Ol Gudfala Wok Oli Leftemap Nem Blong God

TAEM ol trufala Kristin oli soemaot gudfala fasin mo gudfala eksampol long wok blong olgeta, oli leftemap nem blong God. (1 Pita 2:​12) Long ol yia we oli pas, hemia nao samting we i hapen long Itali.

Long Septemba 1997, graon i seksek bigwan long plante ples blong Marche mo Umbria, mo i spolem klosap 90,000 haos. Kwiktaem nomo ol Witnes blong Jeova oli mekem grup blong givhan long olgeta we oli gat sem bilif olsem olgeta, mo long ol narafala man tu. Oli givimaot ol haos we trak i pulum, ol bag we ol man oli save slip insaed, ol stof blong kuk, jenereta blong laet, mo narafala samting bakegen we man i nidim. Ol man we oli stap klosap, oli luksave wok we oli mekem blong givhan long ol narafala.

Niuspepa ya II Centro, i talem se: “Ol faswan we oli kamtru wetem ol saplae long ples we i gat trabol, hemia ol Witnes blong Jeova blong Roseto [long provins blong Teramo] . . . Antap long ol miting blong prea we oli holem evri wik, olgeta ya we oli stap tru long Jeova oli wok long wan rod we i givhan bigwan, oli halpem ol man we oli safa, mo oli no lukluk se ol man ya oli blong wanem jos.”

Mea blong Nocera Umbra, wan long ol taon we i kasem moa trabol, i raetem leta long ol Witnes se: “Wetem ful hat blong mi, mi wantem talem tangkiu long yufala from help we yufala i givim blong halpem ol man long Nocera. Mi sua se mi talemaot samting we olgeta man blong taon ya oli filim.” Antap moa, Minista blong Interior i givim wan stefeket blong talem tangkiu mo wan medol long Congregazione Cristiana dei Testimoni di Geova (Kristin Kongregesen blong ol Witnes blong Jeova), “blong pruvum se oli wok mo oli kwik blong givhan long olgeta we oli trabol long ol eria blong Umbria mo Marche.”

Long Oktoba 2000, wota i ron bigfala mo i spolem ol ples long Piedmont, wan taon long not blong Itali. Bakegen, ol Witnes oli kwik blong givhan. Ol man oli luk ol gudfala wok ya tu. Ol man long Piedmont oli givim wan brasplet long olgeta from “gudfala wok [we oli mekem] blong sapotem ol man long Piedmont we oli kasem trabol from wota we i ron bigwan.”

Jisas i tijim ol disaepol blong hem se: “Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Matiu 5:​16) Ol Witnes blong Jeova oli no leftemap olgeta. Oli glad blong leftemap nem blong God, taem oli mekem ol “gudgudfala wok” ya we i givhan long ol man raonabaot long olgeta long saed blong spirit no long narafala rod tu.