Gohed Long Wok Blong Jeova We Hat Blong Yu i Strong Long Hem
Gohed Long Wok Blong Jeova We Hat Blong Yu i Strong Long Hem
“God. !Oltaem tingting [“hat,” NW ] blong mi i stap strong long yu!”—OL SAM 57:7.
1. ?From wanem tingting blong yumi i save sua fulwan olsem Deved?
JEOVA i save mekem we yumi strong oltaem long Kristin bilif nao yumi naf blong holemtaet ol trufala Kristin fasin olsem ol man blong wok blong hem. (Rom 14:4) Taswe, tingting blong yumi i mas sua fulwan olsem Deved, taem hem i singsing se: “God. !Oltaem tingting [“hat,” NW ] blong mi i stap strong long yu!” (Ol Sam 108:1) Sipos hat blong yumi i stap strong long God, bambae yumi wantem holem promes we yumi mekem taem yumi givim laef blong yumi long hem. Mo sipos yumi lukluk i go long hem blong i lidim yumi mo givim paoa long yumi, bambae yumi stanap strong. Tingting mo bilif blong yumi bambae i stap strong oltaem. Bambae yumi man we i holem strong long God, we ‘oltaem yumi gat plante wok blong mekem long wok blong Masta.’—1 Korin 15:58, NW.
2, 3. ?Advaes we Pol i givim long 1 Korin 16:13, i tijim wanem long yumi?
2 Ol advaes we aposol Pol i sanem i go long ol man blong Jisas long Korin bifo, oli stret tu long ol Kristin tede. Olsem advaes ya se: “Wekapgud, stanap strong long bilif, gohed olsem strong man mo kasem paoa.” (1 Korin 16:13, NW ) Long Grik lanwis, ol tok we oli yusum blong talem wanwan long ol oda ya oli no minim samting we yumi mekem wan taem nomo, be oli yusum blong tokbaot samting we yumi mas gohed blong mekem oltaem. ?Advaes ya i wantem tijim yumi long wanem?
3 Yumi save “stap wekap” long saed blong spirit taem yumi agensem Devel Setan mo stap klosap long God. (Jemes 4:7, 8) Taem yumi dipen long Jeova, samting ya i halpem yumi blong yumi stap joengud oltaem mo blong ‘stanap strong long Kristin bilif’ blong yumi. Yumi—hemia i minim ol man wetem ol woman tu—yumi mas “gohed olsem strong man,” taem yumi no fraet blong mekem wok blong God blong talemaot Kingdom. (Ol Sam 68:11) Yumi “kasem paoa” taem yumi gohed oltaem blong lukluk i go long Papa blong yumi long heven blong hem i givim paoa long yumi blong mekem wok blong hem.—Filipae 4:13.
4. ?Wanem ol samting we yumi mas mekem bifo we yumi baptaes olsem wan Kristin?
4 Yumi soem se yumi agri wetem trutok taem yumi sua blong givim fulwan laef blong yumi long Jeova mo yumi soemaot disisen ya taem yumi baptaes long wota. ?Be wanem ol samting we yumi mekem bifo we yumi tekem baptaes? Fastaem yumi tekem stret save blong Tok blong God. (Jon 17:3) Save ya i mekem bilif blong yumi i kam strong moa, hem i pusum yumi blong tanem tingting blong yumi, mo soemaot se yumi rili sore from ol mastik we yumi mekem bifo. (Ol Wok 3:19; Hibrus 11:6) Biaen fasin blong yumi i jenis from we yumi tanem baksaed finis long ol fasin nogud mo mekem laef blong yumi i laenap wetem wanem we God i wantem. (Rom 12:2; Efesas 4:23, 24) Afta long hemia yumi prea long Jeova wetem fulhat blong yumi blong givim laef blong yumi i go long hem. (Matiu 16:24; 1 Pita 2:21) Yumi askem God blong i givim wan tingting we i klin gud long yumi, mo yumi baptaes blong soem se yumi givim laef blong yumi long hem. (1 Pita 3:21) I gud blong tingbaot olgeta samting ya we yumi bin mekem. Hemia i save halpem yumi blong traehad oltaem blong laef folem disisen we yumi mekem blong givim laef i go long Jeova mo gohed blong mekem wok blong hem we hat blong yumi i stap strong long hem.
