Yu Save Winim Nogud Filing Se Yu No Gat Fren

?IGAT man i save talem se hem i neva bin harem nogud from we hem i no gat fren? Plante defren samting oli save mekem we yumi harem se yumi no gat fren. Be filing ya i strong moa long ol woman we oli neva mared, no ol woman we oli wido no we oli divos long man blong olgeta.

Wan eksampol, wan yangfala Kristin woman we nem blong hem Frances, i talem se: “Taem mi kasem 23 yia, i luk olsem we olgeta fren blong mi oli mared finis, be mi mi stap mi wan.” * Taem ol yia oli pas mo i no moa gat plante janis blong mared, nogud filing ya i save kam moawas. Sandra, we i gat bitim 40 yia finis, i talem se: “Mi neva gat tingting blong no mared, mo sipos mi gat janis bambae mi glad blong mared.” Angela i gat raonabaot 50 yia, hem i talem se: “Mi no tekem disisen we bambae mi no mared, be hemia i hapen nomo long laef blong mi. Long eria ya we mi go blong mekem wok blong spesel paenia, i no gat plante brata i stap we oli no mared.”

I gud tumas we plante Kristin woman oli jus blong no mared from we oli strong blong folem advaes blong Jeova blong mared nomo long wan “man blong Masta blong yumi.” (1 Korin 7:​39) I gat sam woman we oli lan isi nomo blong stap we oli no mared. Be i gat sam woman we tingting blong mared mo gat pikinini i kam antap moa taem ol yia oli pas. Sandra i talem se: “Oltaem, mi harem se laef blong mi i emti, from we mi no mared.”

I gat sam narafala samting we oli save mekem wan woman i harem nogud tumas from we hem i no gat fren. Eksampol sipos hem i mas lukaot long olfala papa mama blong hem. Sandra i talem se: “Famle blong mi i ting se i stret we mi mi lukaot long olfala papa mama blong mifala, from we mi mi no mared. Nating se papa mama blong mi oli gat sikis pikinini evriwan, be blong 20 yia mi nao mi mekem bighaf blong wok ya blong lukaot long tufala. Sipos mi bin mared, laef blong mi i isi moa, from we man blong mi i save sapotem mi.”

Frances i tokbaot wan narafala samting we i mekem i had moa blong winim filing ya blong no gat fren. Hem i talem se: “Samtaem, samfala oli askem long mi se, ‘?From wanem yu no mared?’ Ol tok ya oli mekem mi mi harem se hemia fol blong mi sipos mi no mared. Klosap evri taem we mi go long wan mared, i gat wan man we i mas askem kwestin ya long mi we mi fraet long hem, se: ‘?Be wetaem bambae yu yu mared?’ Nao mi stat tingting se, ‘Sipos i no gat wan brata we i strong long saed blong spirit we i intres long mi, maet i minim se mi no gat naf gudfala Kristin fasin, no maet mi no naes.’ ”

?Olsem wanem ol woman ya oli save winim nogud filing ya se oli stap olgeta nomo mo oli no gat fren? ?Mo olsem wanem ol narafala oli save givhan long olgeta?

Trastem Jeova

Man blong raetem Sam i talem se: “Yufala i mas putum ol trabol [“baden,” NW ] blong yufala long  Hae God, nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Long Hibru lanwis, stret mining blong tok ya “baden” hemia se “haf we i blong yu.” Tok ya i minim ol wok we yu mas mekem mo ol wari we oli stap mekem yu yu safa from ol samting we oli haf blong laef blong yu. Jeova i savegud wanem ol baden we yumi stap karem, mo hem i save givim paoa long yumi blong yumi gohed, nomata long ol baden ya. Angela i trastem Jeova, mo fasin ya i givhan long hem blong faet agensem nogud filing ya se hem i no gat fren. Hem i tokbaot fultaem wok blong prij blong hem, i se: “Taem mi statem wok blong paenia, mi mo gel ya we i paenia wetem mi, mitufala i laef longwe long kongregesen. Mitufala i lanem blong trastem Jeova fulwan, mo fasin ya i rili givhan long mi long laef blong mi. Taem mi stat tingting long ol samting we oli save spolem mi, mi toktok long Jeova mo hem i halpem mi. Mi laekem tumas Ol Sam 23 from we hem i leftemap tingting, mo mi ridim hem plante taem.”

