Oli Gat Waes Blong Olgeta Tu

I GAT wan tok blong ol man Naejeria we i talem se: “Ol bigman oli waes, be ol pikinini oli gat waes blong olgeta tu.” Edwin i wan Kristin elda long Naejeria, mo hem i luksave se tok ya i tru.

Wan dei, Edwin i faenem wan aean bokis aninit long tebol.

Edwin i askem long trifala pikinini blong hem se: “?Bokis ya i blong hu?”

Emmanuel, we i gat eit yia i ansa se: “Hem i blong mi.” Smol bokis ya we i rosta smol, saes blong hem i 12 sentimita mo i gat wan smol hol antap long hem. Emmanuel i talem se hem i stap putum mane insaed long hem blong sapotem wok blong ol Witnes blong Jeova raon long wol. Hem i se: “From we yumi no stap go long Haos Kingdom evri dei, mi mekem smol bokis ya ale taem mi no yusum mane [we mama] i givim blong pem kakae long skul, mi putum i go long bokis ya.”

Papa blong Emmanuel i bin wokem wan bokis we famle i save yusum blong sevem mane blong go long distrik asembli blong yia ya. Be from we famle i fesem smol problem long mane, oli mas yusum mane we i stap long bokis ya. Emmanuel i no wantem se oli yusum mane blong hem tu, ale hem i karem smol tin bokis blong hem i go long wan man we i save sude lid blong hem. Taem man ya i harem wanem samting we Emmanuel i wantem mekem wetem tin ya, hem i karem sam pispis aean mo i wokem wan narafala bokis blong givim long hem. Michael hem i smol brata blong Emmanuel, mo hem i gat faef yia. Hem tu i wantem wan bokis olsem.

Edwin i sapraes tumas long wanem we ol pikinini ya oli mekem, ale i askem olgeta se from wanem oli wantem gat wanwan bokis blong olgeta. Michael i talem se: “!Mifala tu i wantem givim presen mane!”

Yes, papa mama blong olgeta i no save be, Emmanuel, Michael mo bigfala sista blong tufala we i gat naen yia, nem blong hem Uchei, trifala i bin sevem mane blong kakae blong olgeta mo putum i go long ol bokis ya. ?Hu i givim tingting ya long trifala? Taem ol pikinini ya oli stap gruap nao oli bigwan naf blong holem mane, papa mama blong trifala i tijim trifala blong sakem smol mane oltaem long bokis blong presen mane long Haos Kingdom. I klia se trifala i rili folem samting we trifala i lanem.

Taem ol bokis ya oli fulap long mane, ale oli katem mo openem ol bokis ya. Total mane we oli bin sevem hemia 450 VT. Namba ya i bigwan from we, long kantri blong olgeta, pei blong wan man we i wok i no bitim samting olsem 400 VT. Fasin ya blong givim presen mane blong sapotem wok blong prij blong ol Witnes blong Jeova i stap gohed naoia long 235 kantri long wol.