Wan Kwestin

?Wanem mining blong tok ya long Hibrus 12:4: “I no gat wan long yufala yet we i ded, we blad blong hem i ron from faet ya”?

Tok ya “wan . . . we blad blong hem i ron” i minim se man ya i ded finis, hem i lusum blad blong hem we i stap givim laef long hem.

Aposol Pol i save se from we ol Hibru Kristin oli stap holem bilif blong olgeta, ‘i gat plante samting we i stap mekem oli harem nogud, be ol samting ya oli no winim olgeta.’ (Hibrus 10:​32, 33) Blong makemaot tingting ya, Pol i yusum pijatok long saed blong faet we ol man Gris oli mas mekem long ol kompetisin, olsem resis, resling, boksing, mo sakem disk mo spia tu. Nao long Hibrus 12:1 hem i talem long ol Kristin se: “Yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.”

Tri vas biaen, long Hibrus 12:​4, Pol i lego pijatok blong resis nao i yusum hemia blong boksing. (Tufala pijatok ya i stap long 1 Korin 9:26.) Long taem ya, ol man blong boksing oli fasem han blong olgeta wetem ol longlongfala pis blong skin blong anamol. Samtaem oli ademap ol samting long skin ya blong mekem i hevi moa, olsem “aean, we i save givim bigfala kil long narafala man blong boksing.” Ol raf fasin ya oli mekem blad i ron, mo samtaem man i save ded from.

Be nomata long ol samting ya, ol Hibru Kristin oli gat plante eksampol blong ol man blong God we oli holemstrong long bilif nating se oli kasem kil mo bigfala trabol, klosap oli ded, mo ‘blad blong olgeta i ron.’ Makemgud olsem wanem Pol i tokbaot ekspiriens blong ol man blong bilif blong bifo.

“Mo sam long olgeta, ol man oli stonem olgeta long ston gogo oli ded, mo sam long olgeta, ol man oli tekem so, oli katem bodi blong olgeta long tu haf, blong kilim olgeta. Mo sam long olgeta, ol man oli kilim olgeta long naef blong faet. Mo sam long olgeta oli stap wokbaot, we oli no gat klos, oli putum ol skin blong sipsip mo nani nomo. Olgeta oli pua tumas, mo oltaem ol man oli stap spolem olgeta, oli stap mekem i nogud tumas long olgeta.” Nao, Pol i tokbaot Stamba blong bilif blong yumi, hemia Jisas, i se: “Hem i stanap strong long pos we hem i ded long hem, mo hem i no tingbaot sem we hem i kasem. Nao hem i go sidaon long raetsaed blong bigfala jea blong God long heven.”​—Hibrus 11:37; 12:2; NW.

Yes, i gat plante man we ‘blad blong olgeta i ron from faet,’ minim se klosap oli ded. Faet blong olgeta ya i no jes wan faet blong winim bilif we i slak. Oli fesem bigfala traem from ol man we oli kilim olgeta, be oli stap tru long God go kasem we oli ded.

Maet ol niuwan long kongregesen blong Jerusalem, oli kam Kristin afta we bigfala trabol agensem ol Kristin i pas finis, mo oli neva fesem ol strong traem olsem. (Ol Wok 7:​54-60; 12:​1, 2; Hibrus 13:7) Be, tingting blong sam long olgeta ya i foldaon from ol traem we oli smol nomo, nao oli no moa gohed long resis blong olgeta, oli ‘lego bilif blong olgeta.’ (Hibrus 12:3) Olgeta ya oli mas kam bigman long saed blong spirit. Long rod ya bambae oli naf blong fesem enikaen traem, nating sipos traem ya i save givim kil long olgeta, gogo kasem we blad blong olgeta i ron.​—Hibrus 6:1; 12:​7-11.

Long taem blong yumi, plante Kristin man oli ‘ded, we blad blong olgeta i ron’ yes, sam man oli kilim olgeta oli ded from we oli no wantem lego Kristin bilif blong olgeta. I nogud yumi fraet long ol tok blong Pol long Hibrus 12:4. Be yumi mas luk ol tok ya olsem wan mak we yumi rere blong go kasem, blong soem se yumi stap tru long God oltaem. Biaen, long semfala leta ya we Pol i raetem i go long ol man Hibru, hem i talem se: “I gud yumi stap talem tangkiu long God, . . . yumi stap mekem wosip long hem long fasin we hem i glad long hem, we yumi ona long hem, mo yumi fraet long hem tu.”​—Hibrus 12:28.