I gud blong makem we aposol Pol i gat wan baden we hem i mas karem. Samwe long tri taem, hem i ‘askem long Masta blong i tekemaot’ baden ya. God i no mekem wan merikel blong halpem Pol. Be Pol i kasem wan promes se bambae God i givhan long hem long gladhat blong hem, blong mekem we hem i gat paoa. (2 Korin 12:​7-9) Mo tu, Pol i lanem fasin blong stap glad long samting we hem i gat. Biaen hem i raetem se: “Long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating. Mi save mekem evri samting, long paoa blong Kraes ya we i stap mekem mi mi strong.”​—Filipae 4:​12, 13.

?Olsem wanem blong kasem paoa blong God taem tingting i foldaon no i harem nogud from filing ya blong no gat fren? Pol i raetem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:​6, 7) Sandra i mekem advaes ya i wok long laef blong hem. Hem i eksplenem se: “From we mi no mared, plante taem mi stap mi wan. Hemia i givim janis long mi blong mi prea long Jeova. Mi harem se mi rili stap klosap long hem, mo mi no fraet blong storian wetem hem long saed blong ol problem mo ol glad blong mi.” Mo Frances i talem se: “Sipos mi trastem mi wan, i had we i had tumas blong winim ol tingting we oli save spolem mi. Be sipos mi talemaot olgeta filing blong mi long Jeova, fasin ya i givhan plante. Mi savegud we Jeova i intres long eni samting we i save spolem mi long saed blong spirit no long saed blong filing tu.”​—1 Timoti 5:5.

“Gohed Blong Givgivhan Long Yufala, Blong Karem Ol Baden Blong Yufala”

Long kampani ya blong ol Kristin brata sista, yu no save karem baden blong yu, yu wan. Pol i givim advaes se: “Yufala i mas gohed blong givgivhan long yufala, blong karem ol baden blong yufala. Long fasin ya, bambae yufala i save mekem ol samting we loa blong Kraes i talem.” (Galesia 6:2, NW ) Taem yumi joen wetem ol narafala Kristin, yumi save kasem “gudfala tok” ya we i leftemap tingting mo mekem we baden ya blong stap yu wan i no hevi tumas.​—Ol Proveb 12:25.

Mo tu, makem wanem we Baebol i talem long saed blong gel blong Jeftaha, wan Jaj blong Isrel. Bifo we Jeftaha i winim ami blong ol man Amon we oli enemi blong hem, hem i mekem wan strong promes long Jeova se faswan man we bambae i kamaot long haos blong hem blong mitim hem, bambae hem i givim man ya i go long Jeova olsem wan presen. Be faswan we i kamaot blong mitim hem, hemia gel blong hem. (Jajes 11:​30, 31, 34-36) Blong holem promes ya, i minim se gel blong Jeftaha bambae i neva mared, mo hem i neva gat pikinini. Nating se i olsem, gel blong Jeftaha i rere blong obei long strong promes ya, mo hem i wok long haos prea long Silo long ful laef blong hem. ?Ol narafala oli fogetem sakrefaes ya? Nogat. “Evri yia, fo dei long wan yia, ol gel blong Isrel oli go talem ol gudfala toktok long dota blong man Gilead ya Jeftaha.” (Jajes 11:​40, NW ) Yes, ol gudfala tok oli save leftemap tingting blong wan man. Taswe, i gud we yumi talem ol gudfala tok long olgeta we oli stret blong kasem ol tok olsem.

