‘Yufala i Kam Long Mi, Nao Bambae Mi Mekem We Yufala i Spel’

‘Talemaot Tok Blong God’ Mo Harem Gud

JISAS i wan man we i no gat sin mo hem i gat wan impoten wok blong mekem. Fasin blong hem blong tij i nambawan, taswe “ol man oli sapraes tumas long tok blong hem.” (Matiu 7:28) Mo tu, hem i wan man blong prij we neva i les. Hem i yusum olgeta taem, paoa, mo samting we hem i gat blong mekem wok blong talemaot Kingdom blong God fastaem. Yes, Jisas Kraes i kavremap ol laswan ples long kantri we hem i bon long hem blong prij mo tij.​—Matiu 9:35.

Impoten wok we Jisas i mas mekem, hemia blong talemaot “gud nius blong kingdom” long olgeta man we oli laef long taem blong hem. Mo tu, hem i mas trenem ol disaepol blong hem blong oli save mekem semfala wok ya be long fulwol. (Matiu 4:​23, NW; 24:14; 28:​19, 20) Ol man blong Jisas oli gat sin mo oli no naf blong mekem evri samting. ?Taem oli tingbaot bigfala wok ya blong prij, se oli mas spid long hem mo se hem i mas kavremap ful wol, oli harem se wok ya i hevi tumas long olgeta?

!No gat! Jisas i talem long ol disaepol blong hem se oli mas prea long “masta blong garen ya,” hemia Jeova God, blong i sanem moa man blong wok i kam. Nao hem i sanemaot olgeta, oli go blong tijim ol man. (Matiu 9:38; 10:1) Jisas i talem long olgeta se sipos oli kam man blong hem​—mo lesin long oda ya blong prij​—bambae oli harem gud tumas. Hem i talem se: ‘Yufala i kam long mi, nao bambae mi mekem we yufala i spel.’​—Matiu 11:28.

Stamba Blong Glad

!Tok ya blong Jisas i soem se hem i gat sore, i gat lav mo i kaen tumas! Jisas i kea long ol man blong hem. Mo i tru se, ol disaepol blong hem oli harem gud taem oli obei long oda ya blong talemaot “gud nius” blong Kingdom blong God. Wok ya i givim trufala glad long olgeta mo i mekem olgeta oli harem gud long laef blong olgeta.​—Jon 4:36.

Longtaem finis, bifo we Jisas i kam long wol, Baebol i talem se ol man oli mas glad blong mekem wok blong God. Yumi luk samting ya long sing blong man blong raetem Sam we i se: “!Olgeta man long wol, yumi sing long Hae God! !Yumi glad, yumi mekem wosip long hem! !Yumi kam long fes blong hem, yumi singsing!” (Ol Sam 100:​1, 2) Tede, ol man blong olgeta kantri oli presem Jeova, mo olgeta tok we oli talem oli olsem noes blong wan bigfala ami we i singaot from we oli win. Ol man we oli rili givim laef blong olgeta long God oli stanap long fes blong hem mo oli “singsing” from glad. Yes, i mas olsem from we Jeova hem i “hapi God ya,” we i wantem se olgeta man blong hem oli glad taem oli mekem ol wok we oli promes blong mekem blong hem.​—1 Timoti 1:​11, NW.

Ol Man Blong Prij We Oli Haremgud

?Olsem wanem hadwok we yumi mekem blong prij i no karemaot paoa blong yumi be i mekem yumi harem gud? Long tingting blong Jisas, wok blong Jeova i olsem kakae we i givim paoa bakegen. Hem i se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.”​—Jon 4:34.

Long sem fasin, ol Kristin man we oli wok strong blong prij tede, oli faenem bigfala glad taem oli “talemaot tok” blong God. (2 Timoti 4:2) Connie, wan Kristin woman we i bitim foti yia finis, i spenem moa long 70 aoa evri manis long wok blong prij. Hem i se: “Afta we mi joen long wok blong prij, mi filim se mi mekem wan gudfala samting mo mi harem se mi hapi, nating se mi taed long en blong dei.”

?Olsem wanem sipos plante man oli no wantem lesin long mesej blong Kingdom? Connie i gohed se: “Nomata wanem tingting we man i gat [long saed blong gud nius], i neva gat wan taem we mi sore  se mi bin go prij. Mi save se mi stap mekem Jeova i glad, be tu, mi glad blong tokbaot trutok from we taem mi mekem olsem, mi bilif strong moa long gudfala fiuja we Baebol i tokbaot.”

Sam narafala Kristin oli talem se taem oli halpem ol man blong kasem stret save long saed blong God, laef blong olgeta i no blong nating nomo. Meloney, wan yangfala woman we i spenem bitim 50 aoa evri manis long wok blong prij, i talem se: “Wok blong prij i mekem mi mi harem gud from we i givim wan gudfala risen blong laef. Ol problem blong mi mo ol wari blong evri dei, oli kam smol nomo taem mi joen long wok ya.”

Millicent, wan narafala Witnes blong Jeova we i wok strong blong prij, i talem se: “Wok blong prij i mekem se olgeta dei long laef blong mi oli impoten from we mi tokbaot stamba tingting blong God long ol narafala man, mo mi eksplenem olsem wanem wol ya bambae i kam wan Paradaes bakegen. Hemia i mekem we mi luk Jeova olsem wan trufala man mo i givim pis long mi mo wan glad we mi no save kasem long eni narafala wok.”

Ol Man We Oli Lesin Long Gud Nius Oli Haremgud

Ol man blong talemaot Kingdom oli rili harem gud from Kristin wok blong prij, mo olgeta we oli lesin long mesej ya we i givim laef, oli harem gud tu. Wan skul tija long Potugal i gruap long tijing blong ol sista mo pris blong Katolik jos. Nating se i olsem, hem i harem se jos blong hem i no givhan long hem. Hem i no kasem ansa long ol kwestin we hem i gat long saed blong Baebol. Taem hem i stat stadi Baebol wetem ol Witnes blong Jeova, hem i kasem plante save long saed blong Baebol. Skul tija ya i glad bigwan. Hem i se: “Evri wik mi wantem se Wenesde i kam kwiktaem blong mi mekem stadi blong mi, from we Baebol i stap ansarem olgeta wanwan kwestin blong mi.” Skul tija ya i givim laef blong hem long Jeova finis, mo tede, hem tu i stap mekem ol narafala man oli harem gud wetem trutok blong Baebol.

Yes, i klia se impoten wok ya blong prij i no wan hevi baden long ol Witnes blong Jeova nating se hem i mas kavremap fulwol. Tingting blong olgeta i no foldaon, nating se ol man oli no wantem lesin long mesej blong olgeta no oli agensem olgeta. Oli putum ful paoa blong olgeta i go long wok ya blong talemaot Kingdom. Oli serem gud nius ya wetem ol man long eni ples​—olsem ples ya blong putum ol bigfala trak long Yunaeted Stet (1), long wan eapot long Korea (2), long Andes (3), mo long maket blong London (4). Ol man blong Jisas tede oli glad blong mekem wok ya long fulwol. Mo stret long promes we Jisas i mekem, hem i stap mekem olgeta oli harem gud tumas mo i yusum olgeta blong mekem plante narafala man tu oli harem gud.​—Revelesen 22:17.