Laef Stori

Mi Rere Blong Lego Ol Samting We Mi Nomo Mi Wantem

DON RENDELL I TALEM STORI YA

Mi gat faef yia nomo taem mama blong mi i ded long 1927. Be bilif blong hem i gat bigfala paoa long laef blong mi. ?Samting ya i hapen olsem wanem?

LONG taem we Mama blong mi i mared wetem papa blong mi we i wan soldia, mama i strong blong folem Anglikan Jos. Be hemia bifo long Faswan Wolwo. Long 1914, Faswan Wolwo i stat, nao pasta blong jos blong Mama i yusum platfom blong jos olsem ples blong singaot ol man blong joen long ami. Mama i no agri long fasin ya, be pasta ya blong jos i ansa long hem se: “!Yu gohom, no letem tingting blong yu i trabol long saed ya!” Mama i no glad nating long ansa ya.

Long 1917, long taem we wo i kam antap bigwan, Mama i go luk “Foto-Drama Blong Ol Samting We God i Wokem.” Hem i sua fulwan we hem i faenem trutok, ale kwiktaem nomo hem i lego jos blong hem mo i joenem ol Baebol Studen, hemia nem blong ol Witnes blong Jeova long taem ya. Mifala i laef long vilej blong West Coker, long Somerset, Inglan. Taswe, Mama i joen long ol miting long kongregesen blong Yeovil, klosap long vilej blong mifala.

I no longtaem, Mama i tokbaot niufala bilif blong hem long ol trifala sista blong hem. Biaen, ol olfala blong kongregesen blong Yeovil oli talem long mi olsem wanem mama blong mi wetem sista blong hem, Millie, tufala i ron long baskel i go long bigfala teritori blong mifala afsaed long taon, blong seraotem ol buk ya, Studies in the Scriptures blong givhan long ol man blong stadi Baebol. Be sore tumas, Mama i kasem sik ya tibi, we long taem ya i no gat meresin blong hem. Hem i stap 18 manis we i slip nomo long bed, mo biaen hem i ded.

 Hem i Soem We Hem i Rere Blong Lego Ol Samting

Taem Mama i kam sik, Anti Millie i stap laef wetem mifala. Hem i lukaot long Mama, mo tu i lukaotgud long mi wetem bigfala sista blong mi Joan, we i gat seven yia. Taem Mama i ded, Anti Millie i talem se hem bambae i lukaot long mifala ol pikinini. Papa i glad tumas se narafala i save givhan long wok blong lukaot famle, taswe hem i agri se Anti Millie i stap wetem mifala oltaem.

Stat long taem we mifala i yangfala nomo, mifala i laekem Anti, nao mifala i glad we hem i stap laef wetem mifala. ?Be from wanem hem i tekem disisen ya? Plante yia biaen, Anti Millie i talem long mifala se hem i harem se hem i mas gohed long wok we Mama i bin statem​—hemia wok blong tijim trutok blong Baebol long mi mo Joan. Hem i luksave se Papa i no save mekem samting ya, from we hem i no intres nating long skul.

Biaen mifala i lanem se, taem Anti Millie i mekem samting ya, hem i tekem wan strongfala disisen long saed blong laef blong hem tu. Hem i tekem disisen we bambae hem i neva mared, blong hem i naf blong lukaotgud long mifala. !Hem i rili lego ol samting we hem nomo i wantem! Mi wetem Joan, mitufala i rili gat bigfala tangkiu long hem. Kam kasem tede, mifala i stap folem evri samting we Anti Millie i tijim long mifala, mo nambawan eksampol we hem i bin soem long mifala.

Taem Blong Tekem Wan Disisen

Mi mo Joan mitufala i go long skul blong vilej blong mifala, hemia skul blong Anglikan Jos. Taswe tija blong skul ya i stap givim edukesen long saed blong jos tu. Anti Millie i tok klia long woman we i bos long skul ya se bambae mitufala i no joen nating long edukesen long saed ya. Ale, taem ol narafala pikinini oli wokbaot blong go long jos, mifala i gobak hom, mo sipos pasta i kam blong tijim klas blong mifala long saed blong jos, mitufala i stap mitufala nomo, mo mitufala i mas lanem sam vas blong Baebol baehat. Long taem we i kam biaen, samting ya i givhan plante long mi from we mi neva fogetem ol vas ya we mi bin lanem.

