?Yu Yu Kasem ‘Spirit Blong Trutok’ Finis?
?Yu Yu Kasem ‘Spirit Blong Trutok’ Finis?
‘Papa blong mi . . . bambae i givim wan narawan i kam blong givhan long yufala. Narawan ya hem i spirit blong givhan, we bambae hem i save stap oltaem wetem yufala. Spirit ya, hem i spirit blong trutok.’—JON 14:16, 17, Niutesteman Wetem Ol Sam Long Bislama.
1. ?Long ol laswan aoa we Jisas i stap wetem ol disaepol blong hem, hem i givim wanem impoten save long olgeta?
“?MASTA, bambae yu yu go long weples?” Kwestin ya ol aposol blong Jisas oli askem long hem long ol laswan aoa we hem i stap wetem olgeta long wan rum antap long wan haos long Jerusalem. (Jon 13:36) Long miting ya, Jisas i talem long olgeta se bambae i no longtaem hem i aot long olgeta blong gobak long Papa blong hem bakegen. (Jon 14:28; 16:28) Bambae hem i no moa stap long wol wetem olgeta blong tijim olgeta mo ansa long ol kwestin blong olgeta. Be, hem i promes long olgeta se: “Bambae mi mi askem long Papa blong mi, mo hem bambae i givim wan narawan i kam blong givhan long yufala . . . we bambae hem i save stap oltaem wetem yufala.”—Jon 14:16, NTB.
2. ?Jisas i promes blong sanem wanem long ol disaepol blong hem afta we hem i gowe long olgeta?
2 Jisas i talemaot wanem samting ya we bambae hem i sanem blong givhan long ol disaepol blong hem, mo hem i talem tu olsem wanem samting ya i save halpem olgeta. Hem i se: ‘Mi mi no talemaot ol samting ya long yufala fastaem, from we mi mi stap wetem yufala. Be bambae i no longtaem, mi mi gobak long Papa blong mi we hem i sanem mi mi kam. . . . I moa gud long yufala, blong mi mi gowe long yufala, from we sipos mi mi no gowe long yufala, bambae spirit blong givhan i no save kam stap wetem yufala. Be sipos mi gowe, bambae mi sanem hem i kam stap wetem yufala. Be taem spirit ya we i Stamba blong Trutok i kam, hem bambae i save tijim yufala long olgeta tok we i tru.’—Jon 16:4, 5, 7, 13.
3. (a) ?Ol faswan Kristin oli kasem ‘spirit blong trutok’ wetaem? (b) Talem wan impoten rod we spirit ya “i givhan” long olgeta.
3 Promes ya i kamtru long 33 K.T. Aposol Pita i tokbaot samting ya taem hem i talem se: ‘God i mekem Jisas i laef bakegen finis, mo mifala evriwan ya i stap talemaot samting ya. God ya i Papa blong hem, mo hem i leftemap hem i go antap, blong i stap long raet saed blong hem, mo hem i givim tabu spirit long hem olsem we hem i promes long hem bifo. Mo ol samting ya we yufala i stap luk, mo we yufala i stap harem, oli wok blong tabu spirit ya we Jisas i givim long mifala.’ (Ol Wok 2:32, 33) Tabu spirit we i kamdaon long dei blong Pentekos i mekem plante samting blong givhan long ol faswan Kristin, mo bambae yumi tokbaot samting ya afta. Be Jisas i promes se ‘spirit blong trutok’ bambae i ‘save mekem olgeta oli tingbaot olgeta samting ya bakegen, we hem i stap talem long olgeta.’ (Jon 14:26) Spirit ya bambae i givhan long olgeta blong rimemba minista wok wetem ol tijing mo ol toktok blong Jisas, blong oli save raetemdaon olgeta samting ya. From we aposol Jon i olfala finis taem hem i stat blong raetem Gospel blong hem long en blong faswan handred yia K.T., hem i rili nidim spirit ya blong halpem hem. Long Gospel ya yumi faenem ol nambawan advaes we Jisas i givim long ol aposol blong hem taem hem i stanemap Memoriol blong ded blong hem.—Jon, japta 13-17.
4. ?“Spirit blong trutok” i givhan long ol faswan Kristin olsem wanem?
