Taem i Waes Blong Ronwe

WOL blong tede i fulap wetem fasin blong tok flas mo fasin blong faet, no fasin blong pulum man blong mekem i nogud. Sam man oli talem se sipos yu ronwe long ol traem olsem, yu wan slak man, no man blong fraet. Mo tu oli save jikim mo daonem yu.

Be Baebol i soemaot klia se i gat taem we man i soem waes mo paoa blong hem taem hem i ronwe. Jisas i makemgud poen ya, bifo we hem i sanem ol disaepol blong hem oli go blong prij. Hem i talem long olgeta se: “Taem olgeta oli mekem i strong tumas long yufala long wan vilej, yufala i mas ronwe i go long narafala vilej.” (Matiu 10:23) Yes, ol disaepol blong Jisas oli mas traem blong ronwe long ol man we oli agensem olgeta. Oli no mas joen long ol samting olsem krused, blong fosem ol man blong akseptem tok blong God. Nogat. Mesej blong olgeta i wan mesej blong pis. (Matiu 10:11-14; Ol Wok 10:34-37) Taswe, ol Kristin oli no mas letem kros i winim olgeta, be oli mas ronwe, mo oli mas stap longwe long ol man we oli save pulum kros blong olgeta. Long rod ya nao, tingting we i jajem olgeta i stap klin, mo oli stap frengud wetem Jeova.—2 Korin 4:1, 2.

Long buk blong Ol Proveb long Baebol, i gat wan eksampol we i defren olgeta. Buk ya i tokbaot wan yang man we i no ronwe long wan traem, be hem i biaenem wan woman blong rod “olsem wan buluk we i stap wokbaot i go blong oli kilim hem i ded.” ?Wanem i kamaot from? Bigfala trabol, from we hem i letem nogud fasin long saed blong seks i gat paoa long laef blong hem.—Ol Proveb 7:5-8, 21-23.

?Olsem wanem long yu sipos wan man i pulum yu blong mekem nogud fasin long saed blong seks, no sipos yu fesem sam narafala samting we i save pulum trabol i kam long yu? Folem Tok blong God, i moa gud sipos yu hareap blong ronwe, yu mas stap longwe long traem ya.—Ol Proveb 4:14, 15; 1 Korin 6:18; 2 Timoti 2:22.