Gohed Blong Lukaot Stret Save
5. ?From wanem yumi mas gohed blong tekem save blong Baebol?
5 Yes, yumi mas laef folem disisen we yumi mekem blong givim laef i go long Jeova. Be blong mekem olsem, yumi mas gohed blong kasem ol save blong Baebol we oli blong mekem bilif blong yumi i strong. !Taem yumi kasem trutok blong God fastaem, yumi glad tumas blong tekem ol kakae long saed blong spirit! (Matiu 24:45-47) Ol “kakae” ya oli gud tumas—mo oli bin fidim gud yumi long saed blong spirit. Naoia i impoten blong gohed blong tekem ol gudfala kakae ya. Ol kakae ya nao bambae oli givhan long yumi blong stap oltaem olsem ol man blong wok blong Jeova, we hat blong yumi i stap strong long hem.
6. ?Wanem samting we maet narafala i bin mekem we i halpem yu blong laekem trutok long fulhat blong yu?
6 Blong kasem moa save long Baebol, yumi mas traehad. I olsem we yumi stap lukaot wan sas samting we i haed—yumi mas wok had from. !Be plante gudfala frut i kamaot taem yumi faenem “save blong God”! (Ol Proveb 2:1-6, NW ) Taem wan man no woman blong talemaot Kingdom, i stadi Baebol wetem yu fastaem, maet hem i yusum buk ya Save Blong Lidim Yu Long Laef We i No Save Finis. Maet i tektaem blong flatem wanwan japta, mo long wan stadi maet yutufala i mekem haf nomo blong wan japta. Ol vas blong Baebol we yu ridim mo kasem mining blong olgeta, oli givhan bigwan long yu. Taem yu no klia long wan poen, hemia we i stadi Baebol wetem yu i eksplenem poen ya long yu. Hem i rerem gud stadi we bambae hem i mekem wetem yu, hem i prea blong askem tabu spirit blong God, mo i halpem yu blong yu laekem trutok long fulhat blong yu.
7. ?Wanem i mekem we wan man i naf blong tijim trutok blong God long narafala?
7 I stret we hemia we i stadi Baebol wetem yu i mekem traehad ya from we Pol i raetem se: “Olgeta we oli stap kasem ol tok blong tijim olgeta long Baebol, oli mas joen wetem hemia we i tijim olgeta blong mekem ol gudgudfala wok.” (Galesia 6:6, NW ) Long Grik lanwis, vas ya i min se hemia we i tij hem i planem ol tijing blong God long hat mo tingting blong hemia we i “stap kasem ol tok blong tijim” hem. Sipos yu kasem tijing olsemia, bambae yu kam wan tija we yu tu yu save tijim ol narafala. (Ol Wok 18:25) Be blong holem promes we yu mekem long God, yu mas gohed blong stadi long Tok blong God blong kasem paoa long saed blong spirit mo stanap strong oltaem.—1 Timoti 4:13; Taetas 1:13; 2:2.
Rimemba Taem We Yu Tanem Tingting Mo Jenisim Fasin Blong Yu
8. ?Wanem i save mekem we yumi naf blong holem fasin we God i glad long hem oltaem?
8 ?Yu yu tingbaot taem ya we yu lanem trutok, yu tanem tingting from sin blong yu, nao yu harem se God i fogivim yu from we yu bilif long ransom sakrefaes blong Jisas? Ating yu bin harem i gud tumas. (Ol Sam 32:1-5; Rom 5:8; 1 Pita 3:18) Ating yu no moa wantem gobak long laef blong sin we yu gat fastaem. (2 Pita 2:20-22) Fasin blong prea oltaem long Jeova i wan long ol samting we i save halpem yu blong holem ol fasin we God i glad long hem, blong laef folem promes we yu mekem long God, mo gohed blong mekem wok blong Jeova wetem bilif.—2 Pita 3:11, 12.
