“?Ol Man Oli Stap Tokbaot Mi, Se Mi Hu?”

HEM i Krismas taem bakegen. Ol man raon long wol oli jusum blong mekem wan lafet blong betde. ?Betde ya i blong hu? ?Blong Pikinini blong God no blong wan man Jiu nomo we i strong long wosip mo i wantem jenisim skul blong ol manples blong hem long faswan handred yia? ?Hem i betde blong wan man we i stap tok long saed blong ol puaman, no blong wan rebel we i stap mekem trabol long Gavman blong Rom nao oli mas kilim hem i ded? ?No ating hemia betde blong wan waes man we i pulum ol man blong oli kasem save moa long laef blong olgeta mo samting we oli mas mekem blong laef mo kam waes moa? Yu gat gudfala risen blong askem kwestin ya se: ‘?Jisas Kraes hem i hu?’

Jisas hem wan i intres long ansa blong ol man long kwestin ya. Wan taem, hem i askem long ol disaepol blong hem se: “?Ol man oli stap tokbaot mi, se mi hu?” (Mak 8:27) ?From wanem hem i askem kwestin ya? Samfala maet oli gat tingting we i hafhaf mo oli harem nogud taem oli luk we Jisas i sakemaot hadwok we oli mekem blong putumap hem i king. Mo plante man oli stop blong folem hem. Antap long hemia, Jisas i no mekem wan samting taem ol enemi blong hem oli askem hem blong mekem wan saen i kamaot long heven blong soemaot se hem i hu. ?Taswe, ol aposol blong hem oli talem wanem blong ansa long kwestin ya long saed blong hem? Oli talemaot sam long ol tingting we plante man oli gat, oli se: “Sam man oli stap talem se yu yu Jon Baptaes, mo sam oli stap talem

 se yu yu Profet Elaeja. Mo sam narafala man oli stap talem se yu yu Profet Jeremaea, no wan long ol profet bifo.” (Matiu 16:13, 14) Be oli no talemaot ol rabis tok we ol man long Palestaen long taem ya oli stap talem long saed blong Jisas—se hem i man we i tok nogud long nem God, wan man blong trik, wan giaman profet, mo tu se hem i wan krangke man.

Plante Defren Kaen Jisas

Sipos Jisas i askem sem kwestin ya tede, maet bambae hem i talem se: “?Ol hae man blong stadi oli stap tokbaot mi, se mi hu?” Mo bakegen, maet ansa bambae i sot nomo: Ol man oli gat plante defren tingting long saed blong Jisas. David Tracy, we i wok long Yunivesiti blong Chicago, i talem se: “Ol defren kaen man oli talem plante defdefren kaen tingting long saed blong Jisas.” Long ol laswan handred yia, ol hae man blong stadi oli yusum fulap rod blong traem faenem sam ansa long kwestin ya se Jisas i rili hu. Blong mekem olsem, oli stadi long ol defren fasin blong laef, ol kastom, mo ol buk. ?Long en blong hem, oli kasem save se Jisas i hu?

Sam man blong stadi oli strong blong talem se Jisas we histri i tokbaot, hem i wan man Jiu we i wok olsem wan profet blong singaot ol man blong tanem tingting blong olgeta from sin. Be, oli no singaot hem se Pikinini blong God, Mesaea, mo Man we i Pemaot yumi. Plante long olgeta oli stap raorao se ol stori blong Baebol we i talem se Jisas i kamaot long heven, mo se hem i laef bakegen long ded, i no tru. Sam narafala man oli luk Jisas olsem wan man we tijing mo laef blong hem i pusum fulap man blong stanemap plante defdefren kaen skul we oli mekemap olgeta Kristin skul blong tede. Mo, olsem buk ya Theology Today i talem, sam narafala man bakegen oli ting se Jisas i wan “man we i tingbaot laef olsem wan samting we i nogud nomo, hem i wan waes man we i stap wokbaot olbaot nomo, no hem i wan man we i no skul gud be i talem se God i givim wan spesel paoa long hem. Oli luk Jisas olsem wan man we i gat gud save blong lidim komuniti, no olsem wan man we i waes long fasin blong toktok mo i stap agensem ol rul, no olsem wan man we i no sem blong talemaot tingting blong hem long ol parakot man we oli laef olbaot long ol pua eria blong Palestaen.”

I gat sam narafala tingting bakegen we oli narakaen olgeta long saed blong Jisas. Pija blong wan Jisas we skin blong hem i blak i stat kamaot plante tu long ol rap miusik, long ol danis, mo long ol naesfala pija we ol man oli wokem long ston no long ol wol. * Sam man oli talem tu se ating Jisas i wan woman. Long hot taem blong 1993, ol man we oli kam long bigfala maket ya Orange County long California, oli luk wan aedol blong “Chritie” hemia “Kraes” we i gat bodi blong wan woman we i neked mo i hang long wan kros. Klosap long sem taem ya, long New York, oli soem “Christa”—wan aedol blong Jisas, we bodi blong hem i olsem woman, i hang long kros. Tufala aedol ya oli mekem fulap raorao oli kamaot. Mo long stat blong 1999, long ol stoa blong salem buk ol man oli save pem wan buk we i tokbaot “Pikinini Jisas mo dog blong hem, we nem blong hem Enjel, mo lav we tufala i soem long tufala.” Buk ya i tokbaot olsem wanem we gudfala fasin fren blong tufala ya i “save givhan long man long saed blong spirit mo i soem we boe mo dog ya tufala i rere blong ded from tufala.”

?I Rili Impoten Blong Save Se Jisas i Hu?

?From wanem yu mas intres blong save se Jisas i hu? Fastaem, olsem Napoleon i bin talem, “Jisas Kraes i no stanap long fored long ol man blong Hem, mo oli no save luk Hem. Be hem i stap gat paoa long laef blong olgeta mo oli stap obei long Hem.” Ol tijing blong Jisas mo fasin blong laef blong hem i gat paoa long laef blong plante bilian man blong klosap tu taosen yia nao. Wan man blong raetem buk i talem stret nomo se: “Olgeta ami we oli maj samtaem, olgeta sip we man i mekem samtaem blong mekem faet, olgeta gavman we oli stanap samtaem, olgeta king we oli rul samtaem, be olgeta evriwan oli no save gat paoa long laef blong ol man long wol olsem Jisas Kraes i gat.”

Mo tu, yu nidim blong save se Jisas hem i hu from we hem i joen tu long fiuja blong yu. Yu gat janis blong stap aninit long wan gavman blong heven we i stap rul finis—hemia Kingdom blong God we Jisas i king blong hem. Aninit long rul blong Jisas, wol blong yumi we i trabol bambae i kam gud bakegen. Ol profet tok blong Baebol i talem long yumi se Kingdom blong Jisas bambae i givim kakae long olgeta we oli hanggri, bambae i lukaot gud long olgeta we oli pua, i mekem ol sikman oli kam gud bakegen, mo i mekem ol dedman oli laef bakegen.

I sua se yu wantem save wanem kaen man nao we bambae i rul long gavman ya we yumi evriwan i nidim. Nekis haf bambae i givhan long yu blong save moa long saed blong Jisas se hem i hu.

[Futnot]