Ol Papa Mama—!Givhan Long Ol Pikinini Blong Yufala!

OL PIKININI oli nidim se papa mama i lidim mo stretem olgeta wetem lav. Wan tija long Brasil, we nem blong hem Tania Zagury, i tokbaot ol pikinini se: “Oltaem ol pikinini oli lukaot rod blong pleplei nomo. Taswe i impoten blong putumap sam rul. Ol papa mama nao oli mas mekem samting ya. Sipos oli no mekem olsem, pikinini bambae i wael olgeta.”

Be, long plante kantri we tingting i strong se evri man i fri blong mekem wanem we hem i wantem, maet i hadwok blong folem advaes ya. ?Ol papa mama oli save kasem help long weples? Ol papa mama we oli onagud long God, oli luksave se ol pikinini blong olgeta oli “wan presen we [Jeova] God i givim.” (Ol Sam 127:3) Taswe, oli lukluk i go long Tok blong God, Baebol, blong i soem long olgeta olsem wanem blong tijim ol pikinini blong olgeta. Eksampol, Ol Proveb 13:24 (NW ) i talem se: “Man we i holembak stik blong panis blong hem, hem i no laekem boe blong hem. Be man we i laekem boe blong hem tumas, hem bambae i lukaot hem blong stretem hem.”

Taem Baebol i yusum tok ya “stik” hem i no minim nomo se papa mama i mas kilim pikinini. Tok ya i save minim ol narafala rod tu we maet papa mama i save yusum blong stretem pikinini. Tru ya, plante taem toktok nomo i naf blong stretem wan pikinini we i mekem stronghed. Ol Proveb 29:17 i talem se: “Sipos yu stap tijimgud pikinini blong yu blong stretem hem, bambae yu yu stap long gudfala laef, mo oltaem nomo bambae hem i mekem yu yu glad.”

Ol pikinini oli nidim we yumi stretem olgeta wetem lav blong oli lego sam fasin we oli nogud. Taem papa mama i stretem pikinini long fasin we i stret mo i kaen, tufala i soemaot se tufala i laekem pikinini ya. (Ol Proveb 22:6) !Taswe, yufala ol papa mama, yufala i no mas kam slak! Sipos yufala i gohed blong folem advaes blong Baebol we i waes mo we i wok gud, bambae yufala i mekem Jeova God i glad mo bambae yufala i winim respek blong pikinini blong yufala.