?From Wanem Yumi Mas Baptaes?

“Yufala i mas go . . . blong pulum olgeta oli kam man blong mi. Mo yufala i mas baptaesem olgeta.”—MATIU 28:19.

1, 2. (a) ?Wanem samting we sam man oli mekem long saed blong baptaes? (b) ?Wanem kwestin we yumi mas askem long saed blong baptaes?

 KING CHARLEMAGNE hem i king blong wan laen blong Jemani. Long ol yia 775 kasem 777 K.T., hem i winim ol Saxon, wan narafala laen blong ol man Jemani, mo i fosem evriwan long laen ya blong oli tekem baptaes. John Lord, wan man blong stadi long saed blong histri, i raetem se: “Hem i fosem ol man ya blong tekem nem blong Kristin.” Hemia sem samting we Vladimir 1 i mekem. Vladimir 1 hem i wan rula blong ol man Rasia. Long 987 K.T. hem i maredem gel blong wan hae man we i blong Grik Otodoks Jos. Long taem ya nao, hem i tekem disisen se olgeta man we oli stap aninit long rul blong hem oli mas joenem “Kristin” skul. Hem i pasem wan oda we i talem se olgeta man blong hem oli mas baptaes, mo sipos samfala oli no agri, oli mas kilim olgeta i ded.

² ?Olsem wanem? ?I stret blong baptaesem man long fasin ya? ?Ol baptaes ya oli gat mining? ?Eni man nomo i save tekem baptaes?

?Baptaes i Olsem Wanem?

3, 4. ?From wanem fasin blong saksakem no kafsaedem smol wota long hed blong wan man hem i no trufala Kristin fasin blong baptaesem man?

³ Taem Charlemagne mo Vladimir 1 oli fosem ol man blong tekem baptaes, oli go agensem wanem we Tok blong God i talem. Tru ya, i no gat wan gudfala samting i save kamaot sipos yumi saksakem no kafsaedem smol wota long hed blong wan man, mo i no gat gudfala samting i save kamaot tu sipos yumi draonem man long wota bifo we yumi tijim hem long Baebol.

⁴ Tingbaot wanem i hapen taem Jisas blong Nasaret i go long Jon Baptaes long 29 K.T. Jon i stap baptaesem ol man long Jodan Reva. Ol man ya oli kam long hem from we oli wantem tekem baptaes. ?Jon i baptaesem olgeta olsem wanem? ?Hem i tekem wota blong reva ya mo i saksakem smol i go long hed blong olgeta? ?Wanem i hapen taem Jon i baptaesem Jisas? Matiu i raetem se afta we Jisas i baptaes hem i “kamaot long wota.” (Matiu 3:16) Yes, Jisas i godaon aninit long wota, hem i draon long Jodan Reva. Long sem fasin, man Itiopia ya we i soem bilif long Jisas, hem tu i tekem baptaes long “wan ples we i gat wota long hem.” I nidim ol ples olsem, from we taem Jisas mo ol disaepol blong hem oli baptaes, oli mas  draonem ful bodi blong olgeta long wota.—Ol Wok 8:36.

5. ?Ol faswan Kristin oli baptaesem man olsem wanem?

⁵ Ol Grik tok we yumi tanem se “baptaes,” no “baptaesem,” oli minim we man i draon, no i kavremap ful bodi blong hem long wota. Diksonari ya, Smith’s Bible Dictionary i talem se: “Yumi save talem se baptaes i sem mak nomo mo i karem stret mining blong draon fulwan long wota.” Sam man we oli tanem Baebol oli raetem nem blong Jon Baptaes se “Jon Blong Draonem Man.” (Matiu 3:1, Rotherham; Diaglott interlinear) Augustus Neander i raetem long buk blong hem (History of the Christian Religion and Church, During the Three First Centuries) se: “Baptaes we ol man oli mekem bifo, oli stap draonem ful bodi blong man long wota.” Wan narafala buk blong Franis (Larousse du XX^e Siècle—Paris, 1928) i talem se: “Ol faswan Kristin oli stap baptaesem man long eni ples we bigfala wota i stap long hem.” Mo New Catholic Encyclopedia i talem se: “I klia se ol man long faswan Kristin jos oli stap baptaesem man we oli draonem ful bodi blong hem long wota.” (1967, Buk 2, pej 56) Taswe, tede, wan man we i wantem tekem baptaes blong kam wan Witnes blong Jeova i draon fulwan long wota.

Wan Niufala Risen Blong Baptaes

6, 7. (a) ?Jon i baptaesem man blong mekem wanem? (b) ?Wanem niufala samting we ol man blong Jisas oli mas mekem bifo we oli tekem baptaes?

