“Bambae Yu Harem i Soa Smol”
“Bambae Yu Harem i Soa Smol”
?YU YU harem tok ya finis? Maet wan dokta no wan nes i talem tok ya bifo we hem i mekem wan samting blong fiksimap soa no sik blong yu.
Yu no sakemaot samting we dokta no nes i wantem mekem long yu jes from we bambae i mekem yu yu harem i soa. Defren olgeta, yu taetem yu mo yu harem i soa blong bambae yu save harem gud long saed blong helt long fiuja. Samtaem, samting we dokta i wantem mekem blong stretem sik, we yu mas agri long hem no sakemaot hem, i save sevem laef blong yu.
Yumi no nidim wan dokta oltaem, be yumi evriwan we yumi sinman i nidim fasin stretem, nating sipos samtaem, fasin ya i mekem yumi harem i soa. (Jeremaea 10:23) Baebol i talem se ol pikinini oli nidim fasin ya, i se: “Krangke fasin i stap long hat blong boe. Stik blong stretem hem i save tekemaot fasin ya i go longwe long hem.”—Ol Proveb 22:15, NW.
Long ples ya, stik blong stretem i minim raet blong papa mama blong bos long pikinini. I tru se ol pikinini oli no laekem fasin stretem. Sipos panis tu i joen wetem fasin stretem ya, maet bambae oli kros from. Be, ol papa mama we oli waes mo oli gat lav oli no lukluk nomo long filing blong pikinini we i harem i soa, be oli tingbaot gudfala frut we i save kamaot biaen. Ol Kristin papa mama oli save se Tok blong God i tru taem i talem se: “Yumi save finis, se sipos God i stretem yumi, bambae samting ya i no save mekem yumi harem gud, i mas mekem we yumi harem nogud. Be biaen, bambae yumi save kasem frut blong hem, we yumi gat pis, from we laef blong yumi i stret gud long fes blong God.”—Hibrus 12:11; Ol Proveb 13:24.
I no ol pikinini nomo we oli nidim fasin stretem. Ol bigman tu oli nidim. Baebol i toktok long ol bigman taem hem i talem se: “Oltaem, yu mas tingbaot ol samting ya we yu lanem finis [“holemtaet fasin stretem,” NW ]. Olgeta oli stamba blong laef blong yu, mo yu mas lukaot gud long olgeta.” (Ol Proveb 4:13) Yes, olgeta we oli waes—ol yangfala mo ol olfala tu—bambae oli glad long fasin stretem we i stanap long Tok blong God, Baebol, from we hemia bambae i sevem laef blong olgeta.