Oli Kam Long Gilead From We Oli Glad Blong Mekem Wok

WOK blong Wajtaoa Baebol Skul blong Gilead hemia blong trenem ol man mo woman we oli givim laef blong olgeta long God finis, blong oli save mekem wok blong misinari long narafala kantri. ?Hu olgeta we oli kam long Gilead? Hemia olgeta we oli glad blong mekem wok. (Ol Sam 110:3) Samting ya i klia long Septemba 8, 2001, taem ol studen blong klas namba 111 oli kasem stefeket blong olgeta.

Sam long ol studen ya oli bin lego famle, ol fren mo kantri blong olgeta finis blong go wok long ples we i nidim moa man blong wok. Taem oli mekem olsem, oli traem olgeta wan blong luk sipos oli naf blong laef mo wok long ples we i defren. Eksampol, Richer mo Nathalie tufala i bin muvum olting blong tufala finis blong go stap long Bolivia, Todd mo Michelle tufala i mekem olsem blong go long Dominikan Ripablik, mo David wetem Monique tufala i go long wan kantri blong Esia blong talemaot gud nius blong Kingdom blong God. Sam long ol narafala studen ya oli stap wok finis long ol kantri olsem Nikaragua, Ekuado, mo Albania.

Christy i lanem lanwis blong Spen taem hem i stap long hae skul, ale samting ya i openem rod long hem blong spenem tu yia long Ekuado bifo we hem i mared. Sam narafala oli stap long kantri blong olgeta nomo be oli joen long ol kongregesen blong man we oli toktok narafala lanwis. Saul mo Priscilla i fesem samting we i defren lelebet. From we tufala i glad blong wok ale tufala i wokhad blong lanem Inglis bifo we tufala i kam long Gilead skul.

Ol 20 wik ya blong misinari trening oli pas kwiktaem nomo. Dei blong kasem stefeket i kam, mo ol studen oli stap nao wetem ol fren mo famle blong olgeta, oli rere blong lesin long sam waes advaes mo gudfala toktok blong leftemap tingting blong olgeta bifo we oli go.

Theodore Jaracz i jeaman blong program ya. Hem i bin joen long klas namba seven long Gilead Skul, mo naoia hem i wan memba blong Hed Kampani blong ol Witnes blong Jeova. Long fastok blong hem, hem i soemaot se ogenaesesen blong yumi i neva kam slak blong wok from mak ya, hemia blong trenem ol studen blong Gilead blong talemaot gud nius blong Kingdom long olgeta ples blong wol. (Mak 13:10) Skul blong Gilead i tijimgud ol studen blong oli mekem wok blong prij i kam bigwan moa bitim bifo mo long sam ples we i rili nidim misinari we i kasem trening. Brata Jaracz i talem strong long ol studen ya blong yusum gud trening we oli kasem long Gilead from we naoia bambae oli joen wetem ol narafala misinari we oli stap wok long ol 19 kantri we bambae oli go long hem.

Advaes We i Kamaot Long Stret Taem

I gat fulap tok we oli kamaot biaen. William Van De Wall, wan memba blong Branj Komiti blong Yunaeted Stet, i tokbaot “Strong Tingting Blong Ol Misinari i Wan Mak Blong Ol Trufala Kristin.” Hem i pulum tingting i go long wok blong “mekem disaepol,” we i stap long Matiu 28:19, 20, mo hem i talem long ol studen se: “Yumi mas folem eksampol blong Jisas, we i mekem misinari wok blong hem wetem strong tingting mo glad.” Ol studen ya, we bambae oli kam misinari, oli mas holemtaet strong tingting blong olgeta long wok ya. Taswe, hem i leftemap tingting blong olgeta long saed ya i se: “Yufala i folem  wan gudfala program; holemtaet gudfala fasin blong stadi, lanem ol niufala save long saed blong ol tiokratik samting, mo neva fogetem risen from wanem yufala i mekem wok ya.”

Nekis wan we i mekem tok long program i Guy Pierce, wan memba blong Hed Kampani. Hem i tokbaot stamba tok ya “Gohed Blong Wokem ‘Paoa Blong Tingting Blong Yufala.’ ” (Rom 12:1, NW ) Hem i givim gudfala advaes long ol studen, i leftemap tingting blong olgeta blong oli yusum paoa blong tingting we God i givim blong givhan long olgeta blong luksave samting. Hem i talem se: “Yufala i mas gohed blong tingting dip long wanem we Jeova i talem long yufala tru long Tok blong hem. Samting ya bambae i save lukaotgud long yufala.” (Ol Proveb 2:11) Mo tu, Brata Pierce i talem strong long ol studen se oli no mas fosem ol man blong folem tingting blong olgeta, from we fasin ya i save blokem olgeta blong yusum prapa “paoa blong tingting” blong olgeta. Tru, ol advaes ya, we oli kamaot stret long taem blong hem, i givhan long ol studen ya taem bambae oli wok olsem ol misinari.

