Wan Kwestin

Loa blong Moses i putum mak we man i no mas bitim long saed blong mared bitwin ol memba blong stret famle. ?Ol Kristin oli mas tingbaot loa ya olsem wanem?

Loa we Jeova i givim long nesen blong Isrel i no givim fulap save long yumi long saed blong ol lafet blong mared mo wei we oli folem long saed ya. Be Loa ya i talemaot wanem kaen mared we i tabu blong mekem. Wan eksampol. Long Levitikas 18:6-20, yumi save ridim wan lis blong fasin we i tabu blong mekem wetem ol memba blong ‘stret famle.’ Ol vas ya oli talem klia se hu olgeta memba blong famle we oli no mas slip tugeta. I tru se, ol Kristin oli no stap aninit long Loa blong Moses. (Efesas 2:15; Kolosi 2:14) Be hemia i no minim se ol Kristin oli save jusum eniwan we oli wantem blong mared wetem. I gat plante risen blong samting ya.

Faswan samting se, i gat sam loa blong gavman we oli talem sipos mared bitwin ol memba blong wan famle i stret. Ol Kristin oli mas obei long ol loa blong kantri we oli stap long hem. (Matiu 22:21; Rom 13:1) Be i tru se ol loa long saed ya oli no sem mak long evri ples. Mo plante long ol loa ya oli stanap long risen ya se tufala we tufala i blong stret famle i save karem ol pikinini we oli sik no we oli handikap. Hemia wan samting we plante man oli gat save long hem finis. Risen ya mo fasin blong “ona long gavman” i mas pusum ol Kristin we oli wantem mared, blong folem loa blong mared we i stap long ples blong olgeta.

Wan narafala samting blong tingbaot, hemia tingting we ol man long komuniti blong yumi oli gat long saed blong wanem we i stret mo wanem we i no stret. Klosap evri komuniti i gat ol rul mo kastom we oli go agensem mared bitwin ol man blong stret famle nomo. Plante taem ol komuniti oli luk ol mared ya olsem samting we i doti mo oli putum tabu long hem. I tru se wanwan komuniti i gat defren tingting long saed blong weswan memba blong famle nao we oli talem se i tabu blong maredem. Be, buk ya The encyclopædia Britannica, i talem se “moa we tufala i famle we i klosap, moa we i tabu blong tufala i mared no slip tugeta.” Taswe, nating sipos tufala we i mared tufala i no blong stret famle, ol Kristin oli mas lukaot gud we oli no mekem wan samting we i go agensem ol kastom no tingting blong komuniti blong olgeta, from we oli no wantem sakem doti long Kristin kongregesen mo long nem blong God tu.—2 Korin 6:3.

Mo tu, yumi no mas fogetem tingting ya we God i givim blong jajem yumi. Olgeta man oli bon wetem tingting ya we i givhan long olgeta blong haremsave wanem i stret mo wanem i no stret, wanem i gud mo wanem i nogud. (Rom 2:15) Tingting ya i save talem long olgeta wanem fasin we i stret blong evri man i mekem mo wanem fasin we i go agensem stret fasin blong man. Be i tru se tingting ya bambae i no save givhan gud long wan man sipos man ya i lan blong mekem ol fasin we oli agensem tingting ya mo sipos hem i mekem we tingting ya i no moa gat paoa blong lidim gud hem. Jeova i tokbaot samting ya taem hem i givim loa long ol man Isrel agensem mared bitwin wan man mo woman we tufala i stret famle. Yumi ridim se: “Fastaem yufala i stap long kantri ya Ijip, mo naoia mi stap tekem yufala i go long kantri ya Kenan, be bambae yufala i no mas folem ol fasin nogud blong ol man blong tufala kantri ya.” (Levitikas 18:3) Ol Kristin oli wantem holemtaet tingting blong olgeta we Baebol i trenem. Oli no wantem letem tingting we ol man blong wol oli gat long saed blong wanem i stret mo wanem i rong, i spolem stretfala tingting ya we God i givim.—Efesas 4:17-19.

?Taswe, wanem stret tingting nao we yumi mas gat long saed ya? Ol Kristin oli no stap aninit long Loa blong Moses, hemia i tru. Be tingting we i stap jajem olgeta i soemaot klia long olgeta se mared blong tufala we tufala i blong stret famle nomo—olsem wan papa mo gel blong hem, wan mama wetem boe blong hem, wan brata wetem sista blong hem—i no save stap long medel blong Kristin komuniti *. Long saed blong mared blong tufala we oli no stret famle be oli famle longwe lelebet, ol Kristin oli luksave se i gat loa long saed ya mo i gat ol rul we man i folem we oli laenap long komuniti blong olgeta. Wan Kristin i mas tingbaot ol loa mo rul ya from we hem i wantem mekem we laef blong hem i laenap stret wetem oda ya blong Baebol we i se: “Mared i wan fasin we yufala evriwan i mas tinghae long hem.”—Hibrus 13:4.

[Futnot]