⁶ Baptaes we Jon i mekem i defren olgeta long baptaes we ol man blong Jisas oli mekem biaen. (Jon 4:1, 2) Ol man we oli kam long Jon blong tekem baptaes oli mekem olsem blong soemaot se oli tanem tingting blong olgeta from sin we oli mekem agensem Loa. * (Luk 3:3) Be baptaes we ol man blong Jisas oli mekem i joen wetem wan niufala samting. Long Pentekos 33 K.T., aposol Pita i talem long ol man we oli stap lesin long hem se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala.” (Ol Wok 2:37-41) Long ples ya, Pita i stap toktok long ol man Jiu mo ol proselaet. Nating se i olsem, hem i no tokbaot baptaes ya we i blong soemaot we man i tanem tingting blong hem from sin we hem i mekem agensem Loa. Mo tu, hem i no min se baptaes long nem blong Jisas i save wasemaot ol sin. Nogat.—Ol Wok 2:10.

⁷ Long taem ya, Pita i yusum faswan long ol “ki [ya] blong kingdom.” ?Ki ya i blong mekem wanem? Hem i blong openem rod long ol man blong oli kasem save ya se oli gat janis blong go long Kingdom blong heven. (Matiu 16:19, NW ) Ol man Jiu oli bin sakemaot Jisas, oli no bilif we hem i Mesaea. Taswe, naoia i gat wan niufala samting we i impoten tumas blong oli mekem sipos oli wantem askem mo kasem fogif blong God. Yes, oli mas tanem tingting blong olgeta mo soem bilif long Jisas. Oli soemaot long fes blong ol man se oli gat bilif ya taem oli draon, no baptaes, long wota long nem blong Jisas Kraes. Long rod ya oli soemaot se oli givim laef blong olgeta long God, tru long Kraes. Tede, olgeta man we oli wantem we God i glad long olgeta, oli mas soem se oli bilif long Jisas, givim laef blong olgeta i go long Jeova God, mo mekem Kristin baptaes olsem wan saen se laef blong olgeta i blong Haefala Masta Jeova.

I Impoten Blong Kasem Stret Save

8. ?From wanem i no olgeta man evriwan we oli save tekem Kristin baptaes?

⁸ I no olgeta man evriwan we oli save tekem Kristin baptaes. Jisas i givim oda long ol man blong hem i se: ‘Yufala i mas go . . . long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.’ (Matiu 28:19, 20) Bifo we man i baptaes hem i mas ‘kasem tijing blong folem olgeta tok ya we Jisas i givim finis long ol disaepol blong hem.’ Sipos wan man i no gat bilif we i stanap long stret save blong Tok blong God, ale narafala i fosem hem blong baptaes, baptaes blong hem i nating nomo mo i go agensem oda ya we Jisas i givim long ol man blong hem.—Hibrus 11:6.

9. ?I minim wanem blong baptaes “long nem blong Papa”?

⁹ ?I minim wanem blong baptaes “long nem blong Papa”? Hemia i min se man we i baptaes hem i luksave posisen mo paoa we i blong Papa blong yumi long heven. Yes, man ya i luksave se Jeova God hem i Wokem yumi, hem i “hae King blong olgeta ples long wol,” mo hem i Haefala Masta blong heven mo wol.—Ol Sam 83:18; Aesea 40:28; Ol Wok 4:24.

10. ?Baptaes ‘long nem blong Pikinini’ i minim wanem?

 ¹⁰ Man we i baptaes long ‘nem blong Pikinini’ i min se hem i luksave posisen mo paoa we Jisas i gat olsem wan Pikinini ya nomo blong God. (1 Jon 4:9) Olgeta we oli kasem mak blong baptaes oli agri se Jisas nao hem i man ya we God i givim blong bambae ‘laef blong hem i pem rod blong plante man oli go fri.’ (Matiu 20:28; 1 Timoti 2:5, 6) Mo tu, hemia we i baptaes i mas agri se God i leftemap Pikinini blong hem “i go antap olgeta.”—Filipae 2:8-11; Revelesen 19:16.

11. ?I minim wanem se man i baptaes long ‘nem blong tabu spirit’?

¹¹ ?Wanem mining blong baptaes ‘long nem blong tabu spirit’? Hemia i soem se man we i wantem baptaes hem i luksave se tabu spirit i paoa blong Jeova we hem i stap yusum long plante defren fasin blong mekem stamba tingting blong hem i kamtru. (Jenesis 1:2; 2 Samuel 23:1, 2; 2 Pita 1:21) Man we i kasem mak blong baptaes i luksave se tabu spirit i halpem hem blong kasem save ol “tingting blong God we man i no save faenemaot,” mo spirit ya nao i halpem hem blong mekem wok blong talemaot Kingdom, mo blong soemaot ol frut blong tabu spirit olsem “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.”— Korin 2:10; Galesia 5:22, 23, NW; Joel 2:28, 29.