9. ?Afta we yu lego ol fasin blong sin finis, wanem rod we yu mas folem?
9 Afta we yu lego ol fasin blong sin mo yu jenisim laef blong yu, gohed blong lukaot help blong God blong mekem we hat blong yu i stap strong long hem oltaem. I olsem we yu stap folem wan rod we yu luksave se i rong, ale yu lukluk long map mo yu stat folem rod we i stret. I nogud yu lusum rod bakegen. Yu mas lukluk i go long God oltaem blong hem i lidim yu, mo gat strong tingting blong stap oltaem long rod ya we i go kasem laef.—Aesea 30:20, 21; Matiu 7:13, 14.
Neva Fogetem Taem We Yu Givim Laef Long God Mo Baptaes
10. ?Wanem samting we yumi mas tingbaot long saed blong disisen we yumi mekem blong givim laef i go long God?
10 Tingbaot oltaem se yu bin prea long Jeova blong givim laef blong yu long hem, we i min se bambae yu mekem wok blong hem blong olwe. (Jud 20, 21) Givim laef i go long God i min se yumi putum laef blong yumi i go wansaed, no yumi mekem i seraot long narafala samting, blong mekem wan spesel wok. (Levitikas 15:31; 22:2) Disisen we yu mekem blong givim laef blong yu i no olsem wan kontrak blong wan yia olsem, mo hem i no wan strong promes we yu mekem long ol man. Nogat. Yu yu givim laef blong yu i go long Haefala Masta blong Heven mo Wol, mo blong holem promes ya yu mas stap tru long God gogo kasem ded. Yes, ‘yumi laef, mo yumi ded, blong leftemap nem blong Jeova.’ (Rom 14:7, 8, NW ) Glad blong yumi i dipen long fasin blong obei long evri samting we hem i wantem yumi blong mekem mo gohed blong wok we hat blong yumi i stap strong long hem.
11. ?From wanem yu mas rimemba baptaes blong yu mo mining blong hem?
11 I gud we oltaem yu rimemba baptaes blong yu we hem i saen se yu givim laef blong yu long God wetem fulhat blong yu. I no gat man i fosem yu blong baptaes, yu tekem disisen ya yu wan. ?Olsem wanem naoia? ?Yu yu gat strong tingting blong mekem ol samting we yu yu wantem oli laenap wetem ol samting we God i wantem go kasem taem we yu ded? Yu prea finis long God blong askem hem blong givim wan tingting we i klingud mo yu tekem baptaes blong soemaot se yu givim laef blong yu long hem. Blong no lusum tingting ya we i klingud yu mas mekem samting we i laenap wetem disisen ya blong givim laef long God. Ale nao, ol nambawan blesing blong Jeova bambae oli kam stap wetem yu.—Ol Proveb 10:22.
Ol Samting We Yu Wantem Oli Save Gat Paoa Long Yu
12, 13. ?From wanem i impoten we yumi wan yumi jusum blong tekem disisen blong givim laef mo baptaes?
12 Plante milian man long wol oli kasem ol nambawan blesing from we oli bin givim laef long God mo tekem baptaes. Taem yumi tekem baptaes long wota blong soemaot we yumi givim laef long God, yumi lusum fasin blong laef we yumi gat bifo, be yumi no lusum paoa we yumi gat blong jusum samting we yumi wantem. Stret tijing we yumi kasem i mekem we yumi kam man blong bilif, nao yumi mekem prapa jus blong yumi, yumi prea long God blong givim laef blong yumi long hem mo tekem baptaes. Yes bifo we yumi givim laef long God mo tekem baptaes, yumi mas luksave wanem samting we God i wantem yumi blong mekem, mo biaen yumi mas jusum blong mekem samting ya. (Efesas 5:17) Long rod ya, yumi folem fasin blong Jisas. Hem i mekem prapa disisen blong hem blong lego wok blong kapenta, nao i tekem baptaes, mo i givim ful laef blong hem blong mekem wanem we Papa blong hem long heven i wantem.—Ol Sam 40:7, 8; Jon 6:38-40.
