‘Meresin Blong Putum Long Ae Blong Yufala’

LONG faswan handred yia, Jisas Kraes i talem tok ya long Kristin kongregesen blong Laodisia, long Esia Maena.

Jisas i talem se: “Yufala i mas pem meresin . . . blong putum long ae blong yufala, nao bambae ae blong yufala i no moa blaen, yufala i save lukluk.” I no prapa ae blong olgeta we i gat sik, be oli nidim meresin from we oli blaen long saed blong spirit. Ol Kristin blong Laodisia oli letem tingting blong ol man ples blong olgeta i pulum olgeta, hemia blong wantem tumas ol rij samting. Ale oli kam slak blong lukaot long nid blong olgeta long saed blong spirit.

Jisas i tokbaot samting we i mekem se oli no moa save lukluk gud, i se: “Yufala i stap talem se yufala i rijman, yufala i gat evri samting, yufala i no sot long wan samting, be yufala i no save. Yufala i puaman we yufala i trabol gud, we olgeta man oli sore tumas long yufala, mo ae blong yufala i blaen mo yufala i neked.” Ol memba blong kongregesen oli nidim “meresin” we i save mekem ae blong olgeta i kam gud, nating se oli no luksave samting ya. Mo “meresin” ya, oli save kasem nomo sipos oli letem Jisas Kraes i tijim mo stretem olgeta. Jisas i talem se: “Yufala i mas pem . . . long mi.”—Revelesen 3:17, 18.

Ol trufala Kristin tede oli mas lukaot gud blong no letem fasin blong ol man raonabaot long olgeta blong ronem ol sas samting mo pleplei i gat paoa long laef blong olgeta, olsem we ol Kristin blong Laodisia bifo oli bin mekem. Advaes we Jisas i givim blong mekem yumi stap gud long saed blong spirit, i talem se: “Yufala i mas pem meresin long mi blong putum long ae blong yufala, nao bambae ae blong yufala i no moa blaen, yufala i save lukluk.”

Makem gud se yumi mas pem “meresin” ya blong ae. I gat wan praes blong hem. Yumi mas spenem taem blong stadi mo tingting dip long Tok blong God. Man blong raetem Ol Sam i talem long yumi se Tok ya “i klin, i mekem ae blong yumi [long saed blong spirit] i saen.”—Ol Sam 19:8, NW.