I Impoten Blong Tanem Tingting From Sin Mo Joen Long Trufala Skul

12. ?Olsem wanem Kristin baptaes i joen wetem fasin blong tanem tingting from sin?

¹² Baptaes blong man hem i defren long baptaes blong Jisas we i no gat sin. Baptaes blong man hem i wan saen se God i agri long man ya, mo baptaes ya i laenap wetem fasin blong tanem tingting from sin. Taem yumi tanem tingting from sin, hemia i min se yumi rili sore, no yumi harem nogud, from samting we yumi mekem no samting we yumi no bin mekem. Long faswan handred yia, ol man Jiu we oli wantem mekem God i glad oli mas tanem tingting blong olgeta from ol sin we oli mekem agensem Kraes. (Ol Wok 3:11-19) Taem sam long ol Hiten man we oli stap long Korin oli bilif long Kraes, oli tanem tingting blong olgeta from ol sin olsem fasin blong slip olbaot, wosip long giaman god, stil, mo narafala nogud sin bakegen. From we oli tanem tingting blong olgeta, blad blong Jisas i “wasem” olgeta finis, oli klin mo i mekem olgeta oli “tabu” blong mekem wok blong God. Nao long nem blong Kraes mo from tabu spirit blong God, oli kam “stret man finis” long fes blong God. (1 Korin 6:9-11, NW ) Fasin blong tanem tingting i wan impoten samting blong mekem sipos yumi wantem gat wan tingting we i klin gud mo sipos yumi no wantem we tingting blong yumi i stikim yumi from sin.—1 Pita 3:21.

13. ?Man we i jenisim laef blong hem bifo long baptaes, i mekem wanem?

¹³ Yumi mas jenisim laef blong yumi bifo we yumi baptaes blong kam wan Witnes blong Jeova. Man we, long fulhat blong hem i tekem disisen blong folem Jisas Kraes, hem i mekem jus hem wan blong jenisim laef blong hem. Man olsem, i sakemaot eni rong fasin we hem i bin folem, mo i gat strong tingting blong mekem wanem we i stret long fes blong God. Tok we Hibru mo Grik lanwis i yusum long Baebol blong talem fasin ya blong jenisim laef i minim se wan man i tanraon no i lego rod we hem i stap folem. Aksin ya i soem se man i lego rong rod blong hem mo i tanraon blong folem God. (1 King 8:33, 34) Taem man i jenisim laef blong hem, hem i ‘mekem ol fasin ya we i save soemaot we hem i tanem tingting blong hem finis.’ (Ol Wok 26:20) Hemia i min se man ya i lego giaman wosip, i wokbaot folem ol loa blong God, mo i givim wosip i go fulwan long Jeova nomo. (Dutronome 30:2, 8-10; 1 Samuel 7:3) Fasin blong jenisim laef i karem jenis i kam long tingting, lukluk, mo fasin blong yumi. (Esikel 18:31) Yumi “tanraon” taem yumi lego ol nogud fasin we God i no laekem mo yumi kam niufala man.—Ol Wok 3:19, NW; Efesas 4:20-24; Kolosi 3:5-14.

I Impoten Blong Givim Laef Wetem Wan Hat We i Fulwan

14. ?Taem wan man blong Jisas i givim laef blong hem long God hemia i minim wanem?

¹⁴ Bifo we man i baptaes blong folem Jisas hem i mas givim laef blong hem i go long God. Givim laef i go long God i min se man i wantem yusum laef blong hem blong mekem tabu wok blong God. From we disisen ya i impoten tumas, yumi mas prea long Jeova blong talem long hem se yumi givim laef blong yumi i go long hem blong olwe. (Dutronome 5:9) Tru ya, yumi no givim laef blong yumi i go long wan wok no long wan man be long God hem wan.

15. ?From wanem man we i tekem baptaes i mas draon long wota?

¹⁵ Taem yumi givim laef blong yumi i go long God tru long Kraes, yumi soemaot se yumi gat strong tingting blong yusum laef blong yumi blong mekem wanem  we God i wantem, olsem we i stap long Baebol. Saen we i soemaot se wan man i givim laef blong hem long God, hemia baptaes we man i draon fulwan long wota. Hem i sem mak long baptaes we Jisas i mekem long Jodan Reva blong soemaot se hem i putum hem wan long han blong God, blong mekem ol samting we God i wantem. (Matiu 3:13) I gud blong makem se long impoten taem ya, Jisas i stap prea long God.—Luk 3:21, 22.