4 Mo tu, Jisas i promes long ol faswan disaepol se spirit ya bambae ‘i save tijim olgeta long olgeta samting’ mo ‘bambae i tijim olgeta long olgeta tok we i tru.’ Spirit ya bambae i halpem olgeta blong kasem save long ol dip save long Baebol mo bambae i mekem se olgeta evriwan oli joen gud long wan tingting, wan save, mo wan mak long laef. (1 Korin 2:10; Efesas 4:3) Taswe, ol faswan disaepol ya oli kasem paoa blong tabu spirit blong oli save wok tugeta olsem wan kampani we oli kolem “slef we i stret mo waes.” From slef ya nao, ol tabu Kristin wanwan oli save kasem kakae long saed blong spirit “long stret taem blong hem.”—Matiu 24:45, NW.
Spirit Ya Blong God i Kam Joen Wetem Spirit Blong Yumi
5. (a) ?Long naet blong Naesan 14, 33 K.T., Jisas i soemaot wanem niufala hop long ol disaepol blong hem? (b) ?Olsem wanem tabu spirit i wok blong mekem promes blong Jisas i kamtru?
5 Long naet blong Naesan 14, 33 K.T., Jisas i talem long ol disaepol blong hem se biaen bambae hem i tekem olgeta oli kam stap wetem hem mo Papa blong hem long heven. Hem i talem long olgeta se: “Long haos blong Papa blong mi, i gat plante rum i stap. Tok ya i tru, taswe mi talemaot long yufala. Naoia bambae mi mi go mekemrere ples blong yufala. Mo from we mi go blong mekemrere ples blong yufala bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.” (Jon 13:36; 14:2, 3) Bambae oli rul wetem hem long Kingdom blong hem. (Luk 22:28-30) Blong oli save gat hop ya blong laef long heven, oli mas ‘bon long tabu spirit’ i minim se oli kam ol pikinini blong God. Mo tu, God i mas makemaot olgeta wetem tabu spirit, blong oli save mekem wok olsem king mo pris wetem Kraes long heven.—Jon 3:5-8; 2 Korin 1:21, 22; Taetas 3:5-7; 1 Pita 1:3, 4; Revelesen 20:6.
6. (a) ?Wetaem God i stat blong singaot olgeta we bambae oli go long heven, mo hamas man bambae oli go? (b) ?Olgeta ya oli baptaes blong joen long wanem?
6 Long Pentekos 33 K.T., God i stat blong singaot olgeta we bambae oli “go long heven.” Mo i luk olsem se bighaf blong wok ya i finis long medel blong ol yia 1930. (Hibrus 3:1, NW ) Namba blong olgeta we mak blong God i stap long olgeta mo we oli haf blong Isrel ya long saed blong spirit, hemia 144,000. God i ‘pemaot olgeta long wol ya.’ (Revelesen 7:4; 14:1-4) Olgeta ya oli baptaes blong joen long bodi blong Kraes long saed blong spirit, long kongregesen blong hem, mo long ded blong hem. (Rom 6:3; 1 Korin 12:12, 13, 27; Efesas 1:22, 23) Afta we oli baptaes long wota mo God i makemaot olgeta wetem tabu spirit, oli mas stap tru long God gogo kasem oli ded.—Rom 6:4, 5.
7. ?From wanem ol tabu Kristin nomo oli gat raet blong kakae bred mo dring waen long Memoriol?
7 Olsem ol man Isrel long saed blong spirit, ol tabu Kristin oli stap insaed long niufala kontrak we Jeova i mekem wetem “Isrel blong God.” (Galesia 6:16, NW; Jeremaea 31:31-34) Blad blong Kraes we i ron i mekem niufala kontrak ya i stanap. Jisas i tokbaot samting ya taem hem i stanemap Memoriol blong ded blong hem. Luk i raetem se: “Nao hem i tekem bred, i talem tangkiu long God from. Nao hem i brekem, i givim long ol man blong hem, mo i talem se, ‘Hemia bodi blong mi, we bambae mi givim from yufala. Oltaem yufala i mas mekem samting ya blong tingbaot mi bakegen.’ Mo long sem fasin, taem olgeta oli kakae finis, hem i tekem kap, nao i talem se, ‘Kap ya i saen blong niufala promes [“kontrak,” NW ] blong God, mo blad blong mi, we bambae i ron from yufala, hem bambae i mekem promes [“kontrak,” NW ] ya i stanap.’ ” (Luk 22:19, 20) Smol haf blong ol memba blong 144,000, we oli stap yet long wol, olgeta nomo oli gat raet blong kakae bred mo dring waen long Memoriol blong ded blong Kraes.
8. ?Olsem wanem ol tabu Kristin oli save se God i singaot olgeta blong go long heven?
