Oli Presem God Long Ol Hil Blong Filipin

Sipos yu stap tingbaot se Filipin i wan kantri we i gat ol aelan blong hem, yu stret. Be hem i gat ol bigbigfala hil tu. Ol Witnes blong Jeova oli faenem se i isi blong prij long ol taon mo ol flat ples. Be i defren olgeta long ol hil.

OL NAESFALA hil blong kantri ya oli defren olgeta long ol waet sanbij, ol korel rif, ol vilej we oli stap klosap long solwota, mo ol bisi taon we oli stap long ol flat ples. Ol hil ya oli olsem wan traem we i mekem i had blong talemaot gud nius blong Kingdom long ples ya.—Matiu 24:14.

Ol aelan blong Filipin oli stap stret long ples we tufala samting aninit long graon we oli kolem plet oli mit. Taem tufala i joen, tufala i pusum graon i kam antap, mekem se long ol aelan we oli bigwan moa, i gat ol hil we top blong olgeta i sap. Bitim 7,100 aelan oli mekemap kantri ya blong Filipin, hemia long Wes saed blong ples long Pasifik we oli kolem ‘Ring blong Faea.’ Taswe, i gat fulap volkeno long ol aelan ya, mo samting ya tu i mekem we ol hil oli stap long evri ples. Ol man we oli stap laef long ol bigbigfala hil ya oli stap olgeta nomo, oli no stap joen wetem ol narafala man. I hadwok blong kasem olgeta from we i no gat plante gudfala rod blong trak.

Nating se i hadwok, be ol Witnes blong Jeova oli save se oli mas faenem “olgeta man.” (1 Timoti 2:4) Taswe, ol Witnes blong Filipin oli wok wetem tingting we i stap long Aesea 42:11, 12, se: “Yufala i go antap long hil, yufala i singaot bigwan blong talemaot glad blong yufala. Yufala ol man blong ol kantri we i stap longwe, yufala i presem Hae God, yufala i leftemap nem blong hem.”

Wok ya blong prij antap long ol hil i stat bitim 50 yia bifo. Afta long Seken Wolwo, ol misinari oli mekem wok ya i spid moa. Plante man ples oli bilif long trutok ya blong Baebol, mo olgeta tu oli givhan blong talemaot trutok long ol vilej we oli stap antap moa long ol hil ya. Gudfala frut i kamaot from. Olsem, long ol hil long Cordillera Sentrol, long Not blong Luzon, naoia i gat bitim 6,000 man blong talemaot gud nius. Bighaf blong olgeta oli ol man ples, wetem ol man Ibaloi, Ifugao, mo Kalinga.

 Be, i gat sam ples yet antap long ol hil we i no isi blong kasem. Ol Witnes oli no fogetem ol man we oli laef long ol ples olsem. ?Olsem wanem oli kasem sam long ol ples ya, mo wanem frut i kamaot from?

Trufala Bilif i Tekem Ples Blong Ol Kastom

Long not blong aelan blong Luzon, long provins blong Abra, ol man Tinggian oli laef long ol hil. Maet nem we ol man ya oli karem i kamaot long olfala tok ya, tinggi, long lanwis blong ol man Malesia, we i minim “hil.” !Nem ya i stret gud! Ol man oli singaot olgeta mo lanwis blong olgeta se Itneg. Oli bilif long god we nem blong hem Kabunian. Mo ol giaman bilif long saed blong samting we i givim laki mo badlak, i gat paoa long laef blong olgeta evri dei. Olsem nao, sipos wan man we i stap mekem plan blong go samples i snis, hemia i wan badlak. Hem i mas wet tu aoa blong rabis samting ya i lus fastaem.

Long 1572, ol man Spen oli kamtru wetem bilif blong Katolik skul, be oli no tijim trufala Kristin fasin long ol man Tinggian. Olgeta we oli kam Katolik oli holem strong yet bilif blong olgeta long Kabunian mo oli gohed blong folem ol kastom blong olgeta. Trufala save long saed blong Baebol i kasem ol man ya fastaem long 1930, taem ol Witnes blong Jeova oli stat blong talemaot Kingdom long ples ya. Plante man Tinggian we hat blong olgeta i stret oli stat blong presem Jeova ‘antap long ol hil.’

Tingbaot Lingbaoan. Fastaem hem i jif blong wan laen, mo evriwan long eria ya oli respektem hem. Hem i fasgud long kastom blong ol man Tinggian. Hem i talem se: “Mi folem gud ol kastom blong ol man Tinggian. Sipos wan man i ded, mifala i berem man ya, nao mifala i danis mo kilkilim ol tamtam. Mifala i kilim ol anamol tu olsem sakrefaes. Mifala i bilif long Kabunian, mo mi mi no save God we Baebol i tokbaot.” Nating we hem i wan memba blong Katolik skul, be hem i stap mekem ol samting ya.