13 Long stamba tingting blong Jeova God, Pikinini blong hem bambae “i harem nogud long bodi blong hem, blong mekem hem i kam prapa man blong sevem man.” Taswe, Jisas i mas mekem prapa disisen blong hem blong wantem folem wanem we Papa blong hem i wantem, long rod ya nao, bambae hem i save stanap strong long hadtaem ya mo holem bilif. Blong mekem olsem, Jisas i “prea long God, i stap askem ol samting long hem, i stap krae bigwan, we wota blong ae blong hem i stap ron. . . . Mo from we tingting blong Kraes i stap daon, God i harem hem.” (Hibrus 2:10, 18; 5:7, 8) Sipos yumi soemaot sem kaen fasin ya blong stap daon long God, yumi save sua tu we God bambae i “harem” yumi. Mo yumi save sua we bambae Jeova i mekem yumi stanap strong olsem ol Witnes we oli givim laef i go long hem.—Aesea 43:10.
Yu Save Holem Wan Hat We i Stap Strong Long God
14. ?From wanem yumi mas ridim Baebol evri dei?
14 ?Wanem bambae i halpem yu blong holem wan hat we i stap strong oltaem mo laef folem disisen we yu mekem blong givim laef long God? Yumi wantem gru long save blong Tok blong God taswe yumi mas ridim Baebol evri dei. Hemia wan samting we oltaem “slef we i stret mo waes” i stap pusum yumi blong mekem. Grup ya i givim advaes ya long yumi from we yumi mas holem promes we yumi mekem taem yumi givim laef blong yumi long God, mo blong holem promes ya yumi mas gohed blong wokbaot long trutok blong God. Sipos ogenaesesen blong Jeova i stap tijim ol giaman tijing, bambae hem i neva talem long ol Witnes blong Jeova mo olgeta we oli prij long olgeta se oli mas ridim Baebol.
15. (a) ?Wanem samting we i gud blong tingbaot taem yumi mekem wan disisen? (b) ?From wanem yumi save talem se wok blong winim mane hem i namba tu wok blong wan Kristin?
15 Taem yu mekem ol disisen, yu mas tingbaot oltaem se olsem wanem ol disisen ya bambae oli gat paoa long promes we yu mekem blong givim ful laef blong yu long Jeova. Ol disisen ya maet oli laenap wetem wok blong yu. ?Yu yu stap traehad blong mekem we wok blong yu i no blokem yu blong gohed long trufala wosip? Plante man we oli wok wetem ol Witnes blong Jeova oli luksave se olgeta ya oli ol Kristin we man i save trastem olgeta mo oli wok strong. Be tu, oli makem we ol Witnes blong Jeova oli no bitim mak blong ronem ol samting blong wol mo oli no mekem kompetisin wetem ol narafala man blong traem kasem haeples. Hemia from we mak blong wan Witnes hem i no blong kasem mane, gudnem, haeples no paoa. Nogat. Impoten samting long tingting blong man we i traem laef folem promes we hem i mekem long God, hemia blong mekem wanem we God i wantem. Wok blong winim mane hem i olsem namba tu wok nomo long laef blong olgeta. Bigfala wok we oli mas mekem, olsem we aposol Pol i mekem, hemia Kristin wok blong prij. (Ol Wok 18:3, 4; 2 Tesalonaeka 3:7, 8; 1 Timoti 5:8) ?Yu yu putum ol wok blong Kingdom fasples long laef blong yu oltaem?—Matiu 6:25-33.
16. ?Yumi save mekem wanem sipos yumi stap letem wari i winim yumi, mekem se yumi faenem i had blong holem promes blong yumi long God?
