Letem Ol Rul Blong Baebol Oli Lidim Yu
Letem Ol Rul Blong Baebol Oli Lidim Yu
“[Jeova] i stap tijim yufala blong karem gudfala frut long laef blong yufala.”—AESEA 48:17, NW.
1. ?Bigman we i wokem yumi i lidim yumi olsem wanem?
OL SAYENTIS oli stap wokhad blong faenemaot ol samting blong heven mo wol we oli no save long hem yet. Be taem oli mekem olsem, oli stap sapraes tumas long bigfala paoa we i stap long olgeta samting long skae mo graon. San blong yumi, hem i wan smol sta nomo skelem wetem sam narafala sta. Be paoa we san ya i wokem i sem mak long paoa we i save kamaot sipos “100 bilian bigfala bom oli bosta evri seken.” Bigman we i Wokem ol bigbigfala samting ya antap long skae i save kontrolem olgeta mo lidim olgeta olsem nating nomo from we paoa blong hem i bigwan we i bitim mak. (Job 38:32; Aesea 40:26) ?Olsem wanem long yumi ol man? God i givim raet long yumi blong jusum samting we yumi wantem, yumi naf blong luksave samting we i gud mo samting we i nogud, yumi save yusum tingting blong yumi blong skelem save, mo yumi naf blong kasem save ol samting long saed blong spirit. ?Bigman we i wokem yumi i jusum wanem rod blong lidim yumi? Hem i yusum ol loa blong hem we oli stret gud mo ol rul blong hem we oli antap olgeta blong lidim yumi wetem lav. Ol loa mo rul ya oli wok tugeta wetem tingting ya we i stap finis insaed long yumi, we i stap jajem yumi.—2 Samuel 22:31; Rom 2:14, 15.
2, 3. ?God i glad tumas long wanem kaen fasin obei?
2 God i glad tumas taem ol man oli waes nao oli jusum blong obei long hem. (Ol Proveb 27:11) Jeova i no wokem yumi olsem wan mesin we yumi no tingting be yumi folem nomo evri samting we Jeova i talem. Nogat. Jeova i givim wan presen long yumi, hemia fasin we yumi fri blong jus. Ale, wetem fasin fri ya yumi save tekem ol gudfala disisen we oli stanap long save we yumi gat.—Hibrus 5:14.
3 Jisas i mekem evri samting olsem we Papa blong hem i mekem. Hem i talem long ol disaepol blong hem se: “Sipos yufala i stap mekem ol samting we mi mi talem long yufala, yufala i fren blong mi. Mi mi no moa save singaot yufala, se ol man blong wok blong mi.” (Jon 15:14, 15) Long taem bifo, wan slef i no gat raet blong jusum samting hem wan, hem i mas obei nomo long oda we masta blong hem i givim. Be wan fren i defren olgeta. Fasin fren i kamaot taem yumi luk ol gudfala fasin blong narafala, nao ol gudfala fasin ya oli tajem hat blong yumi. Yumi save kam ol fren blong Jeova. (Jemes 2:23) Fasin fren blong yu wetem narafala i save kam strong moa sipos yutufala tugeta i soem lav. Taswe, Jisas i talem se fasin blong obei long God i joen wetem lav. Hem i se: “Man we i lavem mi, hem bambae i save obei long ol tok blong mi. Mo Papa blong mi bambae i lavem hem.” (Jon 14:23) From we Jeova i lavem yumi mo i wantem se yumi wokbaot long rod we i sef, hem i singaot yumi blong folem ol rul blong hem.
Ol Rul Blong God
4. ?Wanem rul hem i wanem?
