi blong karem. Ol tijing blong hem mo wok we ol disaepol oli mas mekem, i no hevi tumas. Aposol Jon we hem i wan gudfala fren blong Jisas, i karem yok ya blong bitim 60 yia, nao biaen hem i talem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Yu tu yu save bilif fulwan long samting ya. Sipos yu gohed longtaem blong folem ol tijing blong Jisas, bambae yu luk we yu no moa harem nogud tumas long ol samting we i mekem ol man tede oli wari bitim mak. Bambae yu luk we yu gat pis long tingting blong yu. (Ol Sam 34:8) Be i gat wan narafala samting we yumi mas tingbaot long saed blong yok ya blong Jisas we i isi nomo blong karem. Jisas i bin talem se hem i ‘wan kwaet man, mo tingting blong hem i stap daon.’ ?Olsem wanem samting ya i joen wetem ol tijing we yumi kasem long Jisas mo wok we yumi mas mekem blong folem hem? Long nekis stadi, bambae yumi tokbaot samting ya.—Matiu 11:29.

[Futnot]

?Wanem Ansa Blong Yu?

• ?From wanem yumi mas lukluk i go long Jisas taem yumi traem winim wari we i bitim mak?

• ?Yok i pijatok blong soem wanem samting, mo from wanem i olsem?

• ?From wanem Jisas i singaot ol man blong putum yok blong hem long solda blong olgeta?

• ?Olsem wanem yumi save harem gud long saed blong spirit?

[Kwestin]

[Tok blong makem poen long pej 14]

Stamba vas blong ol Witnes blong Jeova long yia 2002 hemia: “Kam long mi, nao mi bambae . . . mi mekem we yufala i spel gud.”—Matiu 11:28.

[Bokis/Foto blong pija long pej 12, 13]

Ol Tijing Blong Givhan Long Yu

?Wanem ol gudfala samting we yu save faenem long Matiu japta 5 kasem 7? Long ol japta ya, i gat ol tijing we Bigfala Tija ya Jisas i bin tokbaot taem hem i stap long wan hil long Galili. Plis ridim ol vas ya long prapa Baebol blong yu, mo traem ansa long ol kwestin we oli joen wetem ol vas ya.

1. 5:3-9 ?Ol vas ya oli stap talem wanem long mi long saed blong prapa fasin blong mi? ?Mi mi save mekem wanem blong gat moa glad? ?Olsem wanem mi save lukaot moa long ol samting we mi nidim long saed blong spirit?

2. 5:25, 26 ?Bitim we mi folem fasin blong plante narafala we oli stap raorao oltaem, i moa gud we mi mekem wanem?—Luk 12:58, 59.

3. 5:27-30 ?Ol tok blong Jisas i makem wanem poen long saed blong fasin blong tingbaot seks oltaem? ?Sipos mi blokem fasin ya, olsem wanem samting ya bambae i givim moa glad mo pis long tingting blong mi?

4. 5:38-42 ?From wanem mi mas traehad blong ronwe long fasin we plante man tede oli ting se i impoten, hemia blong wantem win oltaem?

5. 5:43-48 ?Sipos mi traem save moa olgeta we oli olsem ol enemi blong mi, olsem wanem samting ya i save halpem mi? ?Olsem wanem samting ya i save givhan long mi blong daonem no winim wari?

6. 6:14, 15 ?Sipos sam samtaem mi no faenem i isi blong fogivim narafala, maet hemia from we mi mi jalus no mi kros? ?Olsem wanem mi save jenisim ol fasin ya?

7. 6:16-18 ?Mi mi traehad moa blong soemaot mi se mi stret man, i winim we mi traem kamgud moa long hat blong mi? ?Wanem samting we mi mas tingbaot moa?

8. 6:19-32 ?Wanem i save hapen sipos mi wari tumas long saed blong mane mo ol sas samting? ?Blong no bitim mak long saed ya, mi mas tingbaot wanem?