16. ?Taem yumi go blong wajem ol man oli tekem baptaes, wanem fasin we i stret blong mekem blong soemaot glad blong yumi?

¹⁶ Baptaes blong Jisas i wan taem blong glad be tu, hem i wan taem we i impoten tumas. Hemia i sem mak long baptaes blong ol Kristin tede. Taem ol man we oli givim laef blong olgeta i go long God oli soemaot samting ya long yumi, yumi glad tumas. Maet yumi soemaot glad blong yumi taem yumi klaphan long fasin we i soem respek from impoten taem ya, mo taem yumi talem sam gudfala toktok long olgeta. Be yumi mas lukaot long ol fasin olsem fasin blong singsingaot, wesil, no narafala fasin olsem. Ol fasin ya oli soemaot se yumi no stap tinghae long impoten taem ya we ol man oli soemaot bilif blong olgeta. Yumi mas soem glad blong yumi long fasin we i stret.

17, 18. ?Wanem i halpem ol elda blong luksave sipos wan man i naf blong tekem baptaes?

¹⁷ I no stret blong baptaesem ol bebi no blong fosem wan hip man we oli no gat save long Baebol blong oli tekem baptaes. Ol Witnes blong Jeova oli no fosem eni man blong baptaes. Oli no baptaesem man we laef blong hem i no laenap wetem wanem we Baebol i talem. Taem we man i no baptaes yet mo i wantem joen long wok blong talemaot gud nius, be ol Kristin elda oli meksua se man ya i kasem save ol stamba tijing blong Baebol mo i folem ol tijing ya finis long laef blong hem. Oli wantem luksave sipos man ya i sua fulwan taem hem i ansa long kwestin olsem se, “?Yu yu rili wantem kam wan Witnes blong Jeova?”

¹⁸ Taem wan man we i tinghae long wok blong talemaot Kingdom i wantem tekem baptaes, klosap oltaem, ol elda oli storian wetem hem. Storian ya i blong meksua se hem i wan man blong bilif we i givim laef blong hem i go long Jeova mo i kasem mak finis blong i save tekem baptaes. (Ol Wok 4:4; 18:8) I gat bitim 100 kwestin long saed blong ol tijing blong Baebol we ol elda oli save askem long wan man blong traem luksave sipos hem i kasem ol mak we Baebol i givim blong tekem baptaes no nogat. I gat sam man we oli no naf yet, mo from samting ya oli no save tekem Kristin baptaes.

?I Gat Wan Samting We i Blokem Yu?

19. ?Folem Jon 6:44, hu bambae i joen wetem Kraes blong rul long Kingdom?

¹⁹ Plante skul oli pulum ol hip man blong tekem baptaes from we oli talem se long rod ya nao bambae oli save go long heven taem oli ded. Be Jisas i tokbaot ol man we oli biaenem hem, i se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Jeova i pulum 144,000 man nomo oli kam long Kraes blong rul wetem hem long Kingdom blong heven. Taswe, fasin ya blong fosem man blong baptaes i no save mekem wan man i naf blong tekem nambawan wok ya long plan blong God.—Rom 8:14-17; 2 Tesalonaeka 2:13; Revelesen 14:1.

20. ?Wanem i save halpem olgeta ya we oli no tekem baptaes yet?

²⁰ Be i stat long medel blong ol yia 1930, ol “narafala sipsip” blong Jisas oli stat kam antap bigwan. Olgeta ya oli gat hop blong sef long taem blong “bigfala trabol” mo stap long wol ya blong olwe. (Revelesen 7:9, 14; Jon 10:16) Olgeta ya oli naf blong baptaes from we oli mekem laef blong olgeta i laenap wetem Tok blong God mo oli lavem hem long ‘olgeta hat, olgeta laef, olgeta paoa mo olgeta tingting.’ (Luk 10:25-28) Samfala oli luksave finis se ol Witnes blong Jeova nomo oli stap mekem ‘wosip long God, long spirit mo long trutok.’ Be, oli no tekem disisen yet blong folem fasin blong Jisas mo tekem baptaes blong soem long ol man se oli lavem Jeova mo oli wosip long hem nomo. (Jon 4:23, 24; Dutronome 4:24; Mak 1:9-11) Maet ol prea we oli kamaot long hat mo we oli go stret  long impoten disisen ya oli save givhan long ol man olsem blong gat strong tingting blong mekem laef blong olgeta i laenap wetem Tok blong God. Nao oli save givim laef blong olgeta i go long Jeova God, mo tekem baptaes.