Mi stop blong go long skul taem mi gat 14 yia. Nao mi tekem wan kos blong fo yia long wan lokol faktri we i wokem jis. Mi lanem blong pleplei piano tu, mo mi laekem tumas miusik mo danis. Trutok blong Baebol i stap finis long hat blong mi, be hem i no pulum mi yet. Ale wan dei, long Maj 1940, wan olfala sista i invaetem mi blong go wetem hem long wan asembli long Swindon, we i stap 110 kilometa longwe long ples blong mifala. Brata we i givim pablik tok long asembli ya, hemia Albert D. Schroeder, hem i lukaot long wok blong ol Witnes blong Jeova long Briten. Asembli ya we mi go long hem i jenisim fulwan laef blong mi.

Seken Wolwo i stap gohed long taem ya. I nogud mi westem laef blong mi blong mekem samting we i nating nomo. Mi tekem disisen blong gobak long Haos Kingdom blong Yeovil. Long faswan miting we mi go long hem, ol brata oli tokbaot wan niufala fasin blong prij, hemia fasin blong prij long rod. Nating se mi no gat plante save, be mi wantem joen long niufala fasin ya blong prij. !Plante man we oli talem se oli fren blong mi, oli sek taem oli luk mi, mo oli jikim mi taem oli wokbaot long rod!

Mi tekem baptaes long Jun 1940, long taon blong Bristol. Bifo we wan manis i pas, mi joen long wok blong fultaem paenia. !Smoltaem biaen, mi glad tumas we sista blong mi, hem tu i givim laef blong hem i go long Jeova mo tekem baptaes!

Mi Stap Paenia Long Taem Blong Wo

Wan yia afta we wo i stat, mi kasem ol pepa blong singaot mi mi go long ami. Long Yeovil, oli rejistarem mi olsem wan man we i agensem wo from bilif blong mi. From samting ya nao  mi mas pas long kot long Bristol. Mi bin joen long wok blong prij wetem John Wynn, mo biaen mifala i go long Haverfordwest mo Carmarthen, long Wales. * Samtaem biaen, taem mi pas long kot long Carmarthen, mi kasem panis blong stap tri manis long kalabus long Swansea, mo tu mi mas pem 5,100 vatu​—long taem ya, hemia wan faen we i sas tumas. From we mi mo save pem faen ya, mi kasem wan seken panis blong tri manis long kalabus.

Namba tri taem we mi pas long kot, oli askem long mi se: “?Yu no save we Baebol i talem se: ‘Samting we i blong Sisa, yufala i givimbak long Sisa’?” Mi ansa se, “Yes, mi save tok ya, be laswan haf blong vas ya i talem se: ‘mo samting we i blong God, yufala i givimbak long God.’ Hemia nao samting we mi stap mekem.” (Matiu 22:​21) Sam wik biaen, mi kasem wan leta we i talem se mi fri, mi no nid blong joen long ami.

Eli long 1945, oli invaetem mi blong joen long famle blong Betel long London. Long koltaem we i kam biaen, Nathan H. Knorr i kam visitim London. Hem nao i stap lidim wok blong prij long fulwol, mo hem i kam wetem sekretari blong hem, Milton G. Henschel. Oli singaot eit yangfala brata blong Briten blong oli folem wan kos blong kam misinari, long namba eit klas blong Wajtaoa Baebol Skul blong Gilead. Mi mi wan blong ol eit brata ya.

Wok Blong Misinari

Long Mei 23, 1946, mifala i livim smol haba blong Fowey, long Cornwall, blong statem wan longfala trip long Liberty ship, hemia ol bigfala sip we oli bildim long taem blong wo. Masta blong haba ya, Kapten Collins, hem i wan Witnes blong Jeova, mo taem mifala i aot long wof, hem i mekem wesil i krae. I tru we filing blong mifala i narakaen taem mifala i luk we sloslou mifala i stap gowe long ol hil blong Inglan. Taem mifala i krosem solwota blong Atlantik, weta i nogud, mekem se trip ya i had tumas. Be 13 dei biaen, mifala i kasem Yunaeted Stet.

Mi glad tumas blong go long intenasnal asembli ya, Glad Nations Theocratic Assembly, we i stat long Ogis 4 go kasem Ogis 11 long Cleveland, Ohio. I gat eiti taosen man we oli kam long asembli ya, wetem 302 man we oli kamaot long 32 narafala kantri. Long asembli ya, ol man oli glad tumas blong kasem niufala magasin ya Wekap! * wetem buk ya blong givhan blong stadi long Baebol, hemia “Let God Be True”.

