God i Welkamem Olgeta Nesen

LONG faswan trep we John i mekem i go long Mali, hem i haremgud tumas from kaen fasin blong Mamadou mo famle blong hem, we oli glad blong tekem hem i kam long haos blong olgeta. Taem John i sidaon long graon mo i stap kakae wetem olgeta long wan dis nomo, hem i stap tingbaot wanem nao beswan rod blong serem sas presen ya wetem olgeta—hemia gud nius blong Kingdom we i kamaot long Tok blong God, Baebol. John i save toktok Franis, wan lanwis we ol man Mali oli stap yusum plante. Be John i stap tingbaot olsem wanem blong storian wetem wan famle we skul mo fasin blong tingting blong olgeta i defren long hem.

Yumi no sapraes we John i tingbaot stori blong Baebol long saed blong bigfala taon blong Babel. Long taon ya, God i mekem lanwis blong ol stronghed man i paspas. (Jenesis 11:1-9) Risal blong samting ya, se olbaot long evri ples blong wol i gat ol man we oli gat defren lanwis, skul, mo fasin blong tingting. Tede, ol man oli wokbaot i go long plante ples no oli muv i go long narafala kantri. From samting ya, plante long yumi i fesem wan traem, maet stret long ples blong yumi, we i sem mak long traem blong John. Hemia se: ?Olsem wanem blong serem hop blong Baebol wetem ol man we laef blong olgeta i defren long yumi?

Wan Eksampol Blong Bifo

Olsem ol narafala profet long Isrel, Jona i toktok long ol man Isrel. Hem i mekem wok olsem profet long taem we ol ten laen blong Isrel oli lego trufala wosip finis mo oli mekem ol nogud fasin we oli daonem nem blong God stret long fored blong ol man. (2 King 14:23-25) Be traem tingbaot filing blong Jona, taem hem i kasem spesel oda ya blong lego kantri blong hem mo go long Asiria blong prij long ol man Nineve. Skul mo kastom blong ol man ya i defren olgeta long ol man Isrel. Maet Jona i no gat save nating long lanwis blong olgeta, no maet hem i no save toktok gud lanwis ya. Nating se i olsem wanem, Jona i faenem se traem ya i bitim mak, nao hem i girap i ronwe.—Jona 1:1-3.

I klia se, Jona i nidim blong lan we Jeova God i no stap lukluk bodi blong man nomo, hem i lukluk wanem we i stap long hat blong man. (1 Samuel 16:7) Afta we Jeova i wokem merikel blong sevem laef blong Jona, hem i givim oda bakegen long Jona blong go prij long ol man Nineve. Jona i obei, mo from samting ya, olgeta man Nineve evriwan oli tanem tingting from sin blong olgeta. Nating se i olsem, Jona i holem wan rong tingting yet. Ale Jeova i tijim Jona long wan rod we i halpem hem blong jenisim tingting blong hem. Jeova i askem long Jona se: “?Mi no save sore long bigfala taon ya Nineve, we i gat bitim wan handred twanti taosen man long hem we oli no save nating se raet han blong olgeta i defren long lef han?” (Jona 4:5-11, NW ) ?Olsem wanem long yumi tede? ?Yumi save mekem wanem blong givhan long ol man blong narafala kantri?

 Welkamem Ol Man Sameria Mo Olgeta We Oli No Man Jiu

Long faswan handred yia, Jisas i givim oda long ol man blong hem blong pulum ol man blong olgeta ples long wol oli kam man blong hem. (Matiu 28:19) Wok ya i no isi blong mekem. Ol man blong Jisas oli man Jiu, mo olsem Jona, oli lan blong storian nomo wetem olgeta we oli kamaot long sem kantri mo kalja. Yumi no sapraes se nogud tingting we ol manples oli gat long saed blong man blong narafala nesen i gat paoa long olgeta long taem ya. Be, Jeova i lidim wok ya, ale sloslou oli luksave wanem nao God i wantem olgeta blong mekem.