 Biaen, ol Witnes blong Jeova oli kam blong prij long eria ya. Oli faenem Lingbaoan mo oli pulum hem blong ridim Baebol. Hem i tingbaot taem ya mo i talem se: “Baebol i pruvum long mi se Jeova nao hem i trufala God.” Wan Witnes i stadi Baebol wetem Lingbaoan, mo hem i tekem disisen blong mekem wok blong trufala God. Hem i lego olfala fasin blong laef blong hem, wetem haenem blong hem olsem jif. Hemia wan samting we i mekem pris mo ol fren blong Lingbaoan oli kros tumas. Be, hem i gat strong tingting blong folem trutok we hem i faenem long Baebol. Naoia, hem i wan elda long kongregesen.

Seven Dei Mo Sikis Naet

Nating se naoia ol man we oli stap long sam haf blong Abra oli harem gud nius oltaem, be sam narafala oli stap longwe tumas mo oli harem gud nius wanwan taem nomo. Sam taem i pas, ol Witnes oli mekem wan spesel traehad blong kasem ol ples ya. Wan grup blong 35 Witnes oli go prij long Tineg, long Abra. Oli no bin kam long ples ya blong 27 yia.

Blong go prij long ples ya, oli wokbaot nomo, mo oli tekem bitim seven dei. Traem tingbaot we yu stap wokbaot i go kros long ol brij we oli wokem long rop nomo mo gotru long ol reva we oli dip mo wokbaot plante aoa blong go kros long top blong ol bigfala hil. Be, long semtaem yu stap karem ol samting we yu nidim. !Hemia blong go talemaot gud nius long ol man we oli no harem yet! Long fo blong ol sikis naet ya, oli slip afsaed nomo.

Nating se ol strong Witnes ya we oli mekem trip ya oli karem sam kakae, be oli no save karem naf blong ful trip ya. Be hemia i no wan problem, from we ol man oli glad tumas blong givim kakae long olgeta taem oli kasem ol buk. Ol Witnes oli kasem plante kakae blong garen, wetem fis, mo mit blong dia. Nating se trip ya i no isi, be grup ya i talem se: “Glad we mifala i kasem long taem ya i mekem se mifala i no tingbaot ol smolsmol trabol ya.”

Long ol seven dei ya, ol Witnes oli go prij long ten vilej, oli givimaot 60 buk, 186 magasin, 50 buklet, mo plante smolsmol pepa. Oli soemaot long 74 grup blong man, olsem wanem blong stadi Baebol. Long taon blong Tineg, sam hae man wetem sam impoten man blong taon oli askem ol Witnes blong mekem wan miting. I gat 78 man oli kam. Bighaf blong olgeta oli ol tija, mo ol polis. Yumi hop se plante moa man Tinggian bambae oli joen wetem olgeta we oli stap ‘singaot bigwan’ mo presem Jeova antap long ol hil.

Samting We i Moa Gud i Bitim Gol

Daon moa long saot blong Filipin, i gat sam aelan we ol man Spen oli faenem gol long olgeta. Taswe, tok ya Mindoro i kamaot, hem i haf blong Spanis nem ya mina de oro, we i minim “gol maen.” Be, ol man long ol aelan ya oli faenem wan samting we i moa gud i bitim gol—hemia ol man we oli wantem mekem wok blong trufala God, Jeova.

Klosap 125,000 man ples we oli singaot olgeta se Mangyan, oli stap long medel bus blong Mindoro. Oli no gat plante samting, oli stap olgeta nomo, mo oli gat prapa lanwis blong olgeta. Bighaf blong olgeta oli bilif se evri samting i gat spirit blong hem, mo oli wosip long plante god tu. Mo oli bilif se i gat plante kaen spirit i stap long ol samting we God i wokem raonabaot long yumi.

Sipos sam samtaem oli sot long kakae no sam narafala samting, wanwan Mangyan i go daon  long ol ples klosap long solwota blong faenem wok. Samting ya i hapen long Pailing. Hem i blong wan smol grup blong ol Mangyan, we oli kolem Batangan. Hem i gruap long medel blong ol man ples blong hem antap long hil long bus, mo hem i folem bilif mo kastom blong ol man Batangan. Klos blong olgeta i jes wan smol kaliko nomo olsem ol nambas. Blong mekem se garen i karem plante kakae, kastom blong ol Batangan se taem oli mekem wosip, oli mas kilim wan faol, nao taem oli stap prea, oli letem blad blong hem i ron i go long wota.

