Tu Pasta We Tufala i Tinghae Long Ol Buk Blong Russell

CHARLES TAZE RUSSELL i wan man we i mekem plante bigfala wok blong ol trufala Kristin we oli wosipim Jeova. Long 1891, hemia fastaem we hem i go long Yurop. Sam ripot oli talem se taem Russell i stop smoltaem long Pinerolo, long Itali, hem i mitim Profesa Daniele Rivoire, we bifo hem i wan pasta blong grup ya we oli kolem olgeta ol Waldenses. * Afta we Profesa Rivoire i lego wok blong pasta, hem i gohed blong joengud wetem ol Waldenses be hem i rere blong lesin long ol narafala tingting tu mo hem i ridim plante buk we Charles Taze Russell i raetem.

Long 1903, Profesa Rivoire i tanem wan buk blong Russell, hemia The Divine Plan of the Ages, i go long lanwis Itali mo i yusum prapa mane blong hem blong prentem buk ya. Hem i mekem samting ya longtaem bifo we ol Baebol Studen oli mekem prapa kopi blong buk ya long lanwis Itali. Long fastok blong buk we Profesa Rivoire i tanem, hem i raetem se: “Mifala i putum faswan translesen blong buk ya long han blong Masta blong i lukaotgud long hem. I gud we hem i blesem buk ya mo mekem we, nating se i gat sam mastik long hem, hem i save leftemap nem blong God we i tabu tumas, mo i save pulum ol pikinini blong God we oli toktok lanwis blong Itali blong oli save fasgud moa long Hem. Ol man we oli ridim buk ya mo oli luksave se plan mo lav blong God i sas tumas, i waes tumas, mo i fulap long save, i gud oli talem tangkiu long God from. Kaengud fasin blong hem nao, i mekem se yumi kasem wan buk olsem.”

Profesa Rivoire i stat tu blong tanem Zion’s Watchtower and Herald of Christ’s Presence i go long lanwis Itali. Long 1903, magasin ya, we tede hem i Wajtaoa, i stap kamaot wan taem evri tri manis. Nating se Profesa Rivoire i neva joenem ol Baebol Studen, hemia nem blong ol Witnes blong Jeova bifo, be hem i wantem tumas blong karem tok blong Baebol i go long plante ples, mo eksplenem olsem ol buk blong ol Baebol Studen oli eksplenem.

“Skal Blong Fis i Kamaot Long Ae Blong Mi”

Wan narafala pasta blong grup ya blong ol Waldenses, i laekem tumas ol buk blong Russell. Pasta ya hem i Giuseppe Banchetti. Papa blong Giuseppe i bin lego Katolik jos, mo hem i givim tijing blong ol Waldenses long Giuseppe. Long 1894, Giuseppe i kam wan pasta mo i mekem wok ya long plante komuniti blong ol Waldenses we oli stap long Apulia mo Abruzzi mo long ol aelan ya Elba mo Sicily.

Long 1905, ol Baebol Studen oli prentem buk ya, Divine Plan of the Ages long lanwis Itali. Banchetti i raetem tingting blong hem long saed blong buk ya, mo La Rivista Cristiana, wan niuspepa blong Protestan skul i prentem toktok ya blong hem. Branchetti i raetem se: “Long tingting blong mifala, olgeta Kristin we oli wantem kasem blesing mo gudfala frut taem oli stadi long Baebol, oli save sua fulwan long [buk blong Russell] se bambae hem i givim moa save mo lidim gud olgeta . . . Taem we mi ridim buk ya, mi harem olsem se skal blong fis i kamaot long ae blong  mi, mi harem se rod blong kasem God i kam stret moa mo i kam isi moa. Ol tingting blong mi, we fastaem oli fasfas, oli kam klia nomo nao. Ol bilif we fastaem i hadwok long mi blong kasem save long olgeta, naoia oli isi mo mi akseptem olgeta isi nomo. Ol samting we bifo mi no naf blong kasem save long hem, naoia oli kam klia. Nambawan plan ya blong sevem olgeta man blong wol tru long Kraes, i kam klia we i klia tumas long mi mekem se mi mas singaot olsem Aposol ya we i singaot se: !Tru! !Ol gudgudfala fasin blong God, waes mo save blong hem, oli dip tumas, oli bitim mak!”—Rom 11:33, NW.