8 ?Olsem wanem ol tabu Kristin oli save se God i singaot olgeta blong go long heven? Oli kasem klia pruf blong tabu spirit. Aposol Pol i raet long ol tabu Kristin ya i se: ‘Olgeta we spirit blong God i stap lidim olgeta, oli pikinini blong God. . . . Spirit ya blong God i kam joen long tingting [“spirit,” NW ] blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we hem i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.’ (Rom 8:14-17) Pruf we tabu spirit i givim i klia nomo. Taswe, sipos wan man i no sua fulwan se God i singaot hem blong go long heven no nogat, hemia wan klia pruf se hem i no stap insaed long kampani ya, mo from samting ya hem i no mas kakae bred mo dring waen long Memoriol.
Tabu Spirit Mo Ol Narafala Sipsip
9. ?Ol Gospel mo buk blong Revelesen oli tokbaot wanem tufala kampani?
9 Namba blong ol Kristin we God i singaot olgeta blong kam haf blong Isrel long saed blong spirit, i smol nomo. Taswe, Jisas i tokbaot olgeta ya se oli wan “smol kampani blong ol sipsip,” we bambae oli go insaed long “yad” blong niufala kontrak. Olgeta ya oli defren long “ol narafala sipsip,” we i no gat stret namba blong olgeta, mo we Jisas i talem se bambae hem i mas tekem olgeta tu oli kam. (Luk 12:32; Jon 10:16) Ol narafala sipsip we oli hivap long taem blong en, bambae oli mekemap ‘bigfala hip ya blong ol man,’ we bambae oli sef long taem blong “bigfala trabol,” mo oli gat hop blong laef foreva long paradaes long wol. Yumi intres blong save se, vison we Jon i luk long en blong faswan handred yia K.T., i soemaot se bigfala hip blong ol man mo ol 144,000 memba blong Isrel long saed blong spirit oli tu defren kampani. (Revelesen 7:4, 9, 14) ?Be, ol narafala sipsip tu oli kasem tabu spirit? ?Sipos yes, olsem wanem spirit ya i gat paoa long laef blong olgeta?
10. ?Olsem wanem ol narafala sipsip oli baptaes ‘long nem blong Papa, mo long nem blong Pikinini, mo long nem blong tabu spirit’?
10 Tabu spirit i mekem wan impoten wok long laef blong ol narafala sipsip. Taem oli tekem baptaes blong soem se oli givim laef blong olgeta i go long Jeova, oli baptaes ‘long nem blong Papa, mo long nem blong Pikinini, mo long nem blong tabu spirit.’ (Matiu 28:19) Oli agri long hae rul blong Jeova, oli rere blong stap aninit long Kraes olsem King mo Man we i pemaot olgeta, mo oli letem spirit blong God, no paoa blong Hem, i lidim laef blong olgeta. Evri dei, oli traehad blong wokem ol “frut blong tabu spirit” long laef blong olgeta, olsem “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.”—Galesia 5:22, 23, NW.
11, 12. (a) ?Olsem wanem ol tabu man oli stret man finis? (b) ?Ol narafala sipsip oli mekem wanem blong kam tabu?
11 Ol narafala sipsip oli mas letem Tok blong God mo tabu spirit blong hem i mekem olgeta oli kam klin, oli tabu. From we ol tabu Kristin oli olsem woman blong Kraes, God i mekem olgeta oli kam tabu mo stret man finis long fes blong Hem. (Jon 17:17; 1 Korin 6:11; Efesas 5:23-27) Profet Daniel i tokbaot olgeta olsem “ol tabu man blong God ya we i Antap Olgeta,” we oli tekem Kingdom i blong olgeta aninit long “pikinini blong man,” Jisas Kraes. (Daniel 7:13, 14, 18, 27, NW ) Bifo long taem ya, Jeova i yusum Moses mo Eron blong talem long ol man Isrel se: “Mi mi Hae God, mi God blong yufala, mo oltaem yufala i mas klin long fes blong mi, yufala i mas tabu, from we mi mi tabu, mi klin olgeta.”—Levitikas 11:44.
12 Tok ya “mekem i kam tabu” i minim se “wan aksin no wok we i mekem [wan samting no wan man] i tabu, i seraot, i stap blong bambae Jeova i yusum long wok blong hem; fasin blong kam tabu, no klin.” Long 1938 finis, Wajtaoa i talem se ol Jonadab, no ol narafala sipsip, “oli mas save se olgeta man wanwan we bambae oli kam haf blong bigfala kampani mo we bambae oli laef long wol ya, oli mas givim laef blong olgeta i go long God mo kam tabu.” Buk blong Revelesen i tokbaot olgeta ya long vison blong bigfala kampani se “oli wasem ol klos blong olgeta finis long blad blong Smol Sipsip ya” mo “long dei mo long naet, oli stap mekem wosip long hem insaed long haos blong hem.” (Revelesen 7:9, 14, 15) Tabu spirit i givhan long ol narafala sipsip ya blong oli traehad blong mekem laef blong olgeta i laenap wetem ol hae rul blong Jeova long saed blong fasin we i klin mo i tabu.—2 Korin 7:1.
