Ol Rul Blong God Oli Save Givhan Long Yu

ATING yu yu save se ol anamol oli no tingting fastaem long ol samting we bambae oli mekem. Oli folem nomo waes we oli bon wetem. Plante mesin we man i wokem oli mekem samting nomo olsem we ol man oli putum blong oli mekem. Be God i wokem man long fasin we man i nidim ol rul blong lidim hem. ?Olsem wanem yumi save samting ya? Taem Jeova, we i stamba blong olgeta stret rul, i wokem faswan man mo woman, hem i talem se: “I gud yumi mekem man, mo i gud yumi mekem we hem i tekem fasin blong yumi, i olsem yumi.” Man we i Wokem yumi hem i wan spirit. Hem i no gat wan bodi olsem yumi man. Taswe, tok ya “olsem yumi” i minim se ol man oli naf blong soem ol gudfala fasin blong God long laef blong olgeta. Man i naf blong jusum ol rul we bambae oli lidim laef blong hem, hemia ol rul we hem i luk se oli stret. Jeova i raetem plante long ol rul ya long Tok blong Hem, Baebol.​—Jenesis 1:26; Jon 4:24; 17:17.

Maet wan man i talem se: ‘Be i gat plante handred rul long Baebol. Mi no naf blong folem evriwan.’ Yes, samting ya i tru. Be tingbaot: Olgeta rul  blong God oli save givhan long yumi, be i gat sam rul we oli impoten moa i bitim ol narafala. Yumi luksave samting ya long Matiu 22:37-39. Long vas ya Jisas i soemaot se long olgeta loa mo rul long Loa blong Moses, i gat sam we oli impoten moa i winim ol narafala.

?Weswan long ol rul ya oli impoten moa? Ol stamba rul blong Baebol hemia olgeta we oli gat paoa long fasin fren blong yumi wetem Jeova. Sipos yumi tinghevi long ol rul ya, bambae yumi letem Man ya we i Wokem olgeta samting i gat paoa long ol fasin we yumi mekem. Mo tu, i gat ol rul long Baebol we oli lidim yumi long ol fasin we yumi stap mekem wetem ol narafala man. Ol rul ya bambae oli halpem yumi blong agensem tingting ya se “mi fastaem.”

Be fastaem i gud yumi tokbaot wan trutok we i impoten tumas. ?Wanem trutok ya, mo trutok ya i mekem wanem long yumi?

“Hae King Blong Olgeta Ples Long Wol”

Long Baebol i klia se Jeova i Bigfala Man ya we i Wokem yumi, mo hem i God ya we i gat Olgeta paoa. I no gat wan god we i olsem hem no we i save tekem ples blong hem. Hemia wan stamba trutok blong Baebol.​—Jenesis 17:1; Prija 12:1.

Wan man blong raetem Ol Sam i tokbaot Jeova se: “Yu nomo yu Hae God, yu nao yu hae King blong olgeta ples long wol.” King Deved bifo i talem se: “Yu yu king we yu hae we yu hae olgeta, mo yu rul long olgeta ples.” Mo tabu spirit i pusum profet Jeremaea blong raetem se: “Hae God. Nem blong yu i hae we i hae, mo yu yu gat olgeta paoa. I no gat man nating we i olsem yu.”​—Ol Sam 83:18; 1 Kronikel 29:11; Jeremaea 10:6.

?Ol trutok ya long saed blong God oli gat paoa long laef blong yumi evri dei?

I klia se hu nao i mas stap fasples long laef blong yumi​—hemia Man ya we i Wokem yumi mo we i Givim Laef long yumi. Taswe i stret nomo, we yumi traehad blong blokem fasin ya we yumi stap pulum ol man blong lukluk yumi no wok blong yumi. Maet sam long yumi i mas faet strong blong agensem fasin ya. Wan rul we i waes mo we i save lidim yumi hemia se: “Yufala i mas mekem olgeta samting blong leftemap nem blong God.” (1 Korin 10:31, NW ) Profet Daniel i soemaot wan nambawan eksampol long saed ya.