21, 22. ?From wanem samfala oli no givim laef blong olgeta long Jeova mo tekem baptaes?

²¹ Sam man oli no givim laef blong olgeta long God mo tekem baptaes from we oli bisi tumas long ol bisnes blong wol no oli stap wokhad tumas blong kasem mane, nao oli no gat taem blong lukluk moa long ol samting long saed blong spirit. (Matiu 13:22; 1 Jon 2:15-17) !Olgeta ya oli save glad bigwan sipos oli jenisim tingting blong olgeta mo traehad long ol samting long saed blong spirit! Sipos oli kam klosap moa long Jeova mo mekem wanem we hem i wantem, bambae oli kam rij long saed blong spirit, bambae oli no gat tumas wari, mo bambae oli gat pis mo stap glad wetem wanem we oli gat.—Ol Sam 16:11; 40:8; Ol Proveb 10:22; Filipae 4:6, 7.

²² Sam narafala oli talem se oli lavem Jeova be oli no givim laef blong olgeta long hem mo tekem baptaes from we oli ting se olsem nao bambae oli no gat kaon blong pembak long God. Be olgeta man evriwan bambae oli mas pembak kaon long God. Stat long taem we man i harem tok blong Jeova, hem i gat wan wok blong mekem. (Esikel 33:7-9; Rom 14:12) Ol man Isrel bifo oli ‘man blong God we hem i jusumaot’ olgeta finis, i min se olgeta man Isrel oli bon long wan nesen we i givim laef i go long Jeova finis mo from samting ya oli mas wosip long hem nomo mo folem olgeta loa blong hem. (Dutronome 7:6, 11) Tede, i no gat wan long yumi we i bon long wan nesen olsem hemia. Be, sipos yumi kasem stret tijing blong Baebol finis, yumi mas mekem wan disisen we i stanap long save ya mo bilif.

23, 24. ?Wanem samting we yumi no mas letem se oli mekem yumi fraet blong tekem baptaes?

²³ Maet samfala oli no tekem baptaes from we oli ting se oli no gat inaf save. Be yumi evriwan i gat fulap samting yet blong lanem from we “bambae olgeta man oli no save faenemaot olgeta wok we trufala God i mekem, long stat blong olgeta i go kasem en blong olgeta.” (Prija 3:11, NW ) Tingbaot haeman ya blong Itiopia. Hem i wan proselaet, mo i gat save long saed blong Baebol, be hem i no save ansa blong evri kwestin long saed blong stamba tingting blong God. Nating se i olsem, taem hem i lanem se Jeova i givim Jisas olsem wan ransom sakrefaes blong sevem ol man, wantaem nomo hem i tekem baptaes long wota.—Ol Wok 8:26-38.

²⁴ Sam man oli fraet blong givim laef blong olgeta long God from we oli ting se maet bambae oli no save holem promes blong olgeta. Monique we i gat 17 yia,  i talem se: “Mi stap tektaem blong mekem disisen blong baptaes from we mi fraet se bambae mi no save holemstrong long disisen ya.” Be, sipos yumi trastem Jeova long olgeta hat blong yumi, bambae hem i “soemaot stret rod long yu.” Bambae hem i halpem yumi blong stap olsem ol man blong hem oltaem mo ‘folem trutok.’—Ol Proveb 3:5, 6; 3 Jon 4.

25. ?Wanem kwestin we i impoten blong tingbaot?

²⁵ Evri yia i gat plante taosen man mo woman we oli wantem givim laef blong olgeta long God mo tekem baptaes from we oli trastem Jeova fulwan mo oli rili lavem hem. Mo i sua se olgeta man we oli givim laef blong olgeta finis blong mekem wok blong God, oli wantem stap man blong hem oltaem. Be, yumi stap long taem we laef i strong tumas, mo i gat plante samting we oli traem bilif blong yumi. (2 Timoti 3:1-5) ?Yumi save mekem wanem blong neva lego promes we yumi mekem long Jeova? Bambae yumi tokbaot samting ya long nekis stadi.

[Futnot]

?Yu Yu Tingbaot?

• ?Man i mas mekem Kristin baptaes olsem wanem?

• ?Wanem save we man i mas kasem bifo we hem i baptaes?

• ?Wanem samting we wan man i mas mekem blong tekem baptaes mo kam wan trufala Kristin?

• ?From wanem samfala oli no tekem baptaes, mo wanem i save halpem olgeta ya?

[Kwestin]

[Tok blong pija long pej 14]

?Yu yu save mining blong baptaes long ‘nem blong Papa, Pikinini, mo tabu spirit’?