Mekem i Gud Long Ol Brata Blong Kraes
13, 14. (a) ?Folem parabol blong Jisas, long saed blong ol sipsip mo nani, fasin sef blong ol sipsip i dipen long wanem? (b) ?Long taem ya blong en, olsem wanem ol narafala sipsip oli mekem i gud long ol brata blong Kraes?
13 Long parabol blong ol sipsip mo ol nani, we i stap long profet tok blong Jisas long saed blong “en blong fasin ya blong wol,” Jisas i makem gudfala fasin joen bitwin ol narafala sipsip mo smol kampani ya. Long parabol ya, Kraes i soemaot klia se sipos ol narafala sipsip oli wantem we God i sevem olgeta, oli mas mekem i gud long ol tabu man, we hem i singaot olgeta se ol “brata blong mi.” Hem i talem se: “Nao, bambae mi talem long olgeta long raet saed blong mi se, ‘Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long [“kingdom,” NW ], we hem i king long hem. . . . Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.’ ”—Matiu 24:3, NW; 25:31-34, 40.
14 Tok ya se “taem we yufala i mekem olsem” i tokbaot ol wok we ol narafala sipsip oli mekem wetem lav, blong givhan long ol tabu brata blong Kraes. Wol blong Setan i luk olgeta ya olsem strenja, mo i sakem sam long olgeta oli go long kalabus, sam oli hanggri, oli nidim klos, mo oli sik. (Matiu 25:35, 36) Long taem blong en, we i stat long 1914, plante long ol tabu brata oli bin nidim help. Ol samting we oli kamaot long ol Witnes blong Jeova long ol yia we oli pas, oli pruvum se oli kasem help long ol fren blong olgeta. Yes, ol narafala sipsip ya oli ol trufala fren mo tabu spirit i pusum olgeta blong givhan long ol tabu brata ya.
15, 16. (a) ?Wanem wok we ol narafala sipsip oli stap mekem long wol ya, blong givhan long ol tabu brata blong Kraes? (b) ?Ol tabu brata oli mekem wanem blong soem tangkiu long ol narafala sipsip?
15 Long taem ya blong en, ol narafala sipsip oli wokhad moa blong sapotem ol tabu brata blong Kraes long wok we God i givim long olgeta, hemia blong “talemaot gud nius ya blong kingdom long olgeta ples long wol, blong givim witnes long olgeta nesen.” (Matiu 24:14, NW; Jon 14:12) Long ol yia we oli pas, namba blong ol tabu brata we oli stap yet long wol i stap godaon. Be, namba blong ol narafala sipsip i kasem plante milian. Plante taosen long olgeta oli mekem wok blong prij fultaem olsem paenia mo misinari. Oli talemaot gud nius ‘gogo oli finisim olgeta ples long wol.’ (Ol Wok 1:8) Ol narafala oli traem bes blong olgeta blong joen long wok ya mo oli glad blong givim mane blong sapotem impoten wok ya.
16 !Ol tabu brata blong Kraes oli talem tangkiu long ol fren blong olgeta, hemia ol narafala sipsip, from sapot we oli stap givim long olgeta! Oli talemaot filing blong olgeta long wan buk we kampani we i wok olsem slef i wokem long 1986. Long buk ya, Worldwide Security Under the “Prince of Peace,” oli talem se: “I stat long Seken Wolwo, wok we “bigfala hip” blong “ol narafala sipsip” oli stap mekem hemia nao i givhan bigwan blong mekem profet tok blong Jisas i kamtru long “en blong fasin ya blong wol.” . . . Taswe, mifala i tangkiu bigwan long “bigfala hip” blong ol man we oli stap long ol defren ples long wol mo we oli toktok plante lanwis. Bigfala wok blong olgeta ya, i mekem profet tok blong [Jisas] long Matiu 24:14 i kamtru.”
“Mekem Olgeta Ya Tu Oli Kam Stret Gud Olgeta”
17. ?Olsem wanem ol man blong bilif bifo, we bambae oli laef bakegen long wol ya, olgeta “tu oli kam stret gud olgeta”?
