‘Lav Blong Mifala i Kam Strong Moa’

USU volkeno long Hokkaido, Japan, i slip blong 23 yia finis, be long Fraede, Maj 31, 2000, hem i faerap bakegen. Plante taosen man oli mas aot long ol ples klosap long hem. Plante man oli lusum haos mo wok blong olgeta, laki nomo we i no gat wan i lusum laef blong hem. I gat 46 Witnes blong Jeova long medel blong olgeta we oli ronwe, be oli no stap olsem nomo we oli no kasem help.

Long dei we volkeno ya i faerap, wan Kristin elda we i stap goraon blong visitim ol kongregesen, i givhan blong oli mekem plan blong halpem ol man we oli kasem trabol. I no longtaem, ol kongregesen we oli stap raonabaot oli sanem ol saplae oli kam. Kwiktaem nomo, branj ofis blong Japan i stanemap wan komiti blong lukaot long wok blong givimaot ol samting ya long olgeta we oli trabol, mo ol Witnes blong Jeova long olgeta ples long Japan oli sanem fulap presen i kam. Blong givhan long saed blong wok blong prij, oli sanem ol Witnes blong Jeova we oli prij fultaem oli go long ol kongregesen we oli kasem moa trabol. Mo seket elda i go visitim ol ples ya plante taem blong givhan long bilif blong ol brata mo leftemap tingting blong olgeta.

Long trabol taem ya, ol Witnes oli gohed blong mekem ol Kristin miting long sam haos we oli stap long sef ples. Taem oli tekemaot tabu long ples we Haos Kingdom i stap long hem, ol brata oli gobak mo oli faenem se haos ya i lei, i brokbrok mo sam haf blong hem oli nogud olgeta. Volkeno ya, we i no stap longwe tumas long Haos Kingdom, i gat wan niufala hol blong hem, mo i stap gohed blong saksakem bigfala smok. Ol Witnes oli stap askem se: ‘?Olsem wanem? ?I waes blong gohed blong mekem miting long ples ya? ?Mifala i save mekem Haos Kingdom i kam gud bakegen?’

Oli tekem disisen blong bildim wan niufala Haos Kingdom long wan ples we i moa sef be i no longwe tumas. ‘Regional building committee’ i givhan long saed ya. Ol Witnes we oli stap olbaot long kantri ya oli givim presen mane blong bildim haos ya. Kwiktaem nomo oli kasem wan graon, mo from we plante handred man mo woman oli givim taem mo paoa blong olgeta blong wok, wan niufala Haos Kingdom i girap long wan sot taem nomo. Long Sande, Julae 23, 2000, i gat 75 man oli stap long faswan miting we oli mekem long niufala Haos Kingdom ya. Plante blong olgeta we oli stap, oli krae from glad. Long Oktoba blong sem yia ya, oli mekem wan spesel miting blong givim Haos Kingdom ya i go long Jeova, nao wan elda long kongregesen i talem se: “Volkeno we i faerap i karem plante hadtaem mo traem oli kam long yumi. Be, haos ya i mekem fraet blong yumi i jenis i kam glad. !Lav blong yumi long Jeova mo long ol gudfala Kristin brata blong yumi i kam strong moa!”

[Foto Credit Line blong pija long pej 19]

Eruption of Mount Usu: AP Photo/Koji Sasahara