4 ?Wan rul hem i wanem? Wan diksonari i talem se wan rul “hem i wan stamba trutok; wan stamba loa, bilif, no tingting we ol narafala loa oli stanap long hem no we oli kamaot long hem.” (Webster’s Third New International Dictionary) Taem yumi stadi gud long Baebol yumi faenem se Papa blong yumi long heven i givim sam stamba rul we oli kavremap plante defren haf blong laef. Hem i mekem olsem from we hem i wantem we yumi karem gudfala frut long laef blong yumi blong olwe. Hemia i laenap wetem wanem we waes King Solomon i raetem se: “Pikinini blong mi. Sipos yu lesin gud long mi, mo yu tinghevi long ol samting ya we mi stap talem long yu, bambae yu gat longfala laef. Mi mi stap tijim yu long ol waestok, mo long ol stret fasin we yu mas folem long laef blong yu.” (Ol Proveb 4:10, 11) Ol stamba rul ya we Jeova i givim oli gat paoa antap long fasin fren we yumi gat wetem hem mo wetem ol narafala man, mo oli gat paoa tu long wosip blong yumi mo laef blong yumi evri dei. (Ol Sam 1:1) I gud yumi tokbaot sam long ol stamba rul ya.
5. Talem eksampol blong sam stamba rul blong God.
5 Jisas i tokbaot fasin blong yumi blong fren wetem Jeova, i se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) Antap long hemia, God i givim sam rul long saed blong fasin we yumi mekem long ol narafala man. Wan long ol rul ya hemia Golden Rul: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Matiu 7:12; Galesia 6:10; Taetas 3:2) I gat advaes ya tu we i kam long yumi long saed blong wosip blong yumi, i se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [“kongregesen,” NW ].” (Hibrus 10:24, 25) Long saed blong ol samting blong laef evri dei, aposol Pol i talem se: “Long olgeta samting we yufala i kakae, mo we yufala i dring, mo long olgeta fasin blong yufala, oltaem yufala i mas leftemap nem blong God.” (1 Korin 10:31) I gat plante narafala rul insaed long Tok blong God.
6. ?Wanem i mekem se ol rul oli defren long ol loa?
6 Wan rul hem i wan stamba trutok we i gat paoa long laef blong yumi mo we i impoten tumas. Ol Kristin we oli waes oli wokem fasin blong lavem ol rul ya. Jeova i givim tabu spirit long Solomon blong i raetem se: “Pikinini blong mi. Yu mas lesin gud long ol samting ya we mi stap talem long yu. Yu mas harem ol tok ya blong mi. Yu no mas fogetem olgeta, oltaem yu mas holemtaet long tingting blong yu. Man we i savegud ol tok ya, hem i gat gudfala laef, mo i no save sik.” (Ol Proveb 4:20-22) ?Olsem wanem ol rul oli defren long ol loa? Ol rul nao oli olsem rus blong ol loa, i min se ol loa oli kamaot from ol rul. Ol loa oli blong talem wanem samting we yumi mas mekem, be maet oli stret blong wan taem no wan samting nomo ale biaen oli lus. Be ol rul oli neva lus. (Ol Sam 119:111) Ol rul we oli kamaot long God, oli neva lusum paoa no kam olfala. Tok blong profet Aesea i tru nomo se: “Yes, gras i stap kam drae, mo flaoa i stap lusum kala, be tok blong God blong yumi bambae i stap olwe, gogo i no save finis.”—Aesea 40:8.
Tingting Mo Wok Blong Yu i Mas Folem Ol Rul
7. ?Olsem wanem Tok blong God i pulum yumi blong mekem ol tingting mo ol wok blong yumi oli folem ol rul?
7 Bakegen mo bakegen, “tok blong God blong yumi” i pulum yumi blong mekem ol tingting mo ol wok blong yumi oli folem ol rul. Taem sam man oli askem Jisas blong i talem ol Loa blong God, hem i poenemaot tu samting nomo. Faswan hemia lav we yumi mas gat long Jeova, mo narawan hem i lav we yumi mas gat long ol man raonabaot long yumi. (Matiu 22:37-40) Taem Jisas i toktok olsem, hem i stap talem bakegen wanem we i stap long Dutronome 6:4, 5, hemia wan stamba rul we Loa blong Moses i stanap long hem. Vas ya i se: “Hae God i God blong yumi, mo hem wan nomo i God. Mo yufala i mas lavem hem long olgeta tingting blong yufala, mo long olgeta laef blong yufala, mo long olgeta paoa blong yufala.” Mo i klia tu se long taem ya Jisas i stap tingbaot rul ya blong God we i stap long Levitikas 19:18. Long lastok blong buk blong Prija, tok blong King Solomon i klia, i sot, mo i gat paoa taem hem i ademap ol loa blong God. Hem i se: “Oraet, taem mi harem finis olgeta toktok, mi mi tok olsem, se: ‘Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.’ From we trufala God hem wan bambae i jajem olkaen wok, mo wanem wok we i stap haed, blong luk sipos hem i gud no i nogud.”—Prija 12:13, 14, NW; Maeka 6:8.