16 Sam man klosap oli draon fulwan long ol wari blong laef bifo we oli save trutok. Be, hat blong olgeta i fulap long glad, fasin tangkiu mo lav long God taem oli bilif long gudfala fiuja we Kingdom bambae i karem i kam. Sipos oli tingting oltaem long ol blesing we oli bin kasem stat long taem ya, samting ya bambae i halpem olgeta blong holem promes we oli bin mekem long Jeova. ?Be, olsem wanem sipos oli wari tumas from sam problem we plante long yumi oli stap kasem from laef blong wol ya, mo i luk olsem se ol wari ya bambae oli blokem “tok blong God,” olsem ropnil we i blokem ol sid blong oli gru? (Luk 8:7, 11, 14; Matiu 13:22; Mak 4:18, 19) Sipos yu harem se samting ya i stat hapen long yu no famle blong yu, putum ol wari blong yu long Jeova mo prea se hem i halpem yu blong gat moa lav mo tangkiu long hem. Sipos yu putum ol trabol blong yu long hem, bambae hem i givim paoa long yu blong gohed blong mekem wok blong hem wetem glad mo wetem wan hat we i stap strong long hem oltaem.—Ol Sam 55:22; Filipae 4:6, 7; Revelesen 2:4.
17. ?Olsem wanem yumi save kam naf blong stanap strong long taem blong traem?
17 Gohed blong prea long Jeova God evri dei, olsem taem we yu prea blong givim laef blong yu long hem. (Ol Sam 65:2) Taem ol traem oli kasem yu blong pulum yu blong mekem i no stret, no taem yu gotru long wan hadtaem, lukaot God blong hem i lidim yu mo givhan long yu blong folem wanem we hem i talem. No fogetem se yu nidim bilif, from we disaepol Jemes i raetem se: “Sipos wan long yufala i no gat waes [blong winim wan traem], hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem. Be taem yufala i prea, yufala i mas bilif tru, we tingting blong yufala i no hafhaf, from we man we tingting blong hem i hafhaf, hem i olsem wef blong solwota, we win i blu long hem, i mekem i go olbaot. Man we tingting blong hem i hafhaf olsem, we oltaem hem i stap tingbaot blong go long tu rod, i nogud hem i ting se bambae i save kasem sam samting long Masta blong yumi.” (Jemes 1:5-8) Taem i luk olsem se wan traem i bigwan tumas, yumi mas sua long samting ya se: “Ol samting ya we oli stap traem yumi, oli sem mak nomo long ol samting we oli stap traem ol narafala man. Be God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.”—1 Korin 10:13.
18. ?Yumi save mekem wanem sipos wan sin we yumi haedem i stap mekem we yumi no moa strong blong holem promes we yumi mekem long Jeova?
18 ?Olsem wanem sipos yu mekem wan sin, mo yu haedem sin ya, be naoia yu stap harem we tingting blong yu i stikim yu mo yu no moa strong blong laef folem promes we yu mekem long God? Sipos yu rili tanem tingting blong yu from sin ya, bambae yu save harem gud bakegen blong tingbaot se Jeova bambae i “no save tanem baksaed long man we i tanem tingting blong hem mo i putum hem i stap daon.” (Ol Sam 51:17) Lukaot help blong ol Kristin elda we oli gat lav. Yu save se olgeta ya oli traem folem fasin blong Jeova taswe bambae oli no ting nating long traehad we yu mekem blong kasembak wan gudfala fasin fren wetem Papa blong yu long heven. (Ol Sam 103:10-14; Jemes 5:13-15) Ale, taem yu kasembak paoa long saed blong spirit, mo hat blong yu i stap strong bakegen long God, bambae yu naf blong wokbaot long gudfala rod mo mekem laef blong yu i laenap wetem promes we yu mekem long God.—Hibrus 12:12, 13.
Gohed Blong Wok Wetem Wan Hat We i Strong Long God
19, 20. ?From wanem i impoten tumas blong gohed oltaem blong laef folem promes we yumi mekem long God?
19 Long laef naoia we i strong tumas, yumi mas wokhad blong laef folem promes blong yumi mo gohed blong mekem wok blong God we hat blong yumi i strong long hem oltaem. Jisas i talem se: “Man we i stanap strong gogo olgeta samting ya i finis, bambae God i sevem hem.” (Matiu 24:13) From we yumi stap laef long ol “las dei,” i min se en blong wol i save kam eni taem. (2 Timoti 3:1, NW ) Mo tu, i no gat wan long yumi we i save se bambae hem i laef yet tumora no nogat. (Jemes 4:13, 14) !Taswe i impoten we, tede, yumi mekem laef blong yumi i laenap wetem promes blong yumi!