Faswan samting, oli mas winim nogud tingting we ol man Jiu oli gat, hemia blong no laekem ol man Sameria. Man Jiu i no save toktok mo joen nating wetem man Sameria. Be, olsem sam vas blong Baebol oli soemaot, Jisas nao i mekem rod i rere blong ol man Sameria oli save akseptem mesej blong gud nius long fiuja. Hem i soemaot se hem i mekem i sem mak nomo long olgeta man, taem hem i storian wetem wan woman Sameria. (Jon 4:7-26) Wan narafala taem, Jisas i yusum wan parabol long saed blong kaengud fasin blong wan man Sameria. Long parabol ya, Jisas i tijim wan man Jiu we i strong long skul, se ol man blong narafala kantri tu oli save soemaot lav long ol man raonabaot long olgeta. (Luk 10:25-37) Long taem we Jeova i letem ol man Sameria oli kam haf blong Kristin kongregesen, Filip, Pita, mo Jon—we trifala i man Jiu—trifala nao i talemaot gud nius long olgeta. Mesej blong trifala i karem bigfala glad i kam long taon blong Sameria.—Ol Wok 8:4-8, 14-17.

Ol man Sameria mo ol man Jiu oli rili famle. Nating se i olsem, i no isi blong man Jiu i lavem man Sameria. Taswe, ating i had moa long man Jiu blong soem lav long ol Hiten man. Oli no laekem nating ol Hiten man. Nating se i olsem, ded blong Jisas i karemaot fasin ya we i mekem ol Kristin man Jiu oli seraot long ol Hiten man. (Efesas 2:13, 14) Blong givhan long Pita blong akseptem niufala plan ya, Jeova i soem wan vison long hem. Long vison ya Jeova i talem se, “samting we mi God mi talem finis se i klin, yu no save talem se i no klin.” Nao spirit blong Jeova i lidim Pita i go long wan Hiten man, we nem blong hem Konilias. Pita i kasem tingting blong Jeova se hem i no mas talem we man ya i no klin from we God i talem finis se hem i klin. Ale, tabu spirit i pusum hem blong talem se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:9-35) !Pita i sapraes blong luk we tabu spirit i kamdaon long Konilias mo famle blong hem, blong soem se God i agri long olgeta!

God i Jusum Pol Blong Prij Long Ol Man We Oli No Man Jiu

Jeova i wok sloslou nomo blong rerem ol man blong hem blong lavem mo halpem olkaen man. Samting ya i klia long wok blong prij we Pol i mekem. Long taem we Pol i kam Kristin, Jisas i talem se bambae Pol i talemaot nem blong Hem long ol man we oli no man Jiu. (Ol Wok 9:15) Biaen, Pol i go long Arebia, maet blong tingting dip long wok ya we God i givim long hem blong talemaot  gud nius long ol man we oli no man Jiu.—Galesia 1:15-17.

Long faswan misinari trep we Pol i mekem, hem i soem strong tingting blong prij long olgeta we oli no man Jiu. (Ol Wok 13:46-48) Jeova i blesem wok blong Pol mo samting ya i soemaot se Pol i folemgud plan blong Jeova. Pol i soem klia se hem i kasem tingting blong Jeova, taem hem i no fraet blong stretem Pita, we i no bin mekem i sem mak long ol brata blong hem taem hem i no wantem kakae wetem olgeta we oli no man Jiu.—Galesia 2:11-14.

Long seken misinari trep blong Pol yumi save luk wan narafala pruf blong soem se God i stap lidim wok blong hem. Tabu spirit i blokem Pol blong no prij long Bitinia, wan provins blong Rom. (Ol Wok 16:7) I luk olsem se long taem ya i no stret taem blong prij long olgeta. Be biaen, sam long ol man Bitinia oli kam Kristin. (1 Pita 1:1) Long wan vison, wan man Masedonia i askem long Pol se: “Plis yu kamkros long Masedonia, yu givhan long mifala.” Pol i haremsave se hem i mas jenisim rod we hem i stap folem, mo go talemaot gud nius long provins ya blong Rom.—Ol Wok 16:9, 10.

Taem Pol i prij long Atens hem i kasem wan traem. Loa blong ol man Gris mo Rom i talem se i tabu blong tokbaot narafala god mo niufala kastom long saed blong skul. Pol i mas jenisim fasin blong hem blong prij mo mekem i laenap wetem ples ya. From we hem i lavem tumas ol man, hem i tingtinggud long fasin blong wosip blong olgeta. Hem i faenem wan ples blong wosip long Atens, we oli raetem tok ya long hem se, “Hemia ples blong wosip long wan god we mifala i no save hem.” Ale Pol i tokbaot samting ya taem hem i prij long olgeta. (Ol Wok 17:22, 23) !Hemia wan nambawan rod we hem i yusum blong statem storian, mo i soem kaen fasin mo respek long olgeta!