8. ?From wanem i impoten blong kasem gud save long ol stamba rul blong Baebol?
8 Taem yumi kasem gud save long saed blong ol stamba rul ya, samting ya i save mekem i isi moa long yumi blong kasem save mo folem ol loa we oli joen stret wetem sam haf long laef blong yumi. Mo tu, sipos yumi no gat gud save long ol stamba rul ya mo yumi no rili agri wetem olgeta, maet yumi no naf blong mekem ol disisen we oli waes mo maet bilif blong yumi i save foldaon isi nomo. (Efesas 4:14) Sipos yumi putum gud ol rul ya long tingting mo hat blong yumi, bambae i isi moa long yumi blong yusum olgeta taem yumi gat sam disisen blong mekem. Sipos yumi kasem save olsem wanem blong mekem ol rul ya oli wok, bambae oli karem gudfala frut long laef blong yumi.—Josua 1:8; Ol Proveb 4:1-9.
9. ?From wanem i no isi oltaem blong luksave mo folem ol rul blong Baebol?
9 I no isi blong luksave mo folem ol rul blong Baebol, olsem we i isi blong folem wan lis blong loa we i stap finis. From we yumi sinman, maet yumi les blong tingting gud long ol rul blong faenem olsem wanem blong folem olgeta. Taem yumi gat wan impoten disisen blong tekem no wan problem blong stretem, maet yumi laekem moa ol loa from we oli talem stret wanem we yumi mas mekem. Samtaem maet yumi askem advaes long wan we i bigman finis long ol Kristin fasin, olsem wan elda. Mo maet yumi ting se bambae hem i talem stret wan loa we yumi save folem blong stretem problem blong yumi. Be, maet Baebol no ol buk we oli stanap long Baebol oli no givim wan loa long saed ya. Mo nating sipos oli givim wan loa olsemia, maet bambae yumi faenem se hem i no laenap evri taem mo long evri samting we i kamaot long laef blong yumi. Ating yu rimemba man ya we i bin askem Jisas se: “Tija. Papa blong mi i ded finis. Plis yu talem long brata blong mi blong i seraot ol samting ya, we papa blong mitufala i putum i stap se i blong mitufala.” Jisas i no talem wan loa we i save stretem raorao insaed long ol famle, be hem i givim wan rul we i kavremap plante samting, i se: “Yufala i mas blokem olgeta fasin ya we yufala i wantem samting blong narafala man.” Yes, Jisas i givim wan rul we i lidim man ya long taem bifo mo i save lidim yumi yet.—Luk 12:13-15.
10. ?Olsem wanem fasin blong yumi blong folem ol rul i save soemaot samting we i stap long hat blong yumi?
10 Maet yu luk finis sam man we oli obei long ol loa be oli kros from, no maet oli obei nomo from we oli fraet blong kasem panis. Be, man we i gat respek long ol rul bambae i no save gat fasin no tingting olsem. Taem man i letem ol rul oli lidim hem, bambae hem i mekem samting from we hat blong hem i pulum hem. Yes, taem yumi no folem wan rul, plante taem yumi no kasem panis wantaem nomo. Hemia i givim janis long yumi blong soemaot from wanem yumi stap obei long Jeova, mo wanem i stap long hat blong yumi. Wan eksampol long saed ya hemia Josef, taem hem i no wantem slip wetem woman blong Potifa. Long taem ya, Jeova i no raetemdaon wan loa yet agensem fasin blong slip wetem woman blong narafala man, mo i no talem tu, wanem panis we wan man bambae i kasem sipos i mekem fasin ya. Nating se i olsem, Josef i savegud rul we God i wantem ol man blong folem, hemia blong stap tru long hasban no waef blong olgeta. (Jenesis 2:24; 12:18-20) Ansa we Josef i givim long woman ya i soemaot klia we rul ya i gat bigfala paoa long hem, hem i se: “?Weswe mi mi save mekem rabis samting ya we i sin agens long God?”—Jenesis 39:9, NW.