Pailing i no moa folem ol kastom ya. ?From wanem? Taem hem i godaon long ol ples klosap long solwota, hem i faenem wok wetem sam famle we oli Witnes blong Jeova. Wan long ol famle ya i tekem janis blong soemaot trutok blong Baebol long hem. Hem i lesin mo i glad blong lanem stamba tingting blong Jeova long saed blong ol man mo wol. Oli mekem rod blong hem i save go long skul blong lanem rid mo raet, mo blong stadi Baebol. Pailing i baptaes olsem wan Witnes blong Jeova taem hem i gat 24 yia. Taem hem i gat 30 yia, hem i stap long seken yia blong hae skul, mo hem i mekem se skul ya i kam teritori blong hem blong prij. Naoia oli singaot hem se Rolando (wan nem blong ol man we oli laef klosap long solwota).

Sipos yu mitim Rolando, bambae yu faenem wan man we i jenis gud mo i smael gud. Hem i stap prij fultaem mo i wan man blong givhan long kongregesen blong Mindoro. I no longtaem i pas, Rolando i gobak antap long ol hil, i no blong joen bakegen long kastom blong ol man Batangan, be blong seremaot trutok blong Baebol we i save givim laef long olgeta.

Wantem Tumas Wan Haos Kingdom

Provins blong Bukidnon—we i minim “Ol man blong ol Hil” long lanwis Cebuano—i stap long wan aelan long saot, nem blong hem Mindanao. Hemia i gat plante hil, ol bigbigfala krik, ol reva, mo ol flat ples. Graon i rij, mekem se i karem plante kakae olsem paenapol, kon, kofi, raes mo banana. Ol laen we oli laef antap long ol hil, olsem laen blong Talaadig mo Higaonon, oli stap long ples ya. Ol man ya tu oli mas save long saed blong Jeova. I no longtaem i pas, klosap long taon blong Talakag, i gat janis blong givimaot save ya long wan fasin we yumi intres long hem.

Ol Witnes we oli go antap long ol hil, oli faenem se ples i kolkol lelebet be ol man oli welkamem olgeta. Ol man long ples ya oli talem se oli bilif long Papa God we i antap olgeta, be oli no save nem blong hem. From we oli spenem bighaf blong taem blong olgeta long bus, hemia i faswan taem we oli luk ol Witnes blong Jeova. Ol Witnes oli talemaot nem blong God long olgeta, wetem nambawan stamba tingting blong hem long saed blong Kingdom. Ol man oli glad tumas, ale ol Witnes oli mekem plan blong kambak bakegen long vilej ya.

Biaen oli kambak plante taem. From samting ya, ol man blong ples ya oli givim wan graon long ol Witnes blong Jeova blong oli mekem wan “haos” long hem. Ol Witnes oli glad mo oli talem tangkiu from. Ples ya i stap long top blong hil we i hae moa long ol narafala hil long eria ya, mo i lukluk i godaon long rod. Haos ya oli wokem long wud, bambu, mo lif blong pamtri. Oli tekem tri manis mo ten dei blong finisim. Bigfala saen ya “Haos Kingdom Blong Ol Witnes Blong Jeova” i stap long fored blong haos ya. !Tingbaot, wan Haos Kingdom i stanap bifo we wan kongregesen i stat!

Afta long taem ya, wan elda we i stap prij fultaem, i go stap long ples ya, mo wan man blong givhan i mekem olsem tu. Oli wok wetem ol Witnes we oli stap long ol vilej raonabaot, blong statem wan kongregesen. Long Ogis 1998, samting ya i kamtru. Naoia, wan smol kongregesen i stap yusum Haos Kingdom ya, oli stap givhan long ol man we oli laef long ol hil blong oli lanem trutok blong Baebol.

Tru nomo, Jeova i yusum bigwan ol man blong hem long Filipin we oli glad blong wok strong, blong talemaot trutok blong Kingdom antap long ol hil, long ol vilej we i no isi blong kasem olgeta. Yumi tingbaot Aesea 52:7, we i talem se: “I gud tumas blong luk man blong karem tok, we i wokbaot, i kamkros long ol bigbigfala hil, blong kam talemaot gud nius.”

[Map blong pija long pej 11]

(Lukluk niuspepa)

ABRA

MINDORO

BUKIDNON

[Credit Line]

Globe: Mountain High Maps® Copyright © 1997 Digital Wisdom, Inc.

[Tok blong pija long pej 10]

Blong prij antap long ol hil, oli mas wokbaot plante aoa long ol ples we oli had

[Tok blong pija long pej 10]

Baptaes long wan reva antap long hil