‘Yufala i Kam Long Mi, Nao Bambae Mi Mekem We Yufala i Spel’

Ol Miting We Oli Pulum Man Blong Soem Lav Mo Mekem Gudfala Wok

STAT long Toronto go kasem Tokyo, stat long Moscow go kasem Montevideo​—faef taem long wan wik, plante milian Witnes blong Jeova wetem ol fren blong olgeta oli joen tugeta long ples blong wosip blong olgeta. Olgeta man ya oli defdefren: i gat ol hed blong famle we oli taed tumas from hadwok blong olgeta long dei; i gat ol waef we oli wok had tu, mo ol mama wetem ol smol pikinini blong olgeta; i gat ol yangfala we oli gat plante paoa, oli spenem ful dei long skul; i gat ol olfala we oli no strong tumas, oli harem nogud long bodi blong olgeta; i gat ol wido wetem ol pikinini blong olgeta we oli gat strong tingting; mo i gat ol man we tingting blong olgeta i foldaon, oli nidim help.

Ol Witnes blong Jeova ya oli yusum plante defren rod blong kam long ol miting​—sam long olgeta oli tekem ol tren we oli spid, be sam narafala oli kam long ol dongki; sam long olgeta oli pas long ol smol tren aninit long graon we oli fasfas wetem man, be sam narafala oli kam we oli hivap long wan kameong. Sam brata oli mas krosem ol reva we i gat fulap krokodael long hem, be long ol bigfala taon sam narafala oli mas draevem trak long medel blong plante trak we oli fasfas tumas. ?From wanem olgeta man ya oli traehad blong kam long ol miting?

Faswan risen we i pulum olgeta blong kam long ol Kristin miting, hemia se miting hem i wan impoten rod blong wosipim Jeova God. (Hibrus 13:15) Aposol Pol i tokbaot wan narafala risen i se: “I gud yumi stap tingbaot yumi, blong yumi givgivhan long yumi blong mekem yumi strong moa long lav mo long ol gudfala wok. Yumi no mas lego fasin blong joen tugeta wanples . . . oltaem yumi mas toktok gud long yumi blong leftemap tingting blong yumi. Samting ya, yufala i mas mekem moa, taem yufala i luk we dei ya i kam klosap finis.” (Hibrus 10:​24, 25, NW ) Long vas ya Pol i soem semfala filing olsem Deved we i raetem sing ya long Ol Sam i se: “Taem ol man oli talem long mi se, ‘Yumi go long haos blong Hae God,’ mi mi glad tumas.”​—Ol Sam 122:1.

?From wanem ol Kristin oli glad blong kam long ol miting? From we oli no kam blong sidaon nomo. Long ol miting oli gat janis blong savegud ol narafala brata mo sista. Be tu, oli no jes kam blong kasem sam samting, be long ol miting nao oli gat janis blong givim samting long ol narafala, blong pulum evriwan blong soem lav mo mekem gudfala wok. Ol miting olsemia oli rili leftemap tingting. Mo tu, Kristin miting i wan rod we Jisas i yusum blong holem promes blong hem se:  ‘Yufala i kam long mi, nao bambae mi mekem we yufala i spel gud.’​—Matiu 11:28.

Wan Gudfala Ples Blong Leftemap Tingting Mo Kea

Ol Witnes blong Jeova oli gat gudfala risen blong ting se miting blong olgeta i leftemap tingting. Wan risen se long olgeta miting, “slef we i stret mo waes” nao i stap givim kakae long stret taem blong hem. (Matiu 24:​45, NW ) Mo tu, ol miting oli givhan long olgeta man blong wok blong Jeova, blong oli gat gudhan mo oli wokhad blong tijim Tok blong God. Antap long samting ya, long Haos Kingdom yumi save faenem ol trufala fren we oli gat lav, we oli rili kea long narafala, mo we oli wantem tumas blong halpem mo givhan long olgeta we oli harem nogud.​—2 Korin 7:​5-7.

Hemia ekspiriens blong Phillis, wan wido we i lusum man blong hem taem tufala pikinini blong hem oli gat faef mo eit yia. Hem i tokbaot ol gudfala frut we hem mo tufala yangfala blong hem oli kasem taem oli go long ol Kristin miting, i se: “Mifala i rili haremgud taem mifala i go long Haos Kingdom, from we oltaem, ol narafala man blong bilif oli keagud long mifala mo oli soem lav blong olgeta taem oli holem mifala, oli tokbaot wan tingting we i kamaot long Baebol, no oli putum han blong olgeta i goraon long mifala. Oltaem mi wantem stap long ples ya.”​—1 Tesalonaeka 5:​14.

Marie i sik bigwan, nao dokta i katem hem mo i talem se hem i mas wet sikis wik blong hem i kamgud bakegen. Be long ol wik ya, Marie i no save go long ol miting. Dokta blong hem i luk we Marie i no hapi olsem fastaem. Taem dokta i luksave we Marie i no moa go long ol miting, hem i leftemap tingting blong Marie blong go long ol miting ya. Be Marie i ansa se man blong hem i no gat sem bilif olsem hem, taswe bambae hem i no letem Marie i go long ol miting, from we hem i ting se maet samting ya i denja long helt blong Marie. Ale, from samting ya nao, dokta i raetem wan pepa we i “givim oda” long Marie blong go long Haos Kingdom blong joen wetem gudfala kampani we i save mekem hem i kam strong moa. Marie i talem se: “Afta we mi go long faswan miting, mi mi harem gud tumas. !Mi stat kakae, mi slip ful naet, mi no tekem plante meresin olsem bifo, mo mi stat smael bakegen!”​—Ol Proveb 16:24.

Olgeta we oli no Witnes oli makemgud lav we i stap long ol Kristin miting. Wan studen we i stap go long kolej, i jusum blong lukluk moa long saed blong ol Witnes blong Jeova, from we hem i wantem raetem wan pepa long kos blong hem we i stadi long ol defren kalja. Long pepa blong hem, hem i tokbaot filing we hem i harem long ol miting, i se: “Mi sapraes blong luk we . . . oli glad tumas blong welkamem mi. . . . Ol Witnes blong Jeova oli frengud, hemia wan namba wan fasin blong olgeta, mo mi ting se naes fasin ya i stamba fasin we i kamaot long medel blong olgeta.”​—1 Korin 14:25.

Long wol ya we i trabol tumas, Kristin kongregesen i wan nambawan ples blong stap long hem. Hem i wan gudfala ples we i gat pis mo lav long hem. Sipos yu go long ol miting, bambae yu haremsave we man blong raetem Sam ya i talem trutok taem hem i se: “!Olgeta! I gud tumas taem ol man blong God oli stap wanples, we oli gat wan tingting nomo. Fasin ya i gud tumas.”​—Ol Sam 133:​1.

[Bokis blong pija long pej 25]

FULUMAP WAN SPESEL NID

?Olsem wanem olgeta we sora blong olgeta i fas, oli save haremgud from ol Kristin miting? Raon long wol, ol Witnes blong Jeova oli wokem sam kongregesen we ol man oli toktok wetem han. Long Yunaeted Stet, long ol 13 yia we oli pas, oli stanemap 27 kongregesen wetem 43 grup blong ol man we oli toktok wetem han. Long klosap 40 narafala kantri, i gat raonabaot 140 kongregesen blong ol man we oli toktok wetem han. Oli tanem sam Kristin buk i go long video we i soem ol man we oli toktok wetem han long 13 defren lanwis.

Olgeta we sora blong olgeta i fas, oli gat janis blong presem Jeova long Kristin kongregesen. Odile, we bifo hem i wan Katolik long Franis, hem i wan woman we i stap harem nogud we i harem nogud, tingting blong hem i foldaon olgeta mo hem i wantem kilim hem wan i ded. Hem i tangkiu tumas long ol Kristin miting, from gudfala tijing blong Baebol we hem i bin kasem. Hem i se: “Mi kasembak gudfala helt mo mi hapi blong stap laef. Be antap long samting ya, mi faenem trutok. Naoia, laef blong mi i rili gat mining.”