?Yu Yu Stap Trastem God Ya We i Laef?

Long 1906, Robert E. Peary we i stap wokbaot blong faenem ol niufala ples, i talem se hem i luk wan ples farawe we hem i ting se i graon blong Aktik.

SEVEN yia biaen, ‘American Museum of Natural History’ i sanem wan grup i go long ples ya blong kasem moa save long hem. Peary i bin stanap antap long Kep Colgate, laswan ples long notwes blong Not Amerika. Taem hem i lukluk i go longwe, hem i luk ol hil we top blong olgeta i waetgud. Hem i putum nem blong ples ya se Lan blong Crocker, folem nem blong wan man we i givhan blong pem trip blong hem. !Grup we i kam biaen, ating oli glad tumas taem oli lukluk i go, nao oli luk ol hil, ol flat ples bitwin long ol hil, mo sno antap long ol hil! Be smoltaem biaen, oli luksave se oli no stap luk ol trufala hil blong Aktik. Ae blong olgeta i giaman long olgeta. Sam samting long win i bin mekem Peary i ting se hem i luk ol hil, be ae blong hem i trikim hem. Mo naoia, olgeta tu oli lusum taem, paoa, mo mane, blong traem faenem samting we i no tru.

Tede, plante man oli givim ona mo taem blong olgeta i go long ol god we oli bilif se oli laef. Long taem blong ol aposol blong Jisas, plante man oli wosip long ol god olsem Heremes mo Sus. (Ol Wok 14:​11, 12) Tede, ol Sinto, Hindu mo plante narafala skul blong wol, oli wosip long plante milian god. Yes, olsem Baebol i talem, “i gat plante god olsem, mo plante masta olsem.” (1 Korin 8:​5, 6) ?Olgeta god ya oli rili laef?

‘Oli No Gat Paoa Blong Sevem Man’

Tingbaot fasin blong wosip long ol aedol mo pija. Ol man we oli prea long ol aedol mo trastem olgeta, oli ting se ol aedol ya oli gat spesel paoa blong givim blesing mo blong sevem olgeta. ?Be oli rili save sevem man? Man blong raetem Ol Sam i tokbaot ol aedol long singsing blong hem, i se: “Ol god blong ol hiten man ya, ol man nomo oli wokem olgeta long silva mo long gol. Ol god ya oli gat maot be oli no save toktok, mo oli gat ae be oli no save lukluk. Oli gat sora be oli no save harem samting, mo oli no save pulum win tu.” Yes, ol god ya ‘oli no gat paoa  blong sevem man.’​—Ol Sam 135:​15-17; Aesea 45:20.

Ating olgeta we oli wokem ol aedol oli talem se oli laef mo oli gat paoa. Mo olgeta we oli mekem wosip long ol aedol ya oli trastem olgeta. Profet Aesea i talem se: “Oli go leftemap god ya, oli putum long solda blong olgeta, oli karem i kam. Oli putum i stap long ples blong hem.” Hem i gohed i se: “Nao hem i stap olwe long ples ya, from we i no save aot hem wan. Mo sipos wan man i prea long god ya, god ya i no save harem hem, mo i no save tekemaot hem long ol trabol we i kasem hem.” (Aesea 46:7) Blong talem stret, nomata se bilif blong olgeta we oli trastem ol aedol i bigwan olsem wanem, be aedol bambae i stanap i stap nomo, hem i no save laef. Ol aedol olsem, we ol man oli katem long wud no ston, oli ol “giaman” god nomo.​—Habakuk 2:​18.

Wan narafala fasin we plante man oli folem tede, hemia blong givim ona, respek, mo blong tinghae tumas long sam jampion blong spot, sam bigman blong sinema, sam politik pati, mo sam lida blong skul. Mo tu, plante man oli mekem mane i kam olsem god blong olgeta. Ol man ya oli ting se ol aedol ya oli gat paoa, be oli rong. Ol aedol ya oli no save givim ol samting we ol man blong bilif long olgeta oli wantem. Tingbaot mane. Maet i luk olsem se mane i save stretem plante trabol. Be mane i stap mekem wan narafala samting i kamaot. (Mak 4:​19) Wan man we i stadi long saed ya i talem se: “Plante man oli wantem tumas blong kasem mane, oli bilif se mane bambae i stretem olgeta trabol blong olgeta. Be taem oli kasem, oli no glad, mo samfala, mane i stap mekem olgeta oli trabol mo oli wari moa. I had blong kasem save long samting ya.” Yes, man we i ronem ol sas samting, i save lusum samting we i rili sas, hemia gud helt, gudfala famle laef, ol gudfala fren, mo nambawan fasin fren we hem i gat wetem Man we i Wokem hem. !Mane we i olsem god blong hem, i wan “giaman god” nomo!​—Jona 2:​8, NW.

“I No Gat Wan Ansa Nating i Kam”

I krangke nomo blong tokbaot samting we i no laef, se i tru. Long taem blong profet Elaeja, ol man blong wosip long god ya Bal oli luksave samting ya taem wan bigfala trabol i kasem olgeta. Olgeta oli bilif fulwan se Bal i gat paoa blong mekem faea i kamdaon long heven blong bonem anamol we oli kilim olsem sakrefaes. Ale, “oli prea long Bal gogo kasem medel dei. Oli stap singaot bigwan se, ‘!Bal! !Plis yu harem prea blong mifala!’ ” ?Olsem wanem? ?Bal i gat sora we i harem tok blong olgeta? ?Bal i gat wan maot we i save toktok? Baebol i talem se: “I no gat wan ansa nating i kam.” Yes, “oli no harem wan tok nating.” (1 King 18:​26, 29) Bal i no tru, hem i no laef, mo hem i no save mekem wan samting.

!I impoten tumas we yumi save God ya we i laef, mo yumi mekem wosip long hem nomo! ?Be hu ya God ya? ?Mo sipos yumi trastem hem, samting ya bambae i givhan long yumi olsem wanem?

[Tok blong pija long pej 3]

Egingwah we i fren blong Peary i stap lukluk i go longwe blong traem faenem wan niufala ples

Robert E. Peary

[Credit Line]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Tok blong pija long pej 4]

Plante man oli bilif long ol giaman samting we wol i leftemap olsem aedol