11. ?Ol Kristin oli wantem we ol rul blong Jeova oli lidim olgeta long saed blong wanem?
11 Tede, ol Kristin oli wantem se ol rul blong Jeova oli lidim olgeta long evri samting long laef blong olgeta, olsem taem oli mas jusum ol fren, pleplei, miusik, mo ol buk blong ridim. (1 Korin 15:33; Filipae 4:8) Taem save blong yumi i gru, mo yumi naf moa blong kasem mining blong ol had samting, mo yumi laekem moa Jeova mo ol rul blong hem, ale, tingting blong yumi we i stap jajem yumi, no fasin blong yumi blong harem save samting we i stret, bambae i halpem yumi blong folem ol rul blong God oltaem, long enikaen traem we yumi kasem, mo nating se ol man oli no save luk samting we yumi mekem. Taem yumi letem ol rul blong Baebol oli lidim yumi, bambae yumi no traem faenem eskius blong ronwe long loa blong God. Mo tu, bambae yumi no traem folem fasin blong olgeta ya we oli pleplei wetem sam loa blong God go kasem wan mak we klosap nomo oli brekem loa blong hem. Yumi luksave se fasin blong tingting olsemia bambae i karem trabol i kam long yumi mo i save spolem yumi nomo.—Jemes 1:22-25.
12. ?Wanem samting we i save givhan long yumi blong folem ol rul blong God?
12 Olgeta we oli bigman finis long ol Kristin fasin, oli luksave se taem wan man i wantem save wanem filing we Jeova i gat long wan bisnes, samting ya i save givhan long hem blong folem ol rul blong God. Man blong raetem Sam i givim advaes ya se: “Yufala we i laekem tumas Jeova, yufala i mas no laekem nating ol rabis fasin.” (Ol Sam 97:10, NW ) Wan lis blong ol samting we God i talem se oli nogud i stap long Ol Proveb 6:16-19: “I gat sam fasin blong man i stap, we oli nogud olgeta long fes blong Hae God, we hem i no laekem olgeta nating. Ol fasin ya, i gat fasin blong praod, mo fasin blong giaman, mo fasin blong kilim man we i no mekem samting nogud, mo fasin blong mekem ol rabis plan, mo fasin blong go kwik blong mekem ol samting nogud, mo fasin blong giaman insaed long kot, mo fasin blong mekem ol fren oli harem nogud, oli seraot. Ol fasin ya, Hae God i no wantem luk olgeta nating.” Taem yumi gat fasin ya oltaem blong wantem soemaot sem filing olsem Jeova long ol impoten samting ya, bambae yumi faenem se ol rul blong hem oli stap lidim laef blong yumi.—Jeremaea 22:16.
Yumi Nidim Stret Tingting
13. ?Wanem kaen tingting we Jisas i soemaot se i impoten long Bigfala Toktok blong hem antap long Hil?
13 Taem yumi save mo folem ol rul, hemia i blokem yumi blong no foldaon long trap ya we yumi mekem wosip be samting ya i no kamaot long hat blong yumi. Fasin blong folem ol rul i defren olgeta long fasin blong obei long ol loa jes blong mekem i stret nomo. Jisas i soemaot samting ya long Bigfala Toktok blong hem antap long Hil. (Matiu 5:17-48) Tingbaot se, ol man ya we oli stap lesin long Jisas oli ol man Jiu, taswe Loa blong Moses nao i mas lidim olgeta. Be ol man ya oli gat wan rong tingting long saed blong Loa. Oli fosem olgeta blong folem ol tok blong Loa ya be oli mestem trufala mining blong loa. Mo oli strong moa blong folem ol kastom blong olgeta i bitim we oli folem ol tijing blong God. (Matiu 12:9-12; 15:1-9) From samting ya, ol man ya oli no lan blong tingting long ol rul.
