Lukaotem God Wetem Hat Mo Tingting Blong Yu

Trufala Kristin skul i pulum yumi blong yusum hat mo tingting blong yumi blong wokem wan bilif we God i glad long hem.

MAN we i stanemap Kristin skul, Jisas Kraes, i tijim se yumi mas laekem God wetem “olgeta hat,” mo “olgeta laef,” be tu wetem “olgeta tingting,” no waes blong yumi. (Matiu 22:37) Yes, fasin blong yusum tingting i impoten long wosip blong yumi.

Taem Jisas i wantem se ol man we oli lesin long hem oli tingting gud long tijing blong hem, plante taem hem i talem se: “Yufala i traem tingbaot.” (Matiu 17:25; 18:12; 21:28; 22:42) Long sem fasin, aposol Pita i raetem leta i go long ol narafala Kristin blong ‘wekemap olgeta, blong mekem tingting blong olgeta i stret.’ (2 Pita 3:1) Aposol Pol we i mekem wok blong misinari long moa ples i bitim ol narafala misinari, i pulum ol Kristin blong oli yusum “paoa blong tingting” blong olgeta mo blong oli “luksave ol samting we God i wantem, we ol samting ya oli gud, oli mekem man i glad, mo oli stret gud olgeta.” (Rom 12:1, 2, NW ) Sipos ol Kristin oli tingting gud long bilif blong olgeta olsem, oli save gat wan bilif we i mekem God i glad mo we i save halpem olgeta blong fesem ol traem blong laef tede.—Hibrus 11:1, 6.

Blong givhan long ol man blong oli wokem bilif ya, ol faswan Kristin we oli stap prij oli “mekem plante toktok [blong pulum olgeta oli tingting gud long] ol tok blong Baebol.” (Ol Wok 17:1-3) Fasin ya blong pulum man blong i tingting gud, i mekem olgeta we hat blong olgeta i stret oli kasem bilif ya. Olsem nao, sam man long Berea, we i wan taon blong Masedonia, oli ‘wantem tumas blong harem tok blong [God], mo evri dei, oli stap ridimgud ol tok blong Baebol, blong faenemaot se ol tok blong olgeta [Pol mo ol fren blong hem] i tru no i no tru.’ (Ol Wok 17:11) Yumi makem tu samting long vas ya. Faswan, ol man Berea oli wantem tumas blong lesin long tok blong God; namba tu, oli no jes tingting nomo se ol samting  we oli harem i stret, be oli jekem ol samting ya wetem Baebol. Luk, we hem i Kristin misinari long taem ya, i tok wetem respek long saed blong ol gudfala fasin ya blong ol man Berea, i singaot olgeta se ol man we oli “glad moa blong tingbaot ol tok” blong Baebol. ?Yu yu soemaot gudfala fasin ya taem yu mekem ol samting we i joen wetem wosip?

Tingting Mo Hat i Joen

Olsem we yumi bin talem fastaem, i nidim tingting mo hat tugeta blong mekem trufala wosip. (Mak 12:30) Tingbaot pijatok long faswan haf, hemia blong man ya we i stap pentem wan haos be i yusum ol rong kala. Sipos hem i bin lesingud long advaes we man blong haos i givim long hem, hem i save mekem wok ya wetem olgeta hat mo tingting blong hem, mo hem i save se bambae man blong haos ya i glad long hem. Yumi save talem sem samting long saed blong wosip blong yumi.

Jisas i talem se: “Aoa i stap kam, yes, hem i naoia, we ol man blong mekem trufala wosip, bambae oli wosip long Papa wetem spirit mo trutok.” (Jon 4:23, NW ) Taswe, aposol Pol i raetem se: ‘From samting ya, oltaem mitufala i stap prea from yufala, . . . Mitufala i stap askem long God, blong tabu spirit i mekem yufala i waes [“fulap long stret save,” NW ], yufala i luksave olgeta samting we God i wantem, blong bambae yufala i savegud olgeta. Nao bambae yufala i save mekem laef blong yufala i kam stret gud olsem we Masta blong yumi i wantem.’ (Kolosi 1:9, 10) “Stret save” ya i givhan long ol man we hat blong olgeta i stret blong oli wosip wetem olgeta hat mo tingting blong olgeta. Oli sua fulwan long bilif blong olgeta from we oli wosip long samting we “[oli] save.”—Jon 4:22.

From ol samting ya, ol Witnes blong Jeova oli no baptaesem ol smol bebi mo ol man we oli no stadi gud Baebol fastaem. Jisas i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Blong tekem wan disisen long saed blong wosip, fastaem ol man we hat blong olgeta i stret oli mas stadi Baebol mo kasem stret save long ol samting we God i wantem. ?Yu yu stap traehad blong kasem stret save ya?

Kasem Save Long Prea Blong Masta

Blong luksave olsem wanem fasin blong kasem stret save long Baebol i defren long fasin blong kasem smol save, bambae yumi tingbaot prea ya long Matiu 6:9-13 (NW ), we oli kolem se Papa blong Mifala, no Prea blong Masta.

