?Bilif i Kamaot From Fasin Blong Tingting Gud?

“Plante man oli folem wan skul from we oli no wantem yusum tingting blong olgeta.” Hemia toktok blong bos blong wan skul long Amerika we i stap trenem ol lida blong jos. Hem i talem bakegen se: “Oli talem se oli ‘bilif’ blong soemaot nomo se oli agri wetem evri samting.”

HEMIA i minim se bighaf blong ol man we oli talem se oli gat bilif oli no stap tingbaot from wanem oli bilif olsem, no sipos bilif blong olgeta i stanap long Baebol. From samting ya nao, plante man oli no wantem storian long saed blong skul.

Sore tumas, be taem ol man oli yusum ol pija blong mekem wosip mo talem bakegen ol prea baehat, samting ya tu i no pulum olgeta blong yusum tingting blong olgeta. Long tingting blong plante milian man long wol, skul i minim ol kastom olsem, wetem ol bigbigfala jos haos, ol windo we i gat ol naesfala pija long glas, mo miusik we i pulum tingting blong man. Sam skul oli talem se bilif blong olgeta i stanap long Baebol. Be taem oli talem se: ‘Bilif long Jisas mo hem bambae i sevem yu’ hemia i no pulum ol man blong oli stadi long Baebol. Sam skul oli prijimaot ol plan blong olgeta blong givhan long ol man long saed blong bodi nomo, no oli talemaot politik. ?Olgeta samting ya i karem wanem frut?

Wan man blong raetem ol buk long saed blong jos i tokbaot samting we i hapen long Not Amerika i se: “Ol skul we oli stap talem se oli Kristin . . . oli no go dip insaed long Baebol, [mo] ol man we oli stap long ol skul ya oli kasem smol tijing nomo.” Wan man we wok blong hem i blong goraon blong askem kwestin long ol man, i tokbaot Amerika se hem i “wan kantri we ol man blong hem oli no save Baebol nating.” Ating, ol toktok ya oli tru long saed blong ol narafala kantri tu we ol man oli stap talem se oli Kristin. Plante skul we oli no Kristin, olgeta tu oli no pulum ol man blong oli yusum tingting blong olgeta. Oli mekem ol man oli tingting moa long ol singsing, ol prea we oli talem baehat, mo ol defren kaen fasin blong tingting dip we oli joen wetem paoa blong ol spirit man, i bitim we oli tingting gud mo skelem ol samting.

Samting we i narakaen, hemia se, ol semfala man ya we oli no tingting gud long bilif blong olgeta, be oli tingting gud long ol narafala samting long laef. Tingbaot wan man we i wantem pem wan trak. Hem i tekem plante taem blong tingting gud mo lukluk olbaot. Be wan dei bambae oli sakem trak ya i go long doti nomo. Be semfala man ya i no tingting gud nating long skul, hem i talem nomo se: ‘Sipos papa mama blong mi oli laekem skul ya, mi tu mi laekem.’ ?Yu no ting se samting ya i narakaen?

Sipos yumi rili wantem mekem God i glad, yumi mas tingting gud blong luk sipos bilif we yumi gat long saed blong hem i tru no nogat. Aposol Pol i tokbaot sam man blong skul long taem blong hem we oli “wantem God tumas. . . . Be oli no save prapa rod blong faenem hem.” (Rom 10:2) Ol man olsem oli sem mak long wan  man we i wok had blong pentem haos blong narafala man, be i yusum ol kala we oli no stret, from we hem i no wantem lesin long samting we man blong haos i talem long hem. Maet man ya i glad long wok we hem i mekem. ?Be olsem wanem? ?Man blong haos bambae i glad?

?Long saed blong trufala wosip, God i glad long wanem samting? Baebol i givim ansa se: “Fasin blong prea olsem i gud tumas, mo i save mekem God ya we i sevem yumi i harem gud. God ya, hem i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:3, 4) Maet samfala oli harem se yumi no save faenem trutok ya long eni skul tede. Be tingbaot: ?sipos God i wantem se ol man oli save trutok, bambae hem i haedem long olgeta? Baebol i soemaot se nogat, i talem se: “Sipos yu girap, yu lukaot [God], bambae hem i glad blong tekem yu.”—1 Kronikel 28:9.

?Olsem wanem God i mekem ol man we oli rili lukaotem hem, oli save long hem? Nekis haf bambae i givim ansa.