9. 7:1-5 ?Mi mi harem olsem wanem, taem mi stap klosap long ol man we oli daonem, tok agensem, mo faenem poen long narafala? ?From wanem i impoten we mi no kam olsemia?

10. 7:7-11 ?Sipos i gat nid blong gohed blong askem bakegen mo bakegen long God taem mi wantem wan samting, i gat nid blong folem sem fasin ya blong gohed oltaem, long ol narafala samting long laef tu?—Luk 11:5-13.

11. 7:12 ?Nating se mi savegud ‘Golden Rul,’ mi mi stap folem advaes ya long ol fasin we mi mekem long narafala?

12. 7:24-27 ?From we i wok blong mi nomo blong wokbaot stret long laef, olsem wanem mi save rere moa from ol hadtaem we oli save kasem mi wantaem nomo, mo ol bigfala trabol we oli save mekem mi mi harem nogud? ?From wanem mi mas tingbaot samting ya naoia?—Luk 6:46-49.

Sam moa tijing bakegen we mi save tingbaot:

13. 8:2, 3 ?Olsem wanem mi save soemaot sore long olgeta we oli trabol, olsem Jisas i bin mekem?

14. 9:9-38 ?Mi mi stap soemaot sore oltaem no nogat? ?Olsem wanem mi save soemaot sore moa?

15. 12:19 ?Folem profet tok ya long saed blong Jisas, mi mi traehad blong blokem fasin blong agyu mo rao?

16. 12:20, 21 ?Wanem gudfala samting i save kamaot sipos mi no spolem narafala wetem ol tok mo fasin blong mi?

17. 12:34-37 ?Mi mi stap tokbaot wanem oltaem? Mi save se taem mi skwisim wan aranis, jus blong aranis nomo bambae i kamaot. ?Taswe, from wanem mi mas tingting gud long samting we i stap haed insaed long hat blong mi?—Mak 7:20-23.

18. 15:4-6 ?Mi mi lanem wanem from ol tok blong Jisas long saed blong fasin blong lukaotgud long ol olfala wetem lav?

19. 19:13-15 ?Mi mas tektaem blong mekem wanem?

20. 20:25-28 ?From wanem i nogud blong traem mekem bigfala bos long ol narafala? ?Olsem wanem mi save folem fasin blong Jisas long saed ya?

Sam moa tingting, long buk blong Mak:

21. 4:24, 25 ?From wanem i impoten blong mekem gudfala fasin long ol narafala?

22. 9:50 ?Sipos mi toktok gud mo mekem i gud long narafala, wanem gudfala frut i save kamaot?

Laswan, tingbaot sam tijing we Luk i raetemdaon:

23. 8:11, 14 ?Sipos mi letem wari, mane, mo pleplei oli bos long laef blong mi, wanem i save hapen?

24. 9:1-6 ?Nating se Jisas i gat paoa blong mekem sikman i kamgud, be hem i putum wanem samting fastaem?

25. 9:52-56 ?Mi mi kwik blong harem nogud from samting we narafala i mekem no i talem? ?Mi mi stap blokem tingting blong wantem givimbak?

26. 9:62 ?Wanem tingting we mi mas gat long saed blong wok we God i givim long mi blong talemaot Kingdom blong Hem?

27. 10:29-37 ?Olsem wanem mi save pruvum se mi mi laekem ol man raonabaot, mi no olsem wan strenja long olgeta?

28. 11:33-36 ?Wanem sam jenis we mi save mekem long laef blong mi blong i save kam klia mo isi moa?

29. 12:15 ?Taem mi skelem laef wetem ol sas samting, mi luksave wanem?

30. 14:28-30 ?Sipos mi tekem taem blong tingting gud long ol disisen we mi mekem, maet mi save blokem wanem samting? ?Bambae mi kasem wanem gudfala frut from?

31. 16:10-12 ?Wanem ol blesing we mi save kasem from fasin blong holemstrong long God long ful laef blong mi?

[Tok blong pija long pej 10]

Man we i karem yok blong Jisas i harem gud blong mekem wok we i save sevem laef blong narafala