Evri dei, plante milian man blong jos oli stap talem prea ya blong Jisas baehat. ?Be hamas man oli kasem save long mining blong prea ya, antap moa, faswan haf blong hem we i tokbaot nem mo Kingdom blong God? Tufala samting ya oli impoten tumas, taswe Jisas i tokbaot tufala fastaem long prea blong hem.

Prea ya i stat olsem: “Papa blong mifala we yu stap long heven, plis yu mekem we nem blong yu i tabu.” Hemia i minim se leftemap no mekem nem ya i klin. Makem we Jisas i talem blong prea from nem blong God blong i kam tabu. Plante man oli askem tu kwestin. Faswan, ?wanem nem blong God? Mo namba tu, ?from wanem nem ya i mas kam tabu?

Yumi save faenem ansa blong faswan kwestin long bitim 7,000 ples long ol Baebol we oli raetem long olfala lanwis. Wan ples, hemia Ol Sam 83:18: “Plis yu mekem olgeta oli save we yu nomo yu [“Jeova,” NW ], yu nao yu hae King blong olgeta ples long wol.” Eksodas 3:15 i talem long saed blong nem blong God, Jeova, i se: “Nem ya blong mi bambae i stap we i stap, we bambae i no save lus samtaem. Mo ol laen blong yufala bambae oli stap singaot mi long nem ya.” * ?Be from wanem i nidim we nem blong God i kam tabu? ?Hem i no klin we i klin olgeta? Yes, be stat long faswan man kasem naoia, samfala oli daonem nem ya mo sakem doti long hem.

Long garen blong Iden, God i talem long Adam mo Iv se sipos tufala i kakae frut ya we hem i putum tabu long hem, bambae tufala i ded. (Jenesis 2:17) Be Setan i no fraet blong agensem tok blong  God, hem i se: “Yutufala i no ded.” Taswe, Setan i talem se God i giaman. Be, hem i no stop long ples ya. Hem i sakem moa doti long nem blong God, i talem long Iv se God i stap holemtaet save we Iv i nidim blong halpem hem. “[God] i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.” !Wan giaman tok stret blong spolem God!—Jenesis 3:4, 5.

Taem Adam mo Iv i kakae frut ya we i tabu, tufala i tekem saed blong Setan. Stat long taem ya, bighaf blong ol man oli sakemaot ol stret rul blong God. Taem oli mekem olsem, oli sakem moa doti long nem blong God, nating sipos oli minim blong mekem no nogat. (1 Jon 5:19) Ol man oli stap gohed yet blong spolem nem blong God taem oli talem se hem nao i mekem ol man oli stap harem nogud—be maet samting ya i kamaot from rabis fasin blong olgeta nomo. Ol Proveb 19:3 i talem se: “Krangke fasin blong wan man i spolemgud laef blong hem, mo biaen hem i kros long Masta.” (The New English Bible) ?Yu yu luksave from wanem Jisas, we i rili lavem Papa blong hem, i prea blong nem blong Hem i kam tabu?

“Yu Mekem We Kingdom Blong Yu i Kam”

Afta we Jisas i prea blong nem blong God i kam tabu, hem i talem se: “Yu mekem we Kingdom blong yu i kam. Yu mekem we wil blong yu i kamtru long heven mo long wol tu.” (Matiu 6:10, NW ) Long saed blong vas ya, maet yumi askem se: ‘?Wanem ya Kingdom blong God? ?Mo olsem wanem hem i joen wetem wil blong God long saed blong wol ya?’

Long Baebol, tok ya “kingdom” i minim “wan king we i rul.” Taswe, Kingdom blong God i minim wan rul, no gavman, blong God wetem wan king we Hem i jusum. King ya hem i Jisas Kraes afta we hem i girap bakegen long ded—“King blong olgeta king mo Masta blong olgeta masta.” (Revelesen 19:16; Daniel 7:13, 14) Profet Daniel i tokbaot Kingdom blong Mesaea ya we i stap long han blong Jisas Kraes, i raetem se: “Nao long taem blong ol king ya [ol gavman blong man we oli stap rul tede], God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis,” we i minim blong olwe.—Daniel 2:44.

Yes, Kingdom blong God bambae i rul long ful wol, bambae hem i spolem olgeta rabis man mo bambae hem i rul gogo “i no save finis.” Long fasin ya, Kingdom i rod we Jeova i yusum blong mekem nem blong hem i kam tabu, i tekemaot doti we Setan mo ol rabis man oli sakem long nem ya.—Esikel 36:23.

Sem mak long olgeta gavman, Kingdom blong God tu i gat ol man blong hem. ?Hu ya ol man ya? Baebol i ansa se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:11) Long sem fasin, Jisas i talem se: “Olgeta we tingting blong olgeta i stap daon oli save harem gud, from we oli save kasem ol samting we God i promes blong givim long ol man blong hem.” Ol man ya oli gat stret save blong God, mo hemia wan samting we oli mas gat blong oli kasem laef.—Matiu 5:5; Jon 17:3.

