?Olsem Wanem Yu Save Laef Tru long En blong Wol Ya?

BAEBOL i tokbaot en blong rabis fasin blong wol ya olsem “dei blong kros blong Hae God, mo i dei blong man i trabol, i harem nogud. Long dei ya, Hae God bambae i spolem olgeta samting. Long taem ya, bambae long dei nomo, be ples bambae i kam tudak olgeta, mo klaod we i blak we i blak bambae i kavremap olgeta ples.” (Sefanaea 1:​15) !Tru ya, wan dei olsem, ating yu fraet blong luk! Be, aposol Pita i givim advaes long ol Kristin brata blong hem se ‘taem oli stap wet long Dei ya blong God blong i kamtru, oli mas tabu, oli man blong God, mo oli mas mekem ol fasin we hem i wantem. Mo oli mas gohed blong wok blong mekem Dei ya i kamtru kwik. Long Dei ya, bambae faea i kakae skae we i finisim olgeta, mo ol sta bambae oli ronaot long faea ya we i hot we i hot. Be God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.’​—2 Pita 3:​12, 13.

Long vas ya, Pita i no stap talem se prapa skae mo graon bambae i lus. Nogat. “Niufala skae” mo “niufala wol” we Pita i tokbaot, oli pija blong ol gavman blong man we oli fulap long kruked fasin, mo ol man blong naoia we oli no wantem obei long God. ‘Dei blong Jeova’ bambae i no spolem prapa graon, be bambae i ‘spolemgud olgeta we oli stap mekem sin.’ (Aesea 13:9) Taswe, dei ya blong Jeova bambae i sevem olgeta we “oli stap harem nogud from ol samting nogud ya we ol narafala man ya oli stap mekem.”​—Esikel 9:4.

?Be, olsem wanem wan man i save laef tru long “bigfala dei [blong Jeova] we bambae ol man oli fraet gud long hem”? “Tok blong Jeova” we wan profet blong hem i talemaot, i givim ansa long kwestin ya. Hem i se: “Olgeta man we oli singaot mi long nem blong mi [Jeova], mi bambae mi sevem olgeta.” (Joel 1:​1, NW; 2:​31, 32) Ol Witnes blong Jeova oli glad tumas blong givhan long yu blong save olsem wanem blong singaot long nem blong Jeova.