Stori long Baebol i talem se, wan dei King Nebukadnesa blong Babilon i luk wan drim mo drim ya i mekem hem i wari tumas. Hem i wantem save mining blong drim ya. Long olgeta waes man, i gat Daniel nomo we i save talemaot stret samting we king i wantem save. ?Be, Daniel i leftemap hem wan from ol save we hem i talemaot? Nogat. Hem i leftemap “God ya nomo we i stap long heven, [se] hem nao i save soemaot ol samting we i haed mo we i paspas.” Daniel i gohed i se: “Mining blong drim ya we i haed, hem i soemaot long mi finis, i no from we mi mi waes moa i winim ol narafala man.” Daniel i wan man we i luksave ol rul blong folem. Yumi no sapraes we tri taem, buk blong Daniel i talem se God ‘i lavem hem tumas.’​—Daniel 2:28, 30; 9:23; 10:11, 19.

Yu save kasem gudfala frut taem yu folem eksampol blong Daniel. Be taem yu mekem olsem, i gud blong tingbaot wanem i pusum yu. ?Yu ting se hu i stret blong kasem ona from samting we yu yu mekem? Nomata we laef blong yu i olsem wanem, yu save mekem we laef blong yu i laenap wetem impoten rul ya blong Baebol se, Jeova i Haefala Masta. Sipos yu mekem olsem bambae Jeova i ‘lavem yu tumas.’

I gud we naoia yumi tokbaot tu stamba rul we i save lidim yumi blong joengud wetem narafala. From we yumi stap long wan wol we man  i tingbaot hem wan fastaem, fasin ya blong joengud wetem narafala i no isi nating.

“Mekem Tingting i Stap Daon”

Ol man we oli tingbaot olgeta fastaem oli no save haremgud tru. Oltaem oli wantem we laef blong olgeta i kam gud moa, mo oli wantem samting ya naoia. Long tingting blong olgeta, man we i gat fasin daon hem i wan slak man. Mo oli ting se longfala tingting i wan fasin we narafala nomo i mas soem long olgeta. Oli ting se i oraet blong mekem eni samting, sipos samting ya i givhan long olgeta blong win no kasem wan hae posisen. ?Wanem tingting blong yu? ?Yu ting se yu save folem wan narafala fasin we i defren long olgeta?

Evri dei ol man blong God oli stap long medel blong ol man we oli gat ol fasin olsem. Be, oli no mas kam olsem olgeta. Ol Kristin we oli bigman finis, oli folem rul ya se: “Man we hem nomo i stap leftemap hem, hem i no man we i gat hae nem. Man we Masta blong yumi i leftemap hem, hem nao i gat hae nem tru.”​—2 Korin 10:18.

Rul we i stap long Filipae 2:​3, 4 (NW ) i save givhan. Vas ya i pulum yu blong no ‘tok flas, no mekem wan samting blong leftemap yu nomo, mekem tingting blong yu i stap daon, mo luk ol narafala man olsem we oli gud moa long yu.’ Taem yu mekem olsem, ‘yu no stap lukaot long ol bisnes blong yu nomo, be yu stap lukaotgud long ol bisnes blong narafala man tu.’

Gideon, wan jaj blong ol man Hibru bifo, i gat wan tingting we i stret long saed blong hem wan. Long toktok blong hem, hem i soemaot we hem i no tinghae tumas long hem wan. Hem i no wantem kam lida blong ol man Isrel. Be, taem oli givim wok ya long hem, Gideon i harem se hem  i no naf. Hem i talem se: “Mifala ya ol laen blong Manase, be long laen ya, famle blong mifala . . . i smol moa long ol narafala famle blong laen ya. Mo bakegen, mi, long famle blong mi, oli no kaontem mi nating.”​—Jajes 6:12-16.

Afta we Jeova i mekem Gideon i win long faet, ol man Efrem oli stat tok strong long hem. ?Gideon i mekem wanem? ?From we hem i jes winim faet, tingting blong hem i kam antap tumas? Nogat. Hem i blokem trabol taem hem i ansa long kwaet fasin se: “Samting ya we mifala i mekem i smol nomo, i no kasem mak nating blong samting ya we yufala i mekem.” Yes, Gideon i mekem tingting blong hem i stap daon.​—Jajes 8:1-3.