Long 1947, mifala i finisim kos long Gilead mo kasem stefeket blong mifala. Oli sanem mi wetem Bill Copson, mitufala i go long Ijip. Be bifo we mi go, Richard Abrahamson i givim gudfala trening long mi long Betel blong Brooklyn, long saed blong wok long ofis. Mifala i go so long Alexandria, mo i no longtaem biaen, mi lanem fasin blong laef long Medel Is. I no isi nating blong lanem lanwis blong ol man Arab, nao mi mas yusum ol testimoni kad we oli talemaot mesej blong Kingdom long fo defren lanwis.

Bill Copson i stap long Ijip blong seven yia, be mi, afta long wan yia, mi no save kasem wan niufala visa blong stap, taswe mi mas aot long kantri. Taem mi luklukbak long taem ya, mi harem se faswan yia ya long wok blong misinari hem i karem moa frut i bitim ol narafala yia long laef blong mi. Evri wik, mi gat janis blong mekem bitim 20 stadi long Baebol. Mo sam blong olgeta we oli bin lanem  trutok long taem ya, oli stap gohed yet blong presem Jeova tede. Taem mi aot long Ijip, oli sanem mi mi go long Saepras.

Saepras Mo Isrel

Mi stat lanem wan niufala lanwis, hemia Grik lanwis, mo tu mi stat kasemgud lanwis blong ples ya. Smoltaem biaen, taem Anthony Sideris i aot long Saepras i go long Gris, oli putumap mi olsem man blong lukaot long wok blong prij long Saepras. Long taem ya, branj ofis blong Saepras i lukaot long wok blong prij long Isrel tu. Taswe, mi wetem sam narafala brata, mifala i gat janis blong visitim ol Witnes long Isrel sam samtaem.

Long faswan trep blong mi long Isrel, i gat 50 no 60 man we oli kam long asembli we mifala i mekem long wan restoron long Haifa. !Mifala i seraotem ol man blong semfala kantri oli go long ol smosmol grup, nao mifala i mas mekem asembli ya long sikis defren lanwis! Long wan narafala taem, long Jerusalem mi gat janis blong soem wan sinema we ol Witnes blong Jeova oli wokem, mo tu mi givim wan pablik tok. Inglis niuspepa blong ol man long ples ya i givim wan gudfala ripot long saed blong tok ya.

Long taem ya, i gat klosap 100 Witnes long Saepras, mo oli mas faet strong blong holem bilif blong olgeta. Ol pris blong Grik Otodoks Jos oli lidim ol man blong stopem ol asembli blong mifala. Mo taem mi stap prij long bus, ol man oli stonem mi. !Hemia fastaem we samting ya i hapen long mi, nao mi mas lanem blong ronwe kwiktaem nomo! Ol man oli agensem mifala bitim mak. Taswe, bilif blong mifala i kam strong moa taem sam niufala misinari oli kam mekem wok blong prij wetem mifala long aelan ya. Olgeta misinari ya oli joenem mi long Famagusta: Dennis mo Mavis Matthews, wetem Joan Hulley mo Beryl Heywood. Long Limassol, i gat Tom mo Mary Goulden, mo Nina Constanti, wan woman Saepras we i bon long London. Long sem taem ya, Bill Copson tu hem i kam long Saepras, mo biaen, Bert mo Beryl Vaisey oli joenem hem.

Mi Mas Jenisim Laef Blong Mi

Long en blong 1957 mi stat siksik plante, ale mi no moa save gohed long wok blong misinari. Mi harem nogud tumas, be mi tekem disisen blong gobak long Inglan blong kasem wan gudfala helt bakegen. Long ples ya, mi gohed blong paenia kasem 1960. Sista blong mi wetem man blong hem, tufala i kaen tumas long mi, tufala i welkamem mi long haos blong tufala. Be laef i jenis olgeta, mo Joan i harem se i had tumas long hem blong lukaot long evriwan wantaem. I tru se, long ol 17 yia we mi no stap long Inglan, Joan i mas lukaotem man blong hem mo yangfala gel blong tufala, mo tu hem i mas kea long papa blong mifala, wetem Anti Millie tu. Naoia tufala i olfala, mo tufala i sik. I klia se naoia i taem blong mi blong folem eksampol blong anti blong mi, mo lego olgeta samting we mi nomo mi wantem. Ale, mi stap wetem sista blong mi gogo kasem we anti mo papa blong mi, tufala i ded.

I isi nomo blong mi stap long Inglan sipos mi wantem. Be afta we mi spel smol, mi harem se mi mas gobak long misinari wok. Mi no foget se ogenaesesen blong Jeova i bin spenem plante mane blong givim trening long mi. Ale, long 1972, mi pem tikit blong mi blong gobak long Saepras, mo gohed long wok blong paenia.

