“Mi Wantem Mekem Wok Blong God”
Ripot Long Wok Blong Kingdom
“Mi Wantem Mekem Wok Blong God”
“OL MAN blong mi, yufala i kam. Yufala i kamaot long hem.” Hemia tok blong wan enjel we aposol Jon i harem long faswan handred yia K.T. * Tede, i gat plante bilian man we hat blong olgeta i stret, mo oli obei long tok ya blong ronwe long “Bigfala Babilon,” (NW ) we i minim olgeta giaman skul long wol. (Revelesen 18:1-4) Wan blong olgeta ya, hemia Wilner, wan man Haiti. Hem i talem stori blong hem long haf ya.
“Mi mi bon long 1956 long smol taon blong St. Marc, Haiti. Famle blong mi oli Katolik mo oli strong long jos blong olgeta. Taswe famle blong mi i glad tumas taem oli jusum mi, wetem tu narafala man long taon blong mifala, blong mitrifala i go long wan seminari long St. Michel de l’Atalaye, long Haiti nomo. Biaen, long 1980, oli sanem mitrifala i go long Stavelot, Beljiom, blong kasem sam moa trening. Long ples ya mifala i go long wan Katolik yunivesiti tu.
“Fastaem mi glad tumas blong go long skul blong kam wan pris. Wan dei, long ples we mifala i stap kakae long hem, pris we i stap lukaot long grup blong mifala i askem mi blong stap smol taem from we hem i wantem talem wan samting long mi. !Mi sek bigwan taem hem i talem klia long mi se hem i wantem slip wetem mi! Mi sakemaot hem, mo tingting blong mi i foldaon olgeta. Mi raet i go long famle blong mi blong talemaot samting ya, mo sam manis biaen, mi lego seminari nating se famle blong mi i no glad long samting ya. Mi faenem wan ples blong stap long hem long vilej, mo mi mekem sam kos blong lanem wan narafala wok.
“Taem mi kambak long St. Marc, mi no trastem nating Katolik Jos. Be, mi wantem yet blong mekem wok blong God. Wan samting nomo se, mi no save wanem blong mekem. Mi joen long jos blong ol Adventis, long jos blong Ebenezer, long jos blong ol Momon. Mi olsem wan kenu nomo we solwota i stap karem i go olbaot.
“Biaen mi rimemba we taem mi go long seminari long Beljiom, mi stap ridim Baebol blong Crampon. Long Baebol ya mi faenemaot we God i gat wan nem blong hem. Ale, mi yusum nem ya, mo mi prea dip long God se hem i halpem mi blong faenem trufala skul.
“Smoltaem biaen, i gat tu Witnes blong Jeova oli muv i kam long eria klosap long mi. Tufala woman ya oli kwaet, oli gat respek, mo oli gat ol gudfala fasin. Fasin blong laef blong tufala woman ya i pulum tingting blong mi. Wan dei, wan long tufala Witnes ya i singaot mi blong go long Memoriol blong ded blong Kraes. Mi haremgud tumas long miting ya, mo mi agri blong stadi long Baebol wetem ol Witnes. Long samwe sikis manis nomo, mi sua fulwan se mi faenem stret rod nao blong mekem wok blong God. Mi givim laef blong mi long God, mo mi tekem baptaes long Novemba 20, 1988.”
Biaen, Wilner i joen long fultaem wok blong prij. Tede, hem i wan elda long kongregesen. Hem wetem waef blong hem, mo tu pikinini blong tufala, oli glad blong mekem wok blong God long kongregesen blong olgeta.
[Futnot]
^ K.T. i minim Kristin Taem.
[Tok blong pija long pej 9]
Taem Wilner i ridim Baebol, hem i faenemaot we Jeova i prapa nem blong God