20 Aposol Pita i makemgud poen ya long seken leta blong hem. Hem i tokbaot ol man we oli ded taem Bigfala Wota i ron from we oli no wantem obei long God. Mo hem i talem se sem samting bambae i hapen long ol rabis man we oli laef long wol tede, olgeta tu bambae oli lus long bigfala “dei blong Jeova.” Taswe Pita i talem se: “Yufala i mas kam wanem kaen man long ol wok blong fasin tabu mo ol wok blong fasgud long God” (NW ). Mo hem i gohed i se: “Ol fren. Yufala i kasem finis ol tok blong wekemap yufala, taem trabol ya i no kamtru yet. From samting ya, yufala i mas lukaot gud. Sipos no, ol man ya we oli no holem stret fasin, bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon.” (2 Pita 3:5-17) !Sore tumas long ol man ya we oli baptaes finis mo oli lego stret rod, nao oli ded bifo we oli save mekem hat blong olgeta i stap strong long God bakegen!
21, 22. ?Olsem wanem ol tok blong Ol Sam 57:7 oli kamtru long laef blong Deved mo ol trufala Kristin?
21 Yu gat strong tingting blong mekem laef blong yu i laenap wetem promes we yu mekem i go long God. Be yu save mekem tingting ya i strong moa sipos yu tingting oltaem long hapi dei ya we yu tekem baptaes. Mo tu, i gud blong lukaot help blong God blong bambae ol tok mo fasin blong yu oli mekem hat blong hem i glad. (Ol Proveb 27:11) Jeova i wan God we ol man blong hem oli save trastem hem oltaem. From samting ya i gud tu we yumi stap tru long hem oltaem. (Ol Sam 94:14) Jeova i soem se hem i kasem save filing blong Deved mo i sore long hem taem hem i blokem ol enemi blong Deved mo mekem hem i gofri. Deved i tangkiu tumas from samting ya, ale hem i talemaot se lav we hem i gat long God we i sevem hem, bambae i neva save jenis, bambae i strong oltaem. Hem i singsing wetem strong filing se: “God. !Oltaem tingting [“hat,” NW ] blong mi i stap strong long yu! !Bambae mi sing, mi presem yu!”—Ol Sam 57:7.
22 Ol trufala Kristin oli mekem olsem Deved. Oli no muv nating i gowe long promes we oli bin mekem long God. Hat blong olgeta i strong long God, oli save se Jeova nomo bambae i save mekem oli fri mo givim laef long olgeta, mo oli glad blong sing blong presem hem. Sipos hat blong yu i stap strong long God, bambae yu dipen oltaem long hem, mo bambae hem i halpem yu blong yu holem promes blong yu oltaem. Yes, bambae yu yu wan long olgeta “gudfala man” ya we man blong raetem Sam i tokbaot taem hem i singsing se: “Hem i no save fraet se badnius bambae i kasem hem, from we hem i stap trastem Hae God, mo oltaem bilif [“hat,” NW ] blong hem i stap strong long hem.” (Ol Sam 112:6, 7) Bilif long God mo dipen fulwan long hem, nao bambae yu save holem promes blong yu mo gohed blong mekem wok blong Jeova wetem wan hat we i stap strong.
?Yu Yu Tingbaot?
• ?From wanem yumi mas gohed blong kasem stret save blong Baebol?
• ?From wanem yumi no mas fogetem taem we yumi bin tanem tingting from sin blong yumi mo jenisim laef blong yumi?
• ?Wanem blesing we yumi save kasem sipos yumi rimemba taem we yumi givim laef long Jeova mo tekem baptaes?
• ?Wanem bambae i halpem yumi blong gohed blong mekem wok blong Jeova we hat blong yumi i stap strong long hem?
[Kwestin]
[Tok blong pija long pej 18]
?Yu stap stadi oltaem long Tok blong God blong kasem paoa long saed blong spirit?
[Tok blong pija long pej 18]
Sipos yumi putum Kristin wok blong prij long fasples bambae yumi save gohed blong mekem wok blong Jeova we hat blong yumi i strong long hem