!Ating Pol i haremgud taem hem i tingtingbak long ol frut we i kamaot from wok blong hem olsem wan aposol long ol man we oli no Jiu! Long Korin, Filipae, Tesalonaeka, mo ol taon long Galesia, hem i givhan blong stanemap ol kongregesen blong ol Kristin we oli no man Jiu. Hem i givhan long ol man mo woman blong bilif, olsem Damaris, Denis, Sejas Polas, mo Taetas. !Hemia wan nambawan blesing blong luk se ol man we bifo oli no gat save long Jeova no Baebol oli akseptem trutok blong Kristin skul! Pol i tokbaot wok ya blong halpem ol man we oli no Jiu blong oli kasem save long trutok, i se: “Oltaem mi wantem talemaot gud nius ya  long ol ples we ol man oli no harem nem blong Kraes yet. . . . Hemia i olsem tok blong Baebol we i talem se, ‘Ol man ya we i no gat man i kam talemaot nius blong hem long olgeta, bambae oli luk hem. Mo olgeta ya we oli no harem nius blong hem yet, bambae oli haremsave.’ ” (Rom 15:20, 21) ?Yumi save joen long wok blong talemaot gud nius long ol man we oli no blong sem kantri olsem yumi?

Halpem Olgeta Man Long Wol

Solomon i prea long Jeova long saed blong ol man blong narafala kantri we bambae oli kam wosip long tempol long Jerusalem. Hem i askem se: “Nating we yu yu stap long hom blong yu long heven, be plis yu harem prea blong hem. Sipos man olsem i kam long yu, plis yu mekem ol samting we hem bambae i askem long yu, blong bambae olgeta man long wol oli save yu.” (1 King 8:41-43) Plante taosen man tede, we oli talemaot gud nius blong Kingdom long plante kantri, oli talem bakegen ol semfala tok ya. Oli faenem ol man we oli olsem ol man Nineve long saed blong spirit we “oli no save wanem i gud mo wanem i nogud.” Mo ol man blong talemaot gud nius oli glad blong joen blong mekem ol profet tok oli kamtru mo hivimap ol trufala man blong wosip we oli kamaot long plante defren kantri.—Aesea 2:2, 3; Maeka 4:1-3.

Plante man we oli akseptem mesej blong hop we i stap long Baebol, oli kamaot long Krisendom. * Sam narafala bakegen oli gruap long ol narafala skul. ?Yumi tingbaot olgeta olsem wanem? Yumi no mas giaman long yumi wan. Sipos yumi luksave se fasin blong no laekem man blong narafala kantri i stap dip insaed long yumi, yumi mas lego fasin ya. Traehad blong wokem fasin blong lavem olgeta man. * Yumi no mas blokem ol man we God i glad blong tekem olgeta oli kam.—Jon 3:16.

Bifo we yu save storian wetem wan man blong narafala kantri, yu mas rerem tingting blong yu. Traem savegud long ol bilif, wari, mo fasin blong tingting blong hem. Biaen, tokbaot wan samting we yutufala i intres long hem. Soem kaengud fasin mo sore long hem. Traehad blong no rao. Rere oltaem blong jenisim fasin blong prij mo holem wan gudfala tingting. (Luk 9:52-56) Taem yu mekem olsem, bambae yu mekem Jeova i glad from we hem “i wantem sevem olgeta man, mo i wantem we olgeta man bambae oli save trutok blong hem.”—1 Timoti 2:4.

!Yumi glad tumas blong gat ol man long kongregesen blong yumi we oli kamaot long ol defren kantri blong wol! (Aesea 56:6, 7) Tede, yumi glad tumas blong harem ol nem olsem Mary, John, Stephen, mo Tom, mo tu ol nem olsem Mamadou, Jegan, Reza, mo Chan. Yes, ‘doa i open finis long yumi, blong yumi mekem wan gudfala wok we bambae i gat plante frut blong hem.’ (1 Korin 16:9) !From we Jeova i mekem i sem mak long olgeta man, i gud yumi tekem janis ya blong singaotem mo welkamem ol man blong olgeta ples long wol oli kam long God!

[Ol Futnot]

[Tok blong pija long pej 23]

Pol i rere blong jenisim fasin blong prij blong hem blong talemaot gud nius long ol man long olgeta ples olsem

. . . long Atens

. . . long Filipae

. . . taem hem i mekem ol trep