Traem tingbaot sipos wol ya i fulap long ol man we oli gat tingting daon, ol kwaet man we oli rili laekem God mo ol narafala man. (1 Jon 4:7, 8) Samting ya nao Jisas i prea from taem hem i talem se: “Yu mekem we Kingdom blong yu i kam. Yu mekem we wil blong yu i kamtru long heven mo long wol tu.” ?Yu yu kasem save from wanem Jisas i lanem ol man blong hem blong oli prea olsem? ?Impoten moa, yu yu luksave olsem wanem ol samting we oli kamtru from prea ya oli save gat paoa long laef blong yu?

Milian Man Naoia Oli Tingting Gud Long Baebol

Jisas i tokbaot wan wok we bambae i kasem olgeta ples blong wol, blong tijim ol man long Baebol, mo blong talemaot Kingdom blong God we i stap kam. Hem i se: “Nao bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei [blong ol rabis fasin blong wol ya] i save kam.”—Matiu 24:14.

 Raon long wol, samwe sikis milian Witnes blong Jeova oli stap seremaot gud nius ya long ol man we oli stap raonabaot long olgeta. Oli singaot yu blong yu lanem moa long saed blong God mo Kingdom blong hem. Blong mekem olsem, oli ‘wantem tumas ridimgud ol tok blong Baebol, blong faenemaot se ol tok blong olgeta i tru no i no tru’ mo pulum yu blong yusum gud tingting blong yu. Sipos yu mekem olsem, bilif blong yu bambae i kam strong moa, mo bambae yu harem gud tumas long promes blong laef long paradaes long wol, we bambae i “fulap gud long ol man we oli savegud [Jeova], olsem we solwota i fulap gud long ples blong hem.”—Aesea 11:6-9.

[Futnot]

 [Bokis/Foto blong pija long pej 8]

FOLEM BIGFALA TIJA

Plante taem, Jisas i yusum ol poen we oli stap long Baebol blong tijim ol man. Wan taem we hem i mekem olsem, hemia afta we hem i girap bakegen long ded. Tu disaepol blong hem, tingting blong tufala i fasfas long saed blong ded blong hem. Nao Jisas i eksplenem wok we hem i mekem blong givhan long ol stamba tingting blong God blong oli kamtru. Luk 24:27 i talem se: “Nao Jisas i stat long buk blong Moses, mo i gotru long ol tok blong ol profet, i talemaotgud long tufala, olgeta tok blong Baebol we oli bin raetem blong tokbaot hem.”

Makem gud se Jisas i jusum wan stret poen blong storebaot—“hem,” we i Mesaea. Mo hem i yusum “tok blong Baebol” long storian blong hem. Jisas i joenem sam vas blong Baebol, olsem ol pis blong wan pija pasel, nao sloslou ol samting oli kam klia. Tufala disaepol blong hem oli luksave trutok, i klia nomo. (2 Timoti 1:13) Frut we i kamaot, i no jes we tufala i kasem klia save, be save ya i tajem hat blong tufala. Baebol i talem se: “Nao tufala i stap taltalem long tufala se, ‘Man. Taem hem i stap toktok long yumitufala long rod, i stap talemaot ol tok ya blong Baebol, tok blong hem i nambawan, i mekem yumi harem gud tumas.’ ”—Luk 24:32.

Ol Witnes blong Jeova oli traehad blong folem fasin blong Jisas long wok blong olgeta blong tijim ol man. Smol buk ya ?Wanem Samting We God i Wantem Yumi Blong Mekem? mo buk ya Save Blong Lidim Yu Long Laef We i No Save Finis hemia ol impoten tul we oli yusum blong stadi Baebol wetem ol narafala. Tufala buk ya oli soemaot plante defren poen blong Baebol we yumi intres long olgeta, olsem: “?God Hem i Hu?,” “?From Wanem God i Letem Ol Man Blong Oli Harem Nogud?,” “?Olsem Wanem Yu Save Faenem Trufala Skul?,” “!Yumi Stap Long Ol Lasdei Naoia!,” mo “Wokem Wan Famle We i Givim Ona Long God.” I gat plante vas long ol wanwan stadi ya.

Sipos yu wantem wan Baebol stadi we yu no pem, blong kasem save long ol poen ya mo long sam narafala bakegen, plis askem long ol Witnes blong Jeova long ples blong yu no raet i go long adres we i stap long pej 2.

[Foto]

Blong kasem hat blong studen, jusum sam poen long Baebol blong tokbaot

[Tok blong pija long pej 7]

?Yu yu kasem save mining blong prea blong Jisas?

“Papa blong mifala we yu stap long heven, plis yu mekem we nem blong yu i tabu . . .”

“Yu mekem we Kingdom blong yu i kam . . .”

“Yu mekem we wil blong yu i kamtru long heven mo long wol tu”