Nathan H. Knorr i kam long Saepras blong rerem wan asembli we oli mas holem wan yia biaen. Taem hem i luk se mi kambak, hem i putum mi long wok blong seket elda long fulwan aelan. Mi  gohed long nambawan wok ya blong fo yia. Be wok ya i mekem mi mi fraet lelebet, from we mi mas toktok Grik lanwis klosap evri taem.

Taem Blong Trabol

Mi wetem Paul Andreou, wan Witnes blong Saepras we i toktok Grik lanwis, mitufala i serem wan haos long vilej ya blong Karakoumi, long is saed blong Kyrenia, long not blong Saepras. Branj ofis blong Saepras i stap long Nicosia, long saot blong ol Bigfala Hil blong Kyrenia. Long stat blong Julae 1974, mi stap long Nicosia taem ol man oli putumaot Presiden Makarios, nao mi luk faea i kakae bigfala haos blong hem. Taem trabol i godaon, kwiktaem nomo mi gobak long Kyrenia, nao long ples ya mifala i rerem seket asembli. Tu dei biaen, mi harem noes blong ol faswan bom we oli sakem long haba, mo taem mi lukluk antap long skae, mi luk plante helikopta we oli karem ol ami blong Teki i kam.

Ol soldia blong Teki oli karem mi mi go afsaed long Nicosia, from we mi mi wan sitisen blong Briten. Nao long ples ya, ol man blong wok blong Yunaeted Nesen oli askem plante kwestin long mi, mo oli toktok wetem ol brata long branj ofis. Biaen mi fraet tumas taem mi mas wokbaot i gotru long ol rop blong lektrik wetem ol rop blong telefon we oli fasfas olbaot long graon, blong go kasem ples ya we ol ami oli no winim yet. !Mi glad tumas we i no gat wan samting i save blokem mi blong gohed blong toktok wetem Jeova God! Ol prea we mi mekem oli givhan plante long mi blong stanap strong long bigfala traem ya we mi fesem.

Mi lusum olgeta samting blong mi, be mi glad blong stap sef long branj ofis. Be hemia blong smoltaem nomo. Sam dei biaen, ami blong Teki i kontrolem ful not blong Saepras. Mifala i mas lego Betel, nao mifala i go long Limassol. Mi glad blong wok long ples ya wetem wan komiti we i lukaot long ol 300 brata we oli harem nogud from bigfala trabol ya. Plante blong olgeta oli bin lusum haos blong olgeta.

Wok Blong Mi i Jenis

Long Jenuware 1981, Hed Kampani i askem mi blong go long Gris, blong joenem Betel famle long Atens. Be long en blong sem yia ya, mi kambak long Saepras, mo oli putumap mi olsem elda we i lukaot long wok blong Branj Komiti. Branj ofis blong London i bin sanem Andreas Kontoyiorgis mo waef blong hem, Maro, we tufala i blong Saepras, oli kam wok long Saepras. Tufala i rili givhan mo “mekem mi mi haremgud tumas.”​—Kolosi 4:​11.

Long 1984, Theodore Jaracz i kam blong mekem visit long Saepras. Long en blong visit ya, Hed Kampani i raetem wan leta i kam long mi we i talem nomo se: “Taem visit ya i finis, mifala i glad we yu folem Brata Jaracz blong go long Gris.” Oli no talem from wanem mi mas go, be taem mifala i kam long Gris, i gat wan narafala leta i kamaot long Hed Kampani we i talem se oli putumap mi blong lukaot long wok blong Branj Komiti long kantri ya.

Long taem ya, fasin blong apostasi * i kam antap bigwan long Gris. Plante man oli agensem mifala from we oli talem se mifala i pulum olgeta blong jenisim skul blong olgeta, hemia wan samting ya we i go agensem loa blong kantri ya. Evri dei, polis  i holem ol man blong wok blong Jeova, mo putum olgeta long kot. !Hemia wan nambawan janis we mi kasem blong save olgeta brata sista ya we oli stanap strong tru long ol traem! Sam blong olgeta ya oli pas long Kot blong Yurop Long Saed Blong Raet blong Ol Man. Mo jajmen we i kamaot from kot ya i karem gudfala frut long saed blong wok blong prij long Gris. *

Taem mi stap mekem wok blong God long Gris, mi save go long ol bigfala asembli long Atens, Tesalonaeka, mo ol aelan blong Rhodes mo Krit. Mi haremgud tumas long ol fo yia ya, mo mi mekem bigfala wok. Be wok blong mi i mas jenis bakegen​—mi gobak long Saepras long 1988.