Biaen, jeaman i singaot wan long ol tija blong Gilead, Lawrence Bowen, we i tokbaot stamba tok ya “Putum Tingting i Stap Long Wan Samting Nomo.” Hem i poenemaot se long saed blong misinari wok blong hem long Korin, aposol Pol i ‘putum tingting blong hem i stap strong long wan samting nomo . . . Jisas Kraes nomo, . . . we hem i  ded long [“pos,” NW ].’ (1 Korin 2:2) Pol i save we tabu spirit, we i bigfala paoa long heven mo wol, i sapotem mesej we i stap long ful Baebol. Mesej ya hemia se: Jeova bambae yusum promes Laen blong pruvum se hae rul blong hem nomo i stret. (Jenesis 3:15) Ol 48 studen oli kasem tok we i pusum olgeta blong oli folem fasin blong Pol mo Timoti, mo blong karem gudfala frut long misinari wok blong olgeta taem oli holemstrong long “ol tok ya we oli stret gud.”—2 Timoti 1:13.

Stamba tok blong laswan tok hem i: “Gat Fasin Tangkiu From Janis Blong Yufala, Hemia i Wan Presen Blong God.” Wallace Liverance, we i stap rejistarem nem blong ol studen long Gilead Skul, i givhan long olgeta blong oli kasem save se janis we oli gat blong mekem wok ya i kamaot from gladhat blong God, i no wan wok we oli kasem olsem pei blong olgeta. Brata Liverance i yusum eksampol blong aposol Pol, mo i poenemaot se: “Taem Jeova i jusum Pol blong i kam aposol blong hem long ol nesen, hemia i no from we Pol i wok nao i luk olsem se hem i gat raet blong kasem wok ya no se i stret blong God i jusum hem. No gat. Hem i no kasem wok ya from we hem i olfala moa no i gat moa ekspiriens. Long lukluk blong man, maet i luk olsem se i stret blong Jeova i jusum Banabas. Wok ya i no stanap long gudhan blong wan man; i luk olsem se Apolos i save toktok gud moa bitim Pol. Jus ya we Jeova i mekem i kamaot long gladhat blong hem nomo.” (Efesas 3:7, 8) Brata Liverance i leftemap tingting blong ol studen blong oli yusum presen blong olgeta, no janis we oli gat blong wok, blong givhan long ol narafala blong oli kam fren blong God mo blong olgeta tu oli kasem “presen we God i stap givim i go nomo long olgeta, hemia laef ya we i no save finis.”—Rom 6:23.

Biaen long hemia, Mark Noumair, wan narafala tija blong Gilead, i storian wetem sam studen long tok ya blong hem, “Fasin Blong Rere i Mekem Gudfala Frut i Kamaot.” (Ol Proveb 21:5) Ol ekspiriens oli soemaot se taem wan man blong talemaot gud nius i rere gud fastaem, antap moa taem hat blong hem i rere, bambae hem i soem trufala intres long ol man. Bambae hem i neva sot long toktok. Defren olgeta, bambae hem i talem mo mekem ol samting blong givhan long olgeta long saed blong spirit. Brata Noumair i yusum prapa ekspiriens blong hem taem hem i stap misinari long Afrika mo hem i poenemaot se: “Hemia nao impoten samting we i mekem se wan misinari i karem frut long wok blong hem.”

Misinari Wok i Karem Glad

Ralph Walls mo Charles Woody oli askem kwestin long sam misinari we oli bin mekem wok ya longtaem finis, we oli stap long Patterson Educational Center long taem ya blong kasem spesel trening. Toktok blong olgeta ya i soemaot se lav we yumi gat long ol man nao i mekem se glad i kamaot long misinari wok. Ol studen wetem ol famle mo fren blong olgeta, oli haremgud tumas taem oli lesin long toktok blong ol misinari ya we oli soemaot from wanem wok blong misinari i karem glad.

John E. Barr, we i wok long Hed Kampani, i givim bigfala tok blong dei ya we nem blong hem, “Sing Long Wan Niufala Singsing Long Jeova.” (Aesea 42:10, NW ) Brata Barr i poenemaot se tok ya “wan niufala singsing” i kamaot naen taem long Baebol. Hem i askem se, “?Wanem niufala singsing ya?” Nao hem i ansa se: “Ol vas raonabaot oli soem se wan niufala singsing i kamaot evri taem we i gat ol niufala wok long saed blong hae rul blong Jeova.” Hem i pulum ol studen blong oli gohed blong joenem voes blong olgeta blong singsing presem Kingdom blong God we i win long han blong Mesaea King, Jisas Kraes. Brata Barr i talem se trening we oli kasem long Gilead i givhan long olgeta blong oli kasem save moa dip bitim bifo ol defren haf blong “niufala singsing” ya. “Skul i tokbaot nid we yu gat blong ‘singsing’ presem Jeova wetem ol brata sista blong yufala long eni ples we yufala i go long hem; oltaem yufala i mas wokem fasin joengud wetem olgeta we oli stap long ples we yufala i wok long hem.”

Afta we oli givim ol stefeket long ol studen, wan we i toktok long nem blong klas i ridim wan leta blong talem tangkiu from trening we oli kasem long Gilead.

?Yu yu save mekem moa long wok blong God mo mekem we i karem frut? Sipos yes, mekem olsem ol studen ya. Samting ya nao i bin givhan long olgeta blong oli mekem misinari wok. Taem man i rere blong mekem wok blong God, hem i faenem bigfala glad from—Aesea 6:8.

[Tok blong pija long pej 25]

KAONTEM KLAS YA

Oli kamaot long hamas kantri: 10

Oli go wok long hamas kantri: 19

Hamas studen: 48

Oli gat hamas yia: 33.2

Hamas yia long trutok: 16.8

Hamas yia finis oli prij fultaem: 12.6

[Tok blong pija long pej 26]

Klas Namba 111 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go raetsaed.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.