Long 1925, Remigio Cuminetti i tokbaot Banchetti se hem i wan man we i “sapotem” ol Baebol Studen mo i “agri fulwan” long ol tijing we oli stap talemaot. Banchetti i traehad tu long prapa wei blong hem, blong talemaot ol tijing ya long plante man.

Ol buk we Banchetti i raetem oli soemaot klia se bilif blong hem i sem mak long ol Witnes blong Jeova, se bambae ol dedman oli laef bakegen long wol ya olsem we Baebol i tijim. Mo tu, hem i agri wetem ol Baebol Studen taem hem i eksplenem se yia ya we Jisas i ded long hem, hem i stret taem we God i makemaot mo soemaot finis long profet tok blong Daniel long saed blong ol 70 wik. (Daniel 9:24-27) Plante taem hem i talemaot se i stret blong mekem Memoriol blong ded blong Jisas Kraes, wan taem nomo evri yia, “stret long dei ya we hem i ded long hem.” Hem i mekem olsem, nating se hem i agensem tijing blong jos blong hem. (Luk 22:19, 20) Hem i agensem tijing blong Darwin we i talem se i no God we i wokem olgeta samting long heven mo wol be ol samting ya oli kamaot from laki nomo. Mo hem i strong blong talem se ol trufala Kristin oli no mas joen long ol faet.—Aesea 2:4.

Wan taem, Banchetti i stap storebaot ol buk blong Russell wetem wan man we nem blong hem J. Campbell Wall. Banchetti i ansa long ol tok agens we Wall i sakem long hem, i se: “Mi sua se sipos yu ridim ol sikis buk ya we Russell i raetem, bambae yu kasem wan glad we i bigwan we i bigwan, ale bambae yu talem tangkiu long mi from. Mi no stap tok flas from ol bilif ya, be mi mi ridim ol buk ya leven yia i pas finis, mo mi tangkiu long God evri dei from ol buk ya we oli stanap fulwan long Baebol we oli givim laet ya long mi mo oli mekem mi mi harem gud tumas.”

“Lesin, Lesin, Lesin”

Hem i wan bigfala samting we tufala pasta ya blong ol Waldenses—hemia Daniele Rivoire mo Guiseppe Banchetti—tufala i laekem fasin blong Russell blong eksplenem Baebol. Hemia i no wan samting nating ya. Banchetti i raetem se: “I no gat wan long yumi ol Kristin we i save evri samting, nating we yumi pasta no man we i mekem bigfala stadi long ol tijing blong skul. Nogat. Yumi gat plante, plante samting yet blong lanem. . . . [Yumi mas] . . . stap kwaet mo lesin. I nogud yumi ting se yumi save evri samting finis, mo i nogud yumi sakemaot wanem we ol narafala oli askem yumi blong skelem. I moagud blong lesin, lesin, lesin.”

Evri yia, plante taosen man oli lesin long tok blong Kingdom we ol Witnes blong Jeova oli karem i go long ol haos wanwan. Ol man blong olgeta ples long wol, we oli rere blong lesin, mo we oli tosta from ol trutok blong Baebol, oli stap harem toktok ya blong Jisas se: “Yu kam, yu biaen long mi, yu man blong mi.”—Mak 10:17-21; Revelesen 22:17.

[Futnot]

[Tok blong pija long pej 28]

Professor Daniele Rivoire

[Tok blong pija long pej 29]

Giuseppe Banchetti

[Credit Line]

Banchetti: La Luce, April 14, 1926