14. ?Olsem wanem Jisas i halpem ol man we oli lesin long hem blong tingbaot ol rul?
14 Be, taem Jisas i mekem Bigfala Toktok blong hem antap long Hil, hem i soemaot ol rul we oli laenap wetem faef defren samting long laef blong ol man, olsem fasin kros, mared mo divos, ol promes, fasin blong givimbak, mo lav wetem fasin blong no laekem narafala. Long ol wanwan fasin ya, Jisas i soemaot blesing we man i save kasem taem hem i tingting long ol rul. Long rod ya, Jisas i pulum ol man blong hem blong kam gud moa long fasin blong olgeta. Wan eksampol long saed ya, hemia fasin blong stilim woman blong narafala man. Jisas i givim rul ya se man i mas lukaot gud long ol fasin blong hem, be hem i go moa se, man i mas lukaot gud tu long ol tingting mo ol samting we hem i wantem. Hem i se: “Man we i luk wan woman, nao i wantem hem tumas, i olsem we hem i slip wetem woman ya finis.”—Matiu 5:28.
15. ?Olsem wanem yumi save blokem fasin ya blong strong blong folem ol loa nomo?
15 Eksampol ya i soemaot se yumi neva mas fogetem risen from wanem Jeova i givim ol rul ya mo bigfala tingting we i stap biaen long olgeta. I nogud yumi ting se Jeova bambae i glad long yumi taem yumi stap folemgud ol tok long loa blong hem jes blong soemaot se yumi stret man nomo. Nogat. Jisas i soemaot se fasin ya i rong olgeta taem hem i tokbaot fasin sore mo lav blong God. (Matiu 12:7; Luk 6:1-11) Taem yumi folem ol rul blong Baebol, i nogud yumi traem mekem laef blong yumi (no laef blong ol narafala) i folem wan lis blong ol samting we yumi mas mekem mo ol samting we yumi no mas mekem, gogo yumi bitim mak long ol tijing blong Baebol. I moagud yumi tingbaot blong lavem mo obei long God, i bitim we yumi traem soem yumi se yumi stret man long saed blong wosip.—Luk 11:42.
Ol Gudfala Frut
16. Givim sam eksampol we oli soem olsem wanem ol loa blong Baebol oli stanap long ol rul.
16 Taem yumi traehad blong obei long Jeova, i impoten blong luksave se ol loa blong hem oli stanap long sam stamba rul. Eksampol, ol Kristin oli mas lukaot blong no wosip long ol aedol, no mekem doti fasin long saed blong seks, mo no yusum blad long fasin we i olbaot. (Ol Wok 15:28, 29) ?Wanem tingting i pusum ol Kristin blong holem strong long ol impoten poen ya? Hemia: God nomo we yumi mas wosipim hem; yumi mas stap tru long hasban no waef blong yumi; mo Jeova i givim laef blong yumi. (Jenesis 2:24; Eksodas 20:5; Ol Sam 36:9) Taem yumi kasem save ol stamba rul ya bambae i isi moa long yumi blong agri mo folem ol loa we oli stanap long ol rul ya.
17. ?Wanem gudfala frut i save kamaot taem yumi luksave mo folem ol rul blong Baebol?
17 Taem yumi luksave wanem rul i stap biaen long ol loa nao yumi mekem ol rul ya oli wok long laef blong yumi, bambae yumi luk we oli mekem i gud long yumi. Ol blesing we ol man blong God oli kasem, plante taem oli samting we i klia blong luk. Eksampol, olgeta we oli stap longwe long fasin blong smok, oli lego oli rabis fasin, mo oli soem se blad i wan tabu samting, oli no kasem ol rabis sik we oli kamaot from ol samting ya. Long sem fasin, taem yumi laef folem trutok blong God, yumi mekem i gud long yumi long saed blong mane, long fasin fren blong yumi wetem narafala, mo insaed long famle. Ol blesing ya we oli klia nomo blong yumi luk, oli pruvum se ol rul blong Jeova oli gud tumas, mo se oli save wok gud long laef blong yumi. Be yumi no folem ol rul blong God jes blong kasem ol gudfala samting ya nomo. Ol trufala Kristin oli obei long Jeova from we oli lavem hem, from we hem nomo i gat raet blong kasem wosip blong yumi, mo from we hemia nao stret samting we yumi man i mas mekem.—Revelesen 4:11.