Saepras Mo Gris Bakegen

Taem mi stap aot long Saepras, ol brata oli pem wan niufala branj ofis long Nissou, klosap long Nicosia. Carey Barber, we i wok long hedkwota blong ol Witnes blong Jeova long Brooklyn, hem i kam blong givim dedikesen tok blong branj ofis ya. Ples i kam moa kwaet nao long aelan ya, mo mi glad blong kambak​—be fasin kwaet ya i no stap blong longtaem.

Hed Kampani i agri we mifala i bildimap wan niufala haos Betel long Gris, sam kilometa longwe long not blong Atens. Mi mi save toktok Inglis mo Grik tu. Taswe long 1990, oli singaot mi mi gobak long Gris, long ples we oli stap bildimap wan niufala haos Betel. Long ples ya, mi mekem wok blong tanem tok i go long famle blong ol brata sista we oli kam blong bildim Betel ya. !Mi rimemba we long hot taem, mi glad blong welkamem ol brata sista blong Gris we oli kam long sikis klok long moning blong givhan long ol brata we oli stap wok fultaem! Bambae mi neva fogetem glad mo fasin blong wok strong we oli gat.

Ol pris blong Otodoks Jos blong Gris oli kam wetem olgeta man blong olgeta, oli traehad blong blokem wok blong mifala long ples we mifala i bildim haos Betel. Be Jeova i lesin long ol prea blong mifala, mo i lukaotgud long mifala. Mi stap wok long ples ya gogo kasem we oli dediketem niufala Betel, hemia long Eprel 13, 1991.

Mi Sapotem Gudfala Sista Blong Mi

Wan yia biaen, mi gobak long Inglan blong spel. Mi go stap wetem sista blong mi mo man blong hem. Be sore tumas, taem mi stap wetem tufala, man blong hem i gat tu hat atak, mo i ded from. Taem mi mekem wok blong misinari, Joan i sapotem mi fulwan. Klosap evri wik, hem i sanem wan leta i kam long mi blong leftemap tingting blong mi. !Ol nius olsemia oli rili wan blesing long wan misinari! Naoia, hem i wan wido, helt blong hem i godaon, mo hem i nidim help. ?Bambae mi mekem wanem?

Gel blong Joan, Thelma, wetem man blong hem, tufala i stap lukaot finis long wan narafala wido long kongregesen blong olgeta. Wido ya i famle wetem mifala, mo hem i sik tumas, klosap i ded from. Ale, mi prea dip long Jeova, nao mi tekem disisen se mi mas stap blong lukaot long Joan. I no isi nating blong mekem bigfala jenis ya long laef blong mi, be mi glad blong mekem wok blong elda long Pen Mill, wan long tufala kongregesen blong Yeovil.

Oltaem, ol brata we mi bin wok wetem olgeta long narafala kantri, oli stap raetem leta i kam long mi, no oli telefon long mi. Mi tangkiu tumas long olgeta from. Sipos mi talem nomo se mi mi glad blong gobak long Gris no long Saepras, mi save finis se ol brata bambae oli sanem tikit blong mi i kam kwiktaem nomo. Be naoia mi gat 80 yia finis, mi no moa save lukgud, mo helt blong mi i no moa olsem fastaem. Tingting blong mi i foldaon lelebet from we mi no moa save wok olsem bifo. Be ol yia we mi spenem long Betel oli tijim sam gudfala fasin long mi, we mi stap folem kam kasem naoia. Wan eksampol: evri dei bifo we mi dring ti, mi mas ridim vas blong dei. Mo tu, mi lanem blong joengud wetem ol narafala, mo blong lavem olgeta​—hemia nambawan rod blong gohed gud long wok blong misinari.

Taem mi luklukbak long klosap 60 yia we mi bin presem Jeova, mi luksave se fultaem wok blong prij i protektem mi, mo i givim beswan edukesen long mi. Olsem Deved bifo, mi save talem long Jeova wetem fulhat blong mi se: “Oltaem yu yu strong ples blong haed blong mi, yu yu sefples blong mi long taem blong trabol.”​—Ol Sam 59:16.

[Ol Futnot]

[Map blong pija long pej 24]

(Lukluk niuspepa)

GREECE

Athens

CYPRUS

Nicosia

Kyrenia

Famagusta

Limassol

[Tok blong pija long pej 21]

Mama long 1915

[Tok blong pija long pej 22]

Antap long ruf blong Betel long Brooklyn long 1946, mi (namba fo stat long lefsaed) wetem sam narafala brata blong namba eit klas blong Gilead

[Tok blong pija long pej 23]

Wetem Anti Millie, fastaem we mi kambak long Inglan