?Hu i Save Lidimgud Yumi?

BAEBOL i talem se: “Evri haos i gat man we i wokem, be God i wokem olgeta samting we i stap.” (Hibrus 3:4; Revelesen 4:​11) From we trufala God, Jeova, i Man we i Wokem yumi, hem i “savegud we hem i mekem yumi long graon.” (Ol Sam 103:14) Hem i savegud ol samting we yumi naf blong mekem mo ol nid blong yumi. Mo from we hem i gat lav, hem i wantem givim ol samting ya we yumi nidim. (Ol Sam 145:16; 1 Jon 4:8) Wan samting we yumi nidim tumas, hemia wan man we i save lidim gud yumi.

Jeova i yusum profet Aesea blong talemaot se: “Mi mi putumap hem i kam king, mo i kam lida mo komanda blong ol man blong ol narafala kantri, mo mi yusum hem blong soemaot long olgeta we mi mi gat paoa.” (Aesea 55:4) Blong stretem hadtaem we man i gat tede blong faenem ol gudfala man blong lidim yumi, yumi mas faenemaot hu nao Lida ya we vas ya i tokbaot mo we Hae God hem wan i jusumaot, nao yumi mas letem hem i lidim yumi. ?Taswe, hu ya Lida mo Komanda ya we Baebol i tokbaot? ?Wanem ol fasin blong hem we oli soemaot se hem i naf blong lidim yumi? ?Bambae hem i lidim yumi i go long wanem rod? ?Yumi mas mekem wanem blong kasem blesing long hem olsem lida blong yumi?

Lida Ya We God i Promes Blong Sanem i Kam

Samwe 2,500 yia bifo, enjel Gabriel i kamtru long profet Daniel mo i talem long hem se: “Bambae mi talemaot wan tok long yu. Yu lesin gud long  hem. I stat long taem ya we bambae toktok ya i kamtru blong oli bildim Jerusalem bakegen, go kasem taem we [“Lida mo,” NW ] Mesaea we God i jusumaot bambae i kam, bambae i gat seven wik mo sikisti tu wik i pas. Mo long taem ya bambae oli bildim Jerusalem bakegen, wetem ol rod blong hem, mo ol strong ples blong blokem ol enemi, mo bambae i stanap long sikisti tu wik ya, be bambae i taem blong trabol nomo.”​—Daniel 9:​25.

I klia nomo se, enjel i stap talemaot long Daniel, stret taem we Lida we Jeova i jusum, bambae i kamtru. “Lida mo Mesaea” ya bambae i kamtru long en blong 69 wik, no 438 yia, we oli kaontem i stat long 455 B.K.T., * taem toktok i goaot se oli mas bildim Jerusalem bakegen. * (Nehemaea 2:​1-8) ?Wanem i hapen long en blong 483 yia ya? Gospel blong Luk i talem se: “Nao long taem we man Rom ya, Taebirias Sisa i stap rulum olgeta kantri, long namba fiftin yia blong hem, sam long ol man ya we oli stap rul aninit long hem i olsem. I gat Herod, we hem i stap rul long Galili, [29 K.T. *] . . . mo Ponjes Paelet, we i man Rom, hem i stap hed gavman long Judia. . . . Long taem ya nao, Jon, pikinini blong Sekaraea i stap long draeples, mo i harem God i toktok long hem. Nao hem i go long olgeta ples olbaot long Jodan Reva, i stap prij. Hem i talem se, ‘!Olgeta! Yufala i mas tanem tingting blong yufala from ol sin blong yufala, mo yufala i mas baptaes, nao God bambae i tekemaot ol sin blong yufala.’ ” Long taem ya, ol man oli stap wet nomo from Mesaea we bambae i lidim olgeta. (Luk 3:​1-3, 15) Nating se bigfala hip blong man i kam long Jon, be hem i no stret Lida ya.

Nao long manis Oktoba blong yia 29 K.T., Jisas blong Nasaret i kam long Jon blong tekem baptaes. Mo Jon i witnes long samting ya, i talem se: “God i sanem mi blong mi mekem baptaes long wota, mo taem mi mi kam, mi no save se hem nao man ya. Be God i talemaot long mi se, ‘Bambae yu save luk tabu spirit i kamdaon, i stap long wan man. Man ya nao bambae i mekem baptaes long tabu spirit.’ Nao biaen, mi luk we tabu spirit i aot long heven, i kamdaon olsem wan sotleg, i kam sidaon long hem. Nao mi mi luk samting ya, mo mi talemaot se man ya, hem i Pikinini blong God.” (Jon 1:​32-34) Taem Jisas i tekem baptaes, hem i kam Lida ya we God i jusumaot​—Mesaea, no Kraes.