18. ?Sipos yumi wantem kam gud moa olsem ol Kristin, yumi mas letem wanem i lidim laef blong yumi?
18 Taem yumi letem ol rul blong Baebol oli lidim laef blong yumi, fasin blong laef blong yumi i kam moa gud, mo hemia i save pulum plante narafala man tu blong oli kam long God. Be samting we i moa impoten hemia se, laef blong yumi bambae i givim ona long Jeova. Bambae yumi luksave se Jeova i wan God we i gat bigfala lav mo we i wantem se yumi harem gud fulwan. Taem yumi mekem ol disisen we oli laenap wetem ol rul blong Baebol mo yumi luk olsem wanem Jeova i blesem yumi, bambae yumi kam klosap moa long hem. Yes bambae yumi fren moa wetem Papa blong yumi long heven.
?Yu Yu Rimemba?
• ?Wan rul hem i wanem?
• ?Olsem wanem ol rul oli defren long ol loa?
• ?From wanem i gud we yumi mekem tingting mo ol wok blong yumi oli folem ol rul?
[Kwestin]
[Bokis blong pija long pej 20]
Wilson, hem i wan Kristin man blong Gana. Hem i kasem wan leta we i talem se sam dei biaen bambae hem i mas finis long wok blong hem. Long laswan dei blong wok blong hem, oli askem hem blong wasem trak blong bigfala bos blong kampani ya. Taem Wilson i stap klinim trak ya hem i faenem bigfala mane insaed. Man we i bos blong hem i talem se God nao i sanem mane ya long Wilson from we hem i save se hemia las dei blong wok blong hem. Be, Wilson i folem rul blong Baebol se man i no mas stil. Ale, hem i karem mane ya i gobak long bigfala bos blong olgeta. Bigfala bos ya i sapraes mo i glad. Nao wantaem nomo hem i givim wok long Wilson bakegen, be tu, i putumap hem long wan wok we i hae moa.—Efesas 4:28.
[Bokis blong pija long pej 21]
Rukia, i wan woman Albania we i bitim 60 yia finis. I bin gat wan bigfala rao insaed long famle blong hem mekem se hem i no moa toktok wetem brata blong hem blong bitim 17 yia. Be hem i stat stadi Baebol wetem ol Witnes blong Jeova mo i lanem se ol trufala Kristin oli mas gat pis wetem ol narafala man, oli no mas holem kros. Rukia i prea long ful naet, ale long nekis dei, hem i wokbaot i go long haos blong brata blong hem, we hat blong hem i stap pam tumas. Gel blong brata blong hem i openem doa. Hem i sapraes mo i askem long Rukia se: “?I gat wan man i ded? ?Yu yu kam mekem wanem long ples ya?” Rukia i talem se hem i wantem luk brata blong hem. Wetem kwaet fasin hem i talem se hem i stap lanem ol rul blong Baebol mo i lanem blong save Jeova, mo samting ya nao i pusum hem blong wantem kam mekem pis wetem brata blong hem. Tufala i holholem tufala, mo tufala i kis. !Hemia wan spesel taem, ale oli mekem wan smol kakae from!—Rom 12:17, 18.
[Tok blong pija long pej 23]
[Tok blong pija long pej 23]
[Tok blong pija long pej 23]
[Tok blong pija long pej 23]
“Jisas i luk we plante man oli stap, nao hem i go antap long wan hil. Hem i sidaon, mo ol man blong hem oli kam sidaon raon long hem, nao hem i tijim olgeta.”—Matiu 5:1, 2