Ol Gudfala Lida Wan Traem Blong Fulwol

I gat wan man bifo we i stap raetem ol buk mo ol naesfala toktok. Hem i bilif long ful hat blong hem se, bambae ol man oli save kasem ol gudfala samting long fiuja. Samwe 90 yia bifo, man ya i tingbaot se wol bambae i kam wan ples “we fraet i no stap long tingting blong man mo ol man oli gat wan gudfala tingting long saed blong laef. Bambae [wol] i wan ples we man i no pem save, mo i no moa gat boda we i seraotem ol defdefren kantri. Bambae hem i wan ples we ol man oli talem trutok nomo [mo] oli traehad oltaem blong kamgud moa long wok blong olgeta.”

MAN ya blong raetem buk i talem we hem i wantem se wan dei ol man long kantri blong hem, mo long ol narafala ples blong wol tu, bambae oli stap long wan wol olsem. Man ya we i winim Nobel Praes, i no moa laef tede. Be sipos hem i laef yet, bambae hem i harem nogud tumas. ?From wanem? From we, nating se ol man oli kasem plante niufala save mo wokem plante samting, wol i seraot moa i bitim bifo. Mo i luk olsem se laef blong ol man long fiuja bambae i nogud nating.

Sam man oli askem kwestin long wan fama se, from wanem sam grup long kantri blong hem oli girap wantaem nomo, oli faet. Nao, fama ya i talem wanem samting we hem i ting se i mekem trabol ya i kamaot. Hem i se: “Hemia from we yumi no gat ol gudfala lida.” Long wan buk ya Humanity​—A Moral History of the Twentieth Century, Jonathan Glover, we i wan man blong raetem histri, i talem sem tingting, i se: “Ol man we oli wantem kilim i ded wan ful laen blong man [long kantri ya we fama i tokbaot] oli no statem faet ya from we kros i kam  antap wantaem nomo agensem narafala laen, nogat. Faet ya i kamaot from we ol man oli wantem holem paoa.”

Long stat blong 1990, faet i kamaot bitwin tu ripablik blong kantri ya we fastaem oli kolem Yugoslavia. Wan woman we i stap raetem niuspepa i talem se: “Blong plante yia, yumi stap tugeta long pis. Be naoia, ol samting i kam nogud gogo yumi stap kilim ol pikinini blong ol manples blong yumi nomo. ?Wanem i stap hapen long yumi?”

Man blong raetem ol naesfala toktok, we yumi tokbaot hem fastaem, i bon long kantri blong India, we i stap plante taosen kilometa longwe long Yurop. Long saed blong India, Pranay Gupte we i wan man blong raetem ol buk, i givim wan tok, nem blong hem “?India i Save Stanap Strong Olsem Wan Nesen?” Hem i talem se: ‘Bighaf (samwe 70 pesen) blong ol man India oli yang nomo, oli no kasem 30 yia yet, be i no gat wan gudfala lida we i save soemaot eksampol long olgeta blong oli folem.’

Long sam kantri, ol lida oli mas finis long wok blong olgeta from we ol man oli faenemaot se oli stap mekem kruked fasin. Taswe, from plante defren risen, wol i stap fesem bigfala trabol long saed blong ol lida. Ol samting we i stap hapen i pruvum tok blong wan profet we i laef samwe 2,600 yia bifo. Hem i se: “Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.”​—Jeremaea 10:23.

?I gat wan rod blong stretem ol trabol long wol ya? ?Wanem lida i save mekem se ol man oli no moa faet mo oli no moa fraet? ?Wanem lida i save mekem wol i kam wan ples we trufala save i plante mo i fri nomo, mo lidim olgeta man i go long wan laef we i stret gud olgeta?

[Tok blong pija long pej 3]

Fatmir Boshnjaku