Henry Eit Mo Baebol
Henry Eit Mo Baebol
LONG Buk ya History of the English-Speaking Peoples (Buk 2), Winston Churchill i raetem se: “Long taem blong Refomesen, * i gat bigfala jenis i kamaot long ol jos. Ol man oli stat blong luk se Baebol i save givim ol nambawan advaes blong lidim olgeta. Ol olfala bifo oli bin gat tingting se i denja blong letem ol man we oli no skulgud oli ridim Tabu Buk ya, ol pris nomo oli mas ridim.”
Churchill i gohed i talem se: “Fulwan Baebol we Tyndal mo Coverdale i tanem i kam long Inglis, i kamaot fastaem long 1535, long taem we lif blong ol tri i folfoldaon. Nao oli stat prentem plante moa kopi blong hem. Gavman i givim oda long ol lida blong skul blong pusum ol man blong ridim Baebol.” Blong plante handred yia ol man oli no gat save nating long Baebol, be naoia ol man Inglan bambae oli gat save blong Baebol. Mo hemia i no from ol jos be from gavman blong Henry Eit. *
“Blong blokem olfala tingting ya se i tabu blong ridim Baebol, Gavman i givim oda blong prentem fulap Inglis Baebol long Paris. Ol Baebol ya oli moa naes i winim olgeta we oli prentem bifo. Long 1538, gavman i givim oda se evri jos long kantri i mas pem wan bigfala Baebol mo putum i stap insaed long jos, long wan ples we i isi blong man i faenem mo ridim. Oli putum sikis kopi blong Baebol ya long jos blong St Paul, long London, mo evri dei, plante man oli kam long jos ya blong ridim Baebol. Mo oli talem long mifala se plante moa man oli kam sipos oli faenem wan man blong i save rid wetem bigfala voes.”
Sore tumas, be long plante kantri, plante man oli no yusum gudfala janis we oli gat blong ridim Baebol evri dei. Hemia i wan bigfala samting we i mekem yumi wari, from we Baebol i “kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.”—2 Timoti 3:16.
[Ol Futnot]
^ Wan grup afta 1500 we i agensem plante tijing blong Katolik Jos mo i statem Protestan skul.
^ King Henry Eit i rulum Inglan stat long 1509 go kasem 1547.
[Foto Credit Line blong pija long pej 32]
Henry VIII: Painting in the Royal Gallery at Kensington, from the book The History of Protestantism (Vol. I)