?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Kot blong Federol Konstitusen long Jemani i winim wanem kot kes we i joen wetem skul?

Kot ya i sakemaot wan disisen we narafala kot i bin mekem agens long ol Witnes blong Jeova mo long raet blong olgeta blong wok olsem wan kampani we loa i agri long hem. Kot ya i talem se, folem loa ya we i talem se man i fri blong wosip, wan man i gat raet blong “obei moa long bilif blong hem, bitim we hem i obei long loa” blong Gavman.—8/15, pej 8.

• ?Job i safa blong hamas yia?

Buk blong Job i no talem se hem i stap safa plante yia. Maet ol traem we Job i kasem, oli tekem sam manis nomo blong finis, maet i no kasem wan yia.—8/15, pej 31.

• ?Olsem wanem yumi sua se Setan i no jes wan giaman tingting blong mekem man i fraet?

Jisas Kraes i save se Setan i rili stap. I no wan rabis fasin insaed long hat blong Jisas we i traem hem, be wan trufala man. (Matiu 4:1-11; Jon 8:44; 14:30)—9/1, pej 5 mo 6.

• Ol Proveb 10:15 i talem se: “Rijman, ol gudgudfala samting we hem i gat oli stap blokemgud hem blong trabol i no kam kasem hem, be puaman, hadlaef blong hem i stap spolem hem bakegen.” ?Olsem wanem tok ya i tru?

I tru se ol sas samting oli save blokem man long sam kaen trabol, olsem wan bigfala stonwol we i goraon long taon i save blokem ol man insaed long hem, blong sam samting i no spolem olgeta. Mo i tru tu se, fasin pua i save spolem man, sipos wan trabol i kamaot we hem i no tingbaot mo i jenisim sam samting long laef blong hem.—9/15, pej 24.

• Long taem blong Enos, i minim wanem se ol man oli stat blong “yusum nem blong Jeova”? (Jenesis 4:26, NW )

Ol faswan man we oli laef long wol oli stap yusum nem blong God finis, taswe taem sam man long taem blong Enos oli stat blong yusum nem blong God, i no min se oli bilif long Jeova nao oli stap singaot i go long hem. Ating sam man long taem ya oli stat blong putum nem blong Jeova long olgeta wan no ol narafala man, nao taem oli wosip long ol man ya oli giaman se oli stap wosip long Jeova God.—9/15, pej 29.

• ?Tok ya we Baebol i yusum, “fasin stretem,” hem i minim wanem?

Tok ya i no minim eni fasin we i raf no we i bitim mak. (Ol Proveb 4:13, NW; 22:15) Grik tok we oli tanem i kam “fasin stretem,” bigfala mining blong hem i blong tijim, lanem, mo soem rod long narafala. Sam samtaem, i save karem mining tu se givim panis, be wetem lav. Wan impoten rod we ol papa mama oli save folem blong mekem olsem Jeova, i blong mekem we ol pikinini oli no fraet blong toktok wetem olgeta. (Hibrus 12:7-10)—10/1, pej 8, 10.

• ?Olsem wanem ol trufala Kristin tede oli soem we oli agri long rul blong God?

Ol Witnes blong Jeova oli sapotem Kingdom blong God. Taswe, oli no joen long politik, mo oli no pulum ol man blong rebel agensem gavman, nating sipos oli laef long wan kantri we i putum tabu long wok blong ol Witnes. (Taetas 3:1) Olgeta oli mekem samting we Jisas mo ol disaepol blong hem bifo oli mekem, hemia blong traehad blong halpem ol man blong oli folem ol gudfala rul blong Baebol olsem fasin blong no giaman no stil, gudfala fasin we i klin, mo wok blong halpem ol narafala.—10/15, pej 6.

• ?Olsem wanem i gat wota we i givim laef long Andes?

Ol Witnes blong Jeova oli traehad blong karem trutok blong Baebol i go long ol man, mo tu oli toktok tufala lanwis ya, Kwuja mo Aimara. Ol Witnes oli go luk ol man we oli laef long tufala aelan long Lek Titikaka, wetem ol narafala aelan we oli “flot” antap long Lek ya we oli wokem long ol waelken we oli gru long wota blong lek ya.—10/15, pej 8 kasem 10.

• ?Wanem samting we God i givim blong lidim yumi we i sem mak long kompiuta we i stap lidim ol plen i go long ples we oli mas go long hem?

Taem God i wokem ol man, hem i mekem we oli gat wan samting insaed long olgeta we i save lidim olgeta blong folem stret fasin. Hemia tingting we i save jajem yumi we yumi bon wetem. (Rom 2:14, 15)—11/1, pej 3 mo 4.

• ?From wanem ded blong Jisas i sas tumas?

Taem stret man ya Adam i mekem sin, hem i lusum laef blong hem wetem hemia blong ol pikinini blong hem. (Rom 5:12) Jisas i stretgud olgeta mo i givim laef blong hem olsem wan sakrefaes. Long rod ya, hem i givim ransom we i mekem se ol man we oli stap tru long God oli save kasem laef we i no save finis.—11/15, pej 5 mo 6.

• ?Ol Scythian we Kolosi 3:11 (NW ) i tokbaot, oli hu?

Ol Scythian oli ol man we oli stap muv long wan ples i go long narafala ples, long ol flat ples we i no gat bus long medel blong Yurop mo Rasia. Mo long ol yia 700 kasem 300 B.K.T. * oli bin rul long ol ples ya. Oli ol nambawan man blong faet mo blong resis long hos. Maet Kolosi 3:11 i no jes tokbaot wan nesen nomo, be i tokbaot wan laen blong man we oli wael bitim ol narafala.—11/15, pej 24 mo 25.

• ?From wanem yumi save talem se oltaem yumi mas tingbaot tijing blong ‘Golden Rul’?

Yumi faenem rul ya long ol tijing blong skul blong ol man Jiu, Budis, Gris, mo Confucius. Be, Bigfala Toktok blong Jisas antap long Hil i pulum ol man blong mekem samting we i gud long narafala, mo tijing ya i gat paoa long laef blong ol man nomata wanem ples oli stap long hem mo nomata hamas yia we oli gat. (Matiu 7:12)—12/1, pej 3.

[Futnot]