17 Taem aposol Pol, we hem i wan tabu Kristin, i tokbaot ol man mo woman blong bilif we oli laef bifo long taem blong Kraes, hem i talem se: “From we olgeta ya oli stap bilif strong long God olsem, hem i givim gud nem long olgeta, we bambae i no save lus samtaem. Be olgeta oli no kasem ol gudfala samting yet we God i promes blong givim long olgeta, from we hem i mekem wan plan blong hem finis, se bambae hem i mekem i gud moa long yumi [ol tabu Kristin]. Mo long plan ya blong hem, hem i wantem joenem olgeta wetem yumi fastaem, from we long fasin ya nomo, hem bambae i save mekem olgeta ya tu oli kam stret gud olgeta.” (Hibrus 11:35, 39, 40) Long Wan Taosen yia Rul blong Kraes, Kraes mo ol 144,000 tabu brata blong hem long heven, bambae oli mekem wok olsem king mo pris. Olgeta ya bambae oli mekem ol blesing we oli kamaot from ransom sakrefaes blong Kraes i kam long wol ya. Long rod ya, bambae ol narafala sipsip “oli kam stret gud olgeta” long bodi mo tingting.—Revelesen 22:1, 2.
18. (a) ?Baebol i givhan long ol narafala sipsip blong luksave wanem? (b) ?Ol narafala sipsip oli gat wanem hop taem oli stap wet blong “God bambae i soemaot ol pikinini blong hem”?
18 Olgeta samting ya oli mas mekem ol narafala sipsip oli luksave from wanem Grik haf blong Baebol i toktok plante long saed blong Kraes, ol tabu brata blong hem, mo impoten wok we oli stap mekem blong mekem stamba tingting blong God i kamtru. Taswe, ol narafala sipsip oli tinghae long janis we oli gat blong sapotem ol tabu Kristin ya mo oli traem mekem olsem long eni rod we oli faenem. Oli “wantem tumas blong luk we God bambae i soemaot ol pikinini blong hem” long Amagedon mo long Wan Taosen Yia Rul Blong Kraes. Oli stap wet long dei ya we “God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.”—Rom 8:19-21.
Joengud Long Memoriol
19. ‘?Spirit blong Trutok’ i mekem wanem long ol tabu man mo ol fren blong olgeta, mo long naet blong Maj 28, bambae oli joengud blong mekem wanem?
19 Long laswan prea blong Jisas long naet blong Naesan 14, 33 K.T. hem i talem se: “Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala, blong oli stap wan nomo, nao ol man blong wol ya oli save bilif we yu yu sanem mi mi kam.” (Jon 17:20, 21) From we God i lavem ol man, hem i sanem Pikinini blong hem blong givim laef blong hem blong sevem ol tabu man wetem olgeta we oli obei long hem. (1 Jon 2:2) ‘Spirit blong trutok’ i mekem we ol brata blong Kraes oli joengud wetem ol narafala sipsip. Long naet blong Maj 28, afta we san i godaon, tufala kampani ya bambae tufala i joen wanples blong tingbaot ded blong Kraes. Bambae oli tingbaot evri samting we Jeova i bin mekem blong givhan long olgeta tru long sakrefaes blong Pikinini blong hem, Jisas Kraes, we hem i laekem hem tumas. I gud sipos olgeta we oli kam long impoten miting ya oli mekem fasin joengud blong olgeta i kam strong moa. Oli mas mekem tingting blong olgeta i strong bakegen blong gohed blong mekem ol samting we God i wantem. Long rod ya oli soemaot se oli glad blong stap long medel blong ol man we Jeova i lavem olgeta.
Rod Blong Tingtingbak
• ?Wetaem God i sanem ‘spirit blong trutok’ long ol faswan Kristin, mo olsem wanem spirit ya i ‘givhan long olgeta’?
• ?Olsem wanem ol tabu man oli save se God i singaot olgeta blong go long heven?
• ?Olsem wanem tabu spirit i lidim ol narafala sipsip?
• ?Olsem wanem ol narafala sipsip oli mekem i gud long ol brata blong Kraes, mo from wanem olgeta tu “oli kam stretgud olgeta” olsem ol tabu man?
[Kwestin]
[Tok blong pija long pej 21]
‘Spirit blong trutok’ i kamdaon long ol disaepol long Pentekos 33 K.T.
[Tok blong pija long pej 23]
Ol narafala sipsip oli mekem i gud long ol brata blong Kraes taem oli sapotem olgeta long wok blong talemaot gud nius