I tru se, ol samting we oli hapen long Gideon, oli hapen longtaem bifo. Be, stori ya i save givhan long yu. Taem yu tingting long stori ya, yu luk we fasin blong Gideon i defren olgeta long fasin blong plante man tede. From we Gideon i holem fasin ya long laef blong hem, hem i karem gudfala frut.

Fasin blong plante man tede, we oli tingbaot olgeta nomo, i save spolem stret tingting we yumi mas gat long saed blong yumi wan. Ol rul blong Baebol oli save stretem tingting ya. Oli tijim yumi blong no tinghae tumas long yumi wan, mo blong luksave tru se yumi olsem wanem long lukluk blong Jeova mo ol narafala.

Taem yumi folem ol rul blong Baebol, yumi blokem fasin ya blong tingbaot yumi fastaem. Yumi no moa letem ol filing no ol fasin blong yumi i bos long yumi. Moa we yumi lanem ol stret rul, moa we yumi frengud wetem Man ya we i Wokem yumi. Yes, yumi save karem gudfala frut sipos yumi tingting gud long ol rul blong God taem yumi ridim Baebol.​—Lukluk bokis.

Ol anamol oli folem nomo ol fasin we oli bon wetem. Jeova i wokem ol man blong oli hae moa long ol anamol. Sipos yumi wantem mekem wanem we God i wantem, yumi mas folem ol rul blong hem long laef blong yumi. Long rod ya, bambae kampas blong yumi i wok gud, i lidim yumi i go long niufala wol blong God. Baebol i soemaot se i no longtaem bambae wol ya i kam niuwan mo “stret fasin nomo bambae i stap long hem.”​—2 Pita 3:​13.

[Bokis/Foto blong pija long pej 6]

Sam Gudfala Rul Blong Baebol

Insaed long famle:

“I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu we oli stap raonabaot long yumi.”​—1 Korin 10:24.

“Man we i stap lavem man . . . i no save tingbaot hem nomo.”​—1 Korin 13:​4, 5.

“Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo.”​—Efesas 5:​33.

“Yufala ol woman we i mared. Yufala i mas obei long ol man blong yufala.”​—Kolosi 3:​18.

“Yu mas lesin long ol tok blong stret papa blong yu, mo yu no mas daonem mama blong yu from we hem i kam olfala.”​—Ol Proveb 23:22, NW.

Long skul, wok, no bisnes:

“Hae God i no laekem nating, fasin ya we man i stap jenisim bol blong skel blong i giaman long ol man . . . Man we i stap mekem ol fasin nogud maet i save kasem plante samting, be i no save givhan long hem.”​—Ol Proveb 11:​1, 18.

“Man we i man blong stil, hem i mas lego fasin ya. Hem i mas wok had long stret fasin.”​—Efesas 4:​28.

“Man we i les blong wok, yufala i no givim kakae long hem.”​—2 Tesalonaeka 3:​10.

“Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi.”​—Kolosi 3:​23.

“Mifala i wantem tumas we oltaem mifala i stap mekem i stret nomo.”​—Hibrus 13:18.

Tingting we yumi mas gat long mane:

“Man we i stap hareap tumas blong kam rijman, hem bambae i kasem panis from.”​—Ol Proveb 28:20.

“Sipos yu laekem mane tumas, nating we mane blong yu i plante olsem wanem, be neva yu save talem se yu harem gud.”​—Prija 5:10.

No leftemap yumi wan tumas:

“I nogud yu stap traem mekem ol man oli kam leftemap yu oltaem.”​—Ol Proveb 25:27.

“I nogud yu nomo yu stap leftemap yu bakegen. I moa gud yu letem ol narafala man mo ol strenja oli mekem fasin ya long yu.”​—Ol Proveb 27:2.

“Mi mi talem long yufala evriwan, se yufala i no mas letem tingting blong yufala i go antap.”​—Rom 12:3.

“Sipos wan man i stap ting se, ‘Mi mi wan man ya,’ be hem i man nating nomo, hem i stap giaman nomo long hem.”​—Galesia 6:3.

[Tok blong pija long pej 5]

Daniel i givim ona i go long God nomo

[Tok blong pija long pej 7]

Ol rul blong God oli halpem yumi blong joengud wetem ol narafala mo mekem yumi hapi

[Foto Credit Line blong pija long pej 7]

U.S. Fish & Wildlife Service, Washington, D.C./Robert Bridges