Yes, “lida mo komanda blong ol man blong ol narafala kantri” we God i promes blong sanem, hem i Jisas Kraes. Mo taem yumi luk ol fasin blong hem olsem wan lida, yumi luksave wantaem nomo se hem i moa gud olgeta long ol lida long taem blong yumi.

Mesaea​—Nambawan Lida

Wan gudfala lida hem i wan lida we i save givim ol klia toktok long ol man, mo i givhan long ol man we oli stap aninit long hem blong oli gat strong tingting mo blong oli kam naf blong stretem ol trabol blong olgeta. Buk ya 21st Century Leadership: Dialogues With 100 Top Leaders i talem se: ‘Hemia nao wanem we wan i lida i mas mekem blong lidimgud ol man long ol yia 2,000.’ !Jisas i rerem gud ol man we oli stap lesin long hem blong oli naf blong stretem ol trabol we i kamaot long evri dei laef blong olgeta! Traem tingbaot Bigfala Toktok blong hem we plante man oli save gud. Matiu japta 5 kasem 7 i fulap long ol gudfala advaes.

Tingbaot advaes blong Jisas olsem wanem blong stretem wan rao wetem narafala. Hem i talem se: “Sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.” (Matiu 5:​23, 24) Samting we oli mas mekem fastaem, oli mas girap mo go luk narafala blong mekem pis wetem hem. Hemia i moa impoten i bitim we oli mekem ol wok we i joen wetem skul, olsem givim presen long olta blong tempol long Jerusalem, we Loa blong Moses i askem. Sipos oli no mekem pis wetem narafala fastaem, God i no save agri long wosip blong olgeta. Advaes blong Jisas i wok gud yet long taem blong yumi olsem we hem i bin wok gud plante handred yia bifo.

Jisas i givhan long ol man we oli lesin long hem tu blong oli no foldaon long trap ya blong mekem rabis fasin long saed blong seks. Hem i tok long olgeta i se: “Yufala i harem finis we ol tija oli talem bifo se, ‘Yufala we i mared, bambae yufala i no mas go slip wetem narafala woman.’ Be mi mi talem long yufala, se man we i luk wan woman, nao i wantem hem tumas, i olsem we hem i slip wetem woman ya finis.” (Matiu 5:​27, 28) !Woning ya i stret gud! I nogud we yumi stap tingbaot rabis fasin long saed blong seks. Hemia i olsem we yumi stat blong wokbaot long rod blong mekem rabis fasin ya finis. Jisas i talem se fasin blong slip olbaot mo fasin blong stilim man no woman  blong narafala, oli stat long hat fastaem. (Matiu 15:​18, 19) Yumi waes sipos yumi lukaotgud long hat blong yumi.​—Ol Proveb 4:​23.

Long Toktok we Jisas i mekem antap long Hil, hem i givim ol gudfala advaes bakegen, se yumi mas laekem ol enemi blong yumi, yumi mas glad blong givim presen, yumi mas gat stret tingting long ol samting blong laef mo ol samting long saed blong wosip, wetem plante narafala advaes bakegen. (Matiu 5:​43-47; 6:​1-4, 19-​21, 24-​34) Jisas i tijim olgeta we oli lesin long hem tu, olsem wanem blong prea. Olsem nao, oli save rod blong lukaot help blong God. (Matiu 6:​9-13) Mesaea we i Lida i mekem tingting blong olgeta we oli folem hem i kam strong mo i mekem olgeta oli rere blong fesem ol problem we ol man oli stap kasem.

Sikis taem long toktok blong Jisas antap long Hil, hem i statem tok blong hem olsem: “Yufala i harem finis se,” no: “Bakegen oli bin talem bifo se.” Be afta, hem i givim wan narafala tingting, i se: “Be mi mi talem long yufala se.” (Matiu 5:​21, 22, 27, 28, 31-34, 38, 39, 43, 44) Hemia i soemaot se ol man we oli lesin long hem oli stap folem wan fasin finis we i joen wetem ol kastom we ol Farisi oli tijim olgeta long hem. Be naoia Jisas i stap soemaot wan defren rod long olgeta​—wan rod we i soemaot trufala mining blong Loa blong Moses. Long rod ya, Jisas i stat blong jenisim tingting blong olgeta, mo hem i mekem samting ya long fasin we i pulum ol man blong hem blong oli glad blong folem. Yes, Jisas i pulum ol man blong oli mekem ol bigfala jenis long laef blong olgeta, long saed blong wosip mo long saed blong fasin. Hemia mak blong wan trufala lida.

Wan buk we i tokbaot wok blong ol bos, i soemaot se i hadwok blong pulum ol man blong jenis olsem. Buk ya i talem se: “Man we i pulum ol man blong jenis [wan lida], i mas naf blong harem save filing blong ol narafala, olsem wan man we i wok blong givhan long ol man we oli trabol. Hem i mas gat fasin luksave, olsem wan dokta we i wok long saed blong tingting blong man. Hem i nidim paoa, olsem wan man blong resis. Hem i nidim strong tingting olsem wan buldog. Mo hem i nidim fasin blong man we i save laef hem wan nomo, i no dipen long narafala. Hem i nidim longfala tingting olsem wan man blong God. Be i tru tu se, nating sipos man ya i gat olgeta fasin ya, hem i no save talem stret se wok blong hem bambae i karem gudfala frut.”

Wan buk i tokbaot: “?Ol Fasin Blong Ol Lida Blong Yumi Oli Impoten?” Hem i talem se: “Ol lida oli mas gat ol semfala fasin we oli wantem luk long ol man we oli biaen long olgeta.” Yes, wan gudfala lida i folem ol tok we hem i stap talemaot long ol narafala. !Hemia i tru long saed blong Jisas Kraes! Hem i tijim fasin daon long olgeta we oli wokbaot wetem hem, be hem wan i soemaot fasin ya taem hem i wasem leg blong olgeta. (Jon 13:​5-15) Hem i no jes sanemaot ol disaepol blong hem blong olgeta nomo oli go talemaot gud nius blong Kingdom, be hem tu i mekem wok ya wetem ful paoa blong hem. (Matiu 4:​18-25; Luk 8:​1-3; 9:​1-6; 10:​1-24; Jon 10:​40-42) Mo long saed long fasin blong obei long hem olsem Lida blong olgeta, Jisas i soemaot rod. Hem i tokbaot hem wan i se: “Mi mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i stap mekem.”​—Jon 5:​19.

Ol samting we yumi jes tokbaot we Jisas i talem mo i mekem, oli soemaot klia nomo se hem nao i nambawan Lida. Hem i bitim olgeta lida we man i save putumap long wol ya. Jisas i stretgud olgeta. Afta we hem i ded mo i girap bakegen, hem i kasem wan laef we i no gat ded long hem, ale hem bambae i laef olwe nomo. (1 Pita 3:​18; Revelesen 1:​13-18) ?Wanem lida blong wol ya we i save kasem wan laef olsem?

?Yumi Mas Mekem Wanem?

“Lida mo Mesaea” we i rul olsem King long Kingdom blong God, bambae i blesem ol man we oli obei. Long saed ya, Baebol i promes se: “Bambae wol ya i fulap tru long save blong Jeova olsem we ol wota oli kavremap solwota.” (Aesea 11:​9, NW ) “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:11) “Olgeta man bambae oli stap gud, mo oli gat pis olwe. Bambae oli save stap gud long ol plantesin blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.” (Maeka 4:4) “God bambae i kampani wetem olgeta. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”​—Revelesen 21:​3, 4.

Tede, wol i kasem bigfala trabol from we ol man oli no save lidim gud ol man. Be, Jisas Kraes i stap lidim olgeta we oli gat tingting daon oli go long  wan niufala wol we i gat pis. Long ples ya, ol man we oli gat fasin obei bambae oli joen gud blong wosip long Jeova God, mo sloslou bambae oli kasem wan laef we i stretgud olgeta. !I impoten tumas we yumi tekem taem blong kasem save long trufala God, mo long Lida we hem i jusumaot, nao yumi wok folem save ya!​—Jon 17:3.

Sipos yumi tinghae long wan man, beswan samting we yumi save givim long hem, hemia respek we i kamaot taem yumi traehad blong folem fasin blong hem. ?Taswe, olsem wanem long Jisas Kraes? ?I stret we yumi traem folem fasin blong Lida ya we i bitim ol narafala lida blong bifo mo naoia? ?Olsem wanem yumi save mekem samting ya? ?Sipos yumi letem hem i lidim yumi, hemia bambae i mekem wanem long laef blong yumi? Bambae yumi tokbaot ol kwestin ya mo sam narafala bakegen long tufala haf we i kam biaen.

[Ol Futnot]

[Tok blong pija long pej 4]

Daniel i talemaot fastaem finis se Lida we God i jusumaot bambae i kam

[Tok blong pija long pej 7]

Ol tijing blong Jisas oli mekem ol man oli rere blong fesem ol trabol blong laef

[Tok blong pija long pej 7]

Bambae Jisas i lidim ol man we oli obei oli go long wan niufala wol we i gat pis