Tingbaot eksampol blong Jisas tu. Nating se long kastom blong ol man Jiu wan man i no save storian wetem wan woman, be Jisas i spenem taem wetem Meri mo Mata. I luk olsem we tufala woman ya i  wido, no maet tufala i no mared. Jisas i wantem se tufala woman ya i haremgud long saed blong spirit, from we tufala i kampani wetem hem. (Luk 10:​38-​42) Yumi save folem eksampol blong Jisas sipos yumi singaot ol sista blong yumi we oli no mared oli kam long haos blong yumi, no sipos yumi mekem plan blong go prij wetem olgeta. (Rom 12:13) ?Ol sista ya oli gat tangkiu from fasin ya? Wan sista i talem se: “Mi save se ol brata sista oli oli laekem mi mo oli intres long mi, be mi tangkiu long olgeta taem oli soem se oli rili kea long mi.”

Sandra i eksplenem se: “From we mifala no gat prapa famle blong mifala, mifala i nidim moa blong harem se ol narafala oli lavem mifala, mo blong harem se mifala i wan haf blong bigfala famle blong ol brata sista.” I klia we Jeova i keagud long olgeta ya, mo yumi save folem eksampol blong hem sipos yumi mekem we oli harem kea mo lav blong yumi. (1 Pita 5:​6, 7) Jeova i lukluk taem we yumi mekem ol gudfala fasin ya, from we Baebol i talem se “hemia we i mekem i gud long man we i no gat nem, hem i letem Jeova i kaon long hem. Mo bambae God i givimbak fasin ya long hem bakegen.”​—Ol Proveb 19:​17, NW.

“Evri Man i Gat Wok Blong Hem”

Nating se ol narafala oli save givhan, mo help blong olgeta i save leftemap tingting, be “evri man i gat wok blong hem.” (Galesia 6:5) Be taem yumi karem baden ya blong no gat fren, yumi mas lukaot long sam denja. Wan eksampol, baden ya i save winim yumi sipos yumi letem filing blong yumi i bos long yumi. Be lav i save winim nogud filing ya. (1 Korin 13:​7, 8) Fasin blong givim mo serem samting wetem ol narafala hem i beswan rod blong faenem glad​—nating se yu mared no nogat. (Ol Wok 20:35) Wan sista we i bisi long wok blong paenia i talem se: “Mi no gat plante taem blong stap tingbaot se mi no gat fren. Taem mi gat wok blong mekem mo mi bisi, mi no harem se mi no gat fren.”

Mo tu yumi mas lukaotgud we nogud filing ya se yumi no gat fren i no pusum yumi blong lego waes fasin, mo kampani wetem ol nogud fren. !Eksampol, sore tumas sipos yumi wantem tumas blong mared, nao samting ya i blaenem yumi, yumi no moa luksave olgeta problem we oli kamaot sipos yumi mared long wan man we i no gat sem bilif olsem yumi mo antap moa, sipos yumi no folem gudfala advaes blong Baebol se yumi no mas karem wan yok olsem! (2 Korin 6:​14) Wan Kristin woman we i divos i talem se: “I gat wan samting we i moawas i bitim nogud filing se yumi no gat fren. Hemia taem yumi mared long wan man we i no stret long yumi.”

Sipos yumi no save stretem wan problem, ale yumi mas gohed nomo blong stanap strong tru long problem ya, maet blong smoltaem nomo. God i save halpem yumi blong yumi stanap strong nomata long nogud filing ya se yumi no gat fren. Taem yumi gohed blong mekem wok blong Jeova, i gud we yumi trastem hem se, wan dei bambae hem i givim olgeta samting we yumi nidim long rod we i beswan.​—Ol Sam 145:​16, NW.

[Futnot]

[Tok blong pija long pej 28]

Fasin blong givim mo serem samting wetem ol narafala